‘Espiritu Li Kũlãhaisa Ovina Via Longa Via Suku’

“Espiritu [li] kũlãhaisa ovina viosi, ndaño vievi via longa via Suku.” ​—⁠1 VA KOR. 2:⁠10.

1. Ocikele cipi cespiritu sandu Paulu a lombolola kelivulu lia 1 Va Kor. 2:​10, kuenda apulilo api a votuiwa?

TU ECA olopandu kovina viosi espiritu sandu lia Yehova li tu lingaila! Ovisonehua vi tukula espiritu okuti oñuatisi, ongavelo, ukuovangi, halio li tu livondelelako. (Yoa. 14:16; Ovil. 2:38; Va Rom. 8:​16, 26, 27) Upostolo Paulu wa lombolola ocikele cikuavo cespiritu sandu poku popia hati: “Espiritu [li] kũlãhaisa ovina viosi, ndaño vievi via longa via Suku.” (1 Va Kor. 2:​10) Yehova o situlula ovina via longa viespiritu lekuatiso liespiritu sandu liaye. Nda ka tua kuatisiwile lalio, nda tua tẽla hẽ oku kuata elomboloko liocipango ca Yehova? (Tanga 1 Va Korindo 2:​9-12.) Omo liaco, ku votuiwa apulilo a-a: Volonepa vipi ‘espiritu li kũlĩhisa ovina via longa via Suku’? Kocita catete Yehova wa situluila ovina viaco vonduko yelie? Ndamupi kuenda vonduko yelie espiritu li kũlĩhisa ovina via longa koloneke vilo?

2. Volonjila vipi vivali espiritu li talavaya?

² Yesu wa tukula olonjila vivali ndomo espiritu li talavaya. Eci handi ka file wa sapuila ovapostolo vaye hati: “Ñuatisi, haeye espiritu sandu, una Isia a tumila vonduko yange, [li vu] longisa ovina viosi, kuenda [liu] wivaluisi ovina viosi nda popia lene.” (Yoa. 14:​26) Espiritu sandu li talavaya ndulongisi kuenda ndukuakuivaluisa. Olio li talavaya ndulongisi poku kuatisa Akristão oku kuata elomboloko lia suapo liovina ka va kuatele elomboloko liaco. Espiritu li talavaya ndukuakuivaluisa poku kuatisa Akristão oku ivaluka loku kapako ovina va lilongisa ale.

Kocita Catete

3. Olondaka vipi via Yesu vi lekisa okuti ‘ovina via longa via Suku’ via laikele oku situluiwa vokuenda kuotembo?

³ Yesu wa longisa ovina vialua viokaliye kolondonge viaye. Omo handi va kuatele ovina vialua vioku lilongisa, Yesu wa sapuila ovapostolo vaye hati: “Lopo ñasi lovina via lua vioku popia lene, puãi ka vu tẽla handi oku vi yeva. Eci espiritu liocili [liya, liu songuili] kocili cosi.” (Yoa. 16:​12, 13) Yesu wa lekisa okuti, ovina via longa viespiritu vi situluiwa lekuatiso liespiritu sandu vokuenda kuotembo.

4. Ko Pendekoste yunyamo wa 33 K.K., espiritu sandu lia talavaya ndati ndulongisi kuenda ndukuakuivaluisa?

⁴ Keteke lio Pendekoste yunyamo wa 33 K.K., ci soka 120 Kakristão va liongoluilile vo Yerusalãi, va wavekiwa ‘lespiritu liocili.’ Omanu va yeva kuenda va mola ocikomo caco. (Ovil. 2:​5-​11) Kuenje, olondonge via fetika oku vangula alimi aiñi aiñi poku sapula “ovilinga vinene via Suku.” (Ovil. 1:​4, 5, 15; 2:​1-​11) Eyi ya kala otembo yoku situlula ocina cimue cokaliye. Uprofeto Yoeli wa imbile ale owanji woku wavekiwa kuaco lespiritu sandu. (Yoe. 2:​28-​32) Omanu va mola oku tẽlisiwa kuocitumasuku caco lonjila yimue ka va lavokaile kuenda upostolo Petulu wa lombolola ovina viaco. (Tanga Ovilinga 2:​14-18.) Espiritu sandu lia talavaya ndulongisi poku kuatisa Petulu oku lomboluila olondonge oku tẽlisiwa kuocitumasuku caco. Olio lia talavayavo ndukuakuivaluisa poku kuatisa Petulu oku ivaluka olosamo vivali via Daviti. (Osa. 16:​8-11; 110:1; Ovil. 2:​25-28, 34, 35) Ovina omanu vosi va mola levi va yeva, via pangele onepa kovina via longa via Suku.

