Lipongiya, A Kalei Wa Kolelua

Yesu wa lombolola okuti ‘okacunda’ oko lika ka ka piñala Usoma wo kilu. (Luka 12:32) Pole, oku tambula onima yaco ci kuete esilivilo lialua. Yesu wa lekisa okuti, nda umue o yongola oku panga onepa Kusoma, o sukila oku kuata ocituwa ca sunguluka.

Omo liaco, Yesu o lungula olondonge viaye oco vi lipongiyile oku iya kuaye. Eye o popia hati: “Wali, lipongiyi kuenda olondiyelo viene vi taime, lingi ndomanu va lavoka cime cavo wa tiuka kuvala, okuti eci a pitĩla o totola epito, haico vo yikuilako. Va sumũlũha akuenje vana okuti eci cime a pitĩla o va sanga okuti va kasi oku lavulula!”—Luka 12:35-37.

Olondonge vi kuata lonjanga elomboloko liocituwa Yesu a kasi oku lombolola. Akuenje eye a tukula va lipongiya ale, va talamela oku tiuka kua cime cavo. Yesu o lombolola hati: “Nda [cime] eci a pitĩla kowola yavali, ale kowola yatatu kuenje o va sanga okuti va lipongiya, ovo va sumũlũha!”—Luka 12:38.

Olondaka evi vi kuete esilivilo lialua okuti, elungulo lioku kala vakuambili li sule. Eci ci limbukiwa, omo okuti Yesu, Mõlomunu wa li kongelavo volusapo luaco. Eye o sapuila kolondonge viaye hati: “Lenevo lipongiyi, momo owola ka wa simili, oyo Mõlomunu eya.” (Luka 12:40) Omo liaco, Yesu iya kepuluvi limue kovaso yoloneke kuenje o yongola okuti olondonge viaye ca piãla enene vana va panga onepa ‘kokacunda,’ va lipongiya.

Petulu o yongola oku kuata elomboloko lia suapo lieci Yesu a kasi oku popia, kuenje u pula hati: “A Ñala, olusapo olu wa lu tiamisila lika kokuetu, ale ku vosi?” Yesu ka eci etambululo li teta onimbu ku Petulu, pole, o ta olusapo ndolu luatete luokuti: “Helie kalei wa kolelua haeye wa lunguka, una cime caye a kundika oku eca okulia kakuenje vaye votembo ya sokiyiwa? Ukuenje waco wa sumũlũha nda cime caye eci a pitĩla u sanga oku linga ndeci a kundikiwa! Ndu sapuili ocili siti, eye o ko kundika ovina viaye viosi.”​—Luka 12:41-44.

Kolusapo luatete “cime” o lomboloka Yesu okuti, Mõlomunu. Kuenje “kalei wa kolelua,” o lomboloka alume vana va panga onepa ‘kokacunda,’ va ka tambula Usoma. (Luka 12:32) Kaliye Yesu o kasi oku popia okuti vamue va panga onepa ‘kokacunda,’ va ka eca okulia “kakuenje vaye” “votembo ya sokiyiwa.” Kuenje Petulu lolondonge vikuavo vina Yesu a kasi oku longisa loku tekula konepa yespiritu, va kuata elomboloko liokuti, Mõlomunu iya kovaso yoloneke. Koloneke viaco, ku ka lingiwa esokiyo lioku tekula olondonge via Yesu konepa yespiritu okuti, ‘akuenje’ va Cime.

Yesu o tukula esunga likuavo lieci olondonge viaye vi sukilila oku lavulula, loku kũlĩhĩsa ovituwa viavo. Momo ovo nda ka va tẽlele oku lavulula kuenda nda va pitĩla petosi lioku suvuka vamanjavo. Yesu o popia hati: “Pole nda ukuenje waco o popia vutima waye hati, ‘Cime cange wo cilua oku pitĩla’ kuenje o fetika oku tipula akuenje lafeko apika loku lia loku nyua kuenda oku kolua, Cime cukuenje waco iya keteke eye ka lavokaile kuenda kowola ka kũlĩhĩle kuenje u kangisa calua loku u kapa pamosi la vana ka va koleliwa.”—Luka 12:45, 46.

Yesu o popia hati, weya “oku koka ondalu kilu lieve.” Eye o linga apulilo alua a koka oku li kuatela ukuse kuenje esulilo liaco oku pisa alongiso, loviholo viesanda. Ovina viaco vi nena oku litepa kuomanu vana nda va likuata omunga okuti, “isia o katukila omõlaye ulume, omõla ulume o katukila isia, ina o katukila omõlaye ukãi, omõla ukãi o katukila inaye, ndatembo yukãi o katukila ukãi womõlaye, ukãi womõlaye o katukila ndatembo yaye.”—Luka 12:49, 53.

Olondaka evi vi tiamisiwila enene kolondonge viaye. Pole, cilo Yesu o vi tiamisila kowiñi. Omanu valua ka va tava uvangi wokuti Yesu eye Mesiya; omo liaco o va sapuila hati: “Eci vu mola elende li tundila kutakelo, haico vu popia okuti, ‘Ombela iya’ kuenje yi loka. Eci ofela yi tunda kutundilo, vu popia hoti ku kala ocitenya kuenje ciya. Wakuambambe, vu tẽla oku limbuka ondimbukiso yongongo kuenda ilu, pole nye ka vu tẽlela oku limbuka ovina viotembo yilo?” (Luka 12:54-56) Eci ci lekisa okuti ovo ka va lipongiyile.