O Kuata Ndati Ekalo Liwa Kespiritu?
UPOSTOLO PAULU wa soneha hati: “Oku [tiamisila] ovisimĩlo viutima koloñeyi vietimba oko okufa, puãi oku [tiamisila] ovisimĩlo viutima kovina viespiritu, oko omuenyo, haiko ombembua.” (Va Roma 8:6) Olondaka viupostolo Paulu vi lekisa okuti, voku kala omunu wa kapako ovina viespiritu ka mua kongelele lika oku linõlela onjila yaco ale oku kuata utima waco. Pole, mua kongela omuenyo loku fa. Oco hẽ, omunu una wa kapako ovina viespiritu o tambula ndati ‘omuenyo lombembua’? Ndomo ca lekisiwa Vembimbiliya, omunu waco o kuata ombembua yovutima kuenda ombembua la Suku. Kuenje o kuata onima yomuenyo ko pui. (Va Roma 6:23; Va Filipoi 4:7) Eli olio esunga lieci Yesu a popela hati: “Vakuosuke wovutima va sumũlũha”!—Mateo 5:3.
Omo okuti ove o kasi oku tanga Utala Ulo Wondavululi, ci lekisa okuti, o kuete onjongole yovina viespiritu. Pole, omanu va kuete ovisimĩlo via litepa viatiamẽla kovina viaco. Omo liaco, pamue o lipula ndoco: ‘Ekalo liwa kespiritu li lomboloka nye? Omunu o kuata ndati ekalo liaco?’
‘Ovisimĩlo Via Kristu’
Upostolo Paulu poku lombolola esilivilo lioku kapako ovina viespiritu, wa kuata ovina vialua vioku lekisa elomboloko liaco. Eye, wa lomboluila Akristão volupale luo Korindo oku litepa ku kasi pokati komunu o yongola lika oku tẽlisa olonjongole viaye kuenda omunu wa kapako ovina viespiritu. Paulu wa soneha hati: “Ukuetimba ka tambula oviali viespiritu lia Suku, momo kokuaye vi linga nduveke.” Noke wa lombolola okuti, omunu watiamisila utima kovina viespiritu, o kuete ‘ovisimĩlo via Kristu.’—1 Va Korindo 2:14-16.
Oku kuata ‘ovisimĩlo via Kristu,’ ci lomboloka oku “sima sima cimuamue, ndeci . . . Kristu Yesu” a linga. (Va Roma 15:5; Va Filipoi 2:5) Omunu wa kapako ovina viespiritu, o sokolola nda Yesu kuenda o kuama volomãhi Viaye. (1 Petulu 2:21; 4:1) Osimbu amamako oku kuata ovisimĩlo ndevi via Kristu, o pamisa ekalo liaye kespiritu, kuenje o kuata elavoko lioku tambula ‘omuenyo kuenda ombembua.’—Va Roma 13:14.
Ndomo tu Kũlĩha ‘Ovisimĩlo Via Kristu’
Oco tu kuate ovisimĩlo ndevi via Kristu, tete tu sukila oku kũlĩha ovisimĩlo viaye. Ocina catete tu sukila oku linga, oku kũlĩha ndomo Yesu a enda oku sima. Oco hẽ, o pondola ndati oku kũlĩha ovisimĩlo viomunu umue okuti, tunde eci a kala palo posi toke cilo, pa pita ale olohulukãi vivali vianyamo? Kũlĩhĩsa ndoco: Wa kũlĩha ndati asapulo atiamẽla komanu va kemãla va kala vofeka yove? Ocili okuti, wa va kũlĩha poku tanga ovolandu atiamẽla kokuavo. Cimuamue hacovo o sukila oku linga. Poku tanga ulandu wa Yesu ci ku kuatisa oku kuata ovisimĩlo Viaye.—Yoano 17:3.
Ulandu watiamẽla ku Yesu, u sangiwa Vevanjeliu a sonehiwa la Mateo, la Marko, la Luka kuenda Yoano. Oku tanga ovolandu aco ci tu kuatisa oku kũlĩha ovisimĩlo via Yesu, ocikembe caye, kuenda ovilinga viaye. Poku sanda otembo yoku sokolola ovina wa tanga viatiamẽla ku Yesu, o fetika oku kuata ovituwa ndevi a lekisa eci a kala palo posi. Ndaño okuti ove o litenda ndondonge ya Kristu, oku tanga eci catiamẽla kokuaye, ci ku kuatisa oku ‘kulila vocali kuenda vukũlĩhĩso woku kũlĩha Ñala Yesu Kristu haeye Onjovoli yetu.’—2 Petulu 3:18.
Omo liaco, tu konomuisi olonepa vimue Vevanjeliu oco tu limbuke eci ca kuatisa Yesu oku kala omunu wa kapako ovina viespiritu. Noke, li pulisa ove muẽle eci o sukila oku linga, oco o kuame ongangu yaye.—Yoano 13:15.
