Voluali Luosi Owuya u Kasi Oku Livokiya Calua—Nye Embimbiliya li Popia?

Vokuenda kuosãi Yevambi Linene yunyamo 2022 kua sapuiwa ovolandu alua atiamẽla koku livokiya kuowuya voluali:

• “Yilo onjanja yavali vosãi yilo, olombiali viofeka yo China vi kasi oku lungula omanu catiamẽla kowuya walua u kasi oku pita kalupale a soka 70.”—25 Yevambi Linene yunyamo 2022. CNN Wire Service.

• “Omo okuti ko Europa yosi kua tokota calua, ku kasi oku pita ovilunga vioku pia kuovisenge kalupale alua.”—17 Yevambi Linene 2022. The Guardian.

• “Valupale alua o ko Estadus Unidus kua kala owuya walua Vocalumingu okuti koloneke vikuavo ci sule, owuya wa li sanduila Kohulo Yokalunga Kutundilo, kolonepa vio Kombuelo kuenda kolonepa Viocakati cofeka.”—24 Yevambi Linene yunyamo 2022. The New York Times.

Ovina evi viosi vi lomboloka nye? Anga hẽ vokuenda kuoloneke vongongo ka mu ka kala vali omanu? Nye Embimbiliya li popia?

Anga hẽ oku livokiya kuowuya ku kasi oku tẽlisa ocitumasuku Cembimbiliya?

Oco, ku kasi. Oku livokiya kuowuya walua ku kuete elitokeko lovolandu Embimbiliya lia popele okuti a laikele oku pita kotembo yetu. Ndeci, Yesu wa popele okuti tua laikele oku mola “ovina vi yokokisa.” (Luka 21:11) Omo lioku livokiya kuowuya kolonepa vialua violuali, omanu valua va kasi lusumba wokuti, omanu va ka nyõla ongongo.

Anga hẽ vongongo ka mu ka kala vali omanu?

Mu ka kala. Suku wa lulika ongongo oco yi kale ocitumãlo comanu otembo ka yi pui. (Olosamo 115:16; Ukundi 1:4) Eye ka ka ecelela okuti omanu va nyõla ongongo. Pole, o ka “kundula vana va vĩhisa ilu lieve” ndomo a ci likuminya.—Esituluilo 11:18.

Kũlĩhĩsa ovitumasuku vivali vi lekisa eci Suku a likuminya:

• “Ekalasoko kuenda ofeka ya kukuta vi ka yolela, kuenje etapi lio vekalasoko li ka sanjuka kuenda li ka yukisiwa lolonelẽho.” (Isaya 35:1) Suku ka ka ecelela okuti ongongo yi kala ekalasoko okuti ka mu kala cimue.

• “Ove o tata ilu lieve, o li lingisa okuti lima calua kuenda li kuata ukuasi walua.” (Olosamo 65:9) Suku o ka lingisa okuti ongongo yi kala ocumbo celau.

Oco o kũlĩhe vali ndomo oku pongoloka kuofela ku tẽlisa ovitumasuku Viembimbiliya, tanga ocipama Mudanças climáticas e o futuro da humanidade—O que a Bíblia diz?”

Oco o kũlĩhe ovina vikuavo viatiamẽla kohuminyo Yembimbiliya yoku tumbulula ekalo liongongo tanga ocipama “Helie o ka Yovola Ongongo?”