Eka Lia Yehova Lalimue Eteke li ka Kala Limbumbulu

1. Mose wa lekisa ndati ekolelo ku Yehova eci eye a songuila va Isareli oku tunda Kegito?

ELIVULU lia va Heveru li lombolola eci catiamẽla komanu valua va kuatele ekolelo ku Yehova. Umue pokati kavo Mose, una wa kuatele ekolelo li komõhisa. (Va Hev. 3:​2-5; 11:​23-25) Eye wa lekisa ekolelo eci opa va Isareli Kegito. Mose ka ecelelele okuti o yapuisiwa lasaluiso a Fareo kuenda olohoka viaye. Omo lioku kolela ku Yehova, eye wa songuila va Isareli poku yoka Okalunga Kakusuka kuenda wa va songuilavo vekalasoko. (Va Hev. 11:​27-29) Va Isareli valua va liwekapo oku kolela kunene wa Yehova woku va tata, pole, Mose wamamako oku kolela kokuaye. Omo liekolelo eye ka konyohele, momo wa mola ndomo Yehova a linga ocikomo coku va ĩha okulia kuenda ovava oco a va tekule vekalasoko.a—Etu. 15:​22-25; Osa. 78:​23-25.

2. Momo lie Yehova a pulila Mose hati: “Anga hẽ eka lia Yehova lia linga limbumbulu?” (Atendelo 11:​21-23)

² Ndaño Mose wa kuatele ekolelo lia pama, noke liunyamo umosi tunde eci va Isareli va yovuiwa Kegito, eye wa lipula kueci Yehova a popele catiamẽla koku eca ositu kafendeli Vaye. Mose wa kuata atatahãi nda Yehova wa kuatele muẽle epondolo lioku eca ositu yi tẽla, oco yi tekule olohuluwa viomanu va kala vekalasoko. Poku tambulula Mose, Yehova wa popia hati: “Anga hẽ eka lia Yehova lia linga limbumbulu?” (Tanga Atendelo 11:​21-23.) Ondaka “eka lia Yehova,” yi lomboloka espiritu sandu lia Suku ale unene waye. Volondaka vikuavo, Yehova wa kala oku pulisa Mose ndoco: “Ove hẽ o sima okuti si pondola oku tẽlisa eci nda likuminya?”

3. Momo lie ulandu wa Mose kuenda wa va Isareli u kuetele esilivilo kokuetu?

³ Ove hẽ wa lipulile ale nda Yehova o ka ku ĩha ovina o sukila kumue lepata liove? Ci kaile okuti wa lingile ale epulilo liaco ale sio, tu kũlĩhĩsa ulandu wa Mose kuenda wa va Isareli okuti, va liwekapo oku kolela kunene wa Yehova woku va ĩha ovina va sukilile. Tu konomuisavo Ovisonehua vimue vi ka pamisa ekolelo lietu liokuti, Yehova olonjanja viosi o ka tu kuatisa.

LILONGISILA KULANDU WA MOSE KUENDA WA VA ISARELI

4. Momo lie va Isareli valua va fetikila oku kuata atatahãi nda Yehova wa ponduile muẽle oku va ĩha ovina va sukilile?

⁴ Momo lie va Isareli valua va fetikila oku kuata atatahãi nda Yehova wa ponduile muẽle oku va ĩha ovina va sukilile? Ovo kumue la vana ka va kaile va Isareli okuti va tundile lavo Kegito, va kala vekalasoko vokuenda kuotembo yimue, osimbu va linga ungende woku enda Kofeka Yohuminyo. (Etu. 12:38; Esin. 8:15) Omanu vaco va tunda Kegito kumue la va Isareli, ka va yonguile vali oku lia omana kuenje va fetika oku lisiõsuĩla Mose. (Ate. 11:​4-6) Ovo va fetika oku kuatela ongeva ovikulia va kuatele Kegito. Kuenje Mose wa liyeva okuti o kasi oku sakalaisua lomanu. Handi vali, ca molẽhele ndu okuti eye wa sukilile oku eca kokuavo ovina viaco.—Ate. 11:​13, 14.

5-6. Nye tu lilongisila konjila ndomo va Isareli va yapuisiwa lomanu vana ka va kaile va Isareli?

