Tu Amamiko Oku Lekisa Esanju Ndaño Lovitangi
“Vosi . . . vakuakuwunda [ku Yehova,] va yolele. Va kaluke hũ lonjolela.”—OSA. 5:11.
1, 2. (a) Koloneke vilo, ovina vipi via siata oku nena ohali komanu? (b) Momo lie Akristão vocili va sukilila oku pandikisa ndaño lovitangi va siata oku liyaka lavio?
OLOMBANGI VIA YEHOVA, vi liyakavo lovitangi via siata oku pita voluali. Valua pokati kavo va siata oku liyaka lungangala, ovoyaki, kuenda ovitangi vikuavo. Ovilemawe, uhukũi, ovovei, kuenda oku fa, via siata oku nena ohali komanu. Upostolo Paulu wa soneha hati: “Tua kũlĩha okuti, toke cilo, ovina viosi via lulikiwa vi yavalela kumuamue olongembia vioku cita.” (Va Rom. 8:22) Tua siatavo oku liyaka lovitangi vi tunda kekambo lioku lipua. Ovitangi viaco, vi pondola oku tu vetiya oku lekisa esumuo ndeci ca pita la Soma Daviti wa popia hati: “Ovakandu ange a pitahãla utue wange, a nema enene ndocitele ci lema.”—Osa. 38:4.
2 Ndaño omanu va siata oku liyaka lovitangi, pole, Akristão vocili, va likolisilako oku ambata uti wavo vupopi umue wocindekaise. (Luka 14:27) Ovo va siata oku lambalaliwa, ndeci ca pita lolondonge via Yesu. (Mat. 10:22, 23; Yoa. 15:20; 16:2) Pole, tu sukila oku likolisilako oku kuama Kristu, kuenda oku pandikisa kovitangi, osimbu tu lavoka asumũlũho voluali luokaliye.—Mat. 7:13, 14; Luka 13:24.
3. Tua kũlĩha ndati okuti, Akristão ka va sukila oku tala ohali oco va sanjuise Suku?
3 Ndaño lovitangi, anga hẽ, Akristão ka va kuete esanju komuenyo? Anga hẽ omuenyo wetu wa sokiyiwila lika oku liyaka lovitangi toke kesulilo lioluali lulo? Yehova o yongola okuti, tu kuata esanju osimbu tu lavoka oku tẽlisiwa kuolohuminyo viaye. Embimbiliya li lombolola okuti, afendeli va Suku va kuete esanju liocili. (Tanga Isaya 65:13, 14.) Osamo 5:11, yi popia hati: “Vosi . . . vakuakuwunda [ku Yehova], va yolele. Va kaluke hũ lonjolela.” Tu pondola oku kuata esanju, lombembua yovutima ndaño lovitangi. Omo liaco, tu konomuisi ndomo Embimbiliya li pondola oku tu kuatisa oku yula ovitangi kuenda oku kuata esanju.
Yehova Eye ‘Suku Yesanju’
4. Nye Yehova a siata oku yeva vutima, eci oviluvo viaye vi liwekapo oku linga ocipango caye?
4 Tu konomuisi ovina viatiamẽla ku Yehova. Ndaño okuti eye Suku Wavelapo, una o kuete unene woku viala oluali luosi, pole, ka sukila ekuatiso liomanu, kuenda lacimue co kambela. Ndaño Yehova o kuete unene walua, pole wa sumuile calua eci umue pokati komãla vaye vespiritu a lueya, kuenje wa linga Satana. Esumuo lia Suku lieya oku livokiya calua eci ovangelo vamue va li kongela ku Satana omo liesino. Suku wa sumuilevo, eci Adama la Heva va liwekapo oku pokola kokuaye. Omo liaco, valua pokati komãla vavo, ka va siatele oku lekisa epokolo kuviali wa Yehova.—Va Rom. 3:23.
5. Nye ca siata oku sumuisa Yehova?
5 Usuanji wa Satana, u kasi oku livokiya toke cilo. Tunde eci Yehova a fetika oku mola vana va fendela oviteka, ungangala, umondi, kuenda ukahonga, pa pita ale ci soka 6.000 kanyamo. (Efet. 6:5, 6, 11, 12) Eye wa siata oku mola omanu valua va popia uhembi, loku tomba onduko yaye. Afendeli vocili va Suku, va siatavo oku sumua omo liovina viaco. Embimbiliya li lombolola ulandu waco poku popia hati: “Olonjanja viñami hẽ, va tamalala laye vekalasoko loku u nyumalisa vekango? Vo nyika nyika olonjanja [vialua], kuenje va valula U o kola wa Isareli.” (Osa. 78:40, 41) Yehova wa siata oku sumua calua eci afendeli vaye va talisiwa ohali. (Yer. 3:1-10) Yehova wa siatavo oku sumua eci olondingaĩvi vi linga ovina ka via sungulukile.—Tanga Isaya 63:9, 10.
