Eye O Longisa Nikodemo Luteke

Osimbu Yesu a kasi vo Yerusalãi oco a lie o Paskoa yunyamo 30 K.K., eye o linga olondimbukiso vialua ale ovikomo. Omo liovina viaco, omanu valua va lekisa ekolelo kokuaye. Nikodemo okuti, u Fariseo haeye wa tiamẽla kombonge ya velapo ya va Yudea yi tukuiwa hati Ekanga Linene, o komõha. Omo okuti, Nikodemo o yongola oku kũlĩha ovina vialua, eye o sandiliya Yesu luteke. Citava okuti, wa kuata usumba wokuti, nda ovitunda vikuavo viakulu va Yudea vo mola, o popiwa lãvi.

Nikodemo o popia hