‘Oku Kuata Ukamba wa Pama la Suku,’ Ciwa Kokuetu!

1-2. (a) Nye tu sukila oku linga oco tu kuate ukamba uwa lomunu umue? (b) Nye tu lilongisa vocipama cilo?

OVE hẽ o kuete ekamba limue liwa? Nye wa linga oco vu kali akamba? Citava okuti, wa pita otembo yalua laye, wa lilongisila kovolandu aye omuenyo kuenda ovina eye a sole levi a nyale. Ove wa limbuka ovituwa viaye viwa o yongola oku setukula. Kuenje wa fetika oku sola ekamba liove.

² Oco o kuate ukamba uwa lomunu umue, ci sukila otembo kuenda alikolisilo. Cimuamue haico okuti, oco tu kale ekamba lia Yehova Suku, ci sukila otembo. Vocipama cilo, tu konomuisa ndomo tu pondola oku kuata ukamba wa pama la Suku yetu kuenda asumũlũho eyililako poku ci linga. Tete, tu konomuisa esunga lieci ca sungulukila oku kuata ukamba la Yehova, ekamba lietu lia velapo.

3. Momo lie tu sukilila oku sokolola kasumũlũho eyilila koku amela ku Yehova? Ci lombolola.

³ Kakuli atatahãi, ove o tava okuti ciwa oku amela ku Yehova. Pole, oku sokolola lutate ndomo ca posoka, ci pondola oku tu vetiya oku amamako oku amela kokuaye. (Osa. 63:​6-8) Ndeci, tua kũlĩha okuti oku litekula lokulia ku kuete uhayele, oku pindisa etimba, oku puyuka ciwa kuenda oku nyua ovava alua eteke leteke, ciwa kokuetu. Pole, omanu valua ka va kapiko ovina viaco kuenje va kapa kohele uhayele wavo. Eci tu sokolola ndomo ovina viaco vi tu kuatisa kuhayele wetu, tu likapelako oku ci linga. Cimuamue haico okuti, tua kũlĩha okuti oku kala ekamba lia Yehova ciwa, pole, eci tu sokolola kasumũlũho eyilila koku ci linga, ci ka tu vetiya oku amamako oku pamisa ukamba wetu laye.—Osa. 119:​27-30.

4. Nye usonehi Wosamo 73:28 a popia?

⁴ Tanga Osamo 73:28. Usonehi Wosamo 73, wa kala u Lewi umue wa nõliwile oku vumba ndonjimbi vonembele ya Yehova. Citava okuti, eye wa vumba Yehova lekolelo vokuenda kuotembo yimue. Pole, eye wa limbuka okuti wa sukilile oku ivaluka kuenda oku ivaluisa omanu vakuavo okuti, “oku amela ku Suku” ci kuete esilivilo lialua. Asumũlũho api eye a kuata poku ci linga?

OKU KALA EKAMBA LIA SUKU CI NENA ESANJU

5. (a) Momo lie oku kuata ukamba la Yehova ci tu nenela esanju? (b) Ukũlĩhĩso Yehova a eca kokuove, u ku kuatisa loku ku teyuila ndati? (Olosapo 2:​6-16)

⁵ Oku kuata ukamba wa pama la Yehova, ci tu nenela esanju lialua. (Osa. 65:4) Kuli asunga alua eci tua sanjukila. Ndeci, eci tu tanga ovina Yehova a tu sapuila Vembimbiliya kuenda oku u pokola, tu kuata ukũlĩhĩso. Ukũlĩhĩso waco, u pondola oku tu teyuila kovituwa vĩvi kuenda koku linga akandu anene. (Tanga Olosapo 2:​6-16.) Eli olio esunga lieci Embimbiliya li popela hati: “Wa sumũlũha omunu o sanga olondunge kuenda omunu o sanda uloño.”—Olosap. 3:13.