6. Yehova o tenda ndati ovitangi via siata koloneke vilo?
6 Ndaño Yehova wa siata oku sumua omo lievĩho li kasi voluali, pole, ka ci lekisa okuti, ka pondola oku malako ovina viaco. Afendeli va Yehova eci va pita lovitangi, eye wa siata oku va kuatisa oco va tẽle oku liyaka lavio. Tunde kosimbu, wa siata oku linga eliangiliyo, oco a tẽlise ocipango caye. Omo liaco, Yehova o lavoka lesanju oku sivayiwa kuviali waye uka nena asumũlũho kafendeli vaye vakuekolelo. (Osa. 104:31) Ndaño letombo lia lingiwa ku Yehova, pole, o kasi oku amamako oku kala ‘Suku yesanju.’—1 Tim. 1:11; Osa. 16:11.
7, 8. Tu kuama ndati ongangu ya Yehova poku liyaka lovitangi?
7 Ka tu sokisiwa la Yehova catiamẽla kepondolo lioku tetulula ovitangi. Pole, tu pondola oku kuama ongangu yaye poku liyaka lovitangi. Olonjanja vimue, tua siata oku sumua omo liovitangi, pole, tu sukila oku yuvula oku amamako lesumuo liaco. Omo okuti tua lulikiwa lesetahãlo lia Yehova, tu kuete epondolo lioku sokolola ovina, loku lekisa olondunge vi tu kuatisa oku kũlĩhĩsa ovitangi vietu, kuenda oku nõla onjila ya sunguluka poku vi tetulula.
8 Oku limbuka okuti, ka tu pondola oku linga ovina vimue, ci tu kuatisa oku liyaka lovitangi. Oku tiamisila utima kovitangi tu liyaka lavio, ci koka esumuo, kuenje, ka tu kuata esanju li tunda kefendelo lietu. Noke yoku tetulula ocitangi cimue, tu yuvuli oku ci sokolola, pole, tu tiamisili utima kovina vi nena esanju. Ovolandu Embimbiliya a kuãimo, a lombolola ciwa etosi liaco.
Esunguluko li Kuete Esilivilo
9. Hana wa lekisa ndati esunguluko?
9 Tu konomuisi ulandu wa Hana una wa kala ina yuprofeto Samuele. Eye wa sumuile calua omo lioku kũlĩha okuti, ka pondola oku cita omãla. Hana wa pembuiwa la sepakãi yaye. Omo liaco, wa enda oku lila calua, kuenda ka kuatele onjongole yokulia. (1 Sam. 1:2-7) Eteke limue, eci a endele vonembele ya Yehova, ‘wa sumuile calua, kuenda wa likutilila loku lila.’ (1 Sam. 1:10) Osimbu a kala oku sapula ovitangi viaye ku Yehova, Eli ocitunda cinene, wamẽla kokuaye, kuenje wo sapuila hati: “Kuende lombembua. Suku ya Isareli a ku muise eci wo lomba.” (1 Sam. 1:17) Noke, Hana wa limbuka okuti, wa tẽlisa ovina viosi a yonguile oku linga. Kuenje, wa liwekapo oku sokolola ocitangi caye coku kala osĩsu. Hana wa lekisa esunguluko. Noke, ‘wa enda, kuenje wa fetika okulia, kuenda ocipala caye ka ca sumuile vali.’—1 Sam. 1:18.
10. Ocisimĩlo cipi Paulu a lekisa eci a liyaka locitangi cimue okuti, ka tẽlele oku ci tetulula?
10 Upostolo Paulu wa lekisa ocisimĩlo cimuamue eci a liyaka locitangi cimue. Ocitangi caco co sumuisile calua, kuenje wa ci tukula hati, “osongo vetimba.” (2 Va Kor. 12:7) Paulu wa likolisilako oku yula ocitangi caco poku likutilila ku Yehova loku pinga ekuatiso. Olonjanja viñami Paulu a likutilila ku Yehova catiamẽla kocitangi caye? Wa ci linga olonjanja vitatu. Vonjanja yatatu, Suku wo sapuila hati, ‘osongo yi kasi vetimba’ liaye, ka yi tundimo locikomo. Paulu wa tava kelungulo liaco, kuenje wa tiamisila utima koku vumba Yehova.—Tanga 2 Va Korindo 12:8-10.
