Oku Kuata Ukamba wa Pama la Vamanji Ciwa Kokuetu!

1-2. Ocina cipi ca velapo vali ku Yehova kuenda nye eye a tu vetiya oku linga?

ONJILA ndomo tu tata omanu vakuavo ci kuete esilivilo lialua ku Yehova. Yesu wa longisa okuti tu sukila oku sola vakuetu ndeci tu li sole etu muẽle. (Mat. 22:​37-39) Omu mua kongela oku lekisa uwa komanu vosi, oku kongelamo vana ka va fendela Yehova. Poku ci linga, tu setukula Yehova Suku, una o “tundasaila ekumbi liaye kolondingaĩvi kuenda komanu vawa, o lokasaila ombela ku vakuesunga lava havakuesungako.”—Mat. 5:45.

² Ndaño okuti Yehova o sole omanu vosi, pole, eye o sole vali calua vana va pokola kokuaye. (Yoa. 14:21) Eye o yongola okuti tu u setukula. Omo liaco, Yehova o tu vetiya oco tu “lisoli pokati” la vamanji kuenda oku ci lekisa “omunu lukuavo.” (1 Pet. 4:8; Va Rom. 12:10) Ocisola caco ca lisoka locisola tu kuetele umue ukuapata lietu tu sole calua ale ekamba limue.

3. Nye tu sukila oku ivaluka catiamẽla kocisola?

³ Ocisola ci sokisiwa locikũla cimue ci sukila oku tapeliwa ciwa oco ci kule. Upostolo Paulu wa vetiya Akristão hati: “Ocisola cene coku sola vamanji camameko.” (Va Hev. 13:1) Yehova o yongola okuti ocisola tu kuetele vamanji, camamako oku kula. Vocipama cilo, tu konomuisa esunga lieci tu sukilila oku pamisa ukamba wetu la vamanji kuenda ndomo tuamamako oku ci linga.

MOMO LIE TU SUKILILA OKU PAMISA UKAMBA WETU LA VAMANJI

4. Nye tu sukila oku linga oco tuamameko oku velisapo omunga tu kuete la vamanji? (Osamo 133:1) (Talavo oviluvialuvia.)

⁴ Tanga Osamo 133:1. Tu tava kueci ukualosamo a popia hati, “ciwa” kuenda ca “posoka” etu oku kuata ukamba la vana va vumba Yehova. Pole, kuli ohele yimue. Sokolola komunu umue okuti, eteke leteke o mola uti umue unene haiwo wa posoka. Citava okuti, vokuenda kuotembo eye ka limbuka vali eposo liuti waco. Cimuamue haico okuti, etu tua siata oku kala la vamanji olonjanja vialua vokuenda kuosemana. Kuenje pamue tu liwekapo oku velisapo omunga tu kuete la vamanji. Nye tu sukila oku linga oco ka ci ka pite letu? Ocisola tu kuetele vamanji ci ka livokiya nda tu sandiliya otembo yoku sokolola kesilivilo omunu lomunu a kuete vekongelo kuenda kokuetu.

5. Nye ci pondola oku pita eci omanu va mola ocisola tu likuetele pokati?

⁵ Vamue eci va enda kolohongele vietu onjanja yatete, va komõha calua poku mola ocisola tu likuetele pokati. Kuenje eci ca siata oku va vetiya oku limbuka okuti, Tuakristão vocili. Yesu wa popia hati: “Poku ci linga, vosi va ka limbuka okuti vulondonge viange, nda wa lisoli pokati.” (Yoa. 13:35) Kũlĩhĩsa ulandu wa Chaitra okuti wa tanga kosikola yimue ya velapo, pole, wa kala oku lilongisa Embimbiliya Lolombangi via Yehova. Eye wa tava kelaleko lioku enda kohongele yimue Yofeka. Noke lieteke liatete liohongele, eye wa sapuila ulongisi waye Wembimbiliya hati: “Olonjali viange lalimue eteke via ndi kuatele kapepe locisola. Pole, kohongele yene, omanu va ndi pupola kapepe locisola ci soka 52 veteke limosi! Ame nda limbuka ocisola ca Yehova pocakati ca vamanji kuenje ndi yongola oku panga onepa kepata liaco.” Chaitra wamamako oku kula konepa yespiritu kuenda wa papatisiwa kunyamo wo 2024. Eci ci lekisa okuti, olonjanja vialua eci omanu va mola ovilinga vietu viwa oku kongelamo ocisola tu likuetele pokati, va vetiyiwa oku vumba Yehova.—Mat. 5:16.

