Olonumbi Epanduvali vi Kuatisa Oku Upa Esilivilo Poku Tanga Embimbiliya

“Embimbiliya, helivulu limueko lika lia velepo li landisiwa otembo yosi, pole, olio lika elivulu lia velapo li landisiwa unyamo lunyamo.”—TIME MAGAZINE.

“Olonjanja vimue nda siata oku tanga Embimbiliya, pole, nda limbuka okuti olio ka li kuete esilivilo lalimue.”—KEITH, ONJIMBI YIMUE YA KEMÃLA KOFEKA YO INGLATERRA.

CI sumuisa calua omo okuti omanu valua ndaño va kuete Embimbiliya, ka va kũlĩhĩle esilivilo lialio. Pole, vakuavo va sole oku patekela ovina va tanga Vembimbiliya. Ukãi umue o tukuiwa hati, Nancy, wa popia hati: “Tunde eci nda fetika oku tanga Embimbiliya komẽle loku sokolola ovina ndi tanga, ca siata oku ndi kuatisa oku liyaka lovitangi vieteke leteke. Cikasi oku ndi kuatisa oku pandikisa lesumuo liange okuti ovina vikuavo nda seteka oku linga vokuenda kueci ci soka 35 kanyamo ci sule.”

Ndaño okuti lalimue eteke wa tangele Embimbiliya, anga hẽ ku komõha poku kũlĩha okuti lia siata oku kuatisa omanu valua? Nda wa siata ale oku li tanga, ku yongola hẽ oku kũlĩha ndomo o kuatisiwa lalio? Seteka oku kuama olonumbi epanduvali vi kuãimo.

ONUMBI 1: Tanga locimãho ciwa

◼ Ove pamue wa siata oku tanga Embimbiliya omo lioku sima okuti, olio elivulu limue liwa, pamue o kasi oku ci linga omo lioku kisikiwa, ale locisimĩlo coku sanga olonumbi vi ku kuatisa voluali lulo lueyuka evĩho. Nda o kasi oku tanga locimãho coku lilongisa ocili catiamẽla ku Suku, o pondola oku kuatisiwa calua. Handi vali, nda wa kuatavo ocimãho coku limbuka ndomo esapulo Liembimbiliya li pondola oku pongolola ekalo liomuenyo wove, o ka kuata asumũlũho alua.

Ovisonehua vi lekisa esilivilo lioku tanga locimãho coku kuata elomboloko, poku sokisa Embimbiliya lolumũilo. Ovio vi popia hati: “U o yeva ño ondaka puãi ka yi lingainga, wa lisoka lomanu wa livanjela volumuilo ocipala a citiwa laco, omo o livanjelamo, kuenje enda. Tuli a tunda, ndeci a kala co limba. Puãi, u o vanja vanja sui vocihandeleko ca kanguka, haico ceca umãmãle, kuenje o pandikisa laco okuti ka lingi ukuakuyeva lika loku ivala, o linga puãi ukuakulinga, eye o sumũlũisua lokulingainga kuaye.”—Tiago 1:23-25.

Omunu wa tukuiwa vocinimbu eci, wa li vanjela volumũilo pole ka lingile apongoloko a sesamẽlele ketimba liaye. Citava okuti, eye wa vanjamo ño, ale ka kuatele onjongole yoku linga apongoloko. Cimuamue haico ci pita letu okuti, nda tua tanga Embimbiliya lonjongole yitito, ale ka tua kapeleko ovina tua tanga, ka tu tẽla oku kuatisiwa lalio. Nda tua kũlĩhĩsa lutate Vembimbiliya locimãho coku linga ‘vakuakutẽlisa ondaka,’ loku ecelela okuti Suku o pongolola ovisimĩlo kuenda ovilinga vietu, tu kuata esanju lialua.