5, 6. (a) Noke lio Pendekoste yunyamo wa 33 K.K., apulilo api a tiamẽla kocisila cokaliye a sukilile etambululo? (b) Nye ca votola apulilo aco, kuenda onjila yipi ya nõliwapo?

⁵ Kocita catete, handi kua kala ovina vialua Akristão va sukilile oku kuata elomboloko liavio. Kuenda ka va kuatele elomboloko liocisila cokaliye ca tumbikiwile keteke lio Pendekoste. Anga hẽ ocisila caco cokaliye ca tiamisiwilile lika ku va Yudea olonyitiwe kuenda olomongoloke? Omanu Vakualofeka, nda va taviwavo hẽ loku wavekiwa lespiritu sandu? (Ovil. 10:​45) Oco hẽ alume vo kolofeka vikuavo va sukilile oku seviwa evamba loku kuama Ocihandeleko ca Mose? (Ovil. 15:​1, 5) Apulilo a-a, a kuata esilivilo lialua. Ca sukilile okuti espiritu lia Yehova li kũlĩhĩsa ovina viaco via longa. Oco hẽ, espiritu sandu lia laikele oku talavaya vonduko yelie?

⁶ Vamanji vakuavikele, va sukilile oku konomuisa ondaka yaco. Eci Petulu, la Paulu kuenda Barnaba va kala kohongele yosungu yakulu, va lombolola ndomo Yehova a kala oku tava omanu Vakualofeka ka va seviwile evamba. (Ovil. 15:​7-​12) Noke yoku konomuisa ondaka yaco Vovisonehua via va Heveru, kumue lekuatiso liespiritu sandu, osungu yakulu ya nõlapo onjila yi kuamiwa. Kuenje, va sapuilako akongelo poku va tumisa ovikanda.​—⁠Tanga Ovilinga 15:​25-30; 16:​4, 5; Va Efe. 3:​5, 6.

7. Nye ca kuatisa koku situluiwa kuovina via longa via Suku?

⁷ Ovina vikuavo, via situluiwa lekuatiso liovikanda via Yoano, via Petulu, wa Tiago, kuenda via Paulu. Pole, eci Ovisonehua Viakristão via malusuiwa oku sonehiwa, owanji wovaprofeto lovikomo vikuavo, kuenda ukũlĩhĩso via imuha. (1 Va Kor. 13:⁠8) Oco hẽ, espiritu lia amamako ndati oku talavaya ndulongisi kuenda ndukuakuivaluisa? Lia ponduile hẽ oku amamako oku kuatisa Akristão oku kũlĩhĩsa ovina via longa via Suku? Ovitumasuku vi lekisa okuti olio lia amamako oku va kuatisa.

Vokuenda Kuotembo Yesulilo

8, 9. Velie va ponduile oku “nina” lukũlĩhiso wespiritu vokuenda kuotembo yesulilo?

⁸ Ungelo umue poku lombolola ovina viotembo yesulilo, wa popia hati: “Ava va kasi lolondunge va nina ndokutua kuovailu, lava va tiamisila valua kesunga va ka nina ndolombungululu, oloneke vienda ño hũ. . . . Ukulĩhĩso u lua.” (Dan. 12:​3, 4) Velie va laikele oku kala lolondunge haivo va nina? Olusapo lua Yesu luotiliku losoka, lu tu kuatisa oku limbuka omanu vaco. Poku tukula “esulilo lioluali” eye wa popia hati: “Vakuesunga va taima ndekumbi vusoma wa Isiavo.” (Mat. 13:​39, 43) Yesu wa lekisa okuti “vakuesunga” vaco, “omãla vusoma,” okuti Akristão olombuavekua.​—⁠Mat. 13:⁠38.