6. Nye ca kokela ukualosamo oku pumba esanju?

⁶ Ocili okuti, toke muẽle akamba va Yehova olonjanja vimue, va siatavo oku yeva esumuo. Usonehi Wosamo 73 wa sumuile eci a fetika oku sokolola kovina ka via sungulukile. Eye wa fetika oku sokolola okuti, olondingaĩvi via kuatele ekalo liwa ndaño okuti, ka va kapeleko Suku loku u pokola kuenje eci ca kokela ukualosamo oku yeva onyeño. Toke muẽle eye wa yonguile oku kuata ovina ovo va kuatele. Eye wa simĩle okuti omanu olongangala la vakuepela, va ponduile oku kuata ukuasi, uhayele uwa kuenda ka va kaile oku tala ohali. (Osa. 73:​3-7, 12) Ukualosamo wa sakalalele calua okuti, toke muẽle eteke limue wa lipula nda elikolisilo liaye lioku vumba Yehova lia kuata muẽle esilivilo. Eye wa sumuile calua kuenje wa popia hati: “Ocili, nda yelisa utima wange elivova kuenda nda sukula ovaka ange oco ndi lekise okuti nda pua eko.”—Osa. 73:13.

7. Eci tu yeva esumuo nye tu sukila oku linga? (Talavo koñoño.)

⁷ Ukualosamo wa sumuile calua, pole, eye ka ecelelele okuti o yuliwa lesumuo liaco. Eye wa “iñila vocitumãlo ci kola ca Suku” muna Yehova a pongolola ovisimĩlo viaye. (Osa. 73:​17-19) Eci tu sumua, Yehova Ekamba lietu lia velapo, wa ci kũlĩha. Nda tu likutilila kokuaye oku pinga olonumbi, loku tava ekuatiso eye a eca pocakati Cembimbiliya kuenda cekongelo, tu ka kuata ongusu yoku amamako oku u vumba ndaño ceci tu sumua. Ndaño tu kuete ovitangi vialua okuti ka tua kũlĩhĩle ndomo tu vi potolola, Yehova o ka tu kuatisa oku tula utima.—Osa. 94:19.a

OKU KALA EKAMBA LIA SUKU CI TU ĨHA OCIMÃHO KOMUENYO KUENDA ELAVOKO

8. Volonjila vipi vikuavo oku kuata ukamba la Suku ciwa kokuetu?

⁸ Oku kala ekamba lia Yehova ciwa kokuetu kolonepa vivali vi kuete esilivilo lialua. Catete, tu pondola oku kuata omuenyo umue uwa nda tua kuata ukamba wa pama la Yehova. Cavali, ci tu ĩha elavoko lia kolapo lio kovaso yoloneke. (Yer. 29:11) Tu konomuisi lutate asumũlũho aco.

9. Oku kuata ukamba la Yehova ci tu kuatisa ndati oku kuata esanju liocili komuenyo?

⁹ Omanu valua koloneke vilo, va popia okuti ka kuli Suku. Kuenje va sima okuti omuenyo ka u kuete ocimãho kuenda va tava okuti kovaso yoloneke omanu ka va ka kalako vali. Pole, oku kala ekamba lia Yehova, ci tu ĩha ocimãho komuenyo. Pocakati celilongiso Liembimbiliya, tu kolela okuti “eye o kasi lomuenyo kuenda eca onima kuava vo sanda lutima wosi.” (Va Hev. 11:6) Handi vali, Yehova wa tu lulika lonjongole yoku u vumba. Kuenje eci tu u vumba, tu kuata esanju liocili komuenyo.—Esin. 10:​12, 13.

10. Ndomo ca tangiwa Kosamo 37:​29, nye Yehova a likuminya ku vana vo kolela?

¹⁰ Omanu valua, ka va kuete elavoko liocili lio kovaso yoloneke. Ovo va sima okuti, omuenyo oku talavaya lika, oku kuela, loku kuata omãla kuenda oku pongiya olombongo vi ka va kuatisa eci va kuka. Ovo ka va kũlĩhĩle eci Yehova a likuminya kovaso yoloneke. Pole, afendeli va Yehova va kolela kokuaye. (Osa. 25:​3-5; 1 Tim. 6:17) Tua kolela ku Suku yetu haiye ekamba kuenda tua kũlĩha okuti, eye o ka tẽlisa eci a likuminya. Tu kuete ovina vialua viwa tu lavoka kovaso yoloneke, ca piãla enene oku u fendela otembo ka yi pui vocumbo celau.—Tanga Osamo 37:29.

