“Kali Vakuepandi, Loku Pama”

1-2. Konepa yipi Ukristão umue a sokisiwa losapalalo yimue ya lepa calua? (1 Va Korindo 15:58)

KUNYAMO 1978, o sapalalo yimue ya lepa calua, ya tungiwa kolupale luo Tokyo kofeka yo Japãu. Omanu valua va enda oku lipula ndomo o sapalalo yaco ya laikele oku amamako oku talama, omo volupale luaco mua enda oku pita ovilemawe vialua. Nye vakuakutunga va linga oco osapalalo yaco yamameko oku talama? Vakuoloño yumesele woku tunga va sokiya okuti, osapalalo yaco yi tungiwa lonjila yimue ya pama calua kuenje ndaño yi tuñunyiwa locilemawe oyo ka yi kupuka. Akristão va sokisiwa ndosapalalo yaco. Lonjila yipi?

² Ukristão o sukila oku kũlĩha etepiso li kasi koku pama kuenda oku lekisa esunguluko. Eye o sukila oku lekisa ekolelo lia pama koku teyuila ovihandeleko kuenda olonumbi via Yehova. (Tanga 1 Va Korindo 15:58.) Eye wa “likapelako oku pokola” kuenda ka konyõha. Handi vali, eye o sukila oku lekisa ‘esunguluko’ eci ekalo li ecelela, ale li kisika oku ci linga. (Tia. 3:17) Ukristão umue wa lilongisa oku lekisa esunguluko kakatela kovisimĩlo viaye, ale oku kala ukuacekelela. Vocipama cilo, tu konomuisa ndomo tu lekisa okuti, tu kuete ekolelo liapama calua. Tu ka limbukavo olonjila vitãlo Satana a siata oku kuama oco a tu kokele okuti ka tu amamako oku pokola ku Yehova kuenda tu lilongisa ndomo tu tamalala kalikolisilo aye.

TU PONDOLA OKU PAMA NDATI?

3. Ovihandeleko vipi via Fũ Usovoli Wovihandeleko vi sangiwa Kovilinga 15:28, 29?

³ Omo okuti Yehova eye Fũ Usovoli Wovihandeleko, eye wa siata oku eca ovihandeleko via sunguluka kafendeli vaye. (Isa. 33:22) Ndeci, kocita catete osungu yakulu ya tukula olonjila vitatu Akristão va sukilile oco va pame, ndeci: (1) poku likala efendelo lioviteka kuenda oku fendela lika Yehova, (2) poku pokola kocihandeleko ca Yehova catiamẽla koku yuvula osonde kuenda (3) poku pokola onumbi ya Yehova yatiamẽla koku yuvula evĩho liukahonga. (Tanga Ovilinga 15:28, 29.) Akristão koloneke vilo, va pokola ndati ku Yehova volonumbi evi vitatu?

4. Tu lekisa ndati okuti tu fendela lika Yehova? (Esituluilo 4:11)

⁴ Etu tu yuvula efendelo lioviteka poku fendela lika Yehova. Eye wa handelekele va Isareli oku fendela lika eye. (Esin. 5:6-10) Yesu eci a setekiwa Leliapu, wa popiwa hati tu sukila oku fendela lika Yehova. (Mat. 4:8-10) Omo liaco, etu ka tu fendela oviteka. Etu ka tu velisapovo calua omanu, ci kale okuti asongui vatavo, olombiali viopulitika, ale omanu va kemãla voluali ndeci vakuambunje, olonjimbi okuti tu va tenda ndolosuku. Tua nõlapo oku tiamẽla ku Yehova kuenda oku fendela lika una wa “lulika ovina viosi.”—Tanga Esituluilo 4:11.