⁹ Anga hẽ Akristão vosi olombuavekua va laikele oku “nina”? Oco. Momo Akristão vosi va panga onepa kupange woku kunda, loku linga olondonge kuenda va li pamisa pokati kolohongele. Olombuavekua viosi vi lekisa ongangu yiwa. (Sak. 8:​23) Handi vali, kuli ovina via laikele oku situluiwa vokuenda kuotembo yesulilo. Ivaluka okuti ocitumasuku ca Daniele, ca “sitikiwa” toke kotembo yesulilo. (Dan. 12:⁠9) Ndamupi kuenda vonduko yelie espiritu li kũlĩhisa ovina via longa?

10. (a) Koloneke vilo via sulako espiritu li situlula ovina via longa vonduko yelie? (b) Lombolola ndomo ocili conembele yespiritu ya Yehova ca situluiwa.

¹⁰ Koloneke vilo eci otembo yoku situlula ovina viespiritu ya pitila, espiritu sandu lia kuatisa osungu yakulu okuti oyo ocindekaise ‘cukuenje wa kolelua haeye wa lunguka’ koluali luosi, oco yi kuate elomboloko liovina via longa okuti ka via kũlĩhĩwile. (Mat. 24:45; 1 Va Kor. 2:​13) Osungu Yolombangi Via Yehova vokuenda kuotembo ya siata oku linga apongoloko kelomboloko liovina viespiritu. (Ovil. 15:⁠6) Ovina va lilongisa, va vi sandeka ha vi kuatisa vosi. (Mat. 10:​27) Eci ku lingiwa apongoloko kelomboloko limue, ovo va sapuilako vamanji ocili caco.​—⁠Tanga okakasia ka linga hati, “Ndomo Espiritu Lia Situlula Elomboloko Lionembele Yespiritu.”

Kuatisiwa Lespiritu Koloneke Vilo

11. Akristão vosi koloneke vilo va kuatisiwa ndati lespiritu sandu oku situlula ovina via longa via Suku?

¹¹ Akristão vosi va kuatisiwa lespiritu sandu koku situlula ovina via longa via Suku. Ndeci ca pita Lakristão vo kocita catete, etu tu lilongisa, tu ivaluka, kuenda tu kapako alomboluilo ana espiritu sandu a tu kuatisa oku kuata elomboloko. (Luka 12:​11, 12) Ka tu sukila oku lilongisa calua kosikola oco tu kuate elomboloko liovina via siata oku sandekiwa valivulu ocisoko. (Ovil. 4:​13) Tu kuata ndati elomboloko liovina via longa via Suku? Konomuisa olonumbi vimue.

12. Vepuluvi lipi tu sukila oku pinga espiritu sandu vohutililo?

¹² Pinga espiritu sandu vohutililo. Poku konomuisa Ovisonehua, tu sukila oku likutilila oco espiritu sandu li tu songuile. Citava oku linga olohutililo viaco eci tu kasi lika lietu, ndaño otembo yaco yitito calua. Epingilo liaco liumbombe, li sanjuisa utima wa Isietu wo kilu. Ndomo Yesu a ci popia, Yehova eca espiritu sandu liaye ku vana vo pinga locili.​—⁠Luka 11:⁠13.

13, 14. Oku pongiya olohongele ci kuete esilivilo lie koku kuata elomboloko liovina via longa via Suku?

¹³ Pongiya ovipama violohongele. Tua siata oku tambula “okulia [kuetu] kotembo ya tukuiwa” vonduko yukuenje wa kolelua. “Ukuenje” o tẽlisa ocikele caye poku pongiya ovipama Viovisonehua lalivulu oku lilongisa pokolika kuenda kolohongele. Kuli esunga lieci ‘vamanji’ vosi, voluali va vetiyiwila oku konomuisa esapulo limue. (1 Pet. 2:17; Va Kol. 4:16; Yuda 3) Eci tu pokola kolonumbi viaco, tu lekisa okuti tu kasi oku songuiwa lespiritu.​—⁠Esit. 2:⁠29.

