Yehova pocakati Cusoma waye, ndopo o ka malako ovitangi vietu viosi. Omo okuti esapulo liaco liwa calua, vosi va sukila oku kuata ukũlĩhĩso waco. Yesu wa yonguile okuti olondonge viaye vi sapuilako vosi esapulo liaco! (Mateo 28:19, 20) Olombangi Via Yehova via siata oku kapako ndati ocikundi ca Yesu?

1. Elivulu lia Mateo 24:14, li kasi oku tẽlisiwa ndati koloneke vilo?

Yesu wa popele hati: “Olondaka evi viwa Viusoma vi ka kundilua koluali luosi.” (Mateo 24:14) Olombangi Via Yehova via sanjukila oku linga upange waco wa velapo. Tu kasi oku kunda olondaka viwa koluali luosi ci pitahãla 1.000 kalimi! Poku linga upange waco u komõhisa, te lalikolisilo ocili kuenda esokiyo liwa. Etu nda ka tua kuatele ekuatiso lia Yehova, upange waco nda ka wa tẽlisiwile.

2. Alikolisilo api tua siata oku linga oco tu kundile omanu?

Tu kundila kuosi tu sanga omanu. Ndeci Akristão vo kocita catete, tua siata oku kundila “konjo lanjo.” (Ovilinga 5:42) Oku kuama onjila yaco, ci tu ecelela oku sapela lomanu valua unyamo lunyamo. Omo okuti pamue omanu ka va sangiwa kolonjo, tu kundila kovitumãlo vialua kuli owiñi. Tua siatavo oku sanda apuluvi oku sapela la vakuetu catiamẽla ku Yehova kuenda kocipango caye.

3. Helie o kuete ocikele coku kunda olondaka viwa?

Akristão vosi vocili, va sukila oku kundila olondaka viwa komanu vakuavo. Tua kapako calua ocikele cetu. Tu likolisilako oku kunda omo tua kũlĩha okuti, ci popela omuenyo womanu. (Tanga 1 Timoteo 4:16.) Etu ka tu fetiwa omo lioku linga upange waco, ndeci Embimbiliya li popia hati: “Omo wa tambuli ocali, ecivo ocali.” (Mateo 10:7, 8) Havosiko va tava esapulo lietu. Pole, tuamamako oku kunda omo okuti, ci panga onepa kefendelo lietu kuenda ci sanjuisa Yehova.

LILONGISA ONDONGOSI

4. Tua siata oku likolisilako oco tu kundile omanu vosi

OVIDEO: Oku Kundila “Kovitumãlo vi Kasi Ocipãla” (7:33)

• Nye ci ku komõhisa catiamẽla kalikolisilo Olombangi Via Yehova vi linga oco vi kunde?

Tanga Mateo 22:39 kuenda Va Roma 10:13-15, noke konomuisa apulilo a kuãimo:

• Upange wetu woku kunda u lekisa ndati okuti tu sole omanu vakuavo?

• Yehova o tenda ndati vana va kunda olondaka viwa? —Tala ocinimbu 15.

5. Tulondingupange kumue la Suku

Ovolandu alua a lekisa okuti, Yehova eye o songuila upange wetu. Ndeci, ko Nova Zelandia, manji umue o tukuiwa okuti Paul, eteke limue kekumbi, wa sanga ukãi umue poku kundila konjo lanjo. Keteke liaco komẽle, ukãi waco wa likutilile ku Suku poku tukula onduko ya Suku, Yehova kuenda wa pinga oco umue eye a sapele laye. Paul wa popia hati: “Noke liolowola vitatu, nda pitĩla pepito liaye.”

Tanga 1 Va Korindo 3:9, noke konomuisa epulilo li kuãimo:

• Ulandu wo ko Nova Zelandia, u lekisa ndati okuti, Yehova eye o kasi oku songuila upange woku kunda?

Tanga Ovilinga 1:8, noke konomuisa epulilo li kuãimo:

• Momo lie tu sukilila ekuatiso lia Yehova oco tu tẽlise upange wetu woku kunda?

Wa ci kũlĩha?

