Ekuatiso Limue Lia Litepa Calua Lioku Longisa Lalio Embimbiliya

Kosãi ya Susu yunyamo 2021, Osungu Yolombangi Via Yehova, ya eca esapulo lioku sandekiwa kuekuatiso liokaliye lioku longisa Embimbiliya okuti, elivulu Sanjukili Omuenyo Otembo ka yi Pui!a Ove wa liyeva ndati omo liesapulo liaco? Matthew wo ko Kanada wa popia hati: “Nda yeva esanju lialua! Esanju liange lia livokiya calua eci nda tala olovideo via vamanji vamue va pulisiwa vana va lombolola esunga lieci kua pangiwila elivulu liaco kuenda ndomo lia setekiwa. Nda kevelela lesanju lialua oco ndi li mole loku fetika oku talavaya lalio.”

Elivulu Sanjukili Omuenyo Otembo ka yi Pui!, li lekisa onjila yokaliye yoku longisa Embimbiliya. Pole, eli halioko lika etepiso li kasi pokati kalio lalivulu akuavo osimbu. Nda wa talavaya ale lelivulu Sanjukili Omuenyo Otembo ka yi Pui! lio vopapelo, pamue wa limbukavo etepiso limue. Oco tu kũlĩhe esunga liaco, tu kũlĩhĩsi ndomo lia pangiwa.

Elivulu Limue Liokaliye Lia Litepa Calua

Opapelo ya Lemapo vali. Momo lie ca sukiliwila? Elivulu Sanjukili Omuenyo Otembo ka yi Pui!, li kuete eci ci pitahãla 600 koviluvialuvia via posoka okuti, ci pitahãla elivulu Embimbiliya li Pondola, ekũi kolonjanja! Kamẽla elivulu liokaliye, pali olonepa vialua okuti, ka pa sonehiwile cimue, ndaño oviluvialuvia. Asunga avali a tukuiwa ndeti, a situlula ocitangi cimue ndeci: Nda opapelo ya pelevela calua, oviluvialuvia vi kasi konẽle yikuavo yemẽla, vi pondola oku muiwila konẽle yikuavo. Oco ku tetuluiwe ocitangi caco, vamanji va panga onepa ko Departamento Internacional de Impressão (IPD ale Oseketa Yolofeka Yoku Panga Alivulu), ko Wallkill, volupale luo Nova Yorke kofeka yo Estadus Unidos yo Amerika, va seteka olopapelo vikuãla via litepa tu kasi oku talavaya lavio koloneke vilo volomakina vioku panga alivulu. Ocimunga Casonehi Cosungu Yolombangi Via Yehova, ca konomuisa olopapelo viosi kuenje ca nõlapo opapelo ka ya pelevelele calua. Ndaño ondando yopapelo yaco ya tĩlapo vali ci soka 16 kolopulusendu oku yi sokisa lopapelo tua siata oku panga layo alivulu etu akuavo, oyo yecelela okuti, olondonge Viembimbiliya vi tanga emẽla lemẽla lielivulu Sanjukili Omuenyo Otembo ka yi Pui! lonjila yimue okuti, ka vi tiamisila utima kalitalatu o kemẽla likuavo.

Ongenge yoñoño ya litepa. Oñoño yelivulu liokaliye yi kasi ndu okuti, ya litepa loloñoño vialivulu etu akuavo omo okuti, ongenge yoñoño yaco ya malusuiwa lonjila yimue ya teyuiwa. Ndeci ca siata, oñoño yelivulu liokaliye, ka yi nini, ya pembelapo kamue, kuenje cecelela oku limbuka okuti ociluvialuvia cimue ca tayiwa. Ongenge yaco yecelelavo oku teyuila elivulu kolondimbukiso vioku toka toka omo lioku talavaya lalio calua. Oñoño ya pembela, ya tĩlapo vali calua okuti, oñoño yi nina, ci sule. Kuenje olo filiale vialua via likolisilako oku talavayela kumosi oco vi lande oloñoño via pembelapo vali londando yimue yi sulemo.

Momo lie kua nõliwila ovimalẽho via tĩlapo vali? Manji umue o talavaya ko IPD (ale Oseketa Yolofeka Yoku Panga Alivulu) o lombolola ndoco: “Tu yongola okuti, ku talavayiwa ciwa lelivulu liaco. Omo liaco, tu yongola okuti, li amamako oku kala ciwa ndaño ku talavayiwa lalio calua.” Manji Eduardo una o talavaya Koseketa Yoku Panga Alivulu ko Brazil, wa popia hati: “Tua sanjuka calua omo lioku limbuka onjila ndomo ocisoko ca Yehova ca siata oku talavaya lovimalẽho viwa oco vi pange alivulu a posoka, ana a kala otembo yalua kuenda a vetiya oku talavaya lao okuti, vepuluvi limuamue ku talavayiwa ciwa lolombanjaile vi eciwa.”