5. Momo lie tu pokuila kocihandeleko ca Yehova catiamẽla komuenyo kuenda kosonde?

⁵ Tu teyuila ocihandeleko ca Yehova catiamẽla koku kola kuomuenyo kuenda kuosonde. Momo lie? Momo Yehova wa popia okuti osonde yi lomboloka omuenyo kuenda ombanjaile yimue ya tunda kokuaye. (Ovis. 17:14) Eci Yehova a ecelela onjanja yatete oco omanu valie ositu yovinyama, wa va handeleka oco ka va kalie osonde. (Efet. 9:4) Eye wa pitulula onumbi yaco eci a eca ku va Isareli ocihandeleko ca eciwile ku Mose. (Ovis. 17:10) Kuenda eye wa handelekele osungu yakulu kocita catete oco va sapuile Akristão vosi oku “amamako oku lilava . . . kosonde.” (Ovil. 15:28, 29) Etu lepandi, tu pokola kocihandeleko caco poku nõla ciwa ovihemba tu tava oku tatiwa lavio.b

6. Nye tu sukila oku linga oco tu pokole kolonumbi via Yehova?

⁶ Tu pokola kolonumbi via Yehova viatiamẽla koku yuvula evĩho liukahonga. (Va Hev. 13:4) Upostolo Paulu poku tukula vupopi wocindekaise o tu lungula oco tu “ipaye ovimatamata vietimba lietu,” ci lomboloka okuti, tu sukila oku linga cosi citava oco tu imule olonjongole viosi vĩvi. Etu tu yuvula oku vanja, ale oku linga cimue ci tu vetiya oku linga evĩho liukahonga. (Va Kol. 3:5; Yovi 31:1) Eci tu setekiwa oku linga cimue cĩvi, lonjanga yalua tu sukila oku yuvula ovisimĩlo ale ovilinga vi pondola oku nyõla ukamba wetu la Suku.

7. Nye tu sukila oku nõlapo oku linga kuenda momo lie?

⁷ Yehova o lavoka okuti, tu kala “vakuepokolo vutima.” (Va Rom. 6:17) Ovina viosi a tu sapuila viwa kokuetu kuenda ka tu pondola oku pongolola ovihandeleko viaye. (Isa. 48:17, 18; 1 Va Kor. 6:9, 10) Etu tu likolisilako oku sanjuisa Yehova kuenda tu lekisa ovituwa vimuamue viukualosamo wa popia hati: “Nda nõlapo oku pokola kolonumbi viove otembo yosi, toke kesulilo.” (Osa. 119:112) Pole, Satana o ka seteka oku honguisa onjila tua nõla. Oloseteko vipi eye a kuama?

SATANA O SETEKA NDATI OKU HONGUISA ONLONJILA TU NÕLA?

8. Satana wa siata oku kuama ndati elambalalo oco a honguise onjila tua nõla?

⁸ Elambalalo. Eliapu li kuama olonjila ndeci ungangala kuenda oku kuamawa, oco a tateke olonjila tu yongola oku kuama. Ocimãho caye oku ‘nyõla’ ukamba tu kuete la Yehova. (1 Pet. 5:8) Akristão vo kocita catete va saluisiwa, va tipuiwa kuenda va pondiwa omo lionjila va nõlelepo yoku amamako lekolelo. (Ovil. 5:27, 28, 40; 7:54-60) Satana koloneke vilo, o kasi oku amamako oku kuama elambalalo. Tua siata oku ci limbuka konjila ndomo va tata lungangala vamajetu ko Russia, lo kolofeka vikuavo kuenda kolonjila vikuavo vioku lambalala omunu lomunu pokati ketu.

9. Tukula ulandu umue u lekisa esilivilo lioku kuata utate ndaño kueya oseteko yimue ka yi limbukiwa.

⁹ Oloseteko vi kasi ndonjanjo. Satana o talavaya ‘latutu’ oco a tu lambalale. (Va Efe. 6:11) Kũlĩhĩsa ulandu wa manji umue o tukuiwa Bob, wa kala kosipitali oco a pelaliwe. Eye wa sapuila olondotolo okuti lalimue eteke a ka tava oku kapiwa osonde. Ndotolo ukuakupelala wa tava poku sumbila onjila eye a nõla. Pole, kuteke osimbu ka pelaliwile ondotolo yikuavo yeya oku nyula Bob noke liepata liaye lia tiukila konjo. Ondotolo yaco ya sapuila manji Bob okuti ndaño okuti ka kapiwa osonde, o sukila oku pongiya osonde yimue momo pamue yi ka sukiliwa. Citava okuti ndotolo wa sima okuti manji Bob o pongolola ovisimĩlo viaye, momoi vepuluvi liaco epata liaye ka lia kalepo. Pole manji Bob wa amamako lekolelo loku popia okuti, ka ponduile oku tava oku kapiwa osonde ndaño kueya ocitangi cimue.

