Anga hẽ Yehova o ka Tambulula Olohutililo Viange?

1-2. Momo lie pamue tu liyevela okuti Yehova ka kasi oku tambulula olohutililo vietu?

“SANGA esanju koku fendela Yehova, kuenje eye o ka tẽlisa olonjongole viutima wove.” (Osa. 37:4) Eyi ohuminyo yimue yi komõhisa! Anga hẽ tu lavoka okuti Yehova o tu ĩha vina viosi tuopinga vepuluvi liaco? Momo lie epulilo eli li kuetele esilivilo? Kũlĩhĩsa ocindekaise ci kuãimo. Manji umue ufeko o likutilila, oco a pindisiwe Kosikola Yakundi Vusoma. Pole, pa pita anyamo alua okuti ka lalekiwa. Manji umue ukuenje o likutilila ku Yehova oco a kaye omo liuvei umue wakãla a kasi lawo, oco a kuatise kovopange ekongelo. Pole, uvei waco ka u piti. Olonjali Akristão va likutilila oco omãla vavo vamameko oku endela vocili. Pole, omãla vaco va nõlapo oku liwekapo oku vumba Yehova.

² Citava okuti wa pingilevo cimue ku Yehova, pole, handi kua ci tambuile. Kuenje pamue o sima okuti, Yehova o tambulula lika olohutililo via vakuene, viove sio. Ale pamue o sima okuti wa linga cimue cĩvi. Manji umue ukãi o tukuiwa Janiceb wa liyevavo ndoco. Eye lulume waye va likutilila ku Yehova, catiamẽla konjongole yavo yoku ka talavaya ko Betele. Eye hati: “Nda lavokaile okuti ndopo tu vilikiyiwa ko Betele.” Pole, pa pita anyamo alua, lopo ka tua lalekiwile. Manji Janice wamisako hati: “Nda kuata esumuo lialua kuenda atatahãi. Nda enda oku lipula nda nda linga cimue ca sumuisa Yehova. Nda likutilila calua oco ngende ko Betele. Momo lie Yehova ka tambuluile ohutililo yange?”

3. Nye tu konomuisa vocipama cilo?

³ Olonjanja vimue tu lipula nda Yehova o kasi oku tambulula olohutililo vietu. Toke muẽle alume vamue vakuekolelo vo kosimbu, va endavo oku lipula ndoco. (Yovi 30:20; Osa. 22:2; Hav. 1:2) Nye ci ku kuatisa oku kolela okuti Yehova o ka tambulula olohutililo viove? (Osa. 65:2) Oco tu kuatisiwe oku tambulula epulilo eli, tete sukila oku tambulula atosi a kuãimo: (1) Nye tu lavoka ku Yehova? (2) Nye Yehova a lavoka kokuetu? (3) Momo lie tu sukilila oku pinga ovina vikuavo?

NYE TU LAVOKA KU YEHOVA?

4. Ndomo ca tangiwa ku Yeremiya 29:12, nye Yehova a likuminya oku linga?

⁴ Yehova o likuminya oku yevelela olohutililo vietu. (Tanga Yeremiya 29:12.) Suku yetu o sole afendeli vaye vakuekolelo kuenje o yevelela lutate olohutililo viavo. (Osa. 10:17; 37:28) Pole, ka ci lomboloka okuti eye o ka tu ĩha cosi tu u pinga. Ovina vimue tu pinga pamue tu ka vi tambula lika voluali luokaliye.

5. Cipi ocimãho ca Yehova poku yevelela olohutililo vietu? Ci lombolola.

⁵ Yehova o kuete ocimãho cimue eci a yevelela olohutililo vietu. (Isa. 55:8, 9) Ocina cimue eye a yongola, ceci okuti ongongo yosi yi yuka lomanu vana vo pokola lutima wosi ndombiali yavo. Pole, Satana wa popia okuti omanu nda va kala ciwa nda va livialele ovo muẽle. (Efet. 3:1-5) Oco cece uvangi wokuti Eliapu ohembi, Yehova wa ecelela okuti omanu va li viala ovo muẽle. Ocili okuti, koloneke vilo uviali womunu wa siata oku koka ovitangi vialua. (Uku. 8:9) Tua kũlĩha okuti Yehova ka maliko ovitangi viaco viosi cilo. Nda eye wa ci lingile, vamue nda va sima okuti uviali womunu u tẽla oku malako ovitangi vietu.