⁵ Omanu vana ka va kaile va Isareli, ka va sanjukilile ovina viosi Yehova a enda oku va ĩha kuenje va Isareli va fetikavo oku kuata ovisimĩlo viaco. Cimuamue haico ci pondolavo oku lipita letu. Vana tu lisungue lavo nda ka va lekisa olopandu, ci pondolavo oku tu yapuisa. Eci ci pondola oku lipita nda tu sokolola kovina tua sia konyima ale oku kuatela ukuse ovina vakuetu va kuete. Pole, tu ka kuata esanju nda tu sanjukila ovina tu kuete ci kaile okuti calua ale citito.

⁶ Va Isareli va sukilile oku ivaluka okuti Yehova wa va likuminyile okuti, eci va pitĩla kocitumãlo cavo cokaliye, va laikele oku kuata ovina vialua. Ohuminyo yaco nda ya tẽlisiwa lika Vofeka Yohuminyo, haceciko ovo va kala oku linga ungende vekalasoko. Cimuamue haico okuti, tu sukila oku yuvula oku tiamisila utima kovina ka tu kuete voluali lulo, pole, ciwa nda tu sokolola kovina Yehova a tu likuminya voluali luokaliye. Tu sukilavo oku sokolola kovisonehua Viembimbiliya vi tu kuatisa oku vokiya ekolelo lietu ku Yehova.

7. Momo lie tu kolelela okuti Yehova o pondola oku tu kuatisa?

⁷ Pamue ove o lipula esunga lieci Yehova a pulila Mose hati: “Anga hẽ eka lia Yehova lia linga limbumbulu?” Citava okuti Yehova wa kala oku kuatisa Mose oku sokolola okuti, unene waye walua cimue kuenda eye o pondola oku talavaya lunene waye kovitumãlo viosi, ci kaile okuti viocipãla. Suku wa ponduile oku eca ositu yalua ku va Isareli ndaño okuti, ovo va kala ocipãla vekalasoko. “Leka lia pama kuenda okuokuo kuolõha,” Suku wa lekisa unene waye. (Osa. 136:​11, 12) Omo liaco, eci tu kasi oku liyaka locitangi cimue ka ca lelukile, tu koleli okuti Yehova o ka tu kuatisa kuosi tu sangiwa.—Osa. 138:​6, 7.

8. Nye ci ka tu kuatisa oku yuvula ocituwa ka ca sungulukile va Isareli va lekisa vekalasoko? (Talavo ociluvialuvia.)

⁸ Yehova wa tẽlisa eci a likuminyile poku tuma kafendeli vaye etendelo lialua liakalanga. Pole, va Isareli ka va lekisile olopandu ku Suku omo liocikomo caco. Valua pokati kavo, va linga vakuacipululu kuenda ovo va yonguile vali akalanga alua okuti ana va kuatele ci sule. Ovo va talavaya utanya luteke, oco vongolole etendelo lialua liakalanga. Kuenje onyeño ya Yehova ya wengukila omanu ‘va lekisa ocipululu.’ Noke Yehova wa yambula omanu lefengi lia piãla. (Ate. 11:​31-34) Tu pondola oku lilongisila ovina vialua kulandu waco. Tu sukila oku kuata utate oco ka tu ka kale vakuacipululu. Cikaile okuti tulohuasi ale tulohukũi, tu sukila oku ‘lisolekela ukuasi kilu’ poku pamisa ukamba wetu la Yehova kuenda Yesu. (Mat. 6:​19, 20; Luka 16:9) Nda tu ci linga, tu pondola oku kolela okuti Yehova o ka tu ĩha ovina tu sukila.

9. Nye tu pondola oku kolela catiamẽla kekuatiso lia Yehova?

⁹ Yehova wa likapelako oku kuatisa afendeli vaye koloneke vilo. Eci ka ci lomboloka okuti lalimue eteke tu ka kambela olombongo ale okulia.b Pole, Yehova lalimue eteke a ka tu yanduluka. Eye olonjanja viosi o ka tu ĩha ekuatiso tu sukila kovitangi viosi tu liyaka lavio. Tu limbuka ocili caco, poku konomuisa ovina vivali tu pondola oku kolela okuti, Yehova o kolõla eka liaye oco a tu ĩhe ovina tu sukila ndeci: (1) poku liyaka lovitangi viekambo liolombongo kuenda (2) eci tu lisakalaisa lekalo lietu lio kovaso yoloneke eci tu kuka.

