Elivokiyo Lialua Liondando Viovina Voluali Luosi—Nye Embimbiliya li Popia?

Usongui Wocimunga co Bango Yoluali Luosi vulandu waye wosãi Yevambi wunyamo 2022, wa lungula hati: “Ocitangi cekambo liolombongo voluali, ci kasi vali oku amamako oku livokiya.” “Onjanja eyi, olondando viovina via livokiya calua okuti, votembo yimuamue omanu ka va kuete olombongo oco va lande lavio.”

Ocisoko co Fundo Monetário Internacional ca popia hati: “Olondando viulela woviendelo kuenda viovikulia, via livokiya lonjanga yalua okuti, ovitangi viaco via siata oku veta calua omanu vo kolofeka vina muli uhukũi walua.

Embimbiliya li tu kuatisa oku kuata elomboloko lieci tu kasilili oku liyaka lovitangi viekambo liolombongo, li tu lekisa ndomo tu liyaka lavio kuenda li eca elavoko lioku vi malako otembo ka yi pui.

Elivokiyo liolondando vokuenda ‘kuoloneke vilo via sulako’

• Embimbiliya li tukula otembo yilo tu kasi okuti, ‘oloneke via sulako.’—2 Timoteo 3:1.

• Yesu wa popia okuti, kotembo yilo, kua laikele oku pita “ovina vi yokokisa” ale “olondimbukiso vinene.” (Luka 21:11) Elivokiyo lialua liondando viovina li koka ohele komanu. Ovo va sakalala calua lekalo liavo lio kovaso yoloneke, momo ka va kũlĩhĩle nda va ka tẽla oku tekula epata liavo ale sio.

• Elivulu Liesituluilo lia popele okuti, ondando yovikulia ya laikele oku livokiya kotembo yilo. “Nda yeva ondaka yimue ya tunda pokati koviluvo vikuãla vi kasi lomuenyo. . . . ya popia yiti: ‘Okilu yimosi yotiliku yi landiwa lodenariu yimosi kuenda olokilu vitatu viosevata, vi landiwavo lodenariu yimosi.’”—Esituluilo 6:6, Embimbiliya li Kola Esituluilo Lioluali Luokaliye.

Oco o kũlĩhe ovina vikuavo viatiamẽla “koloneke via sulako” kuenda ovitumasuku vi sangiwa velivulu Liesituluilo, tala ovideo Oluali Lua Pongoloka Tunde Kunyamo 1914 kuenda tanga ocipama “Olokavalu Vikuãla Via Tukuiwa Kelivulu Liesituluilo—Vi Lomboloka Nye?”

Esulilo liovitangi viosi viekambo liolombongo

• “Ovo va ka tunga olonjo kuenda va ka kalamo, Kuenda va ka kũla oviumbo viayuva kuenje va ka lia apako alio. Ovo ka va ka tunga oco umue wiñi a kalemo, Ndaño oku kũla okuti vakuavo ovo va liako.”—Isaya 65:21, 22.

• “Ku ka kala olomema vialua kilu lieve; vi ka supoka kosungu yolomunda.”—Olosamo 72:16.

• “‘Omo okuti olosuke vi talisiwa ohali, omo lioku leña leña kuohukũi, Ame ndi ka votoka’ oco Yehova a popia.”—Olosamo 12:5.a

Suku ndopo o ka malako letepiso li kasi pokati kolohukũi lolohuasi okuti, ka ci ka lingiwa lika vofeka yimosi, pole, voluali luaco luosi. Oco o kũlĩhe ndomo eye a ka ci linga, tanga ocipama losapi “Será que algum dia existirá um sistema económico justo?”

Pole, Embimbiliya li pondola oku ku kuatisa ale cilo oku liyaka lovitangi vioku livokiya kuolondando. Lonjila yipi? Olio li eca olonumbi vi kuatisa konjila ndomo ku talavayiwa ciwa lolombongo. (Olosapo 23:4, 5; Ukundi 7:12) Oco o kũlĩhe ovina vikuavo, tanga ovipama “Use bem o seu dinheiro (Talavaya Ciwa Lolombongo Viove)” kuenda “Como viver com menos dinheiro (Ndomo o Litekula Lolombongo Vitito).”