Ndomo o Linga Elilongiso Liove Liembimbiliya Lonjila Yimue Yeca Onima Kuenda Esanju

Yehosua o tanga ocihandeleko; ovimano vio Yeriko vi kupuka kuenda onjo ya Rahava yi supapo; Yehosua ovotola ovaka aye kuenje o likutilila

YEHOSUA wa kala oku songuila va Isareli oco va iñile Vofeka Yohuminyo. Ocikele caco ka ca laikele oku leluka. Pole, Yehova wo pamisa kuenda wo vetiya poku popia hati: “Kolisako ño, linga muẽle ukuotõi.” Eye wa sapuila Yehosua oco a tange Ocihandeleko loku ci pokola kuenje eci ca laikele oku u kuatisa oku nõla onjila yiwa kuenda cosi a linga cenda ciwa.—Yehosua 1:7, 8.

Omo okuti tu kasi ‘koloneke via sulako havio viohali yalua,’ tu pondolavo oku pita lovitangi vialua komuenyo. (2 Timoteo 3:1) Nda tu yongola oku litunda ciwa ndeci Yehosua, tu sukila oku kuama alungulo Yehova a siata oku tu ĩha. Tu sukila oku tanga Embimbiliya eteke leteke, okuti eci tu pita lovitangi tu kapako ovina tua tanga.

Ocili okuti, valua pokati ketu ka va sole oku tanga ale ka tua kũlĩhĩle ndomo ci lingiwa. Pole, elilongiso Liembimbiliya lio pokolika li kuete esilivilo lialua. Tanga okakasia losapi hati: “Seteka Olonumbi Evi,” oka sangamo olonumbi vi ka ku kuatisa kelilongiso liove, kuenda o kuata esanju lialua.

Ukualosamo wa imba hati: “Ngendise vonjila yovihandeleko viove, momo nda vi sanjukila.” (Osamo 119:35) Ove o pondolavo oku sola oku lilongisa Ondaka ya Suku. O ka sangamo alongiso alua awa osimbu amamako oku lilongisa Embimbiliya.

Ndaño okuti ku sukila oku kala usongui womanu ndeci ca kala Yehosua, ove wa siatavo oku liyaka lovitangi komuenyo. Omo liaco, linga ndeci Yehosua, lilongisa Ondaka ya Suku kuenda yi pokola. Nda wa ci linga o ka nõla onjila yiwa kuenda cosi o linga cenda ciwa.

ETEKA OLONUMBI EVI

Likutilila osimbu kua fetikile oku lilongisa. Vembimbiliya tu sangamo ovisimĩlo via Yehova okuti via sonehiwa oco vi tu kuatise. Kuenje eci o tanga Embimbiliya, pinga ku Yehova oco a ku kuatise oku kuata elomboloko lieci o kasi oku tanga, oku sokolola kulandu waco kuenda oku vi kuama oco vi ku kuatise oku nõla onjila yiwa komuenyo wove.—Esera 7:10.
Lipula ove muẽle osimbu o tanga Embimbiliya ale alivulu etu a kunamẽla Kembimbiliya. ‘Ocipama eci ci ndi longisa nye catiamẽla ku Yehova? Ulandu owu u likuata ndati losapi Yembimbiliya? Ndi kuama ndati ovolandu a-a oco ndi kuatise omanu vakuavo?
Sokolola ovina wa lilongisa. Talamapo kamue kuenda sokolola ovina wa tanga. Lipula ove muẽle ndoco: ‘Eci ci ndi kuatisa ndati? Momo lie ci ndi kuatisila lonjila eyi? Ca litepa hẽ ndati leci nda pita laco kosimbu, leci ndi kasi oku pita laco cilo ale leci ci ka pita lame kovaso yoloneke? Ndi kapako ndati olonumbi evi Viembimbiliya lalungulo aco komuenyo wange?’ (Yovi 23:5; Osamo 49:3) Eci o sokolola ovina wa tanga, kũlĩhĩsa nda o pondola oku lombolola esunga lieci Yehova a sapuila afendeli vaye oco va yuvule ovituwa vimue. Handi vali, sokolola onima nda yeyililako nda omunu wa tukuiwa vulandu wa tanga wa lingile ovina lonjila yimue ya litepa.—Esinumuĩlo 32:28, 29.
Lipula ove muẽle osimbu o tanga Embimbiliya ale alivulu etu a kunamẽla Kembimbiliya. ‘Ocipama eci ci ndi longisa nye catiamẽla ku Yehova? Ulandu owu u likuata ndati losapi Yembimbiliya? Ndi kuama ndati ovolandu a-a oco ndi kuatise omanu vakuavo? Osimbu o tanga sokolola. O pondola hẽ oku sokolola ulandu wa vamanji va Yosefe eci vo landisa ku va Isameli? (Efetikilo 37:18-28) Nye o lete, o yevite kuenda wa limbuka? Likapa pocitumãlo comanu vaco. Nye ovo va sima kuenda va yeva? Eci o sokolola osimbu o tanga, o pondola okupa esilivilo lialua kelilongiso liove.
Talavaya lovimalẽho vioku lilongisa via siata oku eciwa locisoko. Ovio vi ku kuatisa oku linga akonomuiso awa. Lilongisa oku talavaya lovimalẽho vi sangiwa kelimi liove ndeci, vi kasi vo Internet kuenda vialivulu. Ku ka kuate osõi yoku pula vakuene oco va ku kuatise ndomo o talavaya ciwa lovimalẽho viaco. O Índice das Publicações da Torre de Vigia ale Elivulu Lioku Konomuisa Liolombangi Via Yehova, vi pondola oku ku kuatisa oku sanga etosi lieca elomboluilo liocipama cimue kuenda ci ka lombolola ovinimbu vialua Viembimbiliya. Talavaya lo apendice yo Tradução do Novo Mundo da Biblia Sagrada nda oyo yi sangiwa kelimi o pondola oku tanga. Ovio, vi lombolola oku tepiwa kuolofeka, ovolandu, olonjongo, oviyongelo kuenda ovina vikuavo.
Oku pitulula atosi avelapo. Atosi aco a ka ku kuatisa oku ivaluka ovina viosi wa lilongisa. Handi vali, sapela lavamanji ovina wa tanga. Pali hẽ etosi limue okuti o ka likuama kupange woku kunda? Poku ci linga, o ka ivaluka atosi alua a velapo kuenda vakuene va ka kuatisiwavo lelilongiso liove liwa.