CECI TU LIYAKA LOVITANGI VIEKAMBO LIOLOMBONGO

10. Ovitangi vipi viekambo liolombongo tu pondola oku liyaka lavio?

¹⁰ Osimbu oluali lulo lu panda kesulilo, citava okuti tu ka liyaka ovitangi vialua viekambo liolombongo, omo liovitangi vio pulitika, ovoyaki, ovilunga ale afengi okaliye. Tu pondola oku pumba upange wetu woku sanda eteku, ipako vietu ale oku sia ocitumãlo tu kasi kuenje ka ci leluka oku sanga ovina tu sukila. Citava okuti tu ka sukila oku sanda upange wokaliye, ale oku ilukila kocitumãlo cikuavo oco tu tẽle oku tekula epata lietu. Nye ci ka tu kuatisa oku nõla onjila yi lekisa okuti tua kolela keka lia Yehova?

11. Nye ci pondola oku ku kuatisa oku liyaka lekambo liolombongo? (Luka 12:​29-31)

¹¹ Ci kuete esilivilo oku sapuila ku Yehova asakalalo ove. Momo ci ka ku kuatisa calua. (Olosap. 16:3) Pinga kokuaye olondunge oco o nõle olonjila viwa kuenda utima wa tula, oco o yuvule “oku sakalala calua.” (Tanga Luka 12:​29-31.) Pingavo ku Yehova oco a ku kuatise oku sanjukila ovina o kuete. (1 Tim. 6:​7, 8) Linga akonomuiso valivulu etu a pondola oku ku kuatisa oku liyaka lovitangi viekambo liolombongo. Valua va siata oku kuatisiwa lovipama vi sangiwa vo jw.org vi lombolola ndomo tu liyaka lovitangi viekambo liolombongo.

12. Apulilo api a pondola oku kuatisa Ukristão umue oku nõla onjila yiwa yi kuatisa epata liaye?

¹² Vamue va siata oku tava ovopange amue oku sanda eteku, ana a va kokela oku ilukila ocipãla lepata liavo, pole, noke va limbuka okuti ka va nõlele onjila yiwa. Osimbu kua tavele upange umue, ku ka sokolole lika kolombongo o ka fetiwa, pole, tete sokolola nda ci ka ku kuatisa ove kumue lepata liove oku kuata ukamba wa pama la Yehova. (Luka 14:28) Lipula ove muẽle ndoco: Nye ci ka lipita lolohuela viange nda nda kala ocipãla? Anga hẽ ndi ka endaenda kolohongele viosi, kupange woku kunda kuenda oku pita otembo yalua la vamanji? Nda okuti ove o kuete omãla, o sukilavo oku lipula ndoco: ‘Ndi ka tata ndati omãla vange “poku va lungula loku va pindisa ndomo ci likuata leci Yehova a popia,” nda okuti si kasi lavo?’ (Va Efe. 6:4) Ecelela oku songuiwa lonjila yoku sokolola ya Suku, halovisimĩloko viepata ale viakamba vana ka va sumbilile olonumbi Viembimbiliya.c Manji Tony o kasi Kutakelo wo Asia, vo wĩhile ovopange alua kolofeka vikuavo kuna va ponduile oku u feta olombongo vialua. Noke lioku likutilila catiamẽla kondaka yaco kuenda oku sapela lukãi waye, eye wa nõlapo oku likala ovopange aco, pole, wa sokolola ndomo epata liaye lia ponduile oku pongolola ekalo liomuenyo wavo oco va pesele olombongo vitito. Manji Tony poku sokolola konyima, wa popia ndoco: “Nda kuata esumũlũho lioku kuatisa omanu valua oku kũlĩha Yehova kuenda omãla vetu va sanjukila oku vumba Yehova. Epata lietu lia lilongisa okuti, osimbu tu ambata omuenyo u likuata lolondaka vi sangiwa ku Mateo 6:33 Yehova o ka tu tata.”

CECI TU LISAKALAISA LEKALO LIETU LIO KOVASO YOLONEKE ECI TU KUKA

13. Nye tu sukila oku linga cilo oco tu kuate ovina vi ka tu kuatisa eci tu kuka?

¹³ Ekolelo lietu ku Yehova li pondolavo oku kapiwa voseteko, poku sokolola ndomo omuenyo wetu u ka kala eci tu kuka. Embimbiliya li tu vetiya oku likolisilako oku talavaya oco tu kuate ovina vi ka tu kuatisa kovaso yoloneke. (Olosap. 6:​6-11) Nda citava, ciwa oku soleka olombongo vimue vi ka tu kuatisa kovaso yoloneke. Momo ovio vi pondola oku tu kuatisa eci tu kuata esukila limue. (Uku. 7:12) Pole, tu sukila oku yuvula oku tenda olombongo ndocina ca velapo komuenyo wetu.

