Amamako Lesanju Osimbu o Talamẽla Lepandi ku Yehova

Ndaño ndoco, Yehova o yongola okuti, tu talamẽla lepandi otembo eye a sokiya. Momo lie eye a yonguila okuti tu ci linga? Nye ci pondola oku tu kuatisa oku kuata esanju osimbu tu talamẽla?

MOMO LIE YEHOVA A YONGUILA OKUTI TU TALAMẼLA?

Embimbiliya li popia hati: “Yehova o kevelela lepandi oco a lekise kokuene ohenda, kuenda eye o ka katuka oco a lekise ocikembe kokuene. Momo Yehova, eye Suku yesunga. Va sumũlũha vosi vana vamamako oku kevelela kokuaye.” (Isa. 30:18) Olondaka evi, via tiamisiwila ku va Yudea vakuesino. (Isa. 30:1) Pole, kua kala vamue vakuekolelo pokati ka va Yudea, kuenje olondaka evi via enda oku va ĩha elavoko. Olondaka viaco, vi ecavo elavoko kafendeli va Yehova vakuekolelo koloneke vilo.

Tu sukila oku talamẽla lepandi momo Yehova o kasivo oku talamẽla lepandi. Eye o kuete elivala limue a sokiya eci a ka nyõla oluali lulo lũvi kuenda o kasi oku talamẽla eteke lelivala liaco oku pitĩla. (Mat. 24:36) Otembo yaco, yi ka situlula okuti alundi Satana a lingila Yehova kuenda vana vo vumba, uhembi. Eye o ka kundula Satana la vosi vana vakasi konele yaye, pole, Yehova o ka ‘lekisa kokuetu ohenda.’

Osimbu otembo yaco ka ya pitĩlile Yehova ka maliko ovitangi tu kasi oku liyaka liavio, pole, wa likuminya okuti tu pondola oku kuata esanju osimbu tu talamẽla. Ndomo Isaya a ci lombolola, tu pondola oku kuata esanju osimbu tu talamẽla okuti cimue ciwa ci pita. (Isa. 30:18)a Tu kuata ndati esanju liaco? Poku kuatisiwa lovina vikuãla.

NDOMO TU KUATA ESANJU OSIMBU TU TALAMẼLA

Tiamisila utima kovina viwa. Soma Daviti wa mola ovina vialua vĩvi vokuenda kuomuenyo waye. (Osa. 37:35) Eye wa soneha ndoco: “Amamako oku kevelela loku ũha kovaso a Yehova kuenda kevelela kokuaye lepandi. Ku ka sumue omo liomunu una o litunda ciwa koku tẽlisa asokiyo aye ãvi.” (Osa. 37:7) Daviti wa kapeleko elungulo liaco, poku tiamisila utima kohuminyo ya Yehova yeyovo. Handi vali, eye wa lekisavo olopandu kesumũlũho liosi a tambula ku Yehova. (Osa. 40:5) Nda etu tua tiamisilavo utima kovina viwa viekalo lietu, okuti ka tu yuliwa lovina ka vikuete esilivilo vina via tu ñuala, ci ka leluka oku talamẽla ku Yehova.

Sanda apuluvi osi oku sivaya Yehova. Usonehi Wosamo 71 okuti pamue Daviti, wa sapuila Yehova hati: “Catiamẽla kokuange, ndi kamamako oku talamẽla kokuove; Ndi ka vokiya kesivayo liove.” (Osa. 71:14) Daviti wa sivaya ndati Yehova? Eye wa enda oku sapuilako vakuavo catiamẽla ku Yehova kuenda oku wimbila ovisungo viesivayo. (Osa. 71:16, 23) Ndeci ca linga Daviti, tu kuatavo esanju osimbu tu talamẽla ku Yehova. Etu tu pondola oku u sivaya pocakati cupange woku kunda, volombangulo vietu vieteke leteke kuenda vovisungo vietu viefendelo. Onjanja yikuavo eci wimba ovisungo viusoma, momo lie ku luluvalela kesapulo liaco liesanju?

Ecelela okuti vamanji va ku vetiya. Eci Daviti a liyaka lovitangi wa sapuila Yehova hati: “Kovaso ya vana va ku kolela, ñuata elavoko vonduko yove.” (Osa. 52:9) Ka tu pondola lika oku vetiyiwa la vamanjetu vakuekolelo kolohongele kuenda kupange woku kunda, pole, tu vetiyiwavo poku kala lavo kapuluvi olomapalo. —Va Rom. 1:11, 12.

Pamisa elavoko liove. Kosamo 62:5 hati: “Ndi talamẽla ku Suku lepandi. Momo elavoko liange li tunda kokuaye.” Ci kuete esilivilo oku kuata ekolelo lia pama ca piãla enene nda esulilo ka lieyile vepuluvi lina tua simĩle. Tu sukila oku kolela okuti olohuminyo via Yehova vi ka tẽlisiwa muẽle ocili ndaño tu kasi oku vi talamẽla vokuenda kuotembo yalua. Tu pondola oku pamisa ekolelo lietu poku lilongisa Ondaka ya Suku. Ndeci, sokolola kovitumasuku viosi via tukuiwa Vembimbiliya okuti via laikele oku tẽlisiwa kuenda ndomo ovina asonehi Vembimbiliya va soneha vi kuete elitokeko. (Osa. 1:2, 3) Handi vali, tu sukila oku amamako “loku likutilila lespiritu sandu” oco tu pamise ukamba wetu la Yehova osimbu tu talamẽla oku tẽlisiwa kuolohuminyo viaye viomuenyo ko pui.—Yuda 20, 21.

Ndeci ca linga soma Daviti, kolela okuti Yehova o sanjukila vana va talamẽla Kokuaye kuenda o lekisa ocisola Caye ka ci pongoloka kokuavo. (Osa. 33:18, 22) Omo liaco, amamako oku talamẽla lepandi ku Yehova poku tiamisila utima kovina viwa, poku u sivaya, poku ecelela okuti vamanji va ku vetiya kuenda poku amamako oku pamisa elavoko liove.