11. Olohutililo vi kuete esilivilo lie poku liyaka lovitangi?
11 Ovolandu a tukuiwa ndeti, ka a lekisa okuti, tu sukila oku liwekapo oku likutilila ku Yehova eci tu liyaka lovitangi. (Osa. 86:7) Ondaka ya Suku yi tu vetiya hati: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene.” Yehova o tambulula ndati olohutililo vietu? Embimbiliya liamisako loku popia hati: “Ombembua ya Suku, yina ya piãla olondunge viosi, yi lava ovitima viene lovisimĩlo viene vu Kristu Yesu.” (Va Fil. 4:6, 7) Citava okuti, Yehova ka imula ocitangi tu liyaka laco, pole, o tambulula olohutililo tu linga, poku lava ovisimĩlo vietu. Noke yoku tukula ocitangi cimue vohutililo, tu sukila oku limbuka ovitangi viyilila koku sakalala lovina viaco.
Lekisa Esanju Poku Linga Ocipango ca Suku
12. Momo lie oku amamako lesumuo, ci nenela ovitangi?
12 Elivulu Liolosapo 24:10, li popia hati: “Nda wa konyoha keteke liohali, [ci] lomboloka okuti ongusu yove yitito.” Olusapo lukuavo lu popia hati: “Utima wa sumua u honguisa omuenyo.” (Olosap. 15:13) Vamanji vamue va siata oku liwekapo oku tanga Ondaka ya Suku, kuenda ka va sokolola vali ovina va tanga, omo liesumuo. Va liwekapo oku linga olohutililo, kuenda va tepulula ukamba wavo la vamanji. Oku amamako lesumuo, ci nena ovitangi.—Olosap. 18:1, 14.
13. Ovina vipi vi tu kuatisa oku yuvula esumuo, pole, vi tu nenela esanju?
13 Oku kuata ovisimĩlo via sunguluka, ci tu kuatisa oku sokolola ovina vi nena esanju komuenyo. Daviti wa soneha hati: “Oku linga ocipango cove, a Suku yange, oco [ndi] sanjukila.” (Osa. 40:8) Ndaño tu kasi oku liyaka lovitangi, pole, tu sukila oku amamako oku linga ovina viatiamẽla kefendelo lietu. Oco tu yuvule esumuo, tu sukila oku linga ovina vi nena esanju. Yehova o tu sapuila hati, tu kuata lika esanju nda tua tanga Ondaka yaye oloneke viosi. (Osa. 1:1, 2; Tia. 1:25) Ovisonehua vi Kola kuenda olohongele, via siata oku tu vetiya ‘lolondaka via posoka’ okuti vi tu pamisa, kuenda vi sanjuisa utima wetu.—Olosap. 12:25; 16:24.
14. Ohuminyo yipi yi tunda ku Yehova yi tu ĩha esanju cilo?
14 Suku wa kũlĩha esunga lieci tu sukilila oku kuata esanju. Ohuminyo yaye yoku tu yovola, oyo ono yesanju lietu. (Osa. 13:5) Tua kũlĩha okuti ndaño cilo tua siata oku liyaka lovitangi, pole, Suku oka eca onima ku vana vo sandiliya. (Tanga Ukundi 8:12.) Uprofeto Havakuki, wa lekisa ekolelo liaco poku soneha ndoco: “Ndaño ukuyu ko yovi, pamue uyuva ka wimi, ndaño koliveira ka kuiya apako, pamue kovapia ka ku tundi okulia, ndaño vocunda ka mũli olomeme, pamue olongombe vocimanga cavio, haimo njolela Yehova, [kuenda ndi] sanjukila Suku yeyovo liange.”—Hav. 3:17, 18.
‘Vana Okuti Yehova Eye Suku Yavo, va Sanjuka’!
15, 16. Tukula ovina vimue Suku a siata oku tu ĩha vi tu nenela esanju, osimbu tu lavoka asumũlũho tuka tambula kovaso yoloneke.