14. Ukanda ku va Heveru 13:​5, u tu kuatisa ndati oku yuvula oku sakalala calua lekalo lietu lio kovaso yoloneke?

¹⁴ Yesu wa ta olusapo lumue lu situlula uveke woku lisolekela olombongo vialua, okuti omunu ka lingi ‘ohuasi kovaso a Suku.” (Luka 12:​16-21) Ka tua kũlĩhĩle ndomo omuenyo wetu u kala hẽla. (Olosap. 23:​4, 5; Tia. 4:​13-15) Handi vali, Yesu wa popia okuti, vosi vana va yongola oku kala olondonge viaye, va sukila oku likapelako “oku sia” ovipako viavo viosi oco va linge olondonge viaye. (Luka 14:33) Akristão vo Kocita Catete ko Yudea, va tava oku pumba ovina viavo viosi. (Va Hev. 10:34) Koloneke vilo, vamanji valua va siata oku pumba ovipako viavo, ale upange woku sanda eteku omo lioku likala oku litenga vopulitika. (Esit. 13:​16, 17) Nye ca va kuatisa oku ci linga? Ovo va kolela kohuminyo ya Yehova yokuti: “Ame lalimue eteke hu sia, ale oku ku yanduluka.” (Tanga Va Heveru 13:5.) Omo liaco, tu linga eci ci tava oco tu ka kuate ovina tu sukila eci tu kuka, loku kolela okuti Yehova o ka tu kuatisa eci kuiya ocina cimue ka tua lavokaile.

15. Ocisimĩlo cipi ca sunguluka olonjali Akristão vi sukila oku kuata catiamẽla komãla? (Talavo ociluvialuvia.)

¹⁵ Kovitumãlo vimue, vana va kuele va yongola calua oku kuata omãla locimãho cokuti, va kuata olombongo vioku va tata eci va kuka. Volondaka vikuavo, olohueli viaco vi tenda omãla vavo “ndesokiyo liolombongo li ka va kuatisa eci va kuka.” Embimbiliya li popia okuti olonjali vi sukila oku eca ovina omãla vavo va sukila. (2 Va Kor. 12:14) Ocili okuti, olonjali pamue vi sukila oku tambula ekuatiso limue osimbu va kuka kuenje omãla valua va kuata esanju poku ci linga. (1 Tim. 5:4) Pole, olonjali Akristão vi limbuka okuti esanju lia velapo, haku kuatako omãla locimãho coku kuata olombongo vioku va kuatisa eci va kuka, pole, coku kuatisa omãla vavo oku kala afendeli va Yehova.—3 Yoa. 4.

16. Olonjali vi kuatisa ndati omãla vavo oku lipongiyila ndomo va ka litekula eci va kula? (Va Efeso 4:28)

¹⁶ Eci o kuatisa omãla vove oku lilongisa ndomo va ka litekula kovaso yoloneke, lekisa kokuavo okuti wa kolela ku Yehova. Osimbu handi ovo va kasi amalẽhe, va longisa esilivilo lioku likolisilako oku talavaya. (Olosap. 29:21; Tanga Va Efeso 4:28.) Osimbu va kula, va kuatisa oco va litunde ciwa kosikola. Olonjali Akristão vi sukila oku linga akonomuiso oco va sange olonumbi Viembimbiliya vi pondola oku kuatisa lavio omãla oku nõla olonjila viwa viatiamẽla kepindiso va ka tambula kosikola. Ocimãho colonjali, oku kuatisa omãla vavo oku tẽla ndomo va ka likuatisa kovaso yoloneke kuenda oku kuata otembo yalua yoku kunda ale oku kala akundi votembo yosi.

17. Ekolelo lipi tu pondola oku kuata?

¹⁷ Vana va kolela ku Yehova, va pondola oku kolela okuti eye o ka va kuatisa kuenda wa li kapelako oku va ĩha ovina va sukila. Osimbu tu panda kesulilo lioluali lulo, tu pondola oku lavoka ovina vi seteka ekolelo lietu ku Yehova. Nda tu lipita locitangi cipi nda cipi, tuamamiko oku kolela okuti Yehova o ka talavaya lunene waye oco a tu ĩhe ovina tu sukila. Tu pondola oku kolela okuti, eka lia pama lia Yehova kuenda okuokuo kuaye kuolõha, lalimue eteke li ka kala limbumbulu.