6. Oku kuata ukamba wa pama la vamanji ci pondola oku tu teyuila ndati?

⁶ Oku kuata ukamba wa pama la vamanji ci pondola oku tu teyuila. Paulu wa vetiya Akristão hati: “Amamiko oku li pamisa pokati eteke leteke . . . oco lomue pokati kene ka ka tĩlise utima waye poku yapuisiwa lunene wekandu.” (Va Hev. 3:13) Olonjanja vimue tu sumua calua okuti, tu fetika oku yanduluka olonumbi via Yehova. Pole, vamanji va pondola oku ci limbuka kuenda Yehova citava okuti o va vetiya oco va tu ĩhe ekuatiso tu sukila. (Osa. 73:​2, 17, 23) Ocili okuti, ekuatiso kuenda evetiyo liaco, vi kuete esilivilo lialua kokuetu.

7. Ocisola ci tu kuatisa ndati oku likuata omunga? (Va Kolosai 3:​13, 14)

⁷ Etu tu panga onepa komanu vana va likolisilako oku lekisa ocisola komunu lukuavo kuenje eci ci tu nenela asumũlũho alua. (1 Yoa. 4:11) Ndeci, ocisola ci tu kuatisa oku ‘amamako oku likapako omunu lukuavo’ kuenda ci kuatisa komunga yi kasi pokati ketu. (Tanga Va Kolosai 3:​13, 14; Va Efe. 4:​2-6) Ekalo liocisola kuenda liombembua tu kuete kolohongele vietu ocina cimue ka ci sokisiwa. Kakuli ocimunga cikuavo ci sangiwa palo posi, ci tẽla oku ci linga.

LISUMBILI OMUNU LUKUAVO

8. Yehova o tu kuatisa ndati oku likuata omunga?

⁸ Omunga yi sangiwa pokati ka vamanji voluali luosi, ocikomo cimue ca Yehova. Yehova wa ci linga, ndaño okuti ka tua lipuile. (1 Va Kor. 12:25) Embimbiliya li popia hati, tu “longisiwa la Suku oku lisola pokati.” (1 Va Tes. 4:9) Volondaka vikuavo, Vovisonehua Yehova o tu sapuila ciwa eci tu sukila oku linga, oco tuamameko oku kuata ukamba wa pama la vakuetu. Pole, oco tu ‘longisiwe la Suku,’ tu sukila oku lilongisa lutate eci eye a popia loku ci kapako. (Va Hev. 4:12; Tia. 1:25) Eci oco Olombangi Via Yehova via siata oku likolisilako oku linga.

9. Nye ca kongela voku lekisa esumbilo ku vakuetu? (Va Roma 12:​9-13)

⁹ Nye Embimbiliya li tu longisa catiamẽla koku kuata ukamba wa pama la vakuetu? Tala eci Paulu a popia ku Va Roma 12:​9-13. (Tanga.) Etosi limue lia velapo kolondaka via Paulu lieli liokuti, tu sukila oku eca ‘enanga liatete koku lekisa esumbilo ku vakuetu.’ Omu mua kongela oku eca enanga liatete koku lekisa ‘ohenda,’ ocisola kuenda ocikembe ku vamanji. Tu pondola oku ci lekisa volonjila via litepa ndeci, poku kala ukuakuecela, ukuakuyekisa kuenda ukuacali. (Va Efe. 4:32) Ove ku sukila oku talamẽla okuti manji umue iya kokuove. Pole, o sukila oku eca ‘enanga liatete’ koku pamisa ukamba wove laye. Nda wa ci linga, o ka limbuka okuti, olondaka via Yesu viocili eci a popia hati: “Esanju li tunda koku eca olio lia velapo, li tunda koku tambula li sule.”—Ovil. 20:35.

