Anga hẽ tu Sukila Mesiya?
CITAVA okuti ove o lipula ndoco: “Anga hẽ tu Sukila Mesiya?” Ca sunguluka oku lipula nda Mesiya o pondola oku ku kuatisa.
Pamue omanu vamue ove wa sumbila, va ku sapuila okuti, omanu vosi voluali va sukila Mesiya. Ulume umue onoño yoko Yudea, wa popia hati: ‘Olohuminyo viosi via Suku, vi tẽlisiwila vonduko ya Mesiya.’ Ulume waco wa tukula ocikele ca Yesu vocipango ca Yehova coku sumũlũisa omanu vosi palo posi. (2 Va Korindo 1:20) Mesiya o kuete ocikele cavelapo. Osimbu handi keyile palo posi, ovitumasuku Viembimbiliya via lomboluile ale catiamẽla kokuiya kuaye kuenda omuenyo waye palo posi. Velivulu limue, onoño yimue o tukuiwa hati Henry Halley wa popia hati: ‘Otestamendu Yale ya lombolola omuenyo wa Mesiya kuenda ya yulula onjila Yokuiya kuaye.’ Anga hẽ tu sukila okuiya kua Mesiya? Momo lie okuiya kuaye ku kuetele esilivilo?
Ondaka ‘Mesiya,’ yi lomboloka ‘Ombuavekua kuenda yi lombolokavo okuti, Kristu.’ Elivulu limue lia sonehiwa kunyamo wo 1970, lia lombolola okuti, Ombuavekua yaco ya sukilile okuiya oco yi yovole omanu kekandu lia Adama la Heva. Eci va lulikiwa la Yehova, va kala omanu vamue va lipua, lelavoko lioku kala otembo ka yi pui Voluali Luelau palo posi. Pole, va pumba ekalo liaco liwa. Ungelo una wa kũlĩhĩwa okuti, Satana Eliapu, wa va sapuila hati, Yehova wa va limbika cimue ciwa. Omo liaco, nda va litepa laye okuti va linõlela eci ciwa leci cĩvi, va pondola oku kala ciwa.—Efetikilo 3:1-5.
Heva wa kembiwa, kuenje wa tava Keliapu. Adama, omo lioku velisapo calua ukãi waye okuti Suku ci sule, wa yapuisiwa Leliapu. (Efetikilo 3:6; 1 Timoteo 2:14) Omo liovilinga viavo vĩvi, va pumba elavoko lioku kala otembo ka yi pui voluali luokaliye palo posi. Kuenje va sambuisa komãla vavo ekandu lina li tuala kolofa.—Va Roma 5:12.
Yehova wa sokiya onjila yoku nyõla ovilinga via tunda kesino. Lekuatiso Liocihandeleko ca Mose Eye wa yonguile oku lisunguluisa lomanu vakuakandu. (Esinumuĩlo 19:21; 1 Yoano 3:8) Pole, onjongole yaco yi tẽlisiwa lika nda vamue pokati komãla va Adama la Heva va kuata omuenyo ko pui Voluali luokaliye ndeci Yehova a yonguilile epata liomanu kefetikilo. Eli olio esunga lieci tu sukilila Mesiya.
Eci Yehova a pisa Eliapu, wa lombolola ocitumasuku catete ci popia hati: “Ñapa ukuse pokati [kove] lukãi, lo pokati kombuto yove lombuto yaye. Eye o sasõla utue wove, kuenje ove u lumana kocisendamãhi.” (Efetikilo 3:15) Onoño yimue ya popia hati: ‘Ulandu watiamẽla kolohuminyo vioku iya kua Mesiya ndomo wa tukuiwa Vovisonehua, wa fetikila kolondaka viocitumasuku eci.’ Onoño yikuavo, ya popiavo hati: ‘Lekuatiso lia Mesiya, Yehova oka malako ekandu tua piñala ku Adama la Heva.’ Kuenje, oka sumũlũisa omanu vosi.—Va Heveru 2:14, 15.
Koloneke vilo, omanu ka va tambuile handi asumũlũho Yehova a va likuminya. Omanu valua ka va kuete vali elavoko. Elivulu limue lia popia hati: ‘Valua va Yudea toke cilo va kasi oku lavoka okuiya kua Mesiya oco a maleko ovitangi loku kundula ovanyali vomanu.’ Pole, Embimbiliya li lombolola okuti, Mesiya wa tukuluka ale.