Ocikele Cespiritu Sandu Koku Tẽlisa Ocipango Ca Yehova
“Ondaka yange yi tunda vomẽla wange . . . yi linga ndeci nda panga oku tẽlĩsa, leci nda yi tumĩla.”—ISA. 55:11.
1. Tukula oku litepa ku kasi pokati kesokiyo locipango.
SOKOLOLA okuti alume vavali va kasi oku pongiya oku linga ungende lekãlu. Umue pokati kavo o kuete omapa yi lekisa onjila a kuama toke oku a loña. Ukuavo wa patekela oku a loña kuenda o kuete olonjila vialua a pondola oku kuama. Eye wa lipongiyila oku kuama olonjila vikuavo nda kua molẽha ocitangi cimue. Oku lipongiya kualume ava, ku lekisa ciwa oku litepa ku kasi pokati kesokiyo, locipango. Esokiyo li sokisiwa lomapa yi lekisa onjila yimue, pole, vocipango mua kongela ocimãho cimue okuti ci kuete olonjila vialua vioku ci tẽlisa.
2, 3. (a) Nye ca kongela vocipango ca Yehova, kuenda eci Adama la Heva va lueya, eye wa tetulula ndati ocitangi caco? (b) Momo lie tu sukilila oku ambata omuenyo umue u litava locipango ca Yehova?
2 Cosi Yehova a yongola oku linga o ci tẽlisa, momo ka kuama esokiyo limue, pole, o tẽlisa ocimãho caco locipango caye. (Va Efe. 3:11) Vocipango caco mua kongela ocimãho coku pongolola ongongo vocumbo celau, muna omanu va ka kala luhayele wa lipua, lombembua kuenda esanju ka li pui. (Efet. 1:28) Eci Adama la Heva va linga ekandu, Yehova wa tetulula ocitangi caco kuenda wa kuama onjila yikuavo oco ocipango caye ci tẽlisiwe. (Tanga Efetikilo 3:15.) Yehova wa panga okuti ukãi waye wocindekaise, o cita ‘ombuto’ ale Omõla, una o ka kundula Satana, lovina viosi vĩvi via kokiwa laye.—Va Hev. 2:14; 1 Yoa. 3:8.
3 Ka kuli unene laumue kilu ndaño posi u tẽla oku tateka Suku oku tẽlisa ocipango caye. (Isa. 46:9-11) Momo lie tu popela ndoco? Momo espiritu sandu lia Yehova olio li tẽlisa ocipango caye. Ongusu yaco ya pama yi linga okuti Suku o tẽlisa ocipango caye ‘ndomo eye a panga.’ (Isa. 55:10, 11) Eci ci tu vetiya oku ambata omuenyo umue u litava locipango ca Suku. Momo elavoko liomuenyo wetu lia tiamẽla koku tẽlisiwa kuocipango caco. Handi vali, oku mola ndomo Yehova a talavaya lespiritu sandu ci pamisa ekolelo lietu. Omo liaco, tu konomuisi ocikele cespiritu sandu koku tẽlisa ocipango ca Yehova—kosimbu, koloneke vilo kuenda koloneke viya.
Ocikele Cespiritu Sandu Kosimbu
4. Yehova wa situlula ndati ocipango caye vokuenda kuotembo?
4 Kosimbu, Yehova wa situlula ocipango caye vokuenda kuotembo. Catete, oku limbukiwa Kuombuto ya likuminyilue, ca kala “elumbu lia sitikiwile.” (1 Va Kor. 2:7) Eci pa pita 2.000 kanyamo, oco Yehova a popia vali ovina via tiamẽla kombuto. (Tanga Efetikilo 12:7; 22:15-18.) Ohuminyo Yehova a linga ku Avirahama ya laikele oku tẽlisiwa volonepa vialua. Ondaka “kombuto yove,” yi lekisa okuti Ombuto yaco, ya kala omunu wa laikele oku tunda kocikoti ca Avirahama. Tu tẽla oku popia okuti Satana wa kala loku lavulula lonjongole yalua ndomo ovina viaco vi tẽlisiwa. Unyali waco wa kuatele ocimãho coku tateka ocipango ca Suku poku nyõla ocikoti ca Avirahama. Pole, ka kuatele epondolo liaco, momo espiritu lia Suku lia kala loku talavaya. Oco hẽ, lia ci linga ndati?