11. Eci tu kala ekamba lia Suku nye ci pondola oku lipita letu kuenda tu liyeva ndati?

¹¹ Oku kuata ukamba la Yehova, ci tu kuatisa volonjila vialua via litepa. Ndeci, Yehova wa likuminya oku ecela akandu etu eci tu likekembela. (Isa. 1:18) Omo liaco, ka tu sukila oku amamako oku livetela evelo omo liekandu tua linga kosimbu. (Osa. 32:​1-5) Tu yeva esanju lialua eci tu sanjuisa Yehova. (Olosap. 23:15) Ocili okuti, tu kuete asumũlũho akuavo eyilila koku kuata ukamba wocili la Yehova. Cilo, tu konomuisa eci tu sukila oku linga oco tu kuate ukamba wocili la Suku.

AMAMAKO OKU PAMISA UKAMBA WOVE LA SUKU

12. Nye ove wa linga oco kuate ukamba la Suku?

¹² Osimbu ka tua papatisiwile oco tu kale Olombangi ya Yehova, tua linga ovina vialua oco tu kale akamba vaye. Ove wa lilongisa ocili catiamẽla ku Yehova kuenda ku Yesu Kristu, wa likekembela akandu ove o kosimbu, wa lekisa ekolelo liapama ku Suku kuenda wa likolisilako oku linga ovina vi likuata locipango caye. Oco tu kale akamba vocili va Yehova, tu sukila oku amamako oku linga ovina viaco.

13. Ovina vipi vitatu vi pondola oku tu kuatisa oku amamako oku kala akamba va Yehova?

¹³ Nye ci ka tu kuatisa oku amamako oku kala akamba va Yehova? (1) Tu sukila oku amamako oku tanga loku lilongisa Embimbiliya. Eci tu tanga Embimbiliya, tu sukilavo oku lilongisa ovina vikuavo okuti, oku lilongisa lika catiamẽla ku Suku ci sule. Tu sukila oku likolisilako oku kuata elomboloko lionjila ya Suku yoku sokolola, eci eye a yongola okuti tu ci linga kuenda oku ambata omuenyo umue u litava locipango caye. (Va Efe. 5:​15-17) (2) Tu sukila oku pamisa ekolelo lietu poku sokolola kovina vialua Yehova a siata oku lekisa ocisola caye kokuetu. (3) Tu sukilavo oku amamako oku suvuka ovina viu sumuisa kuenda oku yuvula oku linga ukamba lomanu vana va linga ovina vĩvi.—Osa. 1:1; 101:3.

14. Nye tu sukila oku linga oloneke viosi oco tu sanjuise Yehova? (1 Va Korindo 10:31) (Talavo ociluvialuvia.)

¹⁴ Tanga 1 Va Korindo 10:31. Ci kuete esilivilo oku linga ovina tua kũlĩha okuti vi ka sanjuisa Yehova. Pole, oku kunda lika loku enda enda kolohongele ka ci tẽla. Vovilinga vi sanjuisa Yehova mua kongela ovina tu linga eteke leteke. Ndeci, eci tu kala vakuacili kovina viosi, kuenda oku kuatisa vakuetu lovina tu kuete, tu sanjuisa Yehova. (2 Va Kor. 8:21; 9:7) Eye o yongola okuti, tu lekisa olopandu kombanjaile yomuenyo. Omo liaco, tu lekisa utate kovina tu lia levi tu nyua, kuenda oku linga ovina vi tu kuatisa oku kuata uhayele uwa. Eci Yehova a mola alikolisilo etu oku u sanjuisa kovina viosi tu linga, eye o tu sola calua.—Luka 16:10.