10. Momo lie ovisimĩlo viomanu vi kokela ohele? (1 Va Korindo 3:19, 20)

¹⁰ Ovisimĩlo viomanu. Nda tua kuata ovisimĩlo ndevi viomanu ka va sumbilile ovihandeleko via Yehova, tu pondolavo oku yanduluka Yehova kuenda oku sepula ovihandeleko viaye. (Tanga 1 Va Korindo 3:19, 20.) “Olondunge violuali lulo” olonjanja vialua vi tu vetiyila kolonjongole vietimba. Akristão vamue ko Pergamo kuenda ko Tuatera, va yapuisiwile lomanu va lisunguile lavo okuti va kala vakueviho liukanga kuenda vakuakufendela oviteka. Yesu wa eca kakongelo aco elungulo limue linene, omo va kala oku ecelela evĩho liukahonga. (Esit. 2:14, 20) Koloneke vilo omanu tu lisungue lavo va pondola oku tu vetiya oku tava kovisimĩlo ka via sungulukile. Vakuepata lietu kuenda akamba pamue va seteka oku tu vetiya oku tava okuti tua kapako calua ovihandeleko via Yehova kuenda ka ci lingi cimue oku lueya ocihandeleko caco. Ndeci, ovo va pondola oku popia okuti, ka ci kuete esilivilo oku liyelisa kovituwa kuenda olonumbi Viembimbiliya viatiamẽla koku liyelisa, ka vi kuetevo esilivilo.

11. Osimbu tu amamako lepandi, nye tu sukila oku yuvula?

¹¹ Olonjanja vimue, pamue tu sima okuti, Yehova ka ti ĩha olonumbi vi lomboloka ciwa. Citava okuti tu setekiwa oku yuvula oku ‘kuama ovina via sonehiwa.’ (1 Va Kor. 4:6) Asongui vatavo koloneke via Yesu, va kuata eko omo liekandu liaco. Poku vokiya olondaka viavo kovihandeleko via Suku, ovo va kapa ocilemo pokati komanu vakuavo. (Mat. 23:4) Yehova wa siata oku tu ĩha olonumbi viwa pocakati Condaka yaye kuenda ocisoko caye. Ka kuli esunga lioku vokiya kolonumbi eye a eca. (Olosap. 3:5-7) Omo liaco, ka tu ka pinyanyuisi ovina via sonehiwa Vembimbiliya, ale oku kuama olonumbi via tumbikiwa letu muẽle.

12. Satana wa siata oku talavaya ndati “lovisimĩlo viaño”?

¹² Ovisimĩlo viaño. Satana o talavaya “lovisimĩlo viaño” kuenda ‘ovina viaño violuali,’ oco a yapuise loku tepa omanu. (Va Kol. 2:8) Kocita catete, vovisimĩlo viaco mua kongelele olondunge violuali via kunamẽla kovisimĩlo viomanu, lalongiso a va Yudea ana ka a kunamẽlele Kovisonehua kuenda alongiso vokuti Akristão va ponduile oku lava Ocihandeleko ca eciwile ku Mose. Ovisimĩlo viaco viaño via yapuisa omanu kono yolondunge viocili, okuti Yehova. Koloneke vilo, Satana o talavaya lo Internet oco a sandeke ovina ka vi kuete uvangi wocili kuenda asapulo esanda a siata oku sandekiwa lasongui vopulitika. Etu tua mola asapulo aco esanda vokuenda kuefengi lio KOVID-19.c Olombangi Via Yehova vina via tava kolonumbi via eciwa locisoko va yuvula asakalalo a lipita la vana va enda oku yevelela asapulo esanda.—Mat. 24:45.