Ekalo Liwa Kespiritu Kuenda ‘Apako Espiritu’
Evanjeliu lia sonehiwa la Luka, li lekisa okuti, eci Yesu a papatisiwa, espiritu lia Suku lio wila, kuenje, ‘wa yuka espiritu sandu.’ (Luka 3:21, 22; 4:1) Noke wa vetiya olondonge viaye oku lekisa esilivilo lioku songuiwa lespiritu sandu lia Suku ale ‘ongusu yaye yi kola.’ (Efetikilo 1:2; Luka 11:9-13, NW) Momo lie espiritu sandu li kuetele esilivilo? Momo li kuete unene wa Suku woku pongolola ovisimĩlo viomunu okuti, vi kala ndevi via Kristu. (Va Roma 12:1, 2) Espiritu sandu, li kuatisa omunu oku kuata ovituwa vimue ndeci: “Ocisola, esanju, ombembua, epandi, unu, esunga, ekolelo, umbombe, [kuenda] esuluviko.” Ovituwa viaco, ovio Embimbiliya li tukula hati ‘apako espiritu.’ (Va Galatia 5:22, 23) Omo liaco, omunu una o tava oku songuiwa lespiritu lia Suku, eye wa kapako ovina viespiritu.
Yesu eci a kala palo posi, wa lekisa apako espiritu kupange woku kunda. Ovituwa vimue ndeci, ocisola, ocikembe kuenda ohenda, wa vi lekisa komanu vana okuti ka va kapiwileko la vakuavo. (Mateo 9:36) Ulandu wa sonehiwa lupostolo Yoano, u popia hati: “Eci [Yesu] a vinjukako [ale a kala oku pita vonjila,] wa mola omunu wa citiwa omeke.” Olondonge viaye, eci via mola ulume waco, vio tenda ndukuakandu. Kuenje, via pula Yesu hati: “Helie wa linga ekandu, omunu u, ale, . . . olonjali viaye?” Omanu va lisungue laye vo molavo, pole va simile okuti, ukuakupinga okulia. Omo liaco, va popia hati: “Hayeko una wa tumayala loku eya?” Yesu eci a mõla ulume waco omeke, wa limbuka okuti wa sukilile ekuatiso. Noke wa sapela laye kuenje, wo sakula.—Yoano 9:1-8.
Ulandu owu, u ku longisa nye catiamẽla kovisimĩlo via Kristu? Catate, Yesu ka pembuile olohukũi, pole wa vi tata lohenda. Cavali, wa nõlapo oku vi kuatisa. Ove hẽ, o pondolavo oku kuama ongangu ya Yesu? Wa siata hẽ oku kapako omanu ndeci Yesu a lingile poku va kuatisa oco va kuate ekalo liwa komuenyo okuti va kuata elavoko liwa? Anga hẽ, o kuete ocituwa coku velisapo omanu vana va kemãla okuti ku kapiko olohukũi? Nda omanu wa va kapako ndeci Yesu a linga, o kasi oku kuama ongangu yaye.—Osamo 72:12-14.
Ekalo Liwa Kespiritu Kuenda Ohutililo
Ulandu Wevanjeliu, u lekisa okuti, Yesu wa enda oku likutilila olonjanja vialua ku Suku. (Marko 1:35; Luka 5:16; 22:41) Eci a kala kupange woku kunda, wa enda oku sokiya otembo yoku likutilila. Ndonge Mateo wa soneha ndoco: “Eci [Yesu] a sandula [ale osika] owiñi oco wa londa komunda kulika ha likutilila.” (Mateo 14:23) Yesu vapuluvi aco a enda oku sapela la Isiaye, wa kolisiwa calua. (Mateo 26:36-44) Koloneke vilo, omanu vana vatiamisila utima kovina viespiritu, va sandiliya apuluvi oku sapela la Suku. Momo va kũlĩha okuti, nda va ci linga, ci pamisa ukamba wavo Lululiki wetu kuenda ci va kuatisa oku kuata ovisimĩlo ndevi via Kristu.
Yesu wa enda oku pita otembo yalua loku likutilila. (Yoano 17:1-26) Osimbu handi ka nolele olondonge viaye ekũi la vivali, “wa enda komunda oku ka likutilila, kuenje wa likutilila ku Suku uteke wosi.” (Luka 6:12) Omanu vana va kapako ovina viespiritu, ka va sukila oku pita uteke wosi loku likutilila. Pole, va likolisilako oku kuama ongangu ya Yesu. Osimbu ka va nõlele onjila va yongola oku kuama, va likutilila ku Suku oco espiritu sandu li vakuatise oku nõla onjila yi pamisa ekalo liavo kespiritu.
Yesu vohutililo yaye, wa lekisavo ocituwa tu sukila oku kuama poku likutilila. Konomuisa eci Luka a lombolola catiamẽla kohutililo Yesu a linga koñolosi osimbu handi ka file. Eye wa popia hati: “[Eci] asangu a witaila, . . . wa likutilila lolupili. Esalamiho liaye lia lokila posi [ndatosi] osonde.” (Luka 22:44) Yesu wa enda oku likutilila calua, pole, eci a liyaka loseteko ya sulako komuenyo waye palo posi, wa likutilila “lolupili.” Kuenje, Yehova wa tambulula ohutililo yaye. (Va Heveru 5:7) Omanu va kapako ovina viespiritu, vakuama ongangu ya Yesu. Eci va liyaka lovitangi vialua, va likutilila “lolupili” ku Suku oco espiritu sandu liaye li va songuile kuenda oku va kuatisa.
Omo okuti Yesu wa likutilila calua, olondonge viaye via kuama ongangu yaye. Ovo, va pinga kokuaye hati: “A Ñala, tu longise oku likutilila.” (Luka 11:1) Cimuamue haico omanu vana va kapako ovina viespiritu va siata oku linga. Omo okuti, va yongola oku songuiwa lespiritu lia Suku, va kuama ongangu ya Yesu yoku likutilila ku Suku. Oku kapako ovina viespiritu loku likutilila ci kuete elitokeko.
Ekalo Liwa Kespiritu Kuenda Oku Kunda Olondaka Viwa
Vevanjeliu lia Marko, tu sangamo ulandu u lekisa okuti, onjanja yimue kuteke, Yesu wa sakula toke koñolosi omanu valua va kala oku vela. Keteke likuavo komẽle, eci a kala lika liaye oku likutilila, ovapostolo vaye vo sanga, kuenje vo sapuila hati, omanu va kala oku u sandiliya. Citava okuti va yonguile oku va sakula. Pole, Yesu wa va sapuila hati: “Tu endi kumue kuiñi kovaimbo a lisungue si ka kundilakovo.” Noke wa va sapuila esunga liaco hati: “Momo oco ndeyilila.” (Marko 1:32-38; Luka 4:43) Ndaño okuti Yesu wa enda oku sakula omanu, pole wa velisilepo upange woku kunda Olondaka viwa Viusoma wa Suku.—Marko 1:14, 15.
Koloneke vilo, omanu va kuete ovisimĩlo via Kristu va limbukiwila koku kunda olondaka viwa Viusoma wa Suku. Yesu wa eca ocikundi komanu vosi va yongola oku kala olondonge viaye poku va sapuila hati: “Kuendi, ka tavisi olofeka viosi oco va linge olondonge. . . . Va longisi oku linga ovina viosi ndo kundiki.” (Mateo 28:19, 20) Yesu wa popiavo hati: “Ondaka eyi yiwa yusoma yi kutindilua kuoha koluali, ha yi lingi uvangi kolofeka viosi, oco esulilo liya noke.” (Mateo 24:14) Ondaka ya Suku yeca uvangi wokuti, upange woku kunda u tẽlisiwa lekuatiso liespiritu sandu. Omo liaco, oku kuata onepa kupange waco, oyo ondimbukiso yomanu va kapako ovina viespiritu.—Ovilinga 1:8.
Oco olondaka viwa Viusoma vi kundiwile voluali luosi, ci sukila ekuatiso liomanu valua va likuete omunga. (Yoano 17:20, 21) Vana va litumbika kupange waco, ka va sukila lika oku tiamisila utima kovina viespiritu. Pole, va sukilavo oku kala vocisoko cimue ci sangiwa voluali luosi. Ove hẽ, o pondola oku limbuka omanu va kuãi ongangu ya Kristu okuti va kundila olondaka viwa Viusoma voluali luosi?
Ove hẽ wa Kapako Olonumbi Vioku Tiamisila Utima Kovina Viespiritu?
Kuli ovituwa vikuavo vioku limbuka omunu wa tiamisila utima kovina viespiritu. Omunu waco, o limbukiwa ndati? Oco o tẽle oku u limbuka, o sukila oku li pula ndoco: ‘Anga hẽ nda siata oku tanga Ondaka ya Suku eteke leteke loku sokolola ovina nda tanga? Anga hẽ, nda siata oku lekisa apako espiritu sandu? Ñuete hẽ ocituwa coku likutilila olonjanja viosi? Nda siata oku likongela lomanu vakuete ocikele coku kunda olondaka viwa Viusoma wa Suku?’
Oku kũlĩhĩsa ciwa ekalo liove, ci ku kuatisa oku limbuka nda wa kapako ovina viespiritu ale kua vi kapeleko. Omo liaco, tu ku vetiya oku ci linga cilo, oco o kuate “omuenyo lombembua.”—Va Roma 8:6; Mateo 7:13, 14; 2 Petulu 1:5-11.
[Okakasia Lelitalatu kemẽla 5]
OMUNU WATIAMISILA UTIMA KOVINA VIESPIRITU
◆ Wa kapako Ondaka ya Suku
◆ O lekisa apako espiritu
◆ O likutilila ku Suku olonjanja viosi lutima wa sunguluka
◆ O kundila omanu olondaka viwa Viusoma
[Elitalatu kemẽla 5]
Embimbiliya, li ku kuatisa oku kũlĩha ‘ovisimĩlo via Kristu’