15. Ndamupi Yehova a yongola okuti tu tata vakuetu?

¹⁵ Yehova uwa lomanu vosi, ci kaile la vana vo vumba ale sio. (Mat. 5:45) Eye o yongolavo okuti tu kapako vakuetu. Ndeci, tu sukila oku yuvula oku ‘popia umue lãvi, oku kala vakuavama, pole tu sunguluka, loku lekisa umbombe wosi komanu vosi.’ (Tito 3:2) Ndaño okuti, omanu vamue ka va tava ku Yehova, ka tu ka simi okuti tua va velapo. (2 Tim. 2:​23-25) Tu pondola oku kuata ukamba la Yehova poku tata omanu vosi locisola.

PAMISA UKAMBA WOVE LA SUKU NDAÑO CECI O LUEYA

16. Usonehi Wosamo 73 wa liyeva ndati noke lioku vumba Yehova vokuenda kuotembo yimue?

¹⁶ Anga hẽ olonjanja vimue, ove o liyeva okuti ku sesamẽla ocisola ca Yehova omo liovina vĩvi wa linga? Ndomo tua lilongisa, cimuamue haico ca pita lusonehi Wosamo 73. Eye lesumuo wa popia hati: “Olomãhi viange via puluka oku yapuka; Olomãhi viange via puluka oku sielũha.” (Osa. 73:2) Noke wamisako hati: “Nda sumuĩle” kuenda “nda kambele elomboloko” “nda kala ndocinyama ka ci kuete olondunge” kovaso a Yehova. (Osa. 73:​21, 22) Anga hẽ eye wa simile okuti omo lia kulueya aye, Yehova kosolele vali kuenda ka ponduile oku wecela?

17. (a) Ndaño okuti ukualosamo wa sumuile calua nye eye a linga? (b) Nye tu lilongisila kulandu waye? (Talavo oviluvialuvia.)

¹⁷ Nda ukualosamo wa simile okuti Yehova wo yanduluka, pamue ca kala lika vokatembo kamue. Citava okuti, vepuluvi eye a sumuile wa limbuka esilivilo lioku amela ku Yehova ndomo ca situluiwa volondaka viaye. Eye wa soneha hati: “Pole, cilo ndi kasi love [a Yehova]; olonjanja viosi; ove wa kuata eka liange liondio. Ove o ndi songuila lelungulo liove, kuenje noke o ka ndi songuila kulamba.” (Osa. 73:​23, 24) Etu tu sukilavo oku pinga ku Yehova oco a tu pamise eci tu liyeva okuti, ekolelo lietu lia hongua ale ceci tu yeva esumuo omo liakulueya etu. (Osa. 73:26; 94:18) Ndaño tua linga akandu anene, tu pondola oku tiuka ku Yehova loku kolela okuti, eye “wa likapelako oku ecela.” (Osa. 86:5) Eci tu yeva esumuo lialua ci kuete esilivilo oku pamisa ukamba wetu la Yehova.—Osa. 103:​13, 14.

PAMISA UKAMBA WOVE LA YEHOVA OTEMBO KA YI PUI

18. Momo lie tu sukilila oku amamako oku pamisa ukamba wetu la Yehova otembo ka yi pui?

¹⁸ Tu pondola oku amamako oku pamisa ukamba wetu la Yehova otembo ka yi pui. Lalimue eteke tu ka liwekapo oku lilongisa catiamẽla kokuaye. Momo olonjila via Yehova lolondunge kuenda ukũlĩhĩso waye, ‘lomue o tẽla oku vi kũlĩha.’—Va Rom. 11:33.

19. Ekolelo lipi li tu ĩha Osamo?

¹⁹ Kosamo 79:13 hati: “Etu tumanu vove, haetu tulomeme viocunda cove, tu ka ku pandula calua otembo ka yi pui; kuenda tu ka sapula esivayo liove kocitumbulukila locitumbulukila.” Poku pamisa ukamba wove la Suku o pondolavo oku kolela okuti, o ka tambula asumũlũho ka a pui kuenda oku popia lekolelo hati: “Suku o teyuila utima wange, eye handa yange haeye onepa yange otembo ka yi pui.”—Osa. 73:26.