Ungangala Walua Wovita u Kasi Oku Lingiwa Voluali Luosi—Nye Embimbiliya li Popia?

Kosãi Yevambi Linene yunyamo 2022, kua pita ungangala walua wovita voluali luosi ndeci:

• “Oku pondiwa kuomunu umue ukuapulitika wa kũlĩhĩwa calua ko Japão okuti, [wa kala Epalanga Liatete o tukuiwa Shinzo Abe] kua sumuisa calua oluali luosi ca piãla enene ofeka ofeka yo Japão momo oyo ka yi kuete ungangala walua kuenda ovihandeleko viavo viatiamẽla komunu umue oku kuata uta, via tĩla calua.”—10 Yevambi linene, 2022, The Japan Times.

• “Omanu vo ko Denarka va sumua calua eci ongangala yimue ya ponda omanu vatatu vovenda yimue volupale luo Kopenhagen.”—4 Yevambi Linene, 2022, Reuters.

• “Ko Afrika du Sul: Ocimunga cimue calume ca fetika oku loya omanu vo bar yimue volupale luo Soweto kuenje kua fa 15 eci cisoka 15 komanu.”—10 Yevambi Linene 2022, The Guardian.

• “Ci pitahãla 220 komanu va fa kungangala umue wa lingiwa keteke 4 kesulilo liosemana liepuyuko ko Estadus Unidus”—5 Yevambi Linene, 2022, CBS News.

Kuli hẽ elavoko liokuti ungangala waco u ka pua? Nye Embimbiliya li popia?

Esulilo Liungangala

Embimbiliya li tukula otembo tu kasi okuti, ‘oloneke via sulako’ kuenda kotembo yaco omanu va laikelevo oku kala olongangala. (2 Timoteo 3:1, 3) Kuenje omo liovongangala aco omanu va kasi lusumba. (Luka 21:11) Pole, Embimbiliya lia likuminya okuti ungangala u kapuako kuenda ‘omanu va ka tunga vocitumãlo cimue combembua, vovitungilo via kolapo kuenda kovitumãlo viõha viepuyuko.’ (Isaya 32:18) Ovina viaco vi ka lingiwa ndati?

Suku o ka kundula omanu vãvi kuenda o ka nyõla ovota osi.

• “Olondingaĩvi vi ka kunduiwa kilu lieve.”—Olosapo 2:22.

• “[Suku] o kasi oku nena esulilo liovoyaki kilu lieve liosi; o teya ohonji kuenda o nyanyõla onjelia; eye o timĩha akãlu uyaki vondalu.”—Olosamo 46:9.

Suku o ka kundula ovina viosi vi koka ungangala poku longisa omanu oku kala vakuambembua.

• “Ovio ka vi ka linga cimue cĩvi ale oku nyõla komunda yange yosi yi kola, momo ongongo yi keyuka muẽle lukũlĩhĩso wa Yehova ndeci ovava a yukisa okalunga.”—Isaya 11:9.

• Koloneke vilo, Suku o kasi ale oku longisa omanu voluali luosi oku ‘pongolola olosipata viavo oco vi linge atemo kuenda ovonga avo o ku linga olomĩla.’—Mika 4:3.

Oco o lilongise ovina vikuavo viatiamẽla kohuminyo Yembimbiliya yoku kala voluali lumue okuti ka tu kuata vali usumba, tanga ocipama “É Possível Ficar Livre do Medo?”

Oco o kũlĩhe ndomo ungangala u kapua otembo ka yipui, tanga ocipama “Paz na Terra Enfim!”