ONUMBI 2: Nõla ciwa Embimbiliya o yongola oku tanga

◼ Citava okuti kuli Ambimbiliya alua a sandekiwa velimi lina o tẽla oku vangula. Ndaño okuti Ambimbiliya amue a pondola oku ku kuatisa, pole, kuli amue okuti upopi waco wa tatama calua oku kuata elomboloko liaco. (Ovilinga 4:13) Ambimbiliya amue a pongolola esapulo Liondaka ya Suku omo lioku kapamo ovihõlo viomanu. Ndomo tua ci mola kovipama viatete viorevista yilo, vamue va piñanya onduko ya Suku, Yehova, lolondaka ndevi, “Suku” ale “Ñala.” Omo liaco, poku nõla Embimbiliya, kũlĩhĩsa lina li kuete upopi wa leluka oku u tanga.

Omanu valua voluali, va limbuka okuti, Embimbiliya Tradução do Novo Mundo, li kuete upopi wa leluka.a Kũlĩhĩsa ulandu wa popiwa lulume umue ukulu wendamba kofeka yo Bulgaria. Eci a endele kohongele yimue Yolombangi Via Yehova, wa tambula Embimbiliya Tradução do Novo Mundo. Eye wa popia hati: “Nda siata oku tanga Embimbiliya vokuenda kuanyamo alua, pole sia la tanga Embimbiliya limue lia soka ndeli okuti upopi waco wa leluka calua, halio li vetiya utima womunu.”

ONUMBI 3: Likutilila

◼ O pondola oku kuata ukũlĩhĩso wa velapo Wembimbiliya poku pinga ekuatiso Kusovoli walio ndeci ukualosamo a linga eci a popia hati: “Patulula ovaso ange okuti ndimbuka ovikomo viovihandeleko viove.” (Osamo 119:18) Onjanja yosi eci o tanga Ovisonehua, likutilila ku Suku, pinga ekuatiso oco o kuate elomboloko Liondaka yaye. Eca olopandu omo Liembimbiliya, momo olio lika li tu kuatisa oku kũlĩha Suku.—Osamo 119:62.

Anga hẽ Suku o yevelela olohutililo vioku pinga ekuatiso? Kũlĩhĩsa eci ca pita lamalẽhe vavali afeko kofeka yo Uruguai. Ovo va kala oku tanga elivulu lia Daniele 2:44, pole ka va kuatele elomboloko liaco, kuenje va likutilila ku Suku oco a tume omunu umue o va kuatisa. Osimbu ka va tuvikile Embimbiliya, kua moleha Olombangi Via Yehova vivali kuenje via totola kepito. Va tanga kumosi lavo ocinimbu caco, loku likutilila kuenda va lombolola okuti ocinimbu eci ci lekisa ndomo Usoma wa Suku u ka piñanya uviali womunu.b Noke amalẽhe vaco vafeko va limbuka okuti Suku eye wa tambulula ohutililo yavo yekuatiso.

ONUMBI 4: Tanga eteke leteke

◼ Usonehi welivulu limue, wa limbuka okuti noke yocilunga ca pita kofeka yo Estados Unidos keteke 11 Yenyenye Linene yunyamo wo 2001, “Embimbiliya olio lika lia landisiwa calua.” Ocili okuti, omanu valua va sandiliya lika Ondaka ya Suku eci va liyaka lovitangi. Pole, Embimbiliya li tu vetiya oku tanga Ondaka ya Suku oloneke viosi. Olio li popia hati: “Elivulu eli liovihandeleko ka li ka tunde komẽla wove, puãi li sokolola utanya luteke, hu lingi lutate cosi ca sonehiwamo. Momo oco onjila yove yi sumuluha, leci o linga ci ku enda ciwa.”—Yehosua 1:8.

Esilivilo lioku tanga Embimbiliya eteke leteke li sokisiwa lomunu umue o kuete uvei wesuka kuenje wa nõlapo oku lia lika ovina vi tekula ciwa etimba liaye. Anga hẽ omunu waco o pondola oku kuatisiwa nda wa kuama lika onumbi yaco eci a yeva evalo? Sio hacoko. Eye o sukila oku kuama onumbi yaco oloneke viosi. Cimuamue haico okuti nda wa tanga Embimbiliya eteke leteke ‘onjila yove yi sumuluisiwa.’

