Olohuluwa Violohuluwa Violombongo vi Pesiwa Omo Liuyaki—Etendelo Lipi Lia Suapo?

Etendelo liuyaki lialua calua.

• “Etendelo liolombongo li pesiwa kasualali voluali luosi kovoyaki alua a lingiwa, li tẽla eci ci soka 2.2 kolohuluwa violohuluwa violondolale.”—The Washington Post, 13 ya Kayovo 2024.

Vovina viaco mua kongela ovina vialua okuti olombongo vi sule. Kũlĩhĩsa ulandu umue: Uyaki wo ko Ukrania.

• Asualali. Akonomuiso amue a lingiwa, a lekisa okuti ci panda 500.000 kasualali va pondiwa, ale va lemehiwa tunde kefetikilo liuyaki vokuenda kuanyamo avali.

• Vana okuti hasualaliko. Ci pitahãla 28.000 komanu va fa ale va lemehiwa ndomo ca lomboluiwa locisoko co lo Nações Unidas. Handi vali, usongui umue wo ko ONU wa popia hati: “Etendelo liasuapo liomanu valua va pondiwa kuyaki waco, ka litendiwa.a

Ohali omanu va kasi oku tala omo liuyaki waco kuenda ovitangi vikuavo vi kasi oku pita voluali luosi, vialua calua.

• 114 kolohuluwa. Etendelo liomanu va kisikiwa oku siapo olonjo viavo omo liuyaki kuenda ungangala voluali luosi kosãi Yenyenye Linene 2023.

• 783 kolohuluwa. Etendelo liomanu li kasi onjala. Uyaki waco owo u kasi oku koka onjala. “Ci soka 70 kolopulusendu viomanu, vi kasi onjala kolonepa vimue violuali omo liuyaki kuenda ungangala.”—Ulandu Wesokiyo Wokulia Woluali.

Anga hẽ uyaki eteke limue u ka puako? Kuli hẽ elavoko lioku kuata ombembua? Ovokuasi a kasi voluali o-o a ka kuatisa oku malako onjala kuenda uhũkui? Nye Embimbiliya li popia?

Otembo yuyaki

Embimbiliya lia lekisa okuti voluali luosi mu ka kala uyaki, poku lombolola ciwa omunu wa endela kokavalu.

• “Kua tunda okavalu kakuavo ka kuete evala liondalu kuenda u wa tumãlako vo wĩha omoko yoku imũla ombembua kilu lieve okuti, ovo va liponda pokati kuenda vo wĩha osipata yimue yinene.”—Esituluilo 6:4.

Omunu wa endela kokavalu okuti vupopi wocindekaise, o kasi oku kuamiwa lomanu vavali vana va lomboloka onjala kuenda olofa omo liefengi ale ovitangi vikuavo. (Esituluilo 6:5-8) Oco o lilongise ovina vikuavo viatiamẽla kocitumasuku eci kuenda esunga lieci tua kolelela okuti ocitumasuku caco ci kasi oku tẽlisiwa koloneke vietu, tanga ocipama losapi, “Olokavalu Vikuãla Via Tukuiwa Kelivulu Liesituluilo—Vi Lomboloka Nye?”

Ombembua kovaso yoloneke

Ndopo ka ku katalavayiwa vali lovokuasi oluali oco a kuatise kuyaki. Eci ka ci ka lingiwa lalikolisilo omanu. Embimbiliya li popia ndoco:

• Suku “o kasi oku nena esulilo liovoyaki kilu lieve liosi.”—Osamo 46:9.

• Suku o kamalako ovitangi viosi vi kasi oku kokiwa luyaki. “Eye o ka puenya asuẽlẽla osi vovaso avo, oku fa ka ku ka kalako vali, ndaño oku lila loku liyula levalo ka vi ka kalako vali. Ovina viatete via pita.”—Esituluilo 21:4.

• Suku o ka lingisa okuti omanu vosi va ka kala lombembua ka yi pui. “Omanu vange va ka tunga vocitumãlo cimue combembua, Vovitungilo via kolapo kuenda kovitumãlo viõha viepuyuko.”—Isaya 32:18.

Ndomo ca tukuiwa vocitumasuku Cembimbiliya, ovoyaki kuenda ovolandu akuavo tu lete koloneke vilo vi lekisa okuti otembo yombembua yi kasi ocipepi.

Suku o ka nena ndati ombembua kovaso yoloneke? Eye o ka ci linga pocakati cuviali waye wo kilu ale Usoma waye. (Mateo 6:10) Oco o lilongise eci catiamẽla Kusoma waco kuenda eci u lomboloka kokuove, tala ovideo losapi hati, Usoma wa Suku u Lomboloka Nye?