Olosemana viosi kohongele yetu yo vokati kosemana, tu tambula epindiso li tu kuatisa oku kunda. Nda wa siata oku endako, nye o sima catiamẽla kepindiso lia siata oku eciwa?

6. Tu pokola kocikundi ca Suku coku kunda

Kocita catete, vakuakulambalala va seteka olondonge via Yesu oco vi liwekepo oku kunda. Akristão vatete va teyuila omoko yavo yoku kunda poku “imbila uvangi olondaka viwa.” (Va Filipoi 1:7) Koloneke vilo, haicovo Olombangi Via Yehova via siata oku linga.a

OVIDEO: Oku Teyuila Uvangi Wolondaka Viwa (2:28)

Tanga Ovilinga 5:27-42, noke konomuisa epulilo li kuãimo:

• Momo lie ka tu ka liwekelapo oku kunda?—Tala ocinimbu 29, 38, kuenda 39.

NYE WA LILONGISA?

Yesu wa pindisa olondonge viaye oco vi kundile olondaka viwa kolofeka viosi. Yehova o kasi oku kuatisa afendeli vaye oku linga upange waco.

Oku Pitulula

• Olondaka viwa vi kasi oku kundiwa ndati koluali luosi?

• Upange wetu woku kunda u lekisa ndati okuti tu sole omanu vakuavo?

• O sima hẽ okuti upange woku kunda u tu sanjuisa? Momo lie?

OCO O KŨLĨHE OVINA VIKUAVO

Tala ndomo Olombangi Via Yehova vi kundila omanu valupale anene.

Uvangi Ulikasi Volokololo Vio Paris (5:11)

Olombangi Via Yehova nye via siata oku linga oco vi kundile vana va tila uyaki?

Oku Kuatisa Oku Upa Enyona Konepa Yespiritu Vana Va Tila Uyaki (5:59)

Yevelela umue o lombolola ndomo a kuata esanju komuenyo kupange wotembo yosi.

Nda Sanjukila Upange Nda Nõla (6:29)

Lilongisa olonjila vimue via velapo via nõliwa lombonge okuti, via leluisa upange woku kunda olondaka viwa.

“Akundi Vusoma va Tuala Ovitangi Viavo Kolombonge” (Usoma wa Suku u Kasi Oku Viala!, ocipama 13)

Yesu wa longisa okuti, Akristão va sukila oku papatisiwa. (Tanga Mateo 28:19, 20.) Pole, nye ci lomboloka epapatiso? Nye omunu a sukila oku linga oco a tẽlise ocimãho caco?

1. Nye ci lomboloka epapatiso?

Ondaka “epapatiso” ya tunda kondaka yo Helasi yi lomboloka “oku yuvikiwa” vovava. Eci Yesu a papatisiwa, wa yuvikiwa vovava Olui Yordão kuenje wa “tunda vovava.” (Marko 1:9, 10) Cimuamue haico, Akristão vocili poku papatisiwa, va yuvikiwa, ale va mbuitikinyiwa vovava.

2. Omunu poku papatisiwa o lekisa nye?

Poku papatisiwa o lekisa okuti wa litumbika ku Yehova Suku. Omunu o litumbika ndati? Osimbu ka papatisiwile, o likutilila pokolika loku sapuila Yehova okuti, o yongola oku U vumba otembo yosi. O likuminya oku fendela lika Yehova Suku loku linga ocipango caye okuti, oco ocina ca velapo komuenyo waye. Eye ka ‘lisokolola vali eye muẽle . . . kuenje amamako oku kuama’ alongiso a Yesu longangu yaye. (Mateo 16:24) Elitumbiko lepapatiso liove, li ecelela oku kuata ukamba wa pama la Yehova kuenda afendeli vaye.

