Vamanji va li Kuatela Omunga Locisola

Ulandu Wohongele yi Lingaiwa Unyamo Lunyamo

VONJANGO Yolohongele vinene Yolombangi Via Yehova, kolupale luo Nova Jersey kofeka yo Estados Unidos, mua yuvile calua. Komẽle yeteke 3 ya Mbalavipembe yunyamo wo 2009, eci ci pitahãla 5.000 komanu va liongoluila kohongele ya siata oku lingiwa unyamo lunyamo lo Sociedade Torre de Vigia de Bíblias e Tratados yo ko Pennsylvania, okuti tunde eci ohongele yaco ya fetika, ya lingiwa ale 125 kolonjanja. Olohuluwa via vamanji va mola kuenda va yevelela ulandu wovipama kolosapalalo vitatu vio Betele ko Estados Unidos kuenda ko Betele yo ko Kanada. Vocosi, vamanji va soka 13.235, va likuata omunga locisola va kuetele Yehova, va kala kohongele ya lingiwa vokuenda kuolowola vitatu.

Manji Geoffrey Jackson wa tiamẽla Kosungu Yolombangi Via Yehova, eye wa kala usongui wovipama. Eye wa fetika ohongele lovisungo via imbiwa la vamanji vo ko Betele viopiwa velivulu liokaliye liovisungo. Manji David Splane wa tiamẽla Kosungu Yolombangi Via Yehova, wa songola ovisungo kuenda wa lombolola esilivilo liovisikilo kefendelo liocili. Olonjeveleli via kala kohongele yaco via lalekiwa oku imba ovisungo vitatu viokaliye; vamanji vo ko Betele ovo va imba tete, noke va imbila kumosi lolonjeveleli. Ovisungo via imbiwila omo liohongele yaco ilikasi; pole, eci ka ca siatele oku lingiwa kolohongele viekongelo, vimbo levi viofeka.

Ovolandu a Tunda Kolofiliale

Vamanji va tiamẽla kocisoko co Filiale va lombolola ovolandu a tunda kolofiliale vitãlo. Manji Kenneth Little wa lombolola okuti ofeka yo Kanada yi ka fetika oku panga olorevista viavo muẽle levi vi ka tumiwa ko Estados Unidos, omo lievokiyo liupange kolofeka viaco. Oco ci tẽlisiwe ci sukila olomakina viokaliye vi ka talavaya 16 kolowola veteke.

Manji Reiner Thompson wa lombolola upange woku kunda Usoma u kasi oku lingiwa ko República Dominicana, kuenda manji Albert Olih wa tukula ulandu wo ko Nigéria. Manji Emile Kritzinger wo ko Moçambique, wa popia okuti, noke yoku lambalaliwa vokuenda kuanyamo alua, Olombangi Via Yehova kofeka yaco via tambula elianjo lioku fendela kunyamo wo 1992. Olofeka evi vitatu via kuata evokiyo linene ketendelo liakundi vusoma. Manji Viv Mouritz, wo kofiliale yo ko Austrália wa lombolola ndomo vamanji vo kofeka yo Timor Leste va kasi oku kuatisiwa la vamanji vo ko Austrália.

Ovisoko Viosungu Yolombangi Via Yehova

Tunde kunyamo wo 1976, ovopange osi Olombangi Via Yehova a kasi oku songuiwa lovisoko epandu Yosungu Yolombangi Via Yehova. Noke kua nõliwa vamanji va panga onepa kolomeme vikuavo oco va kuatise kupange waco. Cilo, 23 ya vamanji va linga oloñuatisi kupange owu. Vetendelo liaco, kua pulisiwa epandu pokati kavo. Omunu lomunu pokati kavo, o kasi kupange wotembo yosi ci soka 57 kanyamo; oku ci kongela va pesela 341 kanyamo kupange waco.

Manji Don Adams, wa iñila ko Betele kunyamo wo 1943, wa lekisa okuti Ocisoko Casongui ci kuete asongui akuavo a tiamẽla kovisoko vitãlo, kuenda ovisoko viaco vi talavayela kumosi locisola. Ovisoko viaco, vi potolola ovitangi vimue ndeci: alambalalo, oku tetulula ovitangi lolombiali, lovisalu kuenda ovitangi vikuavo Olombangi Via Yehova via siata oku liyaka lavio voluali luosi.