6. Momo lie tu sukilila oku kolela okuti otembo yosi Yehova o ka linga eci ciwa kuenda cesunga?

⁶ Yehova o pondola oku tambulula apingilo etu lonjila ya litepa. Ndeci, eci soma Hesekiya a vela calua, wa pinga ku Yehova oco a kaye. Kuenje, Yehova wo kayisa. (2 Olos. 20:1-6) Pole, eci upostolo Paulu a pinga ku Yehova oco o upe “osongo ketimba” okuti pamue ocitangi cimue cuvei, Yehova kopileko ocitangi caco. (2 Va Kor. 12:7-9) Kũlĩhĩsavo ulandu wupostolo Tiago kuenda Petulu. Soma Herode wa yonguile oku va ponda kavali kavo. Ekongelo liosi lia likutililako Petulu kuenda Tiago. Pole, ndaño ndoco, Tiago wa pondiwa, osimbu okuti, Petulu wa yovuiwa lungelo umue. (Ovil. 12:1-11) Pamue tu lipula ndoco: ‘Momo lie Yehova a yovuila Petulu, pole, Tiago sio?’ Embimbiliya ka li ci lombolola.c Tu pondola oku kolela okuti Yehova “lalimue eteke a lekisa ekambo liesunga.” (Esin. 32:4) Tua kũlĩhavo okuti Petulu la Tiago vosi yavo va taviwile la Yehova. (Esit. 21:14) Olonjanja vimue Yehova ka tambulula olohutililo vietu ndomo tua lavokaile. Omo lioku kolela okuti Yehova olonjanja viosi o linga eci ciwa kuenda cesunga, tu tava konjila yosi eye a nõlapo yoku tambulula olohutililo vietu.—Yovi 33:13.

7. Nye tu sukila oku yuvula kuenda momo lie?

⁷ Tu likolisilako oku yuvula oku sokisa ocitangi cetu leci ca vakuetu. Ndeci, citava okuti tu pinga ku Yehova oco a tu kuatise kocitangi cimue, pole, pamue eye ka tambulula epingilo liaco. Noke tu limbuka okuti omunu ukuavo wa linga epingilo limuamue kuenje Yehova wa li tambulula. Manji umue o tukuiwa Anna wa pita lulandu waco. Eye wa likutilila oco ulume waye Matthew a kaye kuvei waye wo kanser. Vepuluvi liaco, vamanji vavali vakãi va kuka, va kalavo oku liyaka luvei waco. Manji Anna wa likutililako calua ulume waye Matthew kuenda vamanji vavali vakãi. Vamanji akãi va kaya, pole, Matthew ulume wa manji Anna wa fa. Kuenje manji Anna wa sokolola ndoco, nda vamanji akãi va kaya ci lekisa okuti Yehova wa va kuatisa. Nda Yehova wa kuatisa vamanji akãi, momo lie ka tambuluile ohutililo ya manji Anna oco ulume waye a kayevo? Ocili okuti ka tua kũlĩhĩle esunga lieci vamanji akãi va kayela. Eci tua kũlĩha ceci okuti, eye o ka malako ohali yosi kuenda o kuete onjongole yoku ka pindula akamba vaye vosi va fa.—Yovi 14:15.

8. (a) Ndomo ca tangiwa ku Isaya 43:2, Yehova o tu kuatisa ndati? (b) Olohutililo vi tu kuatisa ndati eci tu kasi oku liyaka lovitangi? (Tala ovideo losapi hati: Olohutililo vi tu Kuatisa Oku Liyaka Lovitangi.)

⁸ Yehova o ka tu kuatisa olonjanja viosi. Isietu ukuacisola Yehova ka yongola okuti tu tala ohali. (Isa. 63:9) Ndaño ndoco, eye ka tateka ovitangi vietu viosi tu liyaka lavio vina vi sokisiwa lolondui ale lulienge. (Tanga Isaya 43:2.) Pole, o tu likuminya oku tu kuatisa eci tu “pita” lavio. Eye ka ka ecelela okuti ovitangi viaco vi tepulula ukamba wa pama tu kuete laye. Yehova o tu ĩhavo unene wespiritu sandu liaye oco li tu kuatise oku pandikisa. (Luka 11:13; Va Fil. 4:13) Kuenje tu pondola oku kolela okuti, olonjanja viosi tu ka kuata ovina tu sukila oco tu tẽle oku pandikisa kuenda oku amamako oku u kolela.d

NYE YEHOVA A LAVOKA KOKUETU?

