Ove hẽ wa li Pongiyila Ohali ya Piãla?

1. Momo lie ci kuetele esilivilo oku lipongiyila ovilunga?

OKU lipongiyila ocina cimue, eci pondola oku yovola omuenyo wetu. Ndeci, eci ku pita ocilunga cimue omanu vana va lipongiyila ocilunga caco, citava okuti va puluka kuenda oku kuatisa vakuavo. Ocisoko cimue co ko Europa okuti ca siata oku likolisilako oku kuatisa omanu ca popia hati: “Oku li pongiya ciwa ci pondola oku popela ovimuenyo.”

2. Momo lie tu sukilila oku lipongiyila ohali ya piãla? (Mateo 24:44)

² “Ohali ya piãla” yi keya ocipikipiki. (Mat. 24:21) Pole, ohali ya piãla yi ka litepa lovilunga vikuavo momo tua kũlĩha okuti oyo yi keya. Ci pitahãla 2.000 kanyamo a pita, Yesu wa lungula olondonge viaye oco va lipongiyile eteke liaco. (Tanga Mateo 24:44.) Nda okuti tua lipongiya, ci ka leluka kokuetu oku pandikisa kotembo yovitangi kuenda oku kuatisa vakuetu oku linga cimuamue.—Luka 21:36.

3. Epandi, ocikembe kuenda ocisola vi ka tu kuatisa ndati oku lipongiyila ohali ya piãla?

³ Tu kũlĩhĩsa ovituwa vitatu vi pondola oku tu kuatisa oku lipongiyila ohali ya piãla. Nye tu ka linga nda va tu sapuila oco tu kunde esapulo liesombiso kuenje tu suvukiwa la vana va likala esapulo liaco? (Esit. 16:21) Tu ka sukila oku pandikisa oco tu pokole ku Yehova, loku kolela okuti eye o ka tu kuatisa. Nye tu ka linga nda vamanjetu va pumba ovina vimue ale ovipako viosi? (Hav. 3:17, 18) Tu ka sukila oku lekisa ocikembe oco tu vetiyiwe oku va kuatisa. Ocituwa cipi tu ka lekisa eci ocimunga colofeka ci ka tu nũalelapo, kuenje tu vetiyiwa oku kala kumue la vamanjetu vokuenda kuotembo yimue? (Esek. 38:10-12) Etu tu ka sukila oku lekisa ocisola ca pama kokuavo oco ci tu kuatise oku pandikisa kotembo yaco ka ya lelukile.

4. Ndomo ca lekisiwa Vembimbiliya, momo lie tu sukilila oku kuata epandi, ocikembe kuenda ocisola?

⁴ Ondaka ya Suku yi tu vetiya oku amamako oku kuata epandi, ocikembe, ocisola. Ku Luka 21:19 hati: “Omo liepandi liene, vu ka popela ovimuenyo viene.” Ku va Kolosai 3:12 ku popia ndoco: “Wali ocikembe.” Kuenda 1 Va Tesalonike 4:9, 10 hati: “Ene muẽle vu longisiwa la Suku oku lisola pokati. . . . Pole, a vamanji, tu vu vetiyi oku amamako oku ci linga.” Ovinimbu evi viosi via sonehiwila olondonge via lekisile epandi, ocikembe kuenda ocisola. Ocili okuti ovo vamamako oku lekisa ovituwa evi. Etu tu pondolavo oku ci linga. Oco tu kuatisiwe, tu kũlĩhĩsa ndomo Akristão vokocita catete va lekisa ocituwa locituwa. Noke tu konomuisa ndomo tu setukula olondonge viaco kuenda ndomo tu lekisa okuti tua lipongiyila ohali ya piãla.