Manji Dan Molchan, wa lombolola upange u lingiwa Locisoko Coku Tata Akundi Votembo Yosi, cina ci kuete ocikele coku tata eci ci soka 19.851 komanu va kasi ko lo Betele voluali luosi. Manji David Sinclair wa lombolola ndomo Ocisoko Coku Sandeka ci kuatisa olofiliale viosi oku landa olomakina kuenda ovina vikuavo vi sukiliwa. Noke manji Robert Wallen, okuti ndopo o tẽlisa 60 kanyamo kupange wo Betele, wa lombolola ndomo Ocisoko Cupange ci songuila omanu va Yehova kupange woku kunda loku tata akongelo. Manji William Malenfant, wa tukula upange wa siata oku lingiwa Locisoko Celilongiso koku pongiya ovipama violohongele viofeka. Oku sulako, manji John Wischuk, wa lombolola ndomo Ocisoko Casonehi ci pongiya ovipama vi sangiwa valivulu etu.a

Ocisonehua Cunyamo wo 2010 ca Kunamẽla Kocisola

Olohundo vitatu via kuamamo, via lingiwa la vamanji vo Kosungu Yolombangi Via Yehova. Manji Gerrit Lösch, wa fetika ohundo yaye lepulilo liti, “O yongola hẽ oku soliwa la vakuẽle?” Eye wa lekisa okuti ocisola oco ocina ca velapo omanu va sesamẽla, kuenda vosi yetu tu sukila oku likolisilako oku kuata ocituwa caco. Etu tu kasi komuenyo momo Yehova wa tu lulika locisola. Ocisola tu kuetele Yehova oco ci tu vetiya oku kundila vakuetu.

Ka tu lekisa lika ocisola ‘komanu tu lisungue lavo,’ puãi tu ci lekisavo kovanyali vetu. (Mat. 5:​43-​45) Olonjeveleli via vetiyiwa oku konomuisa eci ca pita la Yesu otembo a kala palo posi, okuti wa tipuiwa, wa sepuiwa, wa kangisiwa toke eci a fa. Ndaño lovina viaco, wa likutilililako asualali vo ponda. Eci ka ci tu vetiya hẽ oku u kuatela ocisola ca velapo? Noke manji Lösch wa tukula ocisonehua cunyamo wo 2010, copiwa kelivulu lia 1 Va Korindo 13:​7, 8: ‘Ocisola ci pandakaisa kovina viosi. Ocisola lalimue eteke ci tokoka.’ Ka tu lavoka lika oku kala komuenyo oloneke ka vi pui, pole tu lavokavo oku sola loku soliwa otembo yenda ño hũ.

Ekãlu Liove li Kuete hẽ Ulela u Tẽla?

Manji Samuel Herd, wa fetika ohundo yaye locindekaise eci: Sokolola okuti ekamba liove li ku laleka oku linga ungende lekãlu vocinãla ci soka 50 kolokilometulu. Osimbu vu linga ungende, ove o limbuka okuti ulela wekãlu u kasi loku pua. Kuenje o sapuilako ekamba liove okuti ulela u kasi vekãlu ka u tẽla. Eye o ku tambulula hati, hu ka yokoke, ulela tu kuete u tẽla. Noke ene vu limbuka okuti ekãlu ka li kuete muẽle ulela. Ca sunguluka hẽ oku linga ungende nda ka vu kuete ‘ulela u tẽla’ vekãlu? Vu sukila oku yukisa etangi liekãlu lulela! Vupopi wocindekaise, etu tu sukilavo oku yukisa etangi liekãlu lietu lulela wukũlĩhiso wa Yehova.

Etu tu sukila oku yukisa etangi lietu lulela olonjanja viosi. Kuli olonjila vikuãla vi tu kuatisa oku ci linga. Onjila yatete, elilongiso lio pokolika, loku kũlĩha ciwa Embimbiliya poku li tanga eteke leteke. Tu sukila oku kuata elomboloko lia suapo, okuti hakutangako ño olondaka. Cavali, oku linga esokiyo Lielilongiso Liepata koñolosi. Tua siata hẽ oku yukisa etangi lietu konepa yespiritu, ale muli lika atosi añamiñami? Catatu, oku endaenda kolohongele viosi Konjango Yusoma. Cakuãla, oku sokolola lutate ovina viespiritu loku kuama olonjila via Yehova. Osamo 143:​5, yiti: “Njivaluka oloneke vionahũlu. Sokolola ovilinga viove viosi. sinyanyẽha upange wovaka ove.”

