Ovitenya Vialua—Nye Embimbiliya li Popia?

• “Ulandu wo China u lekisa okuti kua kala owuya walua kuenda ocitenya caco oco ca piãlelepo vali okuti, ca pitileko lika olonjanja vivali.”—Ondavululi, 7 Yenyenye Linene, 2022.

• “Unyamo watãlo okuti kolonepa vimue vio Afrika ku kasi oku pita ocitenya calua.”—UN News, 26 Yenyenye , 2022..

• “Onepa yimue yo Europa ya tambula esapulo liokuti ku iya ocitenya cimue okuti, ndomo ci moleha oco ca piãlapo vali vokuenda 500 kanyamo.”—BBC News, 23 Yenyenye, 2022.

Olonoño vimue vi popia okuti, ovitenya viaco, vi kamamako kuenda vi ka livokiya. Anga hẽ kuli elavoko liekalo liwa kovaso yoloneke? Nye Embimbiliya li popia?

Ovitenya kuenda ocitumasuku Cembimbiliya

Catiamẽla koloneke vietu Embimbiliya li popia hati:

• “Ku ka kala . . . kocitumãlo locitumãlo onjala.”—Luka 21:11.

Ovitenya vi koka onjala. Ekambo liokulia, ohali kuenda olofa vi kokiwa lovitenya, vi tẽlisa ocitumasuku Cembimbiliya.—Esituluilo 6:6, 8.

Esunga lieci ovitenya vi kasilili oku livokiya

Embimbiliya li situlula ciwa esunga lieci ovitenya vi kasilili oku livokiya. Olio hati:

• “Omunu enda, ka ca tiamẽle kokuaye ndaño muẽle oku songuila oku enda kuaye.”—Yeremiya 10:23.

Eci ci lomboloka okuti omanu ka va kuata onima yiwa nda va li “songuila oku enda kuavo muẽle” ale oku li viala. Omo okuti, ka vakuete uloño woku li songuila ovo muẽle, ca siata oku koka ovitenya kuenda ekambo liovava.

• Olonoño vialua vi tava okuti, ovina omanu va siata oku linga vi koka owuya walua, kuenje ci vokiya ovitenya vialua voluali luosi.

• Ocipululu kuenda ovoviali ka a silivila, ci koka okuti oviti vi tetiwa, oku vĩhisiwa kuofela kuenda oku talavaya lãvi lovokuasi a sangiwa voluali, ci koka okuti ka tu kuata vali ovava ayela oku nyua.

Pole, Embimbiliya li tu ĩha elavoko.

Kuli hẽ elavoko liwa kovaso yoloneke?

Embimbiliya li likuminya okuti, Suku o ka potolola ocitangi cekambo liovava. Ndamupi?

1. 1. Suku o ka “kundula vana va vĩhisa ilu lieve.” (Esituluilo 11:18) Eye o ka malako ovina viosi vi koka ovitenya, omanu olondingãivi, haivo vakuacipululu, okuti omo liovilinga viavo va nyõla ekalo lioluali.—2 Timoteo 3:1, 2.

2. 2. “Osi ya kukuta yi ka linga ociva cimue covava.” (Isaya 35:1, 6, 7) Suku o ka malako ovitangi via kokiwa lovitenya kuenda o ka pongolola oluali lulo, oco lu linge ocumbo celau.

3. 3. “Ove o tata ilu lieve, o li lingisa okuti lima calua kuenda li kuata ukuasi walua.” (Olosamo 65:9) Lesumũlũho lia Suku, omanu vosi voluali va ka kuata okulia kualua kuenda ovava a yela.