Ekuatiso Komanu Ndaño ‘Lovoyaki Kuenda Asapulo Ovoyaki’

Omo okuti tu kasi koloneke via sulako, ka ci tu komõhisa oku “yeva eci catiamẽla kovoyaki kuenda asapulo ovoyaki.” (Mateo 24:6) Pole, nda vamanjetu va liyaka lovitangi viaco, ovo va tambula ekuatiso va sukila. Tua lembelekiwa calua oku tala Ulandu #3 Wosungu Yolombangi Via Yehova 2022, una wa lombolola catiamẽla kupange woku eca ekuatiso Kutundilo wo Europa oco u kuatise vana va kasi oku pita luyaki ko Ukrania. Ekuatiso liaco li kasi oku eciwa ndati ndaño loku livokiya kuyaki? Onima yipi upange waco wa siata oku eca ku vamanjetu ko Ukrania?

Nye Vamanji va Sukila? Ca Siata Oku Tumiwa Ndati?

Keteke  24 ya Kayovo yunyamo 2022 okuti, olio eteke uyaki wa fetika ko Ukrania, Ocimunga Casongui, ca tava oku sokiya olombongo vimue oco vi kuatise vamanjetu ko Ukrania. Ofiliale yo Ukrania lonjanga yalua, ya fetika oku landa ovina vi sukiliwa loku vi eca lekuatiso lieci ci soka 27 Kovisoko Vieca Ekuatiso vina via nõliwile.

Handi vali, oco Ofiliale yo Ukrania yi kuatisiwe, Ombala Yolombangi Via Yehova Voluali Luosi, ya kũlĩhĩsa ovina vi sukiliwa oco ku eciwe ekuatiso li sukiliwa. Ocimunga Casongui kuenda Coku Sandeka Alivulu Cosungu Yolombangi Via Yehova ca pinga okuti Oseketa Yoku Landa Voluali Luosi, yi talavayela kumue lolonumiwa vio Filiale yo Ukrania kuenda vio Polonia. Ca lingiwa oco vi kuatise kesukila liaco loku sokiya ndomo ku lingiwa upange waco. Vamanji va panga onepa Koseketa Yoku Landa, Voseketa yi Tumisa Alivulu, Voseketa yi Tetulula Ovitangi Viombonge, Lukulu umue wo Filiale yo Ukrania kuenda vamanji va panga onepa Koseketa Yoku Landa Voluali Luosi, va enda oku linga olohongele oloneke viosi, oco va sokiye oku eca ekuatiso liaco.

Jay Swinney o panga onepa Koseketa Yoku Landa Voluali Luosi wa popia hati: “Tete tua sukilile oku kũlĩhĩsa ovina vi sukiliwa. Tua yonguile oku eca ovikulia lovina vioku liyelisa, vina vamanji va enda ale oku kuata. Pole, oku kũlĩha lika ovina vi sukiliwa, ca kala ño onepa yimue yocitangi. Tua sukililevo oku sokiya ndomo tua laikele oku tuma ovina viaco ko Ukrania ndaño luyaki okuti, vi pitĩla lonjila ya suapo kuenda lonjanga yalua.”

Keteke 9 Yelombo yunyamo 2022, vamanji va kũlĩhĩle ale ovina via sukiliwile. Kua sukiliwile oku pongiya olokasia muli ovina vioku litekula lavio ndeci, ositu, olombisi viololata, oluoso, ocipoke lolomema vikuavo oku kongelamo ovina vioku liyelisa. Kotembo yaco, kua lingiwa olokonda viokuti, ovina viaco violosemana vikuãla, via ponduile oku kuata ondando yeci ci panda 65 kolondolale vi eciwa komunu lomunu okuti nda kolombongo vietu, (28.056,40 Kwanza). Omo okuti vamanji valua va sukilile ovina viaco, Ocimunga Casongui ca tava okuti, ku talavayiwa letendelo lialua liolombongo. Pole, kua laikele oku tumisiwa ndati ovina viaco okuti ovimuenyo via vamanji ka vi kapiwa kohele?

Keteke 13 Yelombo, vamanji vavali vo ko Polonia va linga oseteko yimue yoku ambata ovina oku upisa ko Filiale yo ko Polonia toke pocitumãlo coku seleka ovikulia ocipepi lolupale luo Lviv ko Ukrania. Eci kua kambele oloneke vimue oco vamanji vaco vavali va linge ungende, vamanji vo ko Filiale yo Polonia kuenda yo ko Ukrania va kuatisa vamanji vaco va lieca olumue oco va lipongiyile ungende waco. O Filiale ya pongiya ovicapa vi sukiliwa oco ovo va pite pongave kuenda ya kũlĩhĩsa okuti akãlu avo a kuata ovicapa vi situlula ciwa okuti, ovo va endelako oku ka eca ekuatiso komanu. Handi vali, o Filiale ya talavaya la vamanji vo ko Ukrania oco va nõle etapalo li kuamiwa lia lelukapo vali noke lioku pita pongave. Lelipongiyo liwa kuenda asumũlũho a Yehova, ovina via tumiwile, via pitĩla ciwa povaka Viovimunga vi Eca Ekuatiso volupale luo Lviv vokuenda kueci ci soka 24 kuolowola, kuenje vamanjetu va tiukila ciwa ko Polonia.