13. Momo lie tu sukilila oku kuata utate lovitalukilo?

¹³ Ovitalukilo. Tu sukila oku tiamisila utima ‘kovina via velapo vali.’ (Va Fil. 1:9, 10) Ovitalukilo vi pondola oku nyana otembo yetu kuenda ongusu yoku linga ovina vi kuete esilivilo. Ovina vimue tua siata oku linga ndeci, oku lia, oku nyua, oku linga olomapalo kuenda ovopange oku sanda eteku, vi pondola oku nyana otembo yetu nda tua ecelela okuti vi kala ovina via velapo komuenyo wetu. (Luka 21:34, 35) Handi vali, oloneke viosi tua siata oku yeva kuenda oku tanga asapulo opulitika. Tu sukila oku kuata utate wokuti ka tu yapuisiwa lasapulo aco. Momo nda ka tua ci lingile tu ka nõlapo oku kuatisa kolonepa viaco, ci kale kovisimĩlo kuenda vutima. Satana o talavaya lovina via tukuiwa ndeti, locimãho coku honguisa onjila tua nõlapo yoku linga eci ca sunguluka.Tu konomuisi ndomo tu pondola oku tamalãla kalikolisilo aco kuenda oku amamako lepandi.

TU AMAMAKO NDATI LEPANDI?

14. Nye ci ka tu kuatisa oku amamako oku tiamẽla konele ya Yehova?

¹⁴ Sokolola kesunga lieci wa tumbikila omuenyo wove ku Yehova loku papatisiwa. Ove wa nõla onjila yaco, momo wa yongola oku tiamẽla konele ya Yehova. Sokolola kueci ca ku kuatisa oku limbuka okuti wa sanga ocili. Ove wa kuata ukũlĩhĩso wa suapo wa Yehova kuenda wa fetika oku u sumbila loku u sola nda Isiove wokilu. Wa fetika oku kuata ekolelo kuenda ca ku vetiya oku likekembela. Utima wove wa ku vetiya oku siapo ovina ka via sungulukile kuenda oku ambata omuenyo umue u likuata locipango ca Suku. Ove wa yeva ekavuluko eci wa limbuka okuti Suku wa ku ecela. (Osa. 32:1, 2) Ove wa fetika oku endaenda kolohongele Viakristão kuenda oku sapuilako vakuẽne ovina viwa wa kala oku lilongisa. Omo okuti wa linga Ukristão umue wa litumbika loku papatisiwa, ove cilo o kasi oku endela vonjila yomuenyo kuenda wa nõlapo oku amamako oku endela vonjila yaco.—Mat. 7:13, 14.

15. Oku lilongisa kuenda oku sokolola kovina tua tanga ci tu kuatisa ndati?

¹⁵ Lilongisa Ondaka ya Suku kuenda sokolola kovina o tanga. Ndeci uti umue nda u kuete olombombo via kõla ciwa u pama, ekolelo lietu li pondolavo oku pama nda lia kunamẽla Kondaka ya Suku. Osimbu uti umue u kula olombombo vilio, viñila vali kosi kuenda vi lisanduila vali kupãla. Eci tu lilongisa loku sokolola ovina tu tanga, tu pamisa vali ekolelo lietu kuenda tu tava okuti olonjila via Suku ovio via velapo. (Va Kol. 2:6, 7) Sokolola ndomo elongiso, alungulo kuenda eteyuilo lia Yehova lia kuatisa afendeli vaye kosimbu. Ndeci, Esekiele wa luluvalele lutate eci ungelo umue a linga oseteko yonembele a mola vocinjonde. Ocinjonde caco ca pamisa Esekiele kuenda ci tu longisa ovina viwa viatiamẽla konjila ndomo tu teyuila olonumbi via Yehova kefendelo liocili.d (Esek. 40:1-4; 43:10-12) Etu tu kuatisiwavo eci tu sanda otembo yoku lilongisa kuenda oku sokolola kovina tua tanga Vondaka ya Suku.

