Epingilo Lia Siata Oku Lingiwa Voluali Luosi

SOKOLOLA okuti ocita kolohuluwa viomanu va linga epingilo limuamue. Ovo va lavoka okuti ombiali yoluali luosi yi tambulula epingilo liaco. Pole, pokati kavo vañamiñami va kũlĩha elomboloko lieci va siata oku pinga. Anga omanu va siata oku linga muẽle epingilo liaco? Ocili okuti, eteke leteke omanu va siata oku linga epingilo liaco. Oco hẽ, nye va siata oku pinga? Ovo va siata oku pinga oco Usoma wa Suku wiye!

Voluali muli eci ci soka 37.000 katavo a litukula hati Akristão, kuenda va popia okuti Yesu Kristu eye Usongui wavo. Vatavo aco, muli eci ci pitahãla 2.000.000.000 komanu. Valua pokati kavo va siata oku linga ohutililo ya Isietu ale Ohutililo ya Ñala. Ove hẽ wa kũlĩha ohutililo yaco? Yesu poku longisa ohutililo yaco kolondonge viaye wa fetika ndoco: “A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe ndeci ci lingiwa kilu.”​—⁠Mateo 6:​9, 10.

Vokuenda kuanyamo, omanu va siata oku pitulula olondaka viaco volonembele. Ovo, va pitulula ohutililo yaco eci va kasi lepata ale ceci va kasi pokolika, ci kale vapuluvi awa ale vapuluvi ãvi. Vakuavo va pitolola ohutililo yaco lonjongole kuenda esumbilo lialua. Pole, ka va kuete elomboloko liaco. Akristão vesanda havoko lika va likutilila lelavoko liokuiya Kusoma wa Suku.

Epingilo Lia Siata Oku Lingiwa Vatavo Osi

Ohutililo va Yudea va enda oku linga yi tukuiwa hati asiõsuĩlo a Kaddish. Ndaño ohutililo yaco ka yatiamẽlele kolonambi ale kesumuo, ya siata oku lingiwa kotembo yohali. Ohutililo yaco yi popia hati: “[Suku] a tumbike Usoma waye votembo a sokiya . . . loku yayulako.”a Ohutililo yikuavo ya enda oku lingiwa volosunangonga, yi tukula oku iya Kusoma wa Mesiya vonduko ya Daviti.

Atavo ana okuti Hakristãoko, va kapakovo Usoma wa Suku. Ojornale yi tukuiwa hati, The Times of India yo kocita cekũi lecea, poku konomuisa onjongole yasongui amue vatavo ndeci va Hindu, va Musulumanu kuenda Akristão, ya popia hati: “Nda omanu vokutundilo lokutakelo ka va likuata omunga, Usoma wa Suku ka uka tumbikiwa.” Usongui wosikola yimue ya velapo yo Islamismu yo Strathfield, ko Australia, wa sonehela ojornale yimue ndoco: “Ame ndi tava okuti Yesu oka tiuka kuenda oka tumbika Usoma wocili wa Suku ndeci va Musulumanu vosi va kuete elavoko liaco.”

Ocili okuti, koloneke vilo kuli omanu valua va lavoka Usoma wa Suku. Pole, tu konomuisi tete ocitangi cimue.

Ove wa kũlĩha okuti etu Tulombangi Via Yehova, tua siata oku sandeka orevista yilo, kuenda tu endaenda kolonjo viomanu oku va longisa olonumbi Viembimbiliya. Upange waco wa siata oku lingiwa voluali luosi kueci ci soka 236 kolofeka kuenda kueci ci pitahãla 400 kalimi. Usoma wa Suku, owo tua siata oku kundila omanu. Limbuka okuti orevista yilo yi tukuiwa hati, Utala Wondavululi Wusapula Usoma wa Yehova. Eci tu pulisa omanu nda va siata oku likutilila Usoma wa Suku, valua va tambulula vati, oco. Pole, eci tu va pulisa eci Usoma waco u lomboloka, valua va tambulula vati, “Ka tu ci.” Pamue va eca etambululo limue ka lia suilepo.

Momo lie omanu va pingila ocina ka va kũlĩhĩle? Anga hẽ ca tĩla calua oku kuata elomboloko Liusoma wa Suku? Sio. Usoma wa lomboluiwa ciwa Vembimbiliya. Handi vali, Embimbiliya li pondola oku ku ĩha elavoko liocili liatiamẽla Kusoma, kotembo yilo yohali. Vocipama ci kuãimo tuka limbuka otembo ohutililo ya Yesu yatiamẽla Kusoma yika tambuluiwa.

[Etosi pombuelo yemẽla]