PAMISA EPANDI LIOVE

5. Momo lie Akristão vokocita catete va sukilile oku kuata epandi?

⁵ Akristão vokocita catete va sukilile oku kuata epandi. (Va Hev. 10:36) Ovo ka va liyakele lika lovitangi via siatele pokati komanu vosi, pole, va liyakavo lovitangi vikuavo. Valua pokati kavo ka va lambalaliwile lika lasongui vetavo va Yudea kuenda olombiali vioko Roma, pole va lambalaliwavo lapata avo. (Mat. 10:21) Handi vali, vekongelo va sukililevo oku lilava oco ka va ka yapuisiwe lolonanguluke kuenda lalongiso avo ana a kala oku tepa ekongelo. (Ovil. 20:29, 30) Ocili okuti Akristão vaco va pandikisa lekolelo. (Esit. 2:3) Ndamupi? Ovo va sokolola lutate kovolandu epandi a sangiwa Vovisoneha, ndeci wa Yovi. (Tia. 5:10, 11) Ovo va likutilila oco va pamisiwe. (Ovil. 4:29-31) Handi vali, va tiamisililevo utima konima yiwa va kuata omo lioku pandikisa.—Ovil. 5:41.

6. Nye wa lilongisa konjila ndomo Merita a pandikisa kelambalalo?

⁶ Etu tu ka tẽlevo oku pandikisa nda okuti, olonjanja viosi tu tanga ovolandu epandi vondaka ya Suku lo valivulu etu kuenda oku sokolola kovolandu aco. Manji Merita wo ko Albania, wa tẽla oku pandikisa kelambalalo liungangala lia lingiwa lepata liaye. Eye hati: “Nda vetiyiwa calua poku lilongisa ulandu wa Yovi Vembimbiliya. Yovi wa tala ohali yalua ndaño ka kũlĩhĩle u wa kala oku koka ohali yaco kuenda wa popia hati: ‘Toke eci ndi fa, si liwekapo kekolelo liange!’ (Yovi 27:5) Nda sokolola ndomo ovitangi viange via kala vitito oku vi sokisa levi via Yovi. Momo nda kũlĩhĩle u wa kala oku koka ovitangi viange.”  

7. Ndaño okuti ka tu kasi oku liyaka lovitangi vinene, nye tu sukila oku lilongisa cilo?

⁷ Tu pondolavo oku pamisa epandi lietu poku likutila olonjanja viosi ku Yehova loku u sapuila asakalalo etu. (Va Fil. 4:6; 1 Va Tes. 5:17) Citava okuti, cilo ku kasi oku liyaka locitangi cimue cinene. Ndaño ndoco, anga hẽ o sanda olonumbi via Yehova olonjanja viosi o liyeva okuti wa tema, o kuete atatahãi ale wa lemelelua? Nda olonjanja viosi o li kutilila ku Yehova oku sanda ekuatiso eci o kuata ovitangi vitito, ku ka kuata ohele yoku ci linga eci o ka kuata ovitangi vinene kovaso yoloneke. Kuenje o ka kolela ciwa okuti Yehova wa kũlĩha epuluvi eye a pondola oku kuatisa kuenda eci eye a sukila oku ku lingila.—Osa. 27:1, 3.

8. Ulandu wa manji Mira u lekisa ndati okuti oku pandikisa kovitangi cilo, ci ka tu kuatisa kovitangi vio kovaso yoloneke? (Tiango 1:2-4) (Talavo ociluvialuvia.)