16. Oku kuata utima umue wa pama ca kuatisa ndati manji Bob? (Olosamo 112:7)

¹⁶ Kuata utima umue wa pama. Soma Daviti wa popele okuti lalimue eteke a ponduile oku siapo ocisola o kuatela Yehova eci a popia hati: “A Suku, utima wange wa pama.” (Osa. 57:7) Tu pondolavo oku kuata utima umue wa pama, nda tua kolela lutima wosi ku Yehova. (Tanga Olosamo 112:7.) Kũlĩhĩsa ndomo eci ca kuatisa manji Bob, wa tukuiwa kefetikilo. Eci vo sapuila okuti va ponduile oku seleka osonde yaye loku yi tiula vali nda ci sukiliwa, lonjanga yalua wa tambulula okuti nda ca sukila oku u kapa osonde, eye wa ponduile oku tunda vosipitali yaco. Noke manji Bob wa popia hati, “Ame sia kuatele atatahãi ale oku sakalala.”

17. Nye tu lilongisila kulandu wa manji Bob? (Talavo ociluvialuvia.)

¹⁷ Manji Bob wa tẽla oku pandikisa momo wa nõlelepo oku amamako oku kuata utima umue wa pama osimbu handi ka endele kosipitali. Tete, eye wa yonguile oku sanjuisa Yehova. Vali, wa lilongisa lutate eci Embimbiliya kuenda alivulu etu a popia catiamẽla koku kola kuomuenyo kuenda kuosonde. Tatu, eye wa kolelele okuti oku kuama olonumbi via Yehova, ca laikele oku u nenela asumũlũho ka a pui. Etu tu pondolavo oku kuata utima umue wa pama ndaño tu liyaka lovitangi.

18. Ulandu wa Balaka u tu longisa ndati catiamẽla koku kolela ku Yehova? (Tala ociluvialuvia koñoño.)

¹⁸ Kolela ku Yehova. Konomuisa ndomo Balaka a kuata onima yiwa omo lioku kolela kolonumbi via Yehova. Ndaño ka kua kaile ociyepelo cimue, ale onjelia, kolonepa viosi Yehova wo sapuila oco a ka liyake lasualali vo ko Kanana va limalehele calua va songuiwile la Sisera. (Olong. 5:8) Uprofeto ukãi Devora wa sapuila Balaka oco a lokile kolomunda oku ka lisanga la Sisera kuenda eci ci soka 900 kakalu wuyaki. Ndaño ku va Isareli ca molẽhele ndu okuti ka va ka yula uyaki waco omo ka va kuatele akãlu uyaki, lopo, Balaka wa pokola. Eci asualali va lokila Komunda Tavore, Yehova wa lokisa ombela yalua. Akãlu uyaki a Sisera a saka volonata kuenda Yehova wa eca ku Balaka eyulo. (Olong. 4:1-7, 10, 13-16) Cimuamue haico okuti Yehova o tu ĩha eyulo, nda tua kolela kokuaye kuenda kolonumbi eye a eca pocakati cocisoko caye.—Esin. 31:6.

NÕLAPO OKU AMAMAKO OKU PAMA

19. Momo lie wa nõlelapo oku amamako oku pama?

¹⁹ Uyaki wetu woku amamako oku pama u kamamako osimbu tu kasi voluali lulo. (1 Tim. 6:11, 12; 2 Pet. 3:17) Ka tu ka eceleli oku yapuisiwa, lelambalalo, loloseteko vi kasi ndonjanjo, lovisimĩlo viomanu, lovisimĩlo viaño kuenda ovitalukilo. (Va Efe. 4:14) Pole, tu amamiko oku pama, loku kuata epandi koku fendela Yehova, loku lekisa ekolelo lia pama koku sola Yehova kuenda oku pokola kolonumbi viaye. Pole, olonjanja vimue, tu sukila oku lekisa esunguluko. Vocipama cikuãimo tu ka konomuisa ndomo Yehova la Yesu ongangu ya velapo yoku lekisa esunguluko.