Uyaki ko Ukrania u Fetika Unyamo Wavali—Elavoko Lipi Embimbiliya li Eca?

Votãlo, 24 ya Kayovo, 2023, eteke liaco lia linga onjivaluko yimue yi sumuisa, momo uyaki ko Ukrania wa tẽlisa unyamo tunde eci wa fetika. Ndomo ci lekisiwa vovolandu amue, ci soka 300.000 kasualãli vo ko Ukrania kuenda vo ko Russia va fa ale va lemehiwa kuenda ci soka 30.000 komanu va fa kuyaki wo ko Russia. Pole, citava okuti etendelo liaco lia pitahãla.

Ci sumuisa ceci okuti, handi ka tua kũlĩhĩle otembo uyaki waco u ka pua.

• “Tunde eci asualali vo ko Russia va iñila vo Ukrania pa pita ale ci panda unyamo, pole toke cilo ka kuli ondimbukiso yokuti uyaki ndopo u pua. Pokati kavo lomue wa lipongiyila oku yula uyaki kuenda ombangulo va kasi oku linga oco va liwekepo oku yaka, yi molẽhavo ndu okuti ka yi kuete esulilo.”—NPR (Rádio Pública Nacional), 19 ya Kayovo, 2023.

Omanu valua va yevite evalo kuenda va kasi oku tala ohali omo liuyaki waco kuenda ovoyaki akuavo a kasi oku kokela ovitangi omanu kolonepa viosi violuali. Elavoko lipi Embimbiliya li eca? Anga hẽ eteke limue uyaki u ka pua?

Uyaki umue u ka malako ovoyaki osi

Embimbiliya li vangula uyaki umue u ka popela omanu okuti, ka u ka va kundula. Uyaki waco wa kũlĩhĩwa okuti, Harmagedo kuenda u tukuiwa okuti, ‘uyaki u ka pita keteke linene lia Suku Ukuonene Wosi.’ (Esituluilo 16:14, 16) Pocakati cuyaki wo Harmagedo, Suku o ka malako olombiali viomanu via siata oku koka ovoyaki alua. Oco o lilongise ndomo uyaki wo Harmagedo u ka nena ombembua ka yi pui, tanga ovipama vi kuãimo:

• “Uyaki wo Harmagedo u Lomboloka Nye?”

• “O Harmagedo Esapulo Limue Liwa!”