Yehova Wa Tenda ‘Esinga Liovitue Viene’
“Layimue [ongungu] . . . yi lokila posi te Isiene wa ci panga. Puãi, ndaño esinga liovovitue viene lia tendiwa.”—MATEO 10:29, 30.
1, 2. (a) Momo lie Yovi a kuatela ovisimĩlo viokuti Yehova wo yanduluka? (b) Anga hẽ olondaka via Yovi vi lekisa okuti wa kapele ekandu Suku? Lombolola ulandu waco.
YOVI wa popele ku Yehova hati: “Ndi ku vilikiya kuenje ku ñumbulula. [Nditãi,] kuenje ku ndete. Wa pongoloka, wa ndingila ongangala. O nalisa ohali lolohõlo vieka liove.” Otembo yaco, Yovi wa pitile lepese liovokuasi aye kuenda olofa viomãla vaye. Noke wa kala oku liyaka locitangi coku vela. Ulandu waye, wa sonehiwa Vembimbiliya oco u tu kuatise poku liyaka lovitangi.—Yovi 30:20, 21.
2 Olondaka via Yovi vi kasi ndu okuti wa kapele ekandu Suku. Pole, eye ka kuatele ocisimĩlo caco. Yovi wa kala oku lombolola esumuo liaye. (Yovi 6:2, 3) Eye, ka kũlĩhĩle okuti, Satana eye wo kokela ovitangi. Omo liaco, wa simĩle okuti Yehova wo yanduluka. Kuenje wa popia ku Yehova hati: “Ocipala cove wa ci vundisila nye? Nye o nendela ndunyali wove?”a—Yovi 13:24.
3. Eci o liyaka lovitangi, ovisimĩlo vipi wa siata oku kuata?
3 Koloneke vilo, omanu va Yehova va siata oku liyaka lovitangi vialua vi tunda kuyaki, kopulitika, kovilemawe, koku kuka, kovovei, kuhukũi, kelambalalo kuenda kovina vikuavo. Citava okuti, ove wa siatavo oku liyaka lovitangi viaco. Kuenje, pamue o sima okuti Yehova wa ku yanduluka. Handi vali, wa kũlĩha ciwa olondaka vi sangiwa kelivulu lia Yoano 3:16, li popia hati: “Omo Suku a sola . . . oluali, oco a ecela Omõlaye wongunga.” Eci o liyaka lovitangi citava okuti o lipulisa ndoco: ‘Anga hẽ Suku o ndi sole muẽle? Anga hẽ wa kũlĩha ovitangi ndi kasi oku liyaka lavio? Anga hẽ o ndi kuatisa muẽle?’
4. Ovitangi vipi Paulu a liyaka lavio? Ndamupi tu pondolavo oku liyaka lovitangi viaco?
4 Tu konomuisi ovitangi Paulu a liyaka lavio. Eye wa popia hati: “Nda kapiwa osongo vetimba. Osongo yaco oyo omunga ya Satana yi mbeta mbeta okuti si litambela enene. . . . Nda likutilila olonjanja vitatu ku Ñala okuti [osonga yaco] yi nunda.” Yehova wa yeva ohutililo yaye. Pole, wo lekisa okuti, ka lingi ocikomo coku u yovola kocitangi caco. Paulu wa sukilile oku kolela kunene wa Yehova oco o kuatise oku liyaka ‘losongo yaco.’b (2 Va Korindo 12:7-9) Citava okuti eci ove o liyaka locitangi ndeci ca Paulu, pamue o popia ndoco: ‘Yehova ka kasi oku ndi kuatisa kovitangi viange. Anga hẽ wa kapako muẽle ovitangi viaco?’ Ivaluka okuti, Yehova ka ku yandulukile. Kuli uvangi u lekisa okuti Eye wa kapako omanu vaye. Uvangi waco, wa lekisiwa kolondaka Yesu a popia noke yoku nõla olondonge viaye. Tu konomuisi ndomo olondaka viaco vi pondola oku tu kuatisa koloneke vilo.
Momo Lie ‘ka tu Kuatela Ohele’?