5, 6. Yehova wa teyuila ndati lespiritu liaye omunu lomunu wa tiamelẽle kocikoti ca laikele oku nena Ombuto?
5 Yehova wa teyuila lespiritu liaye omunu lomunu wa tiamẽlele kocikoti Combuto. Yehova wa popia la Avirama (Avirahama) hati: “Ame ndimbetateli yove.” (Efet. 15:1) Ohuminyo yaco ya tẽlisiwa. Konomuisa eci ca pita kunyamo wo 1919 O.Y., eci Avirahama la Sara va kala ko Gerare. Omo okuti, Avimeleke soma ya Gerare ka kũlĩhile okuti Sara wa kala ukãi wa Avirahama, wa yonguile okuti Sara o kala ukãi waye. Anga Satana eye wa kala kovaso yovitangi viaco oco a tateke Sara oku eca ombuto ku Avirahama? Embimbiliya ka li lombolola ulandu waco. Pole, olio li lekisa okuti Yehova wa va kuatisa. Avimeleke wa lunguiwa vonjoi oco ha ka lambe Sara.—Efet. 20:1-18.
6 Eyi haiyoko onjanja yatete va popeliwa. Yehova wa teyuila Avirahama kuenda epata liaye olonjanja vialua. (Efet. 12:14-20; 14:13-20; 26:26-29) Catiamẽla ku Avirahama kuenda ocitumbulukila caye, ukualosamo wa popia hati: “[Yehova] ka tavele umue oku va linga cĩvi, ndaño olosoma wa vi pisila eci via va linga cĩvi, hati, Ko ka lambi kolombuavekua viange. Ko ka lingisi ovaprofeto vange.”—Osa. 105:14, 15.
7. Ndamupi Yehova a teyuila ofeka yo Isareli?
7 Lekuatiso liespiritu sandu, Yehova wa popela epata lia va Isareli kosimbu muna Ombuto ya likuminyiwa ya laikele oku citiwa. Yehova wa eca Ocihandeleko caye ku va Isareli lekuatiso liespiritu liaye, lina lia teyuila efendelo liocili kuenda lia kuatisa va Yudea oku lava ukamba wavo la Yehova. (Etu. 31:18; 2 Va Kor. 3:3) Koloneke Violonganji, Yehova wa eca espiritu sandu liaye kalume va kuatisa va Isareli oku kundula ovanyali vavo. (Olong. 3:9, 10) Vokuenda kuovita vianyamo via sulila koku citiwa kua Yesu okuti eye ombuto yatete ya Avirahama, espiritu sandu lia teyuila o Yerusalãi, o Beteleme, kuenda onembele, momo via pangele onepa koku tẽlisiwa kuovitumasuku via tiamẽla ku Yesu.
8. Nye ci lekisa okuti espiritu sandu lia kuatisa Omõla a Suku kupange a linga?
8 Espiritu sandu lia kuatisa Yesu kuenda upange waye woku kunda. Olio lia linga ocina cimue ci komõhisa vimo lia Maria. Momo lia ecelela okuti ukãi umue ka lipuile, o mina kuenda o cita Omõla wa lipua, haeye ka kaile ukuakandu. (Luka 1:26-31, 34, 35) Noke, espiritu lia teyuila Yesu kolofa eci a kala omõla. (Mat. 2:7, 8, 12, 13) Eci Yesu a kuata 30 kanyamo, Suku wo waveka lespiritu sandu, wo nõla oco a kale kapiñala ka Daviti kusoma kuenda wo wĩha ocikele coku kunda. (Luka 1:32, 33; 4:16-21) Espiritu sandu lia eca unene ku Yesu woku linga ovikomo ndeci, oku sakula olombeyi, oku tekula owiñi, kuenda oku pindula ava va fa. Ovikomo viaco, via kala ulembo wovina tu lavoka vuviali wa Yesu.