9. Ndomo ca tangiwa ku Tiago 1:6, 7, momo lie tu kolelela okuti Yehova o ka tu kuatisa?

⁹ Yehova o lavoka okuti, tu kolela kokuaye. (Va Hev. 11:6) Pamue tu liyeva okuti oku pandikisa lovitangi vietu via tĩla calua. Kuenje tu fetika oku kuata atatahãi nda Yehova o ka tu kuatisa muẽle. Pole, Embimbiliya li tu ĩha ohuminyo yokuti, lunene wa Suku tu pondola oku “londa kocimbaka cimue.” (Osa. 18:29) Omo liaco, ka tu ka eceleli okuti atatahãi etu a livokiya, pole, tu sukila oku likutilila lekolelo loku lavoka okuti Yehova o ka tambulula olohutililo vietu.—Tanga Tiago 1:6, 7.

10. Tukula ocindekaise cimue ndomo tu pondola oku linga ovina vi likuata lolohutililo vietu.

¹⁰ Yehova o lavoka okuti ovilinga vietu vi likuata lolohutililo tu linga. Ndeci, manji umue ulume o pinga ku Yehova, oco o kuatise oku kuata oloneke viepuyuko kupange waye oco a ende kohongele yofeka. Yehova o tambulula ndati ohutililo yaco? Eye o pondola oku eca utõi ku manji oco a tẽle oku vangula la cime caye. Pole, manji o sukila oku enda ku cime oku ka linga epingilo. Citava okuti eye o sukila oku pinga olonjanja vialua. Ale oku pongolola elivala lieteke liaye liupange lomunu ukuavo va talavayela kumosi. Handi vali, nda citava eye o pinga oco vo tepulule kofeto yaye.

11. Momo lie tu sukilila oku likutilila olonjanja vialua catiamẽla kasakalalo etu?

¹¹ Yehova o lavoka okuti tu amamako oku likutilila catiamẽla kasakalalo etu. (1 Va Tes. 5:17) Yesu wa longisa okuti, apingilo amue ka a ka tambuluiwa vepuluvi liaco. (Luka 11:9) Omo liaco, ku ka liwekepo! Amamako oku likutilila kuenda ci linga lolupili. (Luka 18:1-7) Eci tu amamako oku likutilila catiamẽla kocitangi cimue, tu lekisa ku Yehova okuti epingilo lietu li kuete esilivilo. Tu lekisavo ekolelo lietu kuloño waye woku tu kuatisa.

MOMO LIE TU SUKILILA OKU PINGA OVINA VIKUAVO?

12. (a) Epulilo lipi tu sukila oku linga liatiamẽla kapingilo etu kuenda momo lie? (b) Ekolelo lipi tu sukila oku kuata liokuti olohutililo vietu vi lekisa esumbilo ku Yehova? (Tala okakasia losapi hati: “Apingilo Ange a Lekisa hẽ Esumbilo ku Yehova?”)

¹² Nda ka tua tambuile ovina tua pinga vohutililo, tu sukila oku linga apulilo atatu kokuetu muẽle. Liatete lieli: ‘Ñasi hẽ oku likutilila ocina ca sunguluka?’ Olonjanja vialua tu sima okuti tua kũlĩha eci ca velapo kokuetu muẽle. Pole, ovina tu pinga pamue ka vi tu kuatisa vokuenda kuotembo yalua. Nda tu kasi oku likutilila catiamẽla kocitangi cimue, pamue ci tambuluiwa lonjila yimue ya velapo okuti yina tua pinga yi sule. Pamue ovina tu pinga ka vi likuata locipango ca Yehova. (1 Yoa. 5:14) Ndeci, kũlĩhĩsa ocindekaise colonjali via tukuiwa kefetikilo. Ovo va pinga ku Yehova oco omãla vavo vamameko oku endela vocili. Ocili okuti, epingilo limue lia sunguluka. Pole, Yehova ka kisika laumue pokati ketu oco o vumbe. Eye o yongola okuti vosi yetu oku kongelamo omãla, omunu lomunu o nõla oku u vumba. (Esin. 10:12, 13; 30:19, 20) Kuenje eci olonjali vi sukila oku pinga ku Yehova ceci okuti, eye o vetiya ovitima viomãla vavo oku sola Yehova kuenda oku kala akamba Vaye.—Olosap. 22:6; Va Efe. 6:4.

