Tu li Pamisi Pokati Kolohongele Viekongelo

1. Momo lie tu ecela etambululo kolohongele?

MOMO lie tu endaila kolohongele? Ocina catete, oku sivaya Yehova. (Osa. 26:12; 111:1) Tu endaendavo kolohongele oco tu li pamise pokati kotembo yilo yohali. (1 Va Tes. 5:11) Eci tu eca etambululo kolohongele, tu kasi oku linga ovina evi vivali.

2. Apuluvi api tu kuete oku eca etambululo kolohongele vietu?

² Osemana losemana tu kuete apuluvi oku eca atambululo kolohongele vietu. Ndeci, kasulilo osemana, tu pondola oku eca etambululo vokuenda Kuelilongiso Liutala Wondavululi vekongelo. Kolohongele viovokati kosemana, tu pondola oku eca atambululo vokuenda Kuovokuasi a Sangiwa Vembimbiliya, Kelilongiso Liembimbiliya Vekongelo kuenda kolonepa vikuavo vi konomuisiwa.

3. Ovitangi vipi pamue vi tu kokela esalalo kuenda ekuatiso lipi tu sanga kukanda ku Va Heveru 10:24, 25?

³ Vosi yetu tu yongola oku sivaya Yehova, loku pamisa vamanjetu. Pole, eci tu eca etambululo pamue tu liyaka lovitangi. Ndeci, pamue tu yeva esakalalo poku eca etambululo ale citava okuti tu kuata onjongole yalua yoku eca etambululo pole, olonjanja viosi eci tu katula eka, ka tu nõliwa. Nye ci pondola oku tu kuatisa? Tu sanga etambululo kukanda wupostolo Paulu a sonehela va Heveru. Eci a popia esilivilo lioku liongoluila kumosi, eye o tu sapuila okuti tu sukila oku tiamisila utima koku “li pamisa pokati.” (Tanga Va Heveru 10:24, 25.) Eci tu limbuka okuti vakuetu va pamisiwa latambululo etu, ka tu kala lusumba walua poku katula eka. Nda okuti ka tua nõliwile oco tu ece etambululo, tu sanjukila vakuetu eci vakuata epuluvi lioku eca etambululo.—1 Pet. 3:8.

4. Atosi api atatu tu ka konomuisa vocipama cilo?

⁴ Vocipama cilo, tete tu ka konomuisa ndomo tu pondola oku li pamisa pokati vekongelo limue litito muna okuti ka muli valua va eca atambululo. Noke tu ka konomuisa ndomo tu pondola oku li pamisa pokati vekongelo limue linene muna okuti muli valua va katula ovaka oco va ece etambululo. Oku sulako, tu ka konomuisa ndomo tu pondola oku pamisa vakuetu kovina tu popia eci tu eca etambululo.

OKU LI PAMISA POKATI VEKONGELO LIMUE LITITO

5. Tu li pamisa ndati pokati nda vatito va tulika eka?

⁵ Vekongelo limue litito, ale vocimunga, pamue ka muli valua va tulika ovaka oco manji o songola a va nõle. Olonjanja vimue, eye o sukila oku talamẽla nda manji umue o tulika eka oco a ece etambululo. Ohongele yaco, yi kala ndu okuti yi kokisa owesi haiyo ka yi pamisa. Nye o sukila oku linga? Lieca olumue poku tulika eka olonjanja viosi. Poku ci linga, citava okuti o vetiyavo vamanji vakuavo oco va ci linge.

6-7. Tu yuvula ndati usumba poku eca etambululo?

⁶ Nye o sukila oku linga nda o kuete usumba woku eca etambululo? Vamanji valua va siata oku liyevavo ndoco. Oco o pamise vamanji, momo lie ku sandiliyila olonjila vikuavo vioku tepulula esakalalo poku eca etambululo? O ci linga ndati?

⁷ O pondola oku sanga ekuatiso poku pitulula olonumbi via sandekiwa ale Vutala Wondavululi.b Ndeci, lipongiya ciwa. (Olosap. 21:5) Nda ove o pongiya ciwa ocipama, ci leluka oku lieca olumue oco ece etambululo. Handi vali, o ka eca atambululo a teta onimbu. (Olosap. 15:23; 17:27) Atambululo a teta onimbu, a ku kuatisa oku yuvula oku kuata usumba walua. Vetambululo liteta onimbu mua kongela oku popia lika olondaka vimue vitito kuenje ci leluka vamanji oku kuata elomboloko lietambululo liove okuti olondaka vialua sio. Vetambululo liteta onimbu volondaka viove muẽle, o ka lekisa okuti wa pongiya ciwa kuenda o kuete elomboloko lia suapo lieci ci kasi oku konomuisiwa.