Oseteko eyi yatete, ya kuata onima yiwa, pole, vamanji va tẽla lika oku eca ci panda otonelada yimosi. Kua lingiwile olokonda viokuti, handi ku sukiliwa oku eciwa eci ci pitahãla 200 kolotonelada! Ovina viaco via ponduile oku ambatiwa ndati loku eciwa lonjanga yalua?

“Omanu Vove va ka Lieca Lutima Wosi”

Noke yoku tanga asapulo vo jw.org atiamẽla ku vamanji ndomo va kala oku tala ohali omo liovina vi kasi oku pita ko Ukrania, omanu vo koluali luosi va lieca olumue oco va kuatise. Valua va kasi kovitumãlo viocipãla va eca olombanjaile kupange u kasi oku lingiwa voluali luosi Lolombangi Via Yehova, momo va kũlĩha okuti, olombongo viaco vi ka talavayiwa lavio lonjila ya sunguluka. Vakuavo va kasi ocipepi longave yo Ukrania, va talavaya lotembo yavo, ongusu kuenda ovipako oco va kuatise. Tala ovolandu amue.

Ko Polonia, valua va lieca olumue va sokiya ovina vialua vioku kuatisa kuenda omãla vamue va soneha otuvikanda tumue. Manji Bartosz Kościelniak o panga onepa Koseketa Yoku Landa wo ko Filiale yo Polonia wa lombolola ndoco: “Nda tangele ale Olosamo 110:3 poku liyaka lovitangi via liyekaila. Oko ku popia okuti, ‘omanu va Yehova va laikele oku lieca lutima wosi.’” “Nda mola ekuatiso liosi vamanji va eca. Nda molavo valua veya vonjanja yaco okuti va lieca olumue oco va kuatise kupange waco. Eci ca ndi lekisa elomboloko lia suapo Liosamo eyi.”

Manji umue o kuete ovenda yimue yi landisa ovina kolofeka vikuavo, wa hundika akãlu aye anene loku eca ongasolina yi sukiliwa. Manji yaco wa popia hati: “Kokuange eli lia kala epuluvi lioku lekisa ocisola ndi kuetele vamanjange kuenda Yehova. Nda sanjuka calua omo nda eca ekuatiso liange.” Olokonda via pangiwa vi lekisa okuti, kua eciwa eci ci pitahãla 7.700 kalitulu ongasolina kuenda vamanji va endisa ocinala ci panda 48.000 kolokilometulu, oku pesela otembo yavo longusu yavo koku eca ovina viekuatiso!

Vamanjetu va talavaya locisola kuenda lutima wosi. Omo liaco, keteke 28 Yelombo noke lioku pita 15 koloneke tunde eci kua lingiwa oseteko yatete, ko Ukrania kua eciwa 100 kolotonelada viokulia, ovina vioku liyelisa kuenda ovihemba! Omo liolombanjaile vamanjetu va eca lutima wosi kuenda omanu vakuavo, ca tepulula calua olondando koku pongiya ovina viekuatiso via eciwa komanu. Toke cilo, Olombangi Via Yehova via tumisa eci ci pitahãla 190 kolotonelada viovina viekuatiso ko Ukrania. Eci ca kuatisa ndati vamanjetu?

“Mua Kalavo Ocisola Cene!”

Eci olonjeke viaco viekuatiso via pitĩla volupale luo Lviv, Ovisoko Vieca Ekuatiso ko Ukrania yosi, via tepasa ovina viaco loku vi eca ku vamanji va suka. Olonjeke viaco via tumiwa kalupale alua, amue pokati kalupale aco, a kala ocinala ci pitahãla 1.300 kolokilometulu lo Lviv. Upange waco wa lingiwa lonjanga yalua, pole, ndaño ndoco wambata otembo yalua.a

Markus Reinhardt o panga onepa Kocimunga Cakulu vo Filiale wa popia hati: “Vokuenda kuotembo eyi yohali, vamanji valua va siata oku limbuka ndomo Yehova a tu sole kuenda esilivilo lioku kuama ciwa olonumbi viocisoko caye ndaño ceci ka kua pitile handi ocilunga cimue. Ndeci, vosi otembo yosi va vetiyiwa oku kuata konjo etendelo limue liovava kuenda liokulia ku tẽla olosemana vimue. Ukulu umue wekongelo lio ko Kyiv o tukuiwa Anton catiamẽla konumbi eyi wa popia hati: ‘Ocisoko ca Yehova ca siata oku tu pongiya poku liyaka lovitangi ka via lelukile kuenje tu eca olopandu omo liolonumbi viaco. Oku kuata okulia, ovava kuenda o radio yimue, ca popela omuenyo wetu.’ Tua sanjuka calua poku limbuka okuti, vamanji va kapako onumbi eyi, momo mekonda liaco ca ecelela o Filiale oku kuata otembo yoku sokiya ekuatiso li eciwa komanu.”