¹⁴ Oku pongiya ovipama violohongele, ci sukila oku tanga Ovisonehua via tukuiwa kuenda oku kũlĩhĩsa ndomo vi kapiwako. Oku ci linga, ci tu kuatisa oku kuata elomboloko liwa Liembimbiliya. (Ovil. 17:​11, 12) Eci tu tanga ovisonehua, espiritu sandu li tu kuatisa oku ivaluka ovina viaco. Handi vali, nda tua kuata ocituwa coku tanga Embimbiliya, espiritu sandu li tu kuatisa oku ivaluka apa ocinimbu caco ci sangiwa.

15. Momo lie tu sukilila oku amamako oku kuata alomboluilo okaliye, kuenda tu ci tẽlisa ndati?

¹⁵ Amamako oku kuata alomboluilo okaliye. Alivulu amue ka a pongiyiwile oku lilongisa kolohongele, pole a sandekiwila oku tu kuatisa. Olorevista tu eca eca komanu, vi kuetevo ocimãho coku tu kuatisa. Ocili okuti voluali lulo lua tĩla, pamue tu kevelila omunu umue ale ocina cimue. Nda tu ambata elivulu okuti handi ka tua li tangele, ale tua tangako ño onepa yimue, citava okuti osimbu tu kevelela tu tanga ovipama vikuavo. Vamue va ci linga poku yevelela ovipama via ngalavaliwa osimbu va endela ale ceci va endisa ekãlu. Ci kale vakuakukonomuisa ci kale vakuakutanga, vosi yavo vopa esilivilo kovina viaco viespiritu.​—⁠Hav. 2:⁠2.

16. Oku soneha apulilo loku a konomuisa, ci kuete esilivilo lie?

¹⁶ Sokolola ovina wa tanga. Eci o tanga Vembimbiliya lalivulu akuavo, sokiya otembo yoku sokolola ovina viaco. Osimbu o tanga, citava okuti o kuata apulilo amue. Soneha apulilo aco, oco o a konomuise noke. Tu pondola oku konomuisa ovina viaco poku linga elilongiso lio pokolika. Elomboloko tu kuata poku linga akonomuiso aco, li sokisiwa lukuasi wespiritu una tu sukila.​—⁠Mat. 13:⁠52.

17. Esokiyo lipi ove wa siata oku kuama velilongiso liepata, ale lio pokolika?

¹⁷ Sokiya otembo yoku linga efendelo liepata. Osungu Yolombangi Via Yehova, ya vetiya vosi yetu oku sokiya oñolosi, pamue elivala likuavo lioku linga elilongiso lio pokolika ale elilongiso liepata. Epongoloko lia lingiwa kesokiyo liolohongele, li tu ecelela oku kapako onumbi eyi. Ovina vipi vu pondola oku lilongisa Vefendelo Liepata? Vamue va tanga Embimbiliya, loku konomuisa ovinimbu vi votola apulilo amue, kuenda va soneha atosi amue Vambimbiliya avo. Apata alua, a likolisila oku kapako ovina va lilongisa. Asongui apata amue, va sokiya ovipama vina ovo va limbuka okuti vi sukila oku konomuisiwa lepata ale apulilo a sukila oku tambuluiwa. Ove o pondola oku sokiya ovipama vikuavo vu ka konomuisa vokuenda kuotembo.a

18. Momo lie tu sukilila oku likolisiliko oku lilongisa ovina via longa Viondaka ya Suku?

¹⁸ Yesu wa popia okuti espiritu, li talavaya ndoñuatisi. Omo liaco, tu likolisiliko oku lilongisa ovina via longa Viondaka ya Suku. Ovina viaco, vi panga onepa ‘kukũlĩhĩso wa Suku,’ kuenda tua lalekiwa oku vi sandiliya. (Tanga Olosapo 2:​1-5.) Ukũlĩhĩso waco, u situlula ovina “Suku a angiliyila ava vo sole.” Osimbu tu likolisilako oku lilongisa Ondaka ya Yehova, espiritu sandu li ka tu kuatisa oku “kũlãhaisa ovina viosi, ndaño vievi via longa via Suku.”​—⁠1 Va Kor. 2:​9, 10.