‘Vakuesunga va ka Nina’

Manji John Barr wa linga ohundo yatatu haiyo ya sulako, wa lombolola olusapo lua Yesu luotiliku losoka. (Mat. 13:​24-30, 38, 43) Olusapo luaco lu tukula “okungula” ku kasi oku lingiwa cilo, okuti “omala vusoma” va tepisiwa losoka yina yi ka yokiwa.

Manji Barr wa lekisa okuti oku ungula kuaco ka ku amamako otembo yosi. Eye wa tukula ocinimbu ca Mateo 24:​34, ci popia citi: “Ocitumbulukila cilo ka ci pui te ovina evi viosi vi lingiwa.” Eye wa tanga olonjanja vivali ocinimbu eci: “Olondaka via Yesu vi lomboloka okuti olombuavekua vina via mola oku situluiwa kuondimbukiso kunyamo wo 1914, vi kala komuenyo otembo yimue lolombuavekua vikuavo vi ka mola oku fetika kuohali yapiãla.” Ka tua kũlĩhile otembo “ocitumbulukila cilo” ci tumãla, pole omu mua kongela ovimunga vivali vi kasi komuenyo vokuenda kuotembo yimue. Ndaño okuti vamanji olombuavekua va kuete anyamo a litepa, ovimunga viaco vivali vi panga onepa kocitumbulukila ci kasi komuenyo vokuenda kuoloneke via sulako. Ci sanjuisa calua oku kũlĩha okuti ombuavekua yumalẽhe pokati ka vana va mola ondimbukiso kunyamo wo 1914, ka yi ka fa osimbu handi ohali ya piãla ka ya fetikile!

“Omãla vusoma” va lavoka lesanju lialua oku ka tambula onima yavo kilu, pole, vosi yetu tu sukila oku amamako oku nina ndekumbi toke kesulilo. Tu kuete esumũlũho linene lioku mola oku kongeliwa ‘kuotiliku’ votembo yaco.

Noke yocisungo, manji Theodore Jaracz, wa tiamẽla Kosungu Yolombangi Via Yehova, wa linga ohutililo yoku malusula. Ulandu wohongele yi lingaiwa unyamo lunyamo wa pamisa calua olonjeveleli!

[Atosi pombuelo yamẽla]

[Okakasia kemẽla 5]

OSIKOLA YAKULU VEKONGELO

Kohongele yaco, manji Anthony Morris, wa tiamẽla Kosungu Yolombangi Via Yehova, wa eca esapulo liokuti, ku kasi oku pongiyiwa osikola yoku pindisa akulu vekongelo. Kofeka yo Estados Unidos, osikola yaco ya fetika kunyamo wo 2008, kosikola yo ko Patterson, kolupale luo Nova Yorke. Kua lingiwa ale 72 kovisoko, kuenje kua pindisiwa 6.720 kakulu vekongelo. Handi kuli upange walua u sukila oku lingiwa. Momo ko Estados Unidos kuli eci ci pitahãla 86.000 kakulu vekongelo. Osungu Yolombangi Via Yehova ya ecelela okuti ko Brooklyn, kolupale luo Nova Yorke, ku lingiwa osikola yikuavo, ya fetika keteke 7, yosãi ya Cembanima yunyamo wo 2009.

Vokuenda kuolosãi vivali, ku ka pindisiwa vamanji vakuãla vakuakunyula akongelo, oco va linge alongisi kosikola yo ko Patterson. Ovo va ka ilukila ko Brooklyn oku ka pindisa vamanji vakuavo vakuãla. Vana va pindisiwa onjanja yavali va ka longisa kosikola yo Brooklyn, kuenje vana va pindisiwa tete va ka longisa kolosikola vi ka lingiwa Volonjango Violohongele vinene kuenda Volonjango Viusoma. Esokiyo liaco li ka amamako toke eci ku tẽlisiwa 12 kalongisi, okuti va ka longisa ovisoko epandu vosemana kelimi Liongelesi kofeka yo Estados Unidos. Noke ku ka pindisiwa vamanji vakuãla oco va ka longise kelimi lio Espanyole. Olosikola viaco ka vi ka piñainya Olosikola Viupange Wusoma; oyo yi kuete ocimãho coku pamisa akulu vekongelo konepa yespiritu. Olofiliale voluali luosi vi ka fetika oku endisa olosikola viaco Volonjango Violohongele vinene kuenda Volonjango Viusoma, vokuenda kunyamo wupange wo 2011.

[Elitalatu kemẽla 4]

Ohongele yi lingaiwa unyamo lunyamo, ya fetika locisungo copiwa velivulu liovisungo viokaliye, losapi, “Tu Imbili Yehova Ovisungo”