5, 6. (a) Ekuatiso lie Yesu a eca kolondonge viaye oco ka vika kuate usumba lovitangi va kala oku lavoka? (b) Ndamupi Paulu a lekisa ekolelo lioku kuatisiwa la Yehova?
5 Ovapostolo va tambuile ku Yesu ‘unene woku tundisa olondele kuenda woku sakula ovovei osi.’ Pole, eci ka ci lomboloka okuti ka va liyakele vali lovitangi. Yesu wa lombolola ovitangi vimue va kala oku lavoka. Eye wa va sapuila hati: ‘Ko ka kuateli usumba ava va ipa etimba. Puãi kuateli usumba u o tẽla oku nyõla omuenyo womunu okuti ka kuata vali elavoko liepinduko.’—Mateo 10:1, 16-22, 28.
6 Yesu poku kuatisa olondonge viaye oco vi limbuke esunga lioku yuvula usumba, wa va ĩha ovindekaise vivali. Eye wa va sapuila hati: “Olongungu vivali hẽ, ka vi landiwa lolusendu? Kuenje layimue [yi fa] te Isiene wa ci panga. Puãi ndaño esinga liovovitue viene lia tendiwa. Oco ko ka kuati ohele, momo wa velipo olongungu.” (Mateo 10:29-31) Olondaka via Yesu, vi lekisa okuti, eci tu liyaka lovitangi tu sukila oku yuvula oku kuata usumba. Momo, Yehova o tu lava. Upostolo Paulu wa kuatele ekolelo liaco. Eye wa popia hati: “Nda Suku o kasi letu helie o tu katukila? U ka kuatelele Omõlaye ohenda, puãi wo tu wavela etu vosi, ka tu ihilevo hẽ ovina viosi kumue laye?” (Va Roma 8:31, 32) Citava okuti ove o liyakavo lovitangi vialua. Pole, ivaluka okuti, nda wamamako lepokolo liove, Yehova oku kuatisa. Uvangi waco tu u limbukila kolondaka Yesu a sapuila ovapostolo vaye.
Esilivilo Liolongungu
7, 8. (a) Koloneke via Yesu omanu va enda oku tenda ndati olongungu? (b) Momo lie elivulu lia Mateo 10:29, lia tukuila ondaka yo Helasi yoku popia hati “olongungu”?
7 Olondaka via Yesu, vi eca uvangi wokuti, Yehova wa kapako omanu Vaye. Tu konomuisi eci catiamẽla kolongungu. Koloneke via Yesu, omanu va enda loku kuata olongungu oco va vilie. Pole, va vi tendele ndefengi omo lioku nyõla kuavo ovikũla. Kotembo yaco kua kala olongungu vialua. Kuenda via lelukile calua oku vi landa. Nda omunu wa sokiya olombongo vioku landa olongungu vivali, ka vo wĩha lika vikuãla. Pole vo wĩha vitãlo. Momo, ongungu yatãlo va enda loku yi tenda okuti ka yi kuete esilivilo.—Luka 12:6.
8 Kũlĩhĩsavo eci catiamẽla ketimba liolongungu via tukuiwa ndeti volusapo lua Yesu. Ovio, ka vi kasi ndolonjila vikuavo. Momo ndaño via pita anyamo alua, ka vi kala vinene. Ondaka yo Helasi yoku popia hati, “olongungu,” ndomo ya tukuiwa kelivulu lia Mateo 10:29, yi lomboloka olonjila vitito. Yesu poku tukula olonjila viaco, wa yonguile oku kuatisa olondonge viaye oco vi sokolole utito wolonjila viaco.
9. Olusapo lua Yesu luatiamẽla kolongungu lu lomboloka nye?
9 Olondaka via Yesu viatiamẽla kolongungu, vi kuete esilivilo liocili. Momo vi tu kuatisa oku limbuka okuti, ovina viosi vi molẽha komanu ndu okuti ka vi kuete esilivilo, Yehova wa vi kapako. Yesu wa lekisa uvangi waco poku popia okuti, pokati kolonjila vitito layimue yi fa okuti Yehova ka yi moli. Omo liaco, Yehova wa kapakovo omanu vana va litumbika kokuaye.