Oku Panga Alivulu Vokuenda Kuefengi Lio COVID-19

Tua fetika oku panga elivulu Sanjukili Omuenyo Otembo ka yi Pui! vosãi Yelombo yunyamo 2021. Vokuenda kuefengi liaco lio COVID-19, kueya apongoloko amue. Olo Betele via yika apito, vana va talavaya voseketa yoku panga alivu okuti ka va kaile vo Betele, ka va ponduile oku iya oku kuatisa kupange waco, ndaño muẽle oku laleka vamanji vakuavo oco va linge upange wo Betele. Omo liaco, voloseketa vimue ka mua kaile etendelo liomanu va sukiliwile, handi vali, vikuavo via yikiwa vokuenda kuotembo yimue omo liovihandeleko viombiali.

Kua yuliwa ndati ovitangi viaco? Eci kua eceliwa okuti oloseketa vioku panga alivulu vi amamako oku talavaya, vamanji va kala vo Betele vo koloseketa vikuavo, va tumiwa oku kuatisa vokuenda kuotembo yimue koseketa yoku panga alivulu. Manji Joel o talavaya ko IPD wa popia hati: “Ocituwa kuenda ombili vamanji va lekisa yoku lilongisa ovina vikuavo, via kuatisa calua koku linga upange waco.”

Ndaño lovitangi, tua panga ale olohuluwa violokopia vielivulu Sanjukili Omuenyo Otembo ka yi Pui! Oco ku pangiwe alivulu aco, ku sukiliwa ovimalẽho vialua ndeci, ocikete ca pelevela coku kopiyala, opapelo ya pelevela yoku sitika koñoño, opapelo yaño, otinda kuenda o kola. Eci pa pita lika olosãi vitãlo viatete, ci pitahãla 2,3 kolohuluwa violondolale (okuti, olombongo vio ko EUA), via pesiwila lika koku landa ovimalẽho. Oco ku tetẽliwe olombongo, tua panga lika etendelo lialivulu akongelo a sukila.

“Elivulu Limue Lia Pongiyiwa Ciwa”

Alongisi kuenda olondonge Viembimbiliya, va liyevite ndati omo liekuatiso liokaliye lioku longisa Embimbiliya? Manji Paul wo ko Australia wa popia hati: “Elivulu Sanjukili Omuenyo Otembo ka yi Pui!, liwa calua oku talavaya lalio okuti, ndi sanjukila oku longisa lalio alilongiso. Ovina vi kasimo vi vetiya calua kuenda vi kisika oku sapela. Mu sangiwa olonumbi via lomboluiwa ciwa, apulilo a vetiya oku vangula eci ci kasi vutima, olovideo, alitalatu, otulokasia kuenda onepa yovimãho viondonge. Elivulu limue lia pongiyiwa ciwa okuti, li ndi vetiya oku mioñolola oku longisa kuange.”

Ondonge yimue Yembimbiliya yo ko Estadus Unidus ya popia hati: “Ndi sole calua elivulu liokaliye. Oviluvialuvia vi ndi kuatisa oku kuata elomboloko lietosi lia velapo. Olovideo vi vetiya utima wange loku nõlapo oku linga cimue.” Ondonge eyi yi lilongisa luvali vosemana kuenda ya siata oku enda kolohongele viekongelo.

Olokopia vialua vielivulu Sanjukili Omuenyo Otembo ka yi Pui!, handi vi kasi oku amamako oku pangiwa kalimi alua. Toke cilo, Osungu Yolombangi Via Yehova, ya tava okuti, elivulu eli li sandekiwa kueci ci soka 710 kalimi okuti, etendelo liaco lia pitahãla 340 kalimi a sandeka elivulu Embimbiliya li Pondola!

Ku fetiwa ndati ondando yoku panga alivulu? Ci lingiwa pocakati colombanjaile vi eciwa kupange wetu u kasi oku lingiwa voluali luosi poku kuama olonjila vionumbi donate.jw.org. Tu eca olopandu omo liocituwa cove coku eca, momo ci tu kuatisa oku panga alivulu loku kuatisa vana va yongola oku lilongisa catiamẽla ku Yehova loku ‘Sanjukila omuenyo otembo ka yi pui.’—Psalms 22:26.