13. Ndomo ca tangiwa ku Va Heveru 4:16, vepuluvi lipi Yehova a tu kuatisa? Ci lombolola.

¹³ Epulilo liavali lieli, ‘Eli hẽ epuluvi lioku tambulula epingilo liange?’ Pamue tu yongola okuti ohutililo yetu yi tambuluiwa lonjanga. Pole, Yehova wa kũlĩha epuluvi liwa tu sukila ekuatiso. (Tanga Va Heveru 4:16.) Eci ka tu tambula lonjanga eci tua pinga, pamue tu sima okuti, Yehova wa ‘likala’ epingilo lietu. Pole, citava okuti etambululo liaye lieli liokuti ‘Handi talamẽla.’ Sokolola kocindekaise ca manji ukuenje wa likutilila oco a kaye kuvei waye. Nda Yehova wa lingile ocikomo oco o kayise, Satana nda wa popia okuti manji o kasi lika oku amamako oku vumba Yehova omo o kayisa. (Yovi 1:9-11; 2:4) Pole, Yehova wa sokiya ale otembo a ka malako ovovei osi. (Isa. 33:24; Esit. 21:3, 4) Osimbu otembo yaco ka ya pitĩlile, ka tu lavoka oku sakuiwa locikomo. Kuenje eci manji a sukilile oku pinga ku Yehova, ongusu kuenda ombembua yo vutima oco a tẽle oku pandikisa kuvei waye kuenda oku amamako oku u vumba lekolelo.—Osa. 29:11.

14. Nye wa lilongisila kulandu wa manji Janice?

¹⁴ Sokolola kulandu wa manji Janice, wa likutilila catiamẽla koku ka talavaya ko Betele. Pa pita anyamo atãlo toke eci eye a kuata elomboloko liokuti Yehova wa tambulula ohutililo yaye, pole, lonjila yimue ya litepa. Eye hati: “Yehova wa ecelela otembo yosi eyi, oco ndi kale Ukristão wa pama. Ekolelo liange kokuaye lia sukilile oku pama. Nda sukilile oku mioñolola ocituwa cange coku lilongisa pokolika. Nda sukililevo oku lilongisa okuti ndi pondola oku kuata esanju kocikele cosi coku vumba Yehova.” Noke manji Janice lulume waye va lalekiwa kupange woku nyula akongelo. Eci manji Janice a sokolola kovina via pita wa popia hati: “Yehova wa tambulula olohutililo viange, ndaño lonjila yimue sia lavokaile. Nda pita otembo yimue oco ndi limbuke okuti etambululo liaye lia kala ombanjaile yimue yiwa kokuange. Mandula calua Yehova omo lioku kuata epuluvi lioku limbuka ocisola kuenda ohenda yaye.”

15. Momo lie ka tu sukilila oku tukula ovina vialua tu yongola volohutililo vietu? (Talavo oviluvialuvia.)

¹⁵ Epulilo liatatu lieli: ‘Citava okuti ndi likutilila ovina vikuavo?’ Ciwa oku tukula eci tu yongola vohutililo. Pole, olonjanja vimue tu yuvula oku tukula ovina vialua tu yongola vonjanja yimosi oco tu limbuke eci Yehova a yongola kokuetu. Sokolola kulandu wa manji ufeko wa siata oku likutilila oco a pindisiwe Kosikola Yakundi Vusoma. Eye o yongola oku pindisiwa kosikola oco a kuatise kuna kuli esukila liakundi. Osimbu a kala oku amamako oco a lalekiwe kosikola, eye wa sukililevo oku pinga ku Yehova oco o kuatise oku limbuka apuluvi akuavo oku vokiya upange waye woku kunda. (Ovil. 16:9, 10) Eye wa sukilile oku linga ovina vi likuata lohutililo yaye, poku pula ku manji ukuakunyula akongelo nda kuli ekongelo limue li kasi ocipepi li sukila vali akundi votembo yosi. Ale nda wa sonehelele ko Filiale oku pula ocikanjo kuli esukila liakundi Vusoma.e

16. Nye tu sukila oku kolela?

¹⁶ Ndomo tua lilongisa, tu koleli okuti Yehova o ka tambulula olohutililo vietu locisola kuenda esunga. (Osa. 4:3; Isa. 30:18) Pamue ka tu kuata etambululo tua lavokale. Pole, Yehova lalimue eteke a ka pembula olohutililo vietu. Eye o tu sole calua. Lalimue eteke a ka tu yanduluka. (Osa. 9:10) Omo liaco, tu amamiko oku ‘kolela kokuaye otembo yosi,’ poku likutilila lutima wetu wosi kokuaye.—Osa. 62:8.