Yesu Eye ‘Ombolo Yomuenyo’

Yesu wa linga ocikomo coku tekula omanu valua kutundilo Wokalunga ko Galilea kuenje va seteka oku u lingisa osoma. Vuteke waco, eye wa endela kilu liovava okalunga ka tema kuenda wa yovola Petulu una wa kalavo oku endela kilu liovava pole, wa fetika oku vomba omo liekambo liekolelo. Handi vali, Yesu wa tulumula ofela, citava okuti, eci ca yovola olondonge viaye koku vomba kuowato.

Cilo Yesu o tiukila vimbo lio Kafarinau, kutakelo wokalunga. Kuenje omanu vana eye a tekula, vo sanga kuenda vo pula vati: “Eteke lipi weya kulo?” Yesu o va pisa kuenje o va sapuila okuti, va kasi oku u sandiliya lika omo va yongola oku tekuiwa vali. Kuenje o va vetiya ‘oku yuvula oku talavayela okulia ku nyõleha, pole va sukila oku talavayela okulia ku eca omuenyo ko pui.’ Omo liaco, va pula Yesu vati: “Nye tu linga oco tu tẽlise upange wa Suku?”—Yoano 6:25-28.

Citava okuti, va kasi oku sima catiamẽla kovopange a kisikiwa Vocihandeleko, pole, Yesu o kasi oku popia upange umue u kuete esilivilo lia velapo hati: “Upange wa Suku wowu okuti, vu kolela una eye a tuma.” Ndaño okuti Yesu wa linga ovopange alua, pole, omanu ka va lekisa ekolelo kokuaye. Ovo va kisika Yesu oku linga ocilimbu cimue oco va kolele kokuaye. Ovo va pula Yesu vati: “Upange upi o [ka] linga? Vakukululu yetu va lia omana vekalasoko, ndomo ca sonehiwa citi: ‘Eye wa va ĩha ombolo yi tunda kilu oco va lie.’”—Yoano 6:29-31; Osamo 78:24.

Yesu poku tambulula epingilo liavo, o lombolola eci catiamẽla Kono yokulia kuocili kua eciwa locikomo. Eye o popia hati: “Ocili ndu sapuili siti, Mose ka ecele ombolo yi tunda kilu, pole Isiange wo wĩhi ombolo yocili yi tunda kilu. Momo ombolo ya Suku, yina yi tunda kilu yeca omuenyo koluali.” Omo okuti ka va kuete elomboloko liovina Yesu a yongola oku popia, ovo va pinga vati: “A Ñala, tu ĩhaihe ño-o ombolo eyi.” (Yoano 6:32-34) Pole, “ombolo” Yesu a tukula yi lomboloka nye?

Yesu o va sapuila elomboloko liaco hati: “Ame ndimbolo yomuenyo. Wosi iya kokuange ka kuata vali onjala wosi o ñolela ka kuata vali enyona. Ndu sapuili siti, ene wa ndi moli, lopo ka wa koleleli. . . . Momo sia tundile kilu oku linga ocipango cange, puãi ndeya oku linga ocipango cu wa numa. Ocipango cu wa numa ceci okuti kovina viosi a nyĩha si nyelisapo umue, pole ndi va pindula keteke lia sulako. Eci oco ocipango ca Isiange okuti wosi o limbuka Mõla loku u kolela o kuata omuenyo ko pui.”—Yoano 6:35-40.

Olondaka via Yesu vi temisa omanu kuenje va Yudea va fetika oku u popia lãvi. Kuenje ovo vati, Yesu o popia ndati okuti eye ‘ombolo ya tunda kilu’? (Yoano 6:41) Kokuavo Yesu wa kala ño omõla umue wa citiwa lolonjali vi kuete etimba liositu okuti, vo ko Galilea volupale luo Nasara. Omo liaco, omanu va pula vati: “U ndeti siti Yesu omõla a Yosefe, okuti isiaye la inaye tua va kũlĩha?”—Yoano 6:42.

Omo liaco, Yesu o sapuila omanu hati: “Liwekipo oku ñuñuna pokati kene. Lomue iya kokuange, te Isia wa numa, u koka kuenje ndu pindula keteke lia sulako. Ca sonehiwa Vovaprofeto citi: ‘Vosi yavo va longisiwa la Yehova.’ Wosi wa yeva ku Isia loku lilongisa kokuaye, iya kokuange. Ka ci kasi okuti umue wa mola Isia, te lika una wa tunda ku Suku; eye lika wa mola Isia. Ocili ndu sapuili siti, wosi o kolela o kuete omuenyo ko pui.”—Yoano 6:43-47; Isaya 54:13.

Vepuluvi limue eci Yesu a sapela la Nikodemo, wa popia hati: “Wosi o kolela [Komõla wongunga wa Suku] ka nyõliwa, [pole,] o kuata omuenyo ko pui.” (Yoano 3:15, 16) Lolondaka evi eye o sokisa omuenyo ko pui lekolelo omunu a lekisa ku Mõlomunu. Cilo o kasi oku vangula lowiñi walua, catiamẽla kocikele a kuete oco va kuate omuenyo ko pui una okuti, ka u sokisiwa lomana ale ombolo yi sangiwa ko Galilea. Omunu o pondola oku kuata ndati omuenyo ko pui? Yesu o pitulula olondaka viaye hati: “Ame ndimbolo yomuenyo.”—Yoano 6:48.

Onjuela yatiamẽla kombolo ya tunda kilu, yamamako kuenda yi livokiya calua osimbu Yesu a kasi oku longisa vosunangonga yimue vo Kafarinau.