Kuatisiwa Locisembi ca Yesu
Unyamo lunyamo, Olombangi Via Yehova kuenda olohuluwa viomanu vana ovio via laleka, va siata oku enda Kocipito Conjivaluko yolofa via Yesu, ndomo eye a cihandeleka. (Luka 22:19) Ocipito caco ci tu kuatisa oku sanjukila ovina Yesu a linga poku eca omuenyo waye oco a yovole omanu. Eci ci lekisavo okuti ocilumba caye ci pondola oku tu kuatisa komuenyo cilo kuenda kovaso yoloneke.—Yoano 3:16.
Ci kaile okuti wenda Kocipito Conjivaluko unyamo ulo ale sio, o kuatisiwa ndati locisembi colofa via Yesu? Yesu wa popia okuti tu pondola oku linga ovina vivali vi kuete esilivilo lialua:
1. Oku lilongisa eci catiamẽla ku Suku kuenda ku Yesu. Vohutililo Yesu a linga ku Isiaye wokilu, wa popia hati: “Eci ci lomboloka omuenyo ko pui okuti, ovo va ku kũlĩha okuti, ove lika wu Suku yocili kuenda va sukila oku kũlĩhavo una ove wa tuma, Yesu Kristu.”—Yoano 17:3.
2. Kapako ovina wa lilongisa. Yesu wa lekisa okuti tu sukila oku kapako alongiso aye komuenyo wetu. Ndeci, eye wa malusula Ohundo yaye a lingila Komunda poku pandiya una ‘o yeva olondaka viaye loku vi kapako.’ (Luka 6:46-48) Handi vali, veluvipi likuavo, eye wa popia hati: “Nda wa kũlĩhi ovina evi, vu sumũlũha nda vu vi linga.”—Yoano 13:17.
O yongola hẽ oku lilongisa ovina vikuavo viatiamẽla ku Suku kuenda ku Yesu? Ove hẽ o yongola oku kuatisiwa ndomo o kapako ovina wa lilongisa? Kũlĩhĩsa ovina vimue vi pondola oku ku kuatisa.
Oku lilongisa Embimbiliya
Elilongiso lietu Liembimbiliya li lingiwa ocali, lia siata oku kuatisa omanu valua oku kũlĩhĩsa Embimbiliya loku kapako komuenyo wavo ovina olio lilongisa.
Kũlĩhĩsa onepa losapi, Elilongiso Liembimbiliya Lulongisi Umue oco o lilongise ovina vikuavo viatiamẽla kesokiyo liaco.
Tala ovideo losapi, Wa Linga Weya Kelilongiso Liove Liembimbiliya oco o tale ndomo elilongiso Liembimbiliya li lingiwa Lolombangi Via Yehova li ku kuatisa.
Olohongele Violombangi Via Yehova
Olombangi Via Yehova via siata oku liongolola olonjanja vivali vosemana povitumãlo viavo viefendelo via kũlĩhĩwa okuti, Olonjango Viusoma. Kolohongele va lilongisa Embimbiliya kuenda ndomo va kapako olonumbi viaco komuenyo wavo.
Olohongele viaco vi lingiwila omanu vosi; ove ku sukila oku kala Ombangi ya Yehova oco wendeko. Ndomo ci likuata lekalo liove, o pondola oku enda Vonjango Yusoma ale oku yi talela vo videoconferencia.
Tala ovideo losap, Nye ci Lingiwa Vonjango Yusoma? oco o lilongise ovina o ka mola kolohongele viaco.
Sanga ocitumãlo cimue colohongele ocipepi love poku kũlĩhĩsa ponepa Olohongele Viekongelo Violombangi Via Yehova.
Ovipama vo internet kuenda olovideo
Ovipama vialua kuenda olovideo vi sangiwa vo internet, vi pondola oku ku kuatisa oku lilongisa ovina vialua viatiamẽla kalongiso a Yesu kuenda esilivilo liolofa viaye.
Ndeci, oco o lilongise ndomo olofa viomunu umosi via kuatisa omanu valua, tanga ovipama losapi “O que quer dizer “Jesus salva”? kuenda “Momo Lie Yesu a Talela Ohali Kuenda Oku fa?” ale tala ovideo Momo Lie Yesu a Fila?