Momo Lie Olombangi Via Yehova ka vi Pangela Onepa Kovipito Vioku Sambiliya Ofeka?

Olombangi Via Yehova via sumbila olombiali viavo kuenda olondimbukiso viofeka. Tu tava okuti, omanu vakuavo va pondola oku nõla oku panga onepa kolombiali, oku fendela epandela limue, ale oku imba ocisungo cofeka.

Pole, Olombangi Via Yehova via nõlapo oku yuvula oku panga onepa kovipito viaco momo vi tava okuti, ovipito viaco ka vi taviwa lalongiso Embimbiliya. Tu sanjuka calua nda omanu va lekisa esumbilo kovina tu tava ndeci tua siatavo oku lekisa esumbilo konjila yavo yoku nõla ovina va yongola.

Vocipama cilo

• Alongiso api Embimbiliya a kongelamo?

• Nda ocipito caco ca kisikiwa lombiali?

• Olombangi Via Yehova vi seteka oku panga onepa kopulitika?

Alongiso api Embimbiliya a kongelamo?

Alongiso avali Embimbiliya a kuãimo, a pondola oku tu kuatisa konjila tu nõla:

• Suku eye lika o sesamẽla efendelo lietu. Embimbiliya li popia hati: “Fendela Yehova, Suku yove, eye lika o vumba.” (Luka 4:8) Olohuminyo vi lingiwa kovipito viaco kuenda oku imba ovisungo viofeka, mua siata oku kala olondaka vioku velisapo ofeka okuti ovina vikuavo vi sule. Omo liaco, Olombangi Via Yehova ka vi tava oku panga onepa kovipito viaco omo liowanji wutima wavo.

  Olombangi Via Yehova vi tavavo okuti oku sambiliya epandela, ca lisoka loku fendela oviteka okuti ocina cimue ci pisiwa Lembimbiliya. (1 Va Korindo 10:14) Olono vimue violuali vi lekisa okuti, apandela olofeka olondimbukiso vietavo. Ndeci, Carlton J.H.Hayes ukuakulombolola ovolandu wa popia hati: “Epandela, ondimbukiso ya velapo yekolelo kuenda ocimãho coku fendela.”a Catiamẽla Kakristão vo kocita catete ukuakũlĩhĩsa Daniel P. Mannix wa lekisa okuti: “Akristão va enda oku. . . likala oku eca ovilumba kombiali yo [Roma] okuti, koloneke vilo, citava okuti ci lisoka loku fendela epandela.”b

  Ndaño okuti Olombangi Via Yehova ka vi fendela epandela, ovio ka vi litati lãvi ndeci oku li timĩha, oku lekisa ekambo liesumbilo kokuali, ale kolondimbu vimue viofeka.

• Omanu vosi kovaso a Suku vamuamue. (Ovilinga 10:34, 35) Embimbiliya li popia okuti Suku “lomunu umosi, wa sovola olofeka viosi viomanu.” (Ovilinga 17:26) Omo liesunga eli, Olombangi Via Yehova vi tava okuti, ka ca sungulukile oku sivaya ocimunga cimue okuti vikuavo vi sule. Omo liaco, nda omanu va citiwila kocitumãlo cimue ca litepa ale sio, etu tua sumbila omanu vosi.—1 Petulu 2:17.

Nda ocipito caco ca kisikiwa lombiali?

Olombangi Via Yehova ka vi liyaki lombiali. Ovio vi tava okuti, olombiali vi panga onepa ‘kesokiyo lia suku’ kuenda eye ecelela okuti ovio vi kalako. (Va Roma 13:1-7) Tu tavavo okuti Akristão va sukila oku pokola kolombiali.—Luka 20:25.

Pole, nda olonumbi vimue vi lipatãla lolonumbi via Suku? Olonjanja vimue citava oku tumisa esapulo limue li litava locihandeleko oco ombiali yi linge apongoloko amue kovihandeleko viaco.c Kuenje nda ka citava oku linga epongoloko limue, Olombangi Via Yehova lesumbilo vi nõlapo “oku pokola ku Suku ndombiali, komunu hakoko.”—Ovilinga 5:29.

Olombangi Via Yehova vi seteka oku panga onepa kopulitika?

Sio. Olombangi Via Yehova ka vi pangi onepa kovina viopulitika. Kuenje eci tu yuvula oku fendela epandela, ale oku imba ocisungo cofeka ka ci lomboloka okuti, tu kuete ale ocitundo cimue. Omo liaco, tu lekisa okuti tu kasi oku kapako alongiso etu a kunamẽla Vembimbiliya.