15 Yehova o yongola okuti, tu sanjukila ovina a siata oku tu ĩha, osimbu tu lavoka ekalo liwa kovaso yoloneke. Embimbiliya li popia hati: “Nda kũliha okuti [komanu] ka kuli ca velapo, okuti oku sanjuka loku kala ciwa osimbu va kasi lomuenyo ci sule. Nda kũlihavo okuti nda omunu o lialia kuenda o nyuanyua kuenda o sanjukila upange waye wosi, cosi eci ocali ca tunda ku Suku.” (Uku. 3:12, 13) Voku “kala ciwa,” mua kongela oku lingila vakuetu ovina vi va kuatisa. Yesu wa popia hati, esanju li tunda koku eca lia velapo okuti, li tunda koku tambula li sule. Oku lingila ovina viwa ohueli yetu, omãla, olonjali, kuenda epata lietu, ci nena esanju lialua. (Olosap. 3:27) Oku lekisa ocisola ku vamanji lohenda, kuenda oku va ecela, ci tu nenela esanju, kuenda ci sanjuisa utima wa Yehova. (Va Gal. 6:10; Va Kol. 3:12-14; 1 Pet. 4:8, 9) Omo liaco, tu likolisiliko oku tẽlisa upange wetu woku kunda una u nena esanju.
16 Olondaka tua tanga kelivulu Liukundi, vi lekisa esanju li tunda kokulia kuenda koku nyua. Ndaño lovitangi tu liyaka lavio, pole, tu pondola oku kuata esanju omo liovina tua siata oku tambula ku Yehova ndeci: Oku tala oku iñila kuekumbi ku komohisa, ovisenge lolomunda via posoka, omãla vovinyama va posoka, kuenda ovina vikuavo vi komõhisa. Osimbu tu sokolola ovina viaco, ocisola tu kuetele Yehova ci livokiya, momo eye Ukuakueca ovina viosi viwa.
17. Nye cika tu popela kovitangi tua siata oku liyaka lavio, kuenda nye ci tu ĩha elembeleko?
17 Ocisola tu kuetele Suku, loku pokola kolonumbi viaye, kuenda oku kolela kocilumba cocisembi ca Yesu, ci tu kuatisa oku liyaka lovitangi viekambo lioku lipua, kuenda ci tu ĩha esanju ka li pui. (1 Yoa. 5:3) Tu pondola oku kuata elembeleko poku limbuka okuti, Yehova wa kapako ovitangi tua siata oku liyaka lavio. Daviti wa soneha hati: “Njolela, [kuenda ndi] sanjukila ocisola cove ka ci pui. Momo wa mõla ohali yange kuenje wa limbuka otokua yange.” (Osa. 31:7) Omo liocisola Yehova a tu kuetele, oka tu popela kovitangi viosi tua siata oku liyaka lavio.—Osa. 34:19.
18. Momo lie afendeli va Suku va sukilila oku kuata esanju?
18 Osimbu tu lavoka oku tẽlisiwa kuolohuminyo via Yehova Suku yesanju, tu sukila oku kuama ongangu yaye yoku lekisa esanju. Ka tuka eceleli okuti, ovisimĩlo ka via sungulukile vi tepulula ombili yetu kupange wa Suku. Eci tu liyaka lovitangi, tu sukila oku kuatisiwa lovisimĩlo via sunguluka, kuenda olondunge vi tunda ku Yehova oco vi tu songuile. Eye o pondola oku tu kuatisa oku kuata ovisimĩlo via sunguluka oco tu tẽle oku liyaka lovitangi. Omo liaco, tu sanjukili ekuatiso a siata oku tu ĩha oku kongelamo ovina viespiritu. Nda tua linga ukamba la ‘Yehova Suku yetu, tu kuata esanju lialua’!—Osa. 144:15.
Nye wa Lilongisa?
• Tu pondola ndati oku kuama ongangu ya Yehova poku liyaka lovitangi?
• Esunguluko li tu kuatisa ndati oku liyaka lovitangi?
• Tu kuata ndati esanju poku tẽlisa ocipango ca Suku ndaño lovitangi?
[Alitalatu kemẽla 16]
Yehova wa sumua omo liovina vĩvi via siata voluali
[Ono Yelitalatu]
© G.M.B. Akash/Panos Pictures
[Alitalatu kemẽla 18]
Yehova wa siata oku tu ĩha ovina vialua vi tu kuatisa oku amamako lesanju