AMALẼHE VA PULA
Embimbiliya li Pondola Oku Ndi Kuatisa Ndati?—Onepa 2 Linga Cimue ci ku Kuatisa Oku Sanjukila Oku Tanga Embimbiliya
Umalẽhe umue o tukuiwa Will wa popia hati: “Oku tanga Embimbiliya ci pondola oku molẽha okuti ci koka owesi. Pole, ci li pita lika nda kua kũlĩhĩle onjila ndomo o tanga Embimbiliya.
O yongola hẽ oku kũlĩha elumbu liaco, oco o sanjukile oku tanga Embimbiliya? Ocipama cilo ci ka ku kuatisa.
Oku tanga kuove Ovisonehua ku kuate esilivilo
Likongela vulandu waco. O pondola oku ci linga ndoco:
Nõla ulandu umue Wembimbiliya o sanjukila oku lilongisa. O pondola oku nõla ulandu umue Wembimbiliya ale ovipama vimue Kevangeliu limue. Handi vali o pondola oku nõla ulandu umue wondalama Yembimbiliya wa ngalavaliwa u sangiwa vonumbi yetu yo internet jw.org.
Tanga ulandu. O pondola oku tanga lika liove ale lolukandi eci o kasi lakamba ale lepata liove. Omunu umue o pondola oku kala kapitiya osimbu vakuavo va kala omanu va tukuiwa vulandu waco.
Seteka yimue pokati kolonumbi ale vialua vi kuãimo:
Soneha alitalatu ale sokiya ulandu umue, oco vi lekisa ulala ndomo ovina vi li pita. Sonehavo ovina vi kasi oku lipita vulala.
Linga ulala umue. Ndeci, poku tanga catiamẽla komunu umue ukuekolelo wa tukuiwa Vembimbiliya, lekisa ndomo ovituwa viaye kuenda ovilinga viomunu waco vi kuete elitokeko la sumũlũho a tambula.
Pongolola ulandu waco vesapulo limue. Lombolola ovina via pita volonjila via litepa, kongelamo oku “pulisiwa” lomanu va panga onepa kulandu kuenda omanu vakuavo va tukuiwavo vulandu.
Seteka oku sokolola esilulilo limue lia litepa. Sokolala komunu umue wa nõla onjila ka ya sungulukile kuenda sokolala eci nda ca li pita nda eye wa nõlele onjila yi kuavo. Ndeci, sokolola eci Petulu a likala Yesu. (Marko 14:66-72) Nye Petulu nda a linga lonjila ya litepa eci a sakalaisua?
Nda o yongola oku linga cimue ci pondola oku kuatisa vali, soneha ondalama yimue wulandu wa tukuiwa Wembimbiliya. Kongelamo ovina o lilongisa vulandu waco.—Va Roma 15:4.
Ove o pondola oku ecelala okuti ulandu Wembimbiliya u kuata omuenyo!
Linga a Konomuiso!
Nda wa kũlĩhĩsa lutate ovina via kongela vulandu umue, o pondola oku sanga ovokuasi a vondisiwa. Ocili okuti, olonjanja vimue, oku upa esilivilo kondaka yimosi ale vivali vulandu umue Wembimbiliya, ci kuatisa calua.
Ndeci, sokisa Mateo 28:7 la Marko 16:7.
Momo lie Marko a kongelela ondaka yokuti Yesu wa laikele oku molẽha kolondonge kuenda “ku Petulu”?
Onumbi: Marko ka kaile ombangi yimue viovolandu aco: citava okuti wa tambula ulandu waco ku Petulu.
Ovokuasi a vondisiwa: Momo lie Petulu wa sanjukilile eci a yeva okuti Yesu wa yonguile oku u mola onjanja yikuavo? (Marko 14:66-72) Yesu wa situlula ndati okuti wa kala ekamba liocili lia Petulu? O pondola oku setukula ndati Yesu loku kala ekamba liocili lia vakuene?
Eci ecelala okuti Ovisonehua vi kala viocili kokuove loku konomuisa ovina via kongelamo, o ka vetiyiwa calua lutangelo Wembimbiliya!