Vamanji va liyeva ndati eci ekuatiso lia pitĩla? Manji Mykola la Zinaida va popia ndoco: “Esakalalo vamanji va lekisa kokuetu, lia tu sanjuisa calua. Tua pandula calua omo liokulia kuenda ovihemba. Tua limbuka okuti Yehova eye o kasi oku tu tata.” Manji Valentyna okuti va kasi posongo yimuamue wa popia hati: “Tunde eci uyaki wa fetika, ulala woku landa okulia, unene calua. Olonjanja vimue ka tu tẽla oku landa ovina vi sukiliwa. Pole, Yehova wa mola ovina via kala oku pita letu. Eye wa nõla vamanji oco va ece okulia kolonjo vietu kuenda volonjeke viaco, mua kala muẽle ovina tua sukilile! Vepuluvi liovitangi vina tu sima okuti ka tu kuete vali ndomo tu ci linga, noke tu limbuka ekuatiso lia Yehova kuenda liocisoko caye lonjila yilikasi. . . . Ciwa calua oku limbuka ndomo Yehova a tu ĩha ekuatiso lovina tu sukila vepuluvi lia sunguluka.”

Yevhen la Iryna va tila ko Mariupol, va popia vati: “Tu pandula calua ekuatiso lia eciwa kepata lietu. Kũlĩhĩ okuti, lia pitĩla votembo ya suapo. Eci tua mola olokasia, tua sima okuti, mua kala lika ovina vioku litekula lavio, pole, eci tua vi yikula, tua mola okuti, mua kalavo ocisola cene!”

Ocili okuti, ove o pondola oku limbuka ndomo Yehova a songuila afendeli vaye pocakati cespiritu sandu oco a ece ekuatiso liocisola li sukiliwa ndaño ‘lovoyaki kuenda asapulo ovoyaki.’ Olombanjaile weca lutima wosi oco vi kuatise kupange u kasi oku lingiwa voluali luosi okuti, vialua pokati kavio vi eciwa pocakati conumbi donate.jw.org, ca kuatisavo koku tẽlisiwa kupange waco. Tu pandula calua omo liocituwa cove coku eca!

Oku Eca Ekuatiso Lonjanga Yalua Kuenda Lonjila ya Kolapo

1. 

   Keteke 24 ya Kayovo yunyamo 2022: Ocimunga Casongui, ca tava oku sokiya olombongo vimue oco vi kuatise vamanjetu ko Ukrania kuenje eci ca ecelela okuti o Filiale yi fetika oku eca ekuatiso

2. 

   Keteke 24 ya Kayovo–8 Yelombo yunyamo 2022: O Filiale yo Ukrania, yi landa ovina vimue viekuatiso kuenje yi fetika oku vi eca pocakati Covimunga vi Eca Ekuatiso. O Filiale yi li pongiyavo oku tambula loku eca ovina viekuatiso vi tunda ko Polonia

3. 

   Keteke 9 Yelombo yunyamo 2022: Ocimunga Casongui ci tava oku tuma ovina viekuatiso oco vi kuatise omanu ko Ukrania

4. 

   Keteke 10–12 Yelombo yunyamo 2022: Ku lingiwa esokiyo limue lioku seteka nda citava oku tumisa ovina viekuatiso vi tunda ko Polonia toke volupale luo Lviv ko Ukrania

5. 

   Keteke 13 Yelombo yunyamo 2022: Ovina viekuatiso vi tumiwa ndoseteko oku tunda ko Polonia toke volupale luo Lviv ko Ukrania

6. 

   Keteke 14–16 Yelombo yunyamo 2022: Konjango Yolohongele Vinene ocipepi lolupale luo Poznan ko Polonia, vamanji va lieca olumue okuti va panga onepa Koseketa Yoku Tunga, vongoluiwa oco va longeke olonjeke viovina viekuatiso muli okulia kuenda ovina vioku liyelisa

7. 

   Keteke 17 Yelombo yunyamo 2022: Noke lioloneke vikuãla tunde eci kua lingiwa oseteko ya eca onima yiwa, kua fetika oku ambatiwa ci soka 13 kolotonelada violonjeke toke pongave yo Ukrania

8. 

   Keteke 21–27 Yelombo yunyamo 2022: Loku kuama olonjila vimuamue, olonjeke via kambeleko, via longekiwa ko Polonia kuenda via tumiwa ko Ukrania kuenje oku upisa vofeka yaco, via eciwa vovaimbo mua kala esukila vokuenda kueci ci soka 24 kolowola

9. 

   Keteke 28 yunyamo 2022: Ci panda 20 koloneke noke lioku taviwa kuesokiyo ci soka 100 kolotonelada viokulia, ovina vioku liyelisa kuenda ovihemba, via tumiwa ko Ukrania

Toke cilo, Olombangi Via Yehova via tumisa eci ci pitahãla 190 kolotonelada viokulia ko Ukrania.