⁸ Tu ka tẽla oku pandikisa kohali ya piãla, nda tu amamako lekolelo ku Yehova cilo, eci tu liyaka lovitangi. (Va Rom. 5:3) Momo lie tu ci popela? Vamanji valua va limbuka okuti o seteko loseteko yekolelo va liyaka layo, yi va kuatisa oku pandikisa koloseteko vikuavo vi kuamamo. Epandi li va kanguisa, loku pamisa ekolelo liavo liokuti Yehova wa li kapelako oku va kuatisa. Kuenje omo lioku kolela Yehova ci va kuatisa oku pandikisa kovitangi vi kuamamo. (Tanga Tiago 1:2-4.) Manji Mira okuti ukundi wotembo yosi ko Albania, wa limbuka okuti omo lioku pandikisa kovitangi a liyaka lavio kosimbu, co kuatisa oku tẽla oku pandikisa kovitangi a kasi oku liyaka lavio cilo. Eye pamue o liyeva ndu okuti eye lika o kasi oku liyaka lovitangi. Pole, eye wa siata oku ivaluka ndomo Yehova o kuatisa oku liyaka lovitangi vokuenda 20 kanyamo. Kuenje wa lisapuila eye muẽle hati: ‘Amamako lekolelo. Ku ka ecelele okuti anyamo osi a-a wa pandikisa lalikolisilo wa linga lekuatiso lia Yehova, li kala liolivova.’ Ove o pondolavo oku sokolola ndomo Yehova a ku kuatisa oku pandikisa. Kolela okuti eye wa kapako olonjanja viosi ove wa pandikisa koseteko yimue kuenda o ka ku sumũlũisa. (Mat. 5:10-12) Kuenje eci ohali ya piãla yi fetika, omo okuti wa lilongisa ale oku pandikisa, o ka nõlapo oku amamako oku pandikisa.

LEKISA OCIKEMBE

9. Ekongelo lio Antiokea ko Suria lia lekisa ndati ocikembe?

⁹ Kũlĩhĩsa eci ca pita eci a Akristão ko Yudea va liyaka locitangi cinene conjala. Eci ekongelo lio ko Antiokea ko Suria va ci yeva, va kuatela ocikembe vamanji ko Yudea. Pole, va lekisa ocikembe cavo kovilinga. Ovo va “sokiya okuti, omunu lomunu eca ndeci a tẽla oco ku tumiwe ekuatiso ku vamanji va tungile vo Yudea.” (Ovil. 11:27-30) Ndaño okuti vamanji va kala oku liyaka locitangi caco va kala ocipãla, Akristão vo ko Antiokea va nõlapo oku va kuatisa.—1 Yoa. 3:17, 18.

10. Volonjila vipi tu sukila oku lekisa ocikembe eci vamanjetu va pita locilunga cimue? (Talavo ociluvialuvia.)

¹⁰ Koloneke vilo, tu pondolavo oku lekisa ocikembe eci tu yeva okuti, vamanjetu va kasi oku liyaka locilunga cimue ale locitangi cimue ka ca lelukile. Lonjanga yalua tu lieca olumue oco tu va kuatise poku pula kakulu vekongelo nda tu kuatisa kupange umue, poku eca olombanjaile vi kuatisa kupange ulingiwa voluali luosi, ale oku likutililako vana va lipita lovilunga.b (Olosap. 17:17) Ndeci, kunyamo 2020, ci pitahãla 950 kovimunga vi eca ekuatiso ku vana va lipita lovilunga, va nõliwa koluali luosi oco va kuatise vana va kuatiwa lefengi lio KOVID-19. Tu eca olopandu vialua ku vamanji va panga onepa kupange waco. Omo lioku kuatela ocikembe vamanji, ovo va va kuatisa kovina va sukilile, oku va tata konepa yespiritu, oku semũlũla loku tumbulula olonjo kuenda ovitumãlo viefendelo.—Ci sokisa 2 Va Korindo 8:1-4.

11. Ovilinga vietu viocikembe vi sivaya ndati Isietu wokilu?

¹¹ Eci tu lekisa ocikembe eci kupita ocilunga cimue, vakuetu va ka limbuka alikolisilo tu linga. Ndeci, kunyamo wo 2019 ocilunga cimue cocipepe ci tukuiwa Dorian ca nyõla Onjango yimue Yusoma ko Bahamas. Osimbu vamanji va kala oku semulula Onjango Yusoma, va pinga komesele yimue okuti Hambangiko ya Yehova loku u pula eci va ponduile oku u feta kupange wa sukiliwile. Eye wa va sapuila hati: “Nda yonguile oku eca ovikuata viange viupange ocali . . . kuenda ame muẽle ndi liecavo olumue koku kuatisa. . . . Ndi ci lingila lika omo liocisoko cene. Nda komõha calua onjila ndomo [ene] wa likapiko.” Omanu valua voluali ka va kũlĩhĩle Yehova. Pole, valua va lete ovina Olombangi Via Yehova va siata oku linga oco va kuatise vakuavo. Esumũlũho kokuetu oku kũlĩha okuti ovilinga vietu viocikembe vi vetiya omanu oku amela ku yuna “ukuahenda ya piãla.”—Va Efe. 2:4.