8. Yehova o tenda ndati alikolisilo o linga?

⁸ Nda hẽ wa kuama olonumbi evi, anga o kala vali lusumba woku eca atambululo? Kolela okuti, Yehova o sanjukila a likolisilo ove. (Luka 21:1-4) Yehova ka tu kisika oku linga eci ka tu tẽla. (Va Fil. 4:5) Nõla eci o yongola oku linga, li tumbikila ocimãho coku ci linga kuenda likutilila oco o kuate utima umue wa tula. Tete, citava okuti o kuata ocimãho coku eca etambululo liteta onimbu.

OKU LI PAMISA POKATI VEKONGELO LIMUE LINENE

9. Momo lie ca tĩlila oku eca atambululo vekongelo limue linene?

⁹ Nda vekongelo o kasi muli akundi valua, citava okuti o liyaka locitangi cikuavo. Pamue vamanji valua va lieca olumue oku eca atambululo kuenje olonjanja viosi o tulika eka ku ilikiwa. Ndeci, manji Danielle olonjanja viosi wa solale calua oku eca atambululo kolohongele.c Eye wa ci tendele ndonepa yefendelo liaye, onjila yoku pamisa vakuavo kuenda onepa yoku pamisa ekolelo liaye kalongiso Embimbiliya. Pole, eci eye a ilukila vekongelo linene, ka endaile oku ilikiwa olonjanja viosi oco a ece etambululo pamue, vokuenda kuohongele yosi ka eci etambululo la limue. Eye wa popia hati, “Ndaenda oku sumua. Nda liyevaile ndu okuti nda pumbile ocikele cimue. Nda elinga liaco li lingiwa olonjanja viosi, ove pamue o lipula nda ci kasi oku lingiwa ocipango.”

10. Nye ci tu kuatisa oku kuata apuluvi oku eca atambululo?

¹⁰ Wa siata hẽ oku liyeva ndeci Danielle a liyeva? Nda oco pamue o kuata ovisimĩlo vioku liwekapo oku eca atambululo loku yevelela lika ohongele. Pole, ku ka liwekepo oku tulika. Nye o sukila oku linga? Oco o kuatisiwe, pongiya atambululo alua kolohongele viosi. Nda ka va ku ilikile kefetikilo lielilongiso, citava okuti vokuenda kuohongele o ka kuata apuluvi oku eca etambululo. Eci o pongiya Utala Wondavululi Welilongiso, sokolola ndomo ocinimbu locinimbu ci kuete elitokeko losapi yocipama. Nda wa ci linga o ka tẽla oku eca atambululo awa kueci wa lilongisila kulandu waco. Handi vali, o pondolavo oku pongiya oku eca etambululo kovinimbu vina vi tukula ocili Cembimbiliya condongisi okuti via tĩla oku vi lombolola. (1 Va Kor. 2:10) Momo lie? Momo konepa yaco ka valuile va tulika eka oco va ece etambululo. Nye o sukila oku linga vali nda osimbu o kapako olonumbi viaco evi, lopo ku kuete epuluvi lioku eca etambululo kolohongele viosi? Citava okuti o sapela la manji o songola osimbu ohongele ka ya fetikile, loku u sapuila epulilo o yongola oku tambulula.

11. Ukanda ku Va Filipoi 2:4, u tu vetiya oku linga nye?

¹¹ Tanga Va Filipoi 2:4. Upostolo Paulu wa vetiya Akristão oku sokolola kovina via vakuavo. Tu pondola oku kapako ndati elungulo eli vokuenda kuolohongele? Poku ivaluka okuti vakuetu va yongolavo oku eca etambululo, ndeci etu.

12. Yipi onjila yimue yiwa yoku pamisa vakuetu kolohongele? (Talavo ociluvialuvia.)

¹² Sokolola kocindekaise eci. Eci o kasi oku sapela lakamba vove, anga hẽ ove o vangula calua okuti ovo va kuata lika epuluvi litito lioku vangula? Ocili okuti sio! O yongola okuti ovo va pangavo onepa kombangulo. Cimuamue haico okuti, kolohongele tu yongola oku ecelela okuti vamanji valua, va ecavo etambululo. Omo liaco, vimue pokati kolonjila vioku pamisa vamanjetu, poku eca epuluvi kokuavo lioku situlula ekolelo liavo pocakati catambululo. (1 Va Kor. 10:24) Tu konomuisi ndomo tu ci linga.

13. Tu ecelela ndati vamanji oku ecavo atambululo?

¹³ Cimue pokati kovina tu sukila oku linga, oku eca atambululo ateta onimbu, oco cecelele okuti vamanji valua va ecavo atambululo. Akulu vekongelo kuenda akundi va loñoloha, va sukila oku eca ongangu yiwa. Eci weca etambululo limue liateta onimbu, yuvula oku vangula atosi alua. Nda wa tukula atosi osi a sangiwa vocinimbu, ka pa ka siala vali lacimue oco vakuetu va a tukulevo. Ndeci, vocinimbu eci mu sangiwa olonumbi vivali viokuti, oku eca etambululo limue lia teta onimbu kuenda oku yuvula oku tukula atosi alua. Nda okuti ove wa ilikiwa tete oco ece etambululo kocinimbu caco, momo lie ku vanguila lika etosi limosi?