10. Olondaka viokuti, ‘esinga liovitue viene lia tendiwa,’ vi lomboloka nye?
10 Yesu poku amisako lolusapo luaye, wa popia hati: ‘Esinga liovitue viene lia tendiwa.’ (Mateo 10:30) Olondaka evi vi lekisa elomboloko liolusapo lua Yesu luatiamẽla kolongungu. Vutue womunu muli eci ci soka 100.000 kovikolo viesinga. Pole, olonjanja vimue ka tua siatele oku kapako ukolo umosi wesinga lietu. Momo u molẽha ndu okuti wa lisoka lesinga liosi. Pole, Yehova wa kapako ukolo wosi wesinga lietu kuenda wa litenda. Oco hẽ kuli ovina vimue komuenyo wetu okuti ka vi kũlĩhĩle? Yehova wa kũlĩha ciwa ekalo liomanu vaye kuenda eci ci kasi ‘vovitima viavo.’—1 Samuele 16:7.
11. Daviti wa lekisa ndati okuti, Yehova wo kapako?
11 Daviti wa liyaka lovitangi vialua. Pole, wa kũlĩhĩle okuti, Yehova wo kapako. Omo liaco, wa popia hati: “A Yehova, ove wa ñulĩhĩsa, wa ñulĩha muẽle. Wa ñulĩha poku tumãla lo poku votoka. Wa limbuka ovisimĩlo viange tunde kupãla.” (Osamo 139:1, 2) Ove o sukila oku ivaluka okuti, Yehova wa kũlĩha ciwa ekalo liove. (Yeremiya 17:10) Omo liaco, kuka kuate ovisimĩlo viokuti ku kuete esilivilo kovaso a Yehova.
“Kapa Asuẽlẽla Ange Vongalafa Yove”
12. Tua kũlĩha ndati okuti, Yehova o lete ovitangi viomanu vaye?
12 Yehova wa kũlĩha ciwa ekalo liomanu vaye. Kuenda wa kũlĩhavo ovitangi va kasi oku liyaka lavio. Eci va Isareli va kala oku tala ohali kupika Kegito, Yehova wa sapuilile Mose hati: “Nda mõla ohali yomanu vange va kasi Vegito. Nda yeva ndeci va lilila asongui vavo vupange [kuenda] nda kũlĩha olohali viavo.” (Etundilo 3:7) Tu sanjuka calua poku kũlĩha okuti Yehova o lete ovitangi vietu kuenda ohali tu kasi oku liyaka layo. Eye o yevelela olohutililo vietu vioku pinga ekuatiso. Kuenda ka tu yanduluka eci tu tala ohali.
13. Nye ci lekisa okuti Yehova o kuete ocikembe lomanu vaye?
13 Ocili okuti, Yehova wa siata oku kuatisa omanu vosi va kuete ukamba laye. Uvangi waco tu u limbukila kocikembe a kuatela va Isareli. Olonjanja vimue, ovo va enda oku tala ohali omo liesino. Pole, Isaya wa popia hati: ‘Olohali viavo Yehova wa vi talela kumosi lavo.’ (Isaya 63:9) Omo liaco, ivaluka okuti, Yehova o sumua calua eci ove o tala ohali. Momo wa litumbika kokuaye. Anga hẽ ukũlĩhĩso waco ka u ku vetiya oku pandikisa eci o liyaka lovitangi?—1 Petulu 5:6, 7.
14. Ocitangi cipi Daviti a liyaka laco eci a soneha Osamo 56?
14 Soma Daviti wa kuatele ekolelo liokuti, Yehova wo kapako kuenda wa kũlĩha ohali yaye. Uvangi waco wa lekisiwa Vosamo 56 yina a soneha eci a kala oku lambalaliwa la Soma Saulu. Daviti wa tilila volupale luo Gati. Pole, wa kala lusumba woku kuatiwa eci va Filisiti vo limbuka. Eye wa popia hati: “Utanya wosi ovanyãli vange va ñosa ñosa. Momo va lua va njakisa loku lituna.” Omo liovitangi viaco, Daviti wa pinga ekuatiso ku Yehova poku popia hati: “Eteke liosi va pengaisa ondaka yange. Ovisimĩlo viavo viosi vi sanda oku muisa [eci] cĩvi.”—Osamo 56:2, 5.