10. Tu lekisa ndati ombili koku ‘sumbila vakuetu?’ (Talavo ociluvialuvia.)

¹⁰ Ci komõhisa ceci okuti, noke lia Paulu oku popia catiamẽla koku eca enanga liatete koku lekisa esumbilo ku vakuetu, wa popia hati: “Lingi vakuambili, ko ka kali vakuawesi.” Omunu umue ukuambili wa likapelako oku tẽlisa upange wosi. Eci a tambula upange umue, eye o likolisilako oku u tẽlisa. Kolosapo 3:​27, 28 ku tu vetiya hati: “Ku ka liwekepo oku linga eci ciwa ku una ove o sukila oku ci linga, nda ove o kuete unene woku kuatisa.” Kuenje eci tu limbuka okuti umue o sukila ekuatiso, tu ci linga lonjanga yalua. Tu sukila oku yuvula oku ci linga noke ale oku sima okuti, omunu ukuavo o pondola oku eca ekuatiso liaco.—1 Yoa. 3:​17, 18.

11. Yipi onjila yikuavo yoku lekisa esumbilo ku va manjetu?

¹¹ Onjila yikuavo yoku sumbila vamanjetu, oku yuvula oku cilua oku va ecela eci va tu lueyela. Ku va Efeso 4:26 ku popia hati: “Ekumbi ka li ka iñile osimbu handi wa temi.” Momo lie ci kuetele esilivilo? Momo, ndomo ocinimbu 27 ci lombolola, eci ci pondola oku eca “evelo Keliapu.” Etu tua kũlĩha okuti Vembimbiliya Yehova o tu vetiya olonjanja vialua oku liecela pokati. Ku Va Kolosai 3:13 ku popia hati, tu sukila oku ‘amamaka oku liecela pokati lutima wosi.’ Oku ivalako akulueya omunu umue, onjila yimue yiwa yoku pamisa ukamba wetu laye. Nda tu ci linga, tu kuatisa koku “kuata ombembua omunu lukuavo, loku likolisilako oku amamako lomunga.” (Va Efe. 4:3) Etosi lieli okuti, ongecelo yi kuatisa calua koku kuata omunga kuenda ombembua pokati kafendeli va Yehova.

12. Yehova o tu kuatisa ndati oku ecela vakuetu?

¹² Ocili okuti ka ca lelukile oku ecela omunu umue wa tu lueyela. Pole, lekuatiso liespiritu sandu lia Suku ci tẽliwa. Embimbiliya, noke lioku tu sapuila okuti tu sukila oku “lisola omunu lukuavo” kuenda oku ‘linga vakuambili,’ olio li tu vetiya ndoco: “Eceleli okuti, espiritu sandu liu vetiyi oku kuata ombili.” Eci ci lomboloka okuti “espiritu lia Suku, li pondola oku tu lingisa vakuambili kuenda oku kuata esanju omo liekuatiso liespiritu.” (Va Rom. 12:11) Kuenje, espiritu lia Suku, li pondola oku tu kuatisa oku lekisa ocisola, uwa kuenda oku ecela vamanji lutima wosi. Omo liaco, tu sukila oku likutilila ku Yehova oku u pinga ekuatiso oco tu tẽle oku ci linga.—Luka 11:13.

“POKATI KENE KA PA KA KALE OKU LITEPA”

13. Ocina cipi ci pondola oku tepa ekongelo?

¹³ Vocisoko ca Yehova tu sangamo “omanu vosi.” (1 Tim. 2:​3, 4) Omunu lomunu wa tekuiwa lonjila ya litepa kuenda o kuete ovolandu omuenyo a litepa. Eli olio esunga lieci okuti, tu kuete ovisimĩlo via litepa poku nõla onjila yimue ndeci, kuwalo, koku liposuisa, koku nõla olomapalo kuenda konjila ndomo tu sakuiwa. Kuenje nda ka tua kuatele utate ovina viaco vi pondola oku tepa ekongelo. (Va Rom. 14:4; 1 Va Kor. 1:10) Pole, Yehova wa siata oku tu longisa okuti, omunu umue o kuete ocisola, ka kisika vakuavo oku tava okuti olonjila viaye via velapo, via vakuavo vi sule.—Va Fil. 2:3.