14. Nye ci pondola oku tu kuatisa oku lekisa olondunge poku katula eka olonjanja vialua? (Talavo ociluvialuvia.)

¹⁴ Lekisa olondunge olonjanja viosi eci o yongola oku eca etambululo. Nda okuti tu votola eka olonjanja vialua, tu ka sakalaisa manji o kasi oku songola oku tu ilika olonjanja viosi, ndaño okuti vakuetu handi ka va kuatele epuluvi lioku ci lingavo. Kuenje eci ci sumuisa vakuetu loku liwekapo oku katula eka.—Uku. 3:7.

15. (a) Ocituwa cipi tu sukila oku yuvula nda ka tua ilikiwile oco tu ece etambululo? (b) Vamanji va kuakusongola va lekisa ndati okuti va kapako vosi? (Tanga okakasia losapi hati, “Ceci o Songola.”)

¹⁵ Nda kuli akundi valua va katula eka vokuenda kuelilongiso, pamue ka va tu ilika olonjanja viosi tu yongola. Pamue manji o songola ka tẽla oku tu ilika vosi yetu. Kuenje ci pondola oku tu sumuisa pole, ka tu ka amamiko lesumuo liaco omo okuti ka va tu ilikile.—Uku. 7:9.

16. Tu pamisa ndati vakuetu va eca etambululo?

¹⁶ Nda ka va ku ilikile oco ece etambululo olonjanja viosi wa yonguile, momo lie ku yevelila lutate atambululo a vakuene kuenda noke liohongele oku va pandiya omo liatambululo avo? Omo liepandiyo liove, vamanji va ka pamisiwa calua okuti etambululo lina nda wa eca li sule. (Olosap. 10:21) Oku eca epandiyo onjila yimue yikuavo yoku li pamisa pokati.

OLONJILA VIKUAVO VIOKU LI PAMISA POKATI

17. (a) Olonjali vi kuatisa ndati omãla vavo oku pongiya atambululo a sunguluka? (b) Ndomo ca lekisiwa vovideo, ananga api akuãla oku pongiya etambululo limue? (Talavo etosi.)

¹⁷ Tu li pamisa ndati pokati kolohongele vietu? Nda okuti u njali, kuatisa omõlove oku pongiya atambululo a likuata lanyamo aye. (Mat. 21:16) Olonjanja vimue kuli olonepa viatiamẽla kolohuela, ale kovituwa via siata oku konomuisiwa vokuenda kuelilongiso, pole, pamue pa ka kala ocinimbu cimosi ale vivali citava okuti omãla va pondola oku vi tambulula. Handi vali, kuatisavo omãla vove oku kuata elomboloko liesunga lieci ka va ka ilikiwila olonjanja viosi eci va katula ovaka avo. Nda wa va ci lomboluila, ci ka va kuatisa oku yuvula esumuo eci vakuavo va ka ilikiwa okuti ovo havoko.—1 Tim. 6:18.d

18. Tu yuvula ndati oku tiamisila utima kokuetu muẽle eci tu eca etambululo? (Olosapo 27:2)

¹⁸ Vosi yetu tu sukila oku pongiya atambululo a eca esivayo ku Yehova a-o a pamisa vamanjetu. (Olosap. 25:11) Pamue voku teta onimbu tu yongola oku tukula ulandu watiamẽla kokuetu muẽle, pole, tu sukila oku yuvula oku vangula calua. (Tanga Olosapo 27:2; 2 Va Kor. 10:18) Etu tu sukila oku tiamisila atambululo etu ku Yehova, Kondaka yaye kuenda kafendeli vaye. (Esit. 4:11) Pole, nda epulilo limue li tu vetiya oku tukula ulandu umue wa tiamẽla kokuetu, citava okuti tu ci linga. Vocinimbu cikuãimo cocipama cilo, tu ka konomuisa ndomo tu ci linga.

19. (a) Onima yipi iyililako eci tu lekisa okuti tua kapako olonjeveleli viosi? (Va Roma 1:11, 12) (b) Nye o sole vali catiamẽla koku eca atambululo kolohongele?

¹⁹ Ndaño ka kuli olonumbi vi kisika ndomo tu eca atambululo, vosi yetu tu sukila oku likolisilako oku li pamisa pokati. Eci ci lomboloka okuti, poku eca etambululo tu sukila oku lekisa esunguluko. Ale, pamue ci lomboloka okuti tu sanjuka lapuluvi va tu ĩha poku eca etambululo kuenda tu yongola okuti vakuetu va kuatavo epuluvi lioku ci lingavo. Eci tu pitisa kovaso ovina via vakuetu kolohongele viekongelo, tu ka sanjukila oku ‘likolisa pokati.’—Tanga Va Roma 1:11, 12.