9, 10. (a) Espiritu sandu lia kuatisa ndati olondonge via Yesu kocita catete? (b) Kocita catete, nye ca situluiwa catiamẽla koku tẽlisiwa kuocipango ca Yehova?
9 Oku upisa ko Pendekoste yunyamo wa 33 K.K., Yehova wa nõla onepa yavali yombuto ya Avirahama lespiritu liaye, okuti valua pokati kavo ka va kaile ocitumbulukila ca Avirahama. (Va Rom. 8:15-17; Va Gal. 3:29) Espiritu sandu lia kuatisavo olondonge via Yesu kocita catete, poku va ĩha ombili kupange woku kunda loku linga ovilinga vi komõhisa. (Ovil. 1:8; 2:1-4; 1 Va Kor. 12:7-11) Omo liolongavelo viaco, espiritu sandu lia va situluila ndomo ocipango ca Yehova ca kala oku tẽlisiwa. Yehova ka yonguile oku fendeliwa vali ndeci omanu va enda oku linga kosimbu vonembele yo Yerusalãi. Ocali caye kaliye ca tiamisiwile kekongelo Liakristão lia tumbikiwile ndopo. Tunde opo, Yehova wa fetika oku tẽlisa ocipango caye lekongelo liolombuavekua.
10 Kosimbu, oco ocipango caye ci tẽlisiwe, Yehova wa talavaya lespiritu liaye—poku teyuila, poku eca unene, kuenda oku waveka afendeli vaye lespiritu sandu. Nye ci popiwa koloneke vilo? Yehova o kasi oku talavaya ndati lespiritu sandu oco a tẽlise ocipango caye? Oku ci kũlĩha ci kuete esilivilo, momo tu yongola oku songuilua lespiritu sandu. Omo liaco, tu konomuisi atosi akũala a lekisa ndomo Yehova a talavaya lespiritu liaye koloneke vilo.
Ocikele Cespiritu Sandu Koloneke Vilo
11. Nye ci lekisa okuti espiritu sandu li kuatisa afendeli va Suku oku liyelisa, kuenda o lekisa ndati okuti o kasi oku songuiwa lespiritu?
11 Catete, espiritu sandu lieca kafendeli va Suku ongusu yoku liyelisa. Vana va panga onepa kocipango ca Yehova te va liyelisa kovituwa. (Tanga 1 Va Korindo 6:9-11.) Pokati komanu veya oku kala Akristão, vamue va lingaile ovina vĩvi ndeci ukahonga, ukahokolo, kuenda oku lipekela kulume lulume. Oloñeyi vi koka ekandu via lamelelele vovitima viavo. (Tia. 1:14, 15) Ovo va sesamẽlele oku ‘sukuiwa,’ ci lekisa okuti va sukilile oku linga apongoloko vomuenyo wavo oco va taviwe la Suku. Nye ci kuatisa afendeli va Suku oku tamalãla loloñeyi vĩvi? Elivulu lia 1 Va Korindo 6:11, li lekisa okuti, “espiritu lia Suku yetu.” Poku liyelisa, o lekisa okuti o kasi oku ecelela oku songuiwa lespiritu sandu.
12. (a) Ndomo ca lekisiwa vocinjonde ca Esekiele, Yehova o songola ndati ocisoko caye? (b) Ove o lekisa ndati okuti o kasi oku songuiwa lespiritu sandu?
12 Cavali, Yehova o songola ocisoko caye lespiritu sandu. Vocinjonde ca Esekiele, ocisoko ca Yehova kilu, ca sokisiwa lekãlu li kasi oku enda oco li tẽlise ocipango ca Yehova. Nye ci kuatisa ekãlu liaco oku enda kuosi lia loña? Espiritu sandu. (Esek. 1:20, 21) Tu ivaluki okuti ocisoko ca Yehova ca tepiwa volonepa vivali, okuti cimue ci kasi kilu, cikuavo ci kasi palo posi. Ndeci onepa yo kilu yi songuiwa lespiritu sandu, cimuamue haico ci pita lonepa ya palo posi. Poku pokola kolonumbi vi eciwa locisoko ca Suku palo posi, o lekisa okuti o kasi oku kuama ongendo yekãlu lia Yehova kilu loku songuiwa lespiritu sandu.—Va Hev. 13:17.