15. (a) Eci Daviti a pinga ku Yehova oco a kape asuẽlẽla aye vongalafa ale velivulu, ci lomboloka nye? (b) Eci tu liyaka lovitangi nye tu sukila oku ivaluka?
15 Vosamo 56:8, Daviti wa popia hati: “Wa kũlĩha ndomo nda pumba pumba otulo. Kapa asuẽlẽla ange vongalafa yove. Velivulu liove hẽ hamoko a sonehiwa?” Olondaka evi vi lekisa okuti Yehova o kuete ocikembe lomanu vaye. Eci tu liyaka lovitangi, tu sukila oku likutilila Kokuaye oco a tu kuatise. Ndaño okuti Yesu wa kala omunu umue wa lipua, pole, eci a tala ohali, wa likutilila ku Yehova. (Va Heveru 5:7) Daviti wa kũlĩhĩle okuti Yehova o lete ohali yaye kuenda o pondola oku u kuatisa. Kuenje ci kasi ndu okuti asuẽlẽla aye a kapiwa vongalafa, ale a sonehiwa velivulu limue.c Ove pamue o simavo okuti eci o tala ohali, asuẽlẽla ove Yehova o va kapa vongalafa, ale velivulu limue. Omo liaco, kolela kokuaye. Embimbiliya li tu likuminya hati: “Yehova yu ocipepi la vakuavitima via teka. O popela ava va kasi lovitima via samba.”—Osamo 34:18.
Kuata Ukamba la Yehova
16, 17. (a) Tua kũlĩha ndati okuti Yehova wa kapako ovitangi viomanu vaye? (b) Nye Yehova a kasi oku linga oco omanu va kuate ukamba laye?
16 Oku kũlĩha okuti Yehova ‘wa tenda esinga liovutue wetu,’ ci pamisa ekolelo lietu. Kuenda ci tu kuatisa oku limbuka okuti Yehova o tu kuetele ocisola lohenda. Tu kasi oku lavoka oluali luokaliye muna okuti ka muka kala vali ohali. Pole, cilo Yehova o kasi oku lingila omanu vaye ovina vialua vi komohĩsa. Daviti wa popia hati: “Ukamba wa Yehova u kasi lava vo sumba. Ohuminyo yaye o va yi longaisa.”—Osamo 25:14.
17 Omanu omo okuti ka va lipuile, va siata oku sima hati, ka va pondola oku kuata ukamba la Yehova. Pole, Eye o laleka omanu vana vo sumbila oco va tunge vonembele yaye. (Osamo 15:1-5) Nye Yehova a kasi oku lingila omanu vaco? Eye o kasi oku va longisa ocisila caye ndeci a lingile la Daviti. Yehova wa va kolela. Kuenje ‘wa situlula ovisimĩlo viaye’ kovaprofeto oco va kũlĩhe ocipango caye kuenda oku va sapuila eci va sukila oku linga oco va pokole kokuaye.—Amosi 3:7.
18. Tua kũlĩha ndati okuti Yehova o yongola okuti tu kuata ukamba laye?
18 Tu sanjuka calua poku kũlĩha okuti, ndaño ka tualipuile tu pondola oku kuata ukamba la Yehova. Embimbiliya li tu sapuila hati: “Amẽli ku Suku kuenje eye amẽla kokuene.” (Tiago 4:8) Yehova o yongola okuti tu kuata ukamba laye. Eye wa yulula onjila yecelela oku kuata ukamba waco. Ocisembi ca Yesu oco ca yulula onjila yaco. Embimbiliya li popia hati: “Etu tu . . . sole [Yehova] momo eye wa lianga oku tu sola.”—1 Yoano 4:19.
