Ekũi Lia Vakuavilundu Va Sakuiwa—umosi Lika O Pandula

Yesu enda volupale luo Efarimi, konano yo Yerusalãi okuti ongombo ya tumbikiwa Lekanga Linene yoku u ponda ka yi tẽlisiwa. Eye o kala volupale luaco lolondonge viaye okuti, ocipãla lovanyãli vaye. (Yoano 11:54) Pole, otembo yo Paskoa yunyamo 33 K.K., yi kasi ocipepi kuenje Yesu ndopo o linga vali ungende. O nyula onjanja ya sulako olupale luaco osimbu ka file kuenje o pita vo Samaria, o loña konano noke o pitĩla vo Galilea.

Kefetikilo liungende, osimbu Yesu a kala oku tunda vimbo limue oku enda vimbo likuavo, o sanga ekũi lia vakuavilundu. Olonjanja vimue uvei waco u koka okuti omunu o pumba ovimatamata vimue vietimba ndeci, ovatũi ovimuine viovaka kuenda vio kovolu. (Atendelo 12:10-12) Ocihandeleko ca Suku ci kisika okuti ukuavilundu o kala likaliaye, kuenda nda o mola omunu umue u lungula hati: “Nda vĩhisiwa, nda vĩhisiwa!”—Ovisila 13:45, 46.

Omo Liocihandeleko caco, ekũi lia vakuavilundu va kala ocipãla la Yesu. Pole va kaluka lolukandi vati: “A Yesu, Ulongisi, tu kuatele ohenda!” Eci Yesu a va mola, o va sapuila hati: “Kuendi, ka li lekisi kovitunda.” (Luka 17:13, 14) Yesu poku ci linga o lekisa okuti, wa sumbila Ocihandeleko ca Suku, ceca omoko kovitunda yoku tukula omunu wa sakuiwa kovilundu okuti wa yelisiwa. Noke yoku sakuiwa ovo va pondola oku kala vali pokati komanu va kuete uhayele.—Ovisila 13:9-17.

Ekũi lia vakuavilundu va kolela kunene wa Yesu woku sakula. Va enda toke kovitunda ndaño okuti handi ka va sakuiwile. Osimbu va linga ungende, va sumũlũisiwa lekolelo va kuetele Yesu. Ovo va lete kuenda va limbuka okuti va sakuiwa!

Ecea lia vakuavilundu va sakuiwa, va enda lonjila yavo. Pole, umosi lika okuti u Samaria o tiuka oku sandiliya Yesu. Momo lie? Ulume waco eca olopandu ku Yesu omo lioku sakuiwa. Ulume wa kuatele ovilundu o limbuka okuti Suku eye wo sakula kuenje o “kaluka loku sivaya Suku.” (Luka 17:15) Eci ulume a sanga Yesu, o kekamẽla kolomãhi viaye kuenda u pandula.

Yesu o sapuila vosi va kasi ocipepi laye hati: “Hekũiko va yelisiwa? Vakuene ecea, va kasi pi? Lomue vali wa tiuka oku sivaya Suku, te lika ulume u okuti, ukuafeka yikuavo?” Kuenje Yesu o sapuila u Samaria hati: “Votoka, kuende lonjila yove; ekolelo liove lia ku kayisa.”​—Luka 17:17-19.

Poku sakula ekũi lia vakuavilundu, Yesu o lekisa okuti wa kuatisiwa la Yehova Suku. Ulume waco ka sakuiwile lika la Yesu, pole, citava okuti wa sangavo onjila yomuenyo. Ka tu kasi vali kotembo okuti Suku o tuma Yesu oco a linge upange woku sakula. Pole, nda tu lekisa ekolelo ku Yesu tu pondola oku sanga onjila yomuenyo okuti, omuenyo ko pui. Tu kasi hẽ oku lekisa olopandu ndeci u Samaria a linga?