ONUMBI 5: Seteka olonjila vikuavo

◼ Oku tanga Embimbiliya okupisa Kefetikilo toke Kesituluilo, ca sunguluka, pole, o pondola oku kuama olonjila vikuavo vioku cilinga. Kũlĩhisa olonumbi evi vi kuãimo.

Tanga ulandu womunu umue wa tukuiwa Vembimbiliya. Tanga ovipama viosi ale alivulu a lombolola ulandu watiamẽla kufendeli umue wa Suku ndeci:

• Yosefe: Efetikilo 37-50.

• Ruti: Ruti 1-3.

• Yesu: Mateu 1-28; Marko 1-16; Luka 1-24; Yoano 1-21.c

Tiamisila utima wove kulandu umue. Tanga ovisonehua vi tiamisiwila kulandu waco. Konomuisa ovipama viatiamẽla kolohutililo kuenda tanga alungulo Embimbiliya atiamẽla kulandu waco. Tangavo ulandu watiamẽla kolohutililo via sonehiwa Vembimbiliya.d

Tanga lolukandi. O pondola oku kuatisiwa poku tanga Embimbiliya lolukandi. (Esituluilo 1:3) Kumosi lepata liove o pondola oku tanga lolukandi, loku pitulula ovinimbu wa tangi, ale omunu lomunu o tanga olondaka via popiwa la umue wa tukuiwa Vembimbiliya. Vamue va siata oku yevelela ovinimbu Viembimbiliya via ngalavaliwa. Ukãi umue wa popia hati: “Kokuange ca tĩlile calua oku fetika oku tanga Embimbiliya. Omo liaco, nda fetika oku yevelela ovinimbu vimue via ngalavaliwa. Cilo nda siata oku tanga Embimbiliya lesanju okuti alivulu akuavo ci sule.”

ONUMBI 6: Sokolola ovina wa tanga

◼ Koloneke vilo omo liasakalalo omuenyo, ka ca lelukile oku sokiya otembo yoku sokolola ovina tua tanga. Pole, ndeci tu sukila oku tulumuinya noke yoku lia oco okulia ku kuatise etimba, haico tu sukila oku linga poku tanga Embimbiliya nda tu yongola oku kuatisiwa lalio. Tu ci linga poku pitolola vutima ovina tua tanga kuenda oku li pula ndoco: ‘Nye nda lilongisa catiamẽla ku Yehova Suku? Ulandu owu u ndi kuatisa ndati? Ndi kuatisa ndati vakuetu lulandu waco?’

Oku sokolola kovina evi, cecelela okuti esapulo Liembimbiliya li vetiya utima wetu kuenda li vokiya esanju lietu lioku tanga Ondaka ya Suku. Osamo 119:97 yi popia hati: “Sole cimue ovihandeleko viove. Ndukuaku vi sokolola ño-o eteke liosi.” Ukualosamo eteke leteke wa enda oku sokiya otembo yoku sokolola kovina a tanga Vovisonehua. Poku ci linga co kuatisa oku vokiya ocisola caye kovina a lilongisa.

ONUMBI 7: Pinga ekuatiso oco o kuate elomboloko

◼ Suku ka kevelela okuti likalietu tu kuata elomboloko liasuapo Liondaka yaye. Embimbiliya li lekisavo okuti ovina vialua via sonehiwamo ‘via tĩla oku kuata elomboloko liaco.’ (2 Petulu 3:16) Elivulu Liovilinga li lombolola ulandu watiamẽla kulume umue wo ko Etiopia, okuti ka kuatele elomboloko liovina a kala oku tanga Vembimbiliya. Omo liaco, Suku wa tuma umue pokati kafendeli vaye oco o kuatise. Noke ulume waco wo ko Etiopia “wa enda lungende waye loku yolela.”—Ovilinga 8:26-39.

Ove o pondola oku kuatisiwa loku tanga Embimbiliya poku pinga ekuatiso oco o sange elomboloko liovina viaco. Sandiliya Olombangi via Yehova vimbo liove, ale sonehela konumbi yi sangiwa kemẽla 4 liorevista yilo, loku pinga elilongiso Liembimbiliya konjo yove.

[Atosi pombuelo yamẽla]