13, 14. (a) Velie va panga onepa ‘kocitumbulukila cilo’ Yesu a tukula? (b) Tukula ulandu umue u lekisa ndomo espiritu sandu li tu kuatisa oku kuata elomboloko liocili Cembimbiliya. (Tala vokakasia losapi hati: “O Kasi hẽ Oku Endela Vocinyi ca Amamako Oku Tua?”)
13 Catatu, espiritu sandu li tu kuatisa oku kuata elomboloko liocili Cembimbiliya. (Olosap. 4:18) Utala Wondavululi, oco ocimãleho “ukuenje wa kolelua haeye wa lunguka” a siata oku sandeka laco alomboluilo Embimbiliya vokuenda kuotembo. (Mat. 24:45) Konomuisa elomboloko tu kuete liomanu va panga onepa ‘kocitumbulukila cilo’ Yesu a tukula. (Tanga Mateo 24:32-34.) Ocitumbulukila cipi Yesu a tukula? Ocipama losapi “Oku Tukuluka Kua Kristu—Ku Lomboloka Nye Kokuove?” ca lombolola okuti Yesu ka tiamisile ondaka yaco kolondingaĩvi, pole, wa yi tiamisila kolondonge viaye, vina via wavekiwile lespiritu sandu.a Oloñame via Yesu olombuavekua, ci kale kocita catete ale koloneke vilo, ovio lika va laikele oku mola ondimbukiso yaco loku kuata elomboloko liokuti, Yesu “o kasi ocipepi pivelo muẽle.”
14 Elomboloko liaco li kuete esilivilo lie kokuetu? Ndaño ka tu tẽla oku tenda otembo ‘yocitumbulukila caco,’ tu sukila oku kũlĩha okuti ondaka “ocitumbulukila”: Yi tiamisiwila komanu vakuanyamo a litepa va kasi vokuenda kuotembo yimuamue; okuti otembo yaco ka yi tumala calua, pole, yi sulila. (Etu. 1:6) Oco hẽ, tu kuata ndati elomboloko liondaka “ocitumbulukila cilo,” Yesu a tukula? Eye wa yonguile oku popia okuti, olombuavekua via kala kunyamo wo 1914 eci ondimbukiso ya fetika, via ponduile oku kala komuenyo vokuenda kuotembo yimue lolombuavekua vikuavo vi ka mola oku fetika kuohali ya piãla. Ocitumbulukila caco, ca kuata efetikilo, kuenje ci ka kuata esulilo. Oku tẽlisiwa kuolonepa vimue yondimbukiso, ku lekisa okuti ohali ya piãla yi kasi ocipepi. Nda wa sakalala lotembo loku lavulula, o lekisa okuti o kuete elomboloko liocili Cembimbiliya kuenda o kasi oku songuiwa lespiritu sandu.—Mar. 13:37.
15. Nye ci lekisa okuti espiritu sandu olio li tu kuatisa oku kunda olondaka viwa?
15 Cakuãla, espiritu sandu li tu kuatisa oku kunda olondaka viwa. (Ovil. 1:8) Helie o pondola oku tu lomboluila ndomo upange woku kunda u kasi oku kundiwa voluali luosi? Sokolola ndoco: Pamue ove wa kala umue pokati komanu vana okuti omo liosõi kuenda usumba, wa simaile huti, ‘Lalimue eteke ndi ka kundila konjo lanjo!’ Puãi, cilo o kuete ombili yoku linga upange waco.b Olombangi vialua via Yehova vi kasi oku amamako oku kunda ndaño loku pembuiwa pamue alambalalo. Espiritu sandu lia Suku olio lika li tu kuatisa oku yula ovitangi kuenda oku linga ovina ka tu tẽla longusu yetu muẽle. (Mika 3:8; Mat. 17:20) Kuenje, tu lekisa okuti tu kasi oku songuiwa lespiritu lia Suku, poku endaenda kupange woku kunda.