12. Oku lekisa ocikembe cilo ci tu pongiyila ndati kohali ya piãla? (Esituluilo 13:16, 17)

¹² Momo lie tu ka sukilila oku lekisa ocikembe vokuenda kuohali ya piãla? Embimbiliya li lekisa okuti vana ka va pangi onepa kopulitika, va liyaka lovitangi cilo kuenda vokuenda kuohali ya piãla. (Tanga Esituluilo 13:16, 17.) Vamanjetu pamue va sesamela ekuatiso kovina ovo va sukila. Eci Soma yetu Yesu Kristu a keya oco a linge esombiso, tu yongola okuti o tu sanga okuti tu kasi oku lekisa ocikembe kuenje o tu laleka oco tu “piñale Usoma.”—Mat. 25:34-40.

PAMISA OCISOLA COVE POKU SOLA VAMANJI

13. Ndomo ca lekisiwa ku va Roma 15:7 Akristão vokocita catete va li pamisa ndati locisola?

¹³ Ocisola oco ca kala ondimbukiso Yakristão vatete. Anga hẽ ca lelukile kokuavo oku lekisa ocisola? Kũlĩhĩsa oku li tepa kua kala vekongelo lio ko Roma. Pokati kavo ka pakaile lika va Yudea vana va longisiwa oku pokola Kocihandeleko ca eciwile ku Mose, pole, mua kalavo Vakualofeka vana va kuata ovituwa via litepa calua. Akristão vamue va kala apika osimbu okuti vamue va kala olume va yovuiwa kuenda citava okuti vamue va kuatele apika. Omo liakalo aco a litepele Akristão vaco va ponduile oku likuatela ndati ocisola ca pama? Upostolo Paulu wa vetiya ‘oku litambula pokati.’ (Tanga Va Roma 15:7.) Eci ci lomboloka nye? Ondaka ya pongoluiwa okuti oku litambula, yi lomboloka oku tambula umue locisola ale oku yekisa konjo yove, ale oku lekisa ukamba. Ndeci, Paulu wa sapuila Filemone ndomo a ponduile oku yolela Onesimu upika wa telile ndoco: “U tambula locisola.” (File. 17) Kuenda Prisila la Akuila va yolela Apolosi, una okuti ka kũlĩhĩle ovina vialua viatiamẽla kalongiso Akristão oku ci sokisa lavo, poku u “kovonga.” (Ovil. 18:26) Akristão vaco, ka va ecelelele okuti oku litepa kuaco ku va kokela olonepele kuenje va liyolela pokati.

14. Manji Ana kumue lulume waye va lekisa ndati ocisola?

¹⁴ Tu pondolavo oku lekisa ocisola ku vamanji poku linga ukamba lavo kuenda oku pita otembo lavo. Eci ci va vetiyavo oku lekisa ocisola kokuetu. (2 Va Kor. 6:11-13) Kũlĩhĩsa ulundu wa manji Ana kumue lulume waye. Eci va tambula ocikele cokaliye cumisionaliu Kutakelo wo Afrika, ka papitile otembo yalua oco efengi lio KOVID-9 lia fetika. Omo okuti ndopo va pitĩlile, ka va ponduile oku lisanga la vamanji vo vekongelo liavo. Ohueli yaco ya laikele oku lekisa ndati ocisola cavo? Ovo va talavaya lovideokonferencia oco va sapele la vamanji kuenda oku va sapuila okuti va yonguile calua oku va kũlĩha ciwa. Apata va pandula calua ocisola olomisionaliu va lekisa. Kuenje va fetika oku va telefonalela kuenda oku va sonehela asapulo. Momo lie olomisionaliu va yonguilile oku kũlĩha vamanji vovekongelo liavo lio kaliye? Manji Ana hati: “Lalimue eteke ndi ka ivalako ocisola vamanji va lekisa kokuange kuenda kepata liange ci kaile kotembo yiwa ale kotembo ĩvi, ongangu yavo ya ndi kuatisavo oku lekisa ocisola”