[Atosi pombuelo yamẽla]

[Olondaka vielitalatu kemẽla 22]

Ndomo Espiritu Lia Situlula Elomboloko Lionembele Yespiritu

[Olondaka vielitalatu kemẽla 22]

‘Ovina via longa via Suku’ okuti via situluiwa vokuenda kuocita catete, otavernakulu kuenda olonembele, via kala ulembo wonembele yinene yespiritu. Paulu wa popia okuti oyo, ya kala ‘ombalaka yocili, yina Yehova a tunga, omunu hayeko.’ (Va Hev. 8:⁠2) Onembele yinene yespiritu, esokiyo lioku amẽla ku Suku vonduko yocilumba cocitunda cinene, Yesu Kristu.

‘Ombalaka yocili’ ya tumbikiwa kunyamo wa 29 K.K., eci Yesu a papatisiwa kuenda Yehova wo tava ndocilumba ce lipua. (Va Hev. 10:​5-​10) Noke yolofa kuenda epinduko, Yesu wa iñila vocitumãlo ci Kola koku Kola vonembele yespiritu kuenda wa molẽha “kovaso a Suku” oco a lekise esilivilo liocilumba caye.​—⁠Va Hev. 9:​11, 12, 24.

Handi vali, upostolo Paulu wa soneha okuti Akristão olombuavekua va ‘kulila vonembele yi kola ya Yehova.’ (Va Efe. 2:​20-​22) Anga hẽ onembele yaco haiyo ‘ombalaka yi kola’ Paulu a tukula poku sonehela va Heveru? Vokuenda kuotembo yalua, afendeli va Yehova va simaile okuti oco. Akristão olombuavekua va simaile okuti ovo va kala oku pongiyilua palo posi oco va linge “ovawe” vonembele ya Yehova kilu.​—⁠1 Pet. 2:⁠5.

Kunyamo wo 1971, ocisoko cukuenje wa kolelua ca fetika oku limbuka okuti onembele Paulu a tukula poku sonehela va Efeso, haiyoko onembele yinene yespiritu ya Yehova. Nda Akristão olombuavekua va pinduiwa va tiamẽlele ‘kombalaka yocili,’ onembele yaco nda ya tumbikiwa lika noke liepinduko liavo lina lia fetika “ketukuluko lia Ñala.” (1 Va Tes. 4:​15-​17) Pole poku tukula otavernakulu Paulu wa soneha hati: “Oco ocilayi cotembo yilo.”​—⁠Va Hev. 9:⁠9.

Poku konomuisa lutate ocisonehua eci, lovisonehua vikuavo, tua limbuka okuti onembele yespiritu ka yi kasi oku tungiwa cilo kuenda Akristão olombuavekua havoko “ovawe” a kasi oku pongiyiwa palo posi oco a ka linge onepa konembele yaco. Puãi, Akristão olombuavekua va kasi oku vumba kocitali kuenda vohondo yi Kola koku Kola vonembele yespiritu poku eca “ocilumba cesivayo” ku Suku oloneke viosi.​—⁠Va Hev. 9:⁠9.

[Elitalatu kemẽla 23]

Tu vokiya ndati elomboloko lietu liovina “via longa via Suku”?

O Tambulula Ndati?

• Volonepa vipi vivali espiritu li tu kuatisa oku kũlĩha ovina “via longa via Suku”?

• Kocita catete espiritu sandu lia situlula ovina via longa vonduko yelie?

• Koloneke vilo espiritu sandu li tu kuatisa ndati oku kuata elomboloko liovina via longa?

• Nye o sukila oku linga oco o kuatisiwe lespiritu?