14. Nye tu sukila oku likolisilako olonjanja viosi oku linga kuenda momo lie?

¹⁴ Tu pondolavo oku kuatisa komunga yekongelo, poku lekisa ovituwa vi pamisa havio vi vetiya vakuetu. (1 Va Tes. 5:11) Kanyamo asulako, omanu valua va liwekelepo oku kunda loku enda enda kolohongele, ale vana va tundisiwile vekongelo, va tiuka vali vekongelo. Kuenje tua va yolela lesanju lialua! (2 Va Kor. 2:8) Tala ulandu wa manji umue ukãi wa liwekelepo oku kunda loku enda enda kolohongele ci soka 10 kanyamo okuti wa tiuka vali vekongelo. Eye wa popia hati: “Omanu vosi vekongelo va ndi lama lesanju loku lekisa ocisola kokuange.” (Ovil. 3:19) Ovilinga vitito viumbombe via vetiya ndati manji ukãi? Eye wamisako hati: “Ca kala ndu okuti Yehova wa ndi nena vali vonjila yombembua.” Eci tu likolisilako olonjanja viosi oku pamisa vakuetu, tu ecelela okuti Kristu o talavaya letu, oco tu kavuluise vana ‘va kava haivo va kuete ovilemo.’—Mat. 11:​28, 29.

15. Nye vali ci pondola oku kuatisa oku li kuata omunga la vamaji? (Talavo ociluvialuvia.)

¹⁵ Ovina tu popia vi pondolavo oku kuatisa oku likuata omunga la vamanji. Ku Yovi 12:11 hati: “Etũi hẽ ka li seteka olondaka ndeci elimi li mãha okulia?” Ukuakuteleka osimbu handi kavele okulia a teleka, eye o mãha okulia kuaco oco a kũlĩhe nda kupepa. Cimuamue haico tu sukila oku linga, osimbu ka tua vanguile ondaka yimue, tu sukila oku sokolola lutate. (Osa. 141:3) Olonjanja viosi, tu sukila oku kolela okuti ovina viosi tu popia vi sanjuisa, vi vetiya kuenda ‘oku vangula lika eci ciwa oco okuti vana va yeva va pamisiwa laco.’—Va Efe. 4:29.

16. Velie va sukila oku kuata utate walua lovina va popia?

¹⁶ Alume vakuele kuenda olonjali va sukila calua oku kuata utate lovina va popia. Ovo va sukila oku vangula lonjila yimue yi pamisa epata. (Va Kol. 3:​19, 21; Tito 2:4) Ndangombo, akulu vekongelo va sukila oku kala ono yekavuluiso kuenda yelembeleko kolomeme via Yehova. (Isa. 32:​1, 2; Va Gal. 6:1) Olonjanja viosi, tu sukila oku ivaluka olondaka vi sangiwa Kolosapo 15:23 viokuti: “Ondaka yi popiwa votembo ya sokiyiwa, yiwa calua!”

SOLI “LOVILINGA KUENDA LOCILI”

17. Tu sola ndati vamanji lutima wosi?

¹⁷ Upostolo Yoano o tu vetiya oco “ka tu ka soli londaka pamue lelimi, pole, te lovilinga kuenda locili.” (1 Yoa. 3:18) Tu sukila oku sola vamanji lutima wosi. Tu ci linga ndati? Eci tu pita otembo yalua la vamanji ukamba wetu lavo u pamisiwa kuenda ocisola tu likuetele ci li vokiya. Omo liaco, sanda apuluvi oku kala la vamanji ndeci, kolohongele kuenda kupange woku kunda. Sandavo otembo yoku va nyũla. Nda tu ci linga, tu lekisa okuti tu kasi oku “longisiwa la Suku oku lisola pokati.” (1 Va Tes. 4:9) Handi vali, tu kamamako oku limbuka okuti “ciwa cimue kuenda ca posoka muẽle, eci vamanji va tunga pamosi vomunga!”—Osa. 133:1.