15. Nye wa lilongisa kulandu wa manji Vanessa catiamẽla koku sola vamanji vosi? (Talavo ociluvialuvia.)

¹⁵ Valua pokati ketu tu kasi vakongelo ana okuti vamanji va kuete ovituwa via litepa levi vietu. Tu pondola oku pamisa ocisola cetu kokuavo poku tiamisila utima wetu kovituwa viavo viwa. Manji umue o tukuiwa Vanessa o kasi ko Nova Zelândia, ka ca lelukile kokuaye oku kuata ukamba la manji umue vekongelo a kasi. Pole, wa nõlapo oku yuvula okuti ka tiamisila utima kovituwa vina eye ka solele kuenje o pita otembo yalua la vamanji vaco. Poku ci linga co kuatisa oku limbuka ovina Yehova a sole ku vamanji vaco. Eye wa popia hati: “Tunde eci ulume wange a fetika oku nyula akongelo, etu tua siata oku pita otembo yalua la vamanji va kuete ovituwa via litepa kuenje nda limbuka okuti ca leluka oku kala lavo. Cilo ndi sanjukila oku kala lomanu va litepa. Yehova o ci sanjukilavo momo eye wa tu kokela pokati komanu vakuavituwa via li tepa.” Eci tu likolisilako oku tenda vakuetu ndeci Yehova a va tenda tu lekisa okuti tu va sole.—2 Va Kor. 8:24.

16. Momo lie ocisola ci ka kuatela esilivilo vokuenda kuohali ya piãla? (Talavo ociluvialuvia.)

¹⁶ Ocisola ci ka kuata esilivilo lialua vokuenda kuohali ya piãla. Eci ohali ya piãla yi ka fetika, Yehova o ka tu teyuila ndati? Kũlĩhĩsa eci Yehova a sapuila afendeli vaye oku linga eci o Bavulono yo kosimbu ya nyõliwa poku popia hati: “Kuendi amanu vange, iñili volohondo viene, Kuenda yiki apito konyima yene. Lisalami vokuenda kuokatembo kamue toke eci onyeño yi pita.” (Isa. 26:20) Olondaka evi vi tiamisiwilavo kokuetu tu ka liyaka lohali ya piãla. Ondaka yokuti “volohondo,” yi pondola oku tiamisiwila kakongelo etu. Vokuenda kuohali ya piãla, tu ka sanga eteyuilo Yehova a likuminya, nda tu amamako oku likuata omunga la vamanjetu. Omo liaco, tu sukila oku likolisilako cilo oku kuatela ocisola vamanji. Tu ka popeliwa lika nda tua linga ovina viaco!

LIPONGIYA CILO

17. Nda tua lipongiya cilo, nye tu ka tẽla oku linga vokuenda kuohali ya piãla?

¹⁷ “Eteke linene lia Yehova” ka li ka leluka komanu. (Sof. 1:14, 15) Eteke liaco, ka li ka lelukavo kafendeli va Yehova. Pole, nda tua lipongiya cilo, tu ka tẽla oku tula utima kuenda oku kuatisa vakuetu. Tu ka tẽla oku pandikisa kovitangi viosi tu ka kuata. Eci vamanjetu va ka tala ohali, tu ka linga cosi tu tẽla oco tu va kuatise poku lekisa ocikembe kuenda oku eca kokuavo ovina va sukila. Nda cilo tua lilongisa oku kuata ukamba wa pama la vamanji, ci ka leluka oku lekisa ocisola kovaso yoloneke. Yehova o ka tu sumũlũisa lomuenyo ka u pui voluali luna okuti, ovilunga viosi kuenda ohali, ka vi ka sokoluiwa vali.—Isa. 65:17.