19. Epandi li pondola ndati oku pamisa ukamba wetu la Yehova?
19 Ukamba wetu la Yehova u pamisiwa lika eci tu pandikisa kovitangi. Ndonge Tiago wa popia hati: “Epandi . . . liene li male upange walio, okuti vu kanguka, loku suapo, kuenje lacimue cu kambeli.” (Tiago 1:4) “Upange” upi u tẽlisiwa lika lepandi? Tu ivaluki ‘osongo Paulu a liyaka layo ketimba.’ Nye co kuatisa oku pandikisa locitangi caco? Eci a kala oku liyaka lovitangi wa popia hati: “[Ndi] sole cimue oku lipandela okupekengua kuange okuti unene wa Kristu u mbuila. Oco, mekonda lia Kristu, [ndi] sanjukila oku pekengua, lafuki, lovosuke, lakangiso, lasakalalo, momo, eci nda pekengua, oco ñuete ongusu.” (2 Va Korindo 12:9, 10) Ulandu wa Paulu u lekisa okuti, Yehova wo wĩha ‘unene a sukilile’ oco a pandikise kovitangi. Kuenje, co kuatisa oku linga ekamba lia Yesu kuenda lia Yehova.—2 Va Korindo 4:7; Va Filipoi 4:11-13.
20. Momo lie tu kuetele ekolelo liokuti Yehova o tu kuatisa eci tu liyaka lovitangi?
20 Olonjanja vimue, Yehova ecelela okuti, ovitangi vietu viamamako. Pole, tu sukila oku ivaluka eci Eye a likuminya komanu vana vo sumbila hati: “Lalimue eteke hu yanduluka ndaño oku ku sia.” (Va Heveru 13:5) Ove o pondola oku mola ekuatiso liaco kuenda elembeleko li tunda Kokuaye. Yehova wa ‘tenda esinga liosi lio vutue wove.’ Kuenda olete epandi liove. Eye o sumua calua poku mõla ovitangi viove, kuenje oku kuatisa. Omo liaco, lalimue eteke aka ‘ivalako upange wove kuenda ocisola wa siata oku lekisa kokuaye.’—Va Heveru 6:10.
[Atosi pombuelo yamẽla]
a Daviti kumue lomãla va Kora, va popelevo olondaka ndevi via Yovi.—Osamo 10:1; 44:24.
b Embimbiliya ka li tukula “osongo” yaco Paulu a liyaka layo. Pole, citava okuti, wa kala locitangi cimue vovaso. Ondaka ‘osongo vetimba,’ yi lombolokavo ovapostolo vesanda vana va lavisile upange wa Paulu.—2 Va Korindo 11:6, 13-15; Va Galatia 4:15; 6:11.
c Kosimbu, omanu va enda oku panga olongalafa viovipa violomeme, violohombo, kuenda violongombe. Volongalafa viaco va enda oku selekamo asenjele, osepo, kuenda ovava. Pole, volongalafa vikuavo via fina, va enda oku selekamo ulela kuenda ovinyu.
Ivaluka Eci Tua Lilongisa?
• Ovina vipi vi vetiya omunu oku sima hati Yehova wo yanduluka?
• Nye tu lilongisa volusapo lua Yesu luatiamẽla kolongungu kuenda koku tendiwa kuesinga lietu?
• Olondaka viokuti, Yehova o kapa ‘asuẽlẽla vongalafa ale velivulu liaye’ vi lomboloka nye?
• Tu pondola ndati oku kuata ‘ukamba la Yehova’?
[Elitalatu kemẽla 19]
Momo lie Yehova kopilile ‘osongo Paulu a kala oku liyaka layo ketimba’?
[Elitalatu kemẽla 20]
Nye tu lilongisa volusapo lua Yesu luatiamẽla kolongungu?
[Ono Yelitalatu]
© J. Heidecker/VIREO
[Elitalatu kemẽla 22]
Nda tua tanga Embimbiliya oloneke viosi, tuka limbuka okuti Yehova o kasi oku tu kuatisa