Ocikele Cespiritu Sandu Koloneke Viya
16. Momo lie tua kolelela okuti Yehova o ka teyuila afendeli vaye vokuenda kuohali ya piãla?
16 Kovaso yoloneke, Yehova o ka talavaya lespiritu liaye volonepa via litepa oco a tẽlise ocipango caye. Konomuisa tete ndomo eye a teyuila. Ndomo tua ci kũlĩha, kosimbu Yehova wa talavaya lespiritu liaye oco a teyuile omanu vamue kuenda ofeka yosi ya va Isareli. Tua kolela okuti vokuenda kuohali ya piãla o ka teyuila afendeli vaye lespiritu sandu. Ka tu sukila oku kuata atatahãi konjila Yehova a ka kuama oco a tu tate. Omo liaco, tu koleli okuti Yehova ka ka ivala vana vo sole, kuenje eye o ka va kuatisa lespiritu sandu liaye.—2 Asa. 16:9; Osa. 139:7-12.
17. Yehova o ka talavaya ndati lespiritu sandu voluali luokaliye?
17 Yehova o ka talavaya ndati lespiritu sandu voluali luokaliye? Espiritu sandu olio li ka tẽlisa ovina via sonehiwa valivulu a ka nyanyumuiwa kotembo yaco. (Esit. 20:12) Nye ci ka sonehiwa valivulu aco? Mu ka sonehiwa olonumbi via Yehova vina tu ka kuama vokuenda kuohulukãi yanyamo. O lavoka oku ka konomuisa alivulu aco? Tu kasi oku kevelila lesanju oluali luokaliye. Ka tu tẽla oku sokolola asumũlũho osi tu ka kuata eci Yehova a ka talavaya lespiritu sandu oco a tẽlise ocipango caye catiamẽla kongongo kuenda omanu.
18. Ocimãho cipi o kuete?
18 Ka tu ka ivaliko okuti ocipango ca Yehova ci ka tẽlisiwa muẽle, momo eye o talavaya lespiritu sandu okuti, ongusu ya velapo voluali luosi. Ove wa kongeliwa vocipango caco. Kuenje, pinga ku Yehova espiritu liaye loku tava oku songuiwa lalio. (Luka 11:13) Omo liaco, kuata ocimãho coku ka tambula omuenyo kopui Volualil luokaliye palo posi, ndomo Yehova a likuminya vocipango caye.
[Atosi pombuelo yamẽla]
a Tanga Utala Wondavululi, 15 ya Kayovo wo 2008, kemẽla 21-25.
b Oco o kũlĩhe ulandu wa manji umue wa yula osõi kupange woku kunda kuenda wa linga ohundi ukuambili, tanga Utala Wondavululi 15 Yenyenye Linene wo 1993, kemẽla 19.
Ivaluka Eci Tua Lilongisa?
• Yehova wa talavaya ndati lespiritu sandu kosimbu oco a tẽlise ocipango caye?
• Yehova o kasi oku talavaya ndati lespiritu liaye koloneke vilo?
• Ndamupi Yehova a ka talavaya lespiritu liaye koloneke viya oco a tẽlise ocipango caye?
[Okakasia kemẽla 10]
O Kasi hẽ Oku Endela Vocinyi ca Amamako Oku Tua?
Yehova o kasi oku amamako oku tuisa ocinyi komanu vaye. Elomboloko liovina vipi via siata oku sandekiwa Vutala Wondavululi?
▪ Olusapo lua Yesu luetumbisa, lu tu kuatisa ndati oku kula kespiritu? (Mat. 13:33)—15 Yevambi Linene wo 2008, kemẽla 19-20.
▪ Elaleko Liakristão va enda kilu li sulila otembo yipi?—1 ya Kupemba wo 2007, kemẽla 30-31, kelimi Lioputu.
▪ Nye ci lomboloka oku fendela Yehova “lespiritu”? (Yoa. 4:24)—1 Yenyenye wo 2002, kemẽla 12.
▪ Owiñi wakahandangala u vumba konepa yipi yocitali conembele? (Esit. 7:15)—1 ya Kupemba wo 2002, kemẽla 30-31, kelimi Lioputu.
▪ Oku tepiwa kuolohombo lolomeme, kua fetika otembo yipi? (Mat. 25:31-33)—15 ya Mbalavipembe wo 1995, kemẽla 18-19, kelimi Lioputu.