3. Nye omunu a sukila oku linga osimbu ka papatisiwile?

Tete o sukila oku lilongisa catiamẽla ku Yehova loku pamisa ekolelo kokuaye. (Tanga Va Heveru 11:6.) Osimbu ukũlĩhĩso lekolelo vi livokiya, ocisola o kuetele Yehova, ci livokiyavo. O kuatavo onjongole yoku kunda catiamẽla kokuaye loku kapako olonumbi viaye. (2 Timoteo 4:2; 1 Yoano 5:3) Nda omunu ambata omuenyo “ndeci ca sesamẽla ku Yehova loku u sanjuisa calua,” o nõlapo oku tumbika omuenyo ku Suku loku papatisiwa.—Va Kolosai 1:9, 10.a

LILONGISA ONDONGOSI

4. Tu lilongisila kepapatiso lia Yesu

Tanga Mateo 3:13-17, oco o lilongise ovina vikuavo viatiamẽla kepapatiso lia Yesu. Noke konomuisa apulilo a kuãimo:

• Eci Yesu a papatisiwa wa kala omõla?

• Wa papatisiwa ndati? Anga hẽ wa nyĩliwa ovava?

Yesu wa fetika upange waye ulikasi Suku a ecele kokuaye palo posi eci a papatisiwa. Tanga Luka 3:21-23 kuenda Yoano 6:38, noke konomuisa epulilo li kuãimo:

• Yesu noke lioku papatisiwa, upange upi a velisilepo komuenyo waye?

5. Epapatiso ocimãho cimue o pondola oku tẽlisa

Ocisimĩlo coku litumbika loku papatisiwa, kefetikilo ci kasi ndu okuti ca tĩla calua. Pole, o pondola oku amamako toke eci o liyeva okuti, wa kolapo kuenda o nõla onjila yimue ya velapo. Oco o kũlĩhe vamue va ci linga, tala OVIDEO.

OVIDEO: Pamisi Ukamba Wene la Yehova (1:11)

Tanga Yoano 17:3 kuenda Tiago 1:5, noke konomuisa epulilo li kuãimo:

• Nye ci kuatisa omunu oku lipongiyila oku papatisiwa?

1. Tu litumbika ku Yehova poku u sapuila okuti, tu yongola oku u vumba otembo yosi

2. Poku papatisiwa tu lekisa komanu okuti, tua litumbika ku Suku

6. Nda tua papatisiwa tu panga onepa kepata lia Yehova

Nda tua papatisiwa tu panga onepa kepata li likuete omunga voluali luosi. Ndaño tua tunda kolonepa via litepa, kovikoti viñi viñi, vosi yetu alongiso etu amuamue kuenda tu kuãi olonumbi vimuamue viatiamẽla kovituwa. Tanga Olosamo 25:14 kuenda 1 Petulu 2:17, noke konomuisa epulilo li kuãimo:

• Epapatiso li panga ndati onepa kukamba womunu la Yehova kuenda la vana Vo fendelavo?

NYE WA LILONGISA?

Yesu wa longisa okuti, Akristão va sukila oku papatisiwa. Oco ocimãho caco ci tẽlisiwe, omunu o sukila oku pamisa ekolelo ku Yehova, oku kapako olonumbi Viaye loku litumbika Kokuaye.

Oku Pitulula

• Nye ci lomboloka epapatiso kuenda momo lie li kuetele esilivilo?

• Elitumbiko kuenda epapatiso li kuete elitokeko lipi?

• Osimbu omunu ka litumbikile loku papatisiwa o sukila oku linga nye?

OCO O KŨLĨHE OVINA VIKUAVO

Lilongisa eci epapatiso li lomboloka, leci olio ka li lomboloka.

“Epapatiso li Lomboloka Nye?” (Ocipama ci sangiwa lika vo Internet)

Pitulula olonjila vi kuatisa omunu oku pitĩla toke kepapatiso.

“Ocisola Kuenda Olopandu ku Yehova vi Tuala Kepapatiso” (Utala Wondavululi Welombo 2020)

Tanga ndomo onjila ulume umue a nõlapo yoku papatisiwa ya kunamẽla kueci ca velapo.

“Ovo va yonguile okuti ndi seteka oco ndi limbuke ocili” (Utala Wondavululi 1 wa Kayovo 2013)

Kũlĩhĩsa esunga lieci epapatiso ocimãho cimue ci sukiliwa oku tẽlisiwa kuenda ndomo o lipongiya.

“Ndi Sukila hẽ Oku Papatisiwa?” (Amalẽhe va Pula—Atambululo a Kuatisa, Elivulu 2, ocipama 37)