Ceci Akristão—Va Sisiwa Ndotiliku
YESU osimbu handi ka file, wa lungula olondonge viaye hati: “[Limbuki] okuti Satana wa panga oku vu kuata vosi okuti o vu sisa ndotiliku.” (Luka 22:31) Nye a yonguile oku popia lolondaka evi?
Koloneke via Yesu, omanu poku ungula otiliku vovapia, va enda oku pita otembo yalua kuenda oku likolisilako. Catete, va enda oku kelula otiliku vepia loku yi kapa povimbandi. Noke va yi sasa lolombueti ale va pitisamo olongombe toke eci yi tunda vapunga. Cavali, va yi yelela, kuenje, eci olomema vi lolukila pocimbandi, vi litepe lovinene. Oku sulako, va enda oku yi pekula oco vopeko ovinene via sialako.
Olondaka via Yesu, vi tiamisiwila kovina Satana a siata oku linga. Eye tunde kosimbu wa siata oku lambalala olondonge via Yesu, kuenda o kasi oku amamako oku ci linga toke koloneke vilo. (Va Efe. 6:11) Ocili okuti, ovitangi vimue tua siata oku liyaka lavio, ka vi tundi ku Satana. (Uku. 9:11) Pole, Satana toke cilo wa siata oku kuama olonjila vialua oco a nyole ekolelo lietu. Eye citava okuti o tu yonjela koku tiamisila utima kovokuasi, kovitalukilo ka via sungulukile, ale koku linga ukahonga. Pamue o tu yapulavo poku kuata akamba vãvi kosikola, kupange, kuenda vana ka va fendela Suku okuti, va tu vetiya koku tiamisila utima kelilongiso lia velapo kosikola ale oku talavaya kovopange akuavo a kemãla voluali. Satana citava okuti, o tu lambalala oco a nyole ekolelo lietu ku Suku. Eye, o kuetevo olonjila vikuavo vioku tu yapula.
Tu tamalãla ndati lunyali waco? Ka tu tẽla oku ci linga longusu yetu. Satana wa tu velapo kongusu, pole tua kũlĩha okuti Yehova o kuete unene wa velapo okuti wa Satana u sule. Nda tua kolela ku Yehova loku likutilila oco tu kuate uloño kuenda utõi woku pandikisa loku tu songuila, o tu ĩha ongusu yoku pandikisa kayonjo a Satana.—Osa. 25:4, 5.
Eci tu pita velambalalo, tu sukila oku kuata olondunge vioku “tepisa pokati keci ciwa leci cĩvi,” kuenda oku yuvula oku yapuisiwa latutu a Satana. (Va Hev. 5:13, 14) Yehova o pondola oku tu ĩha olondunge viaco. Kuenje, tu kakatela koku linga eci ca sunguluka, ndaño lovitangi. Nda tua tava oku songuiwa la Yehova, eye o tu ĩha utõi woku amamako oku linga eci ciwa.—Va Efe. 6:10.
Citava okuti Satana o tu sisa ndotiliku. Pole, lekuatiso lia Yehova, tu pondola oku u yula lekolelo lia pama. (1 Pet. 5:9) Omo liaco, ondaka ya Yehova yi tu vetiya hati: “Tamalali Leliapu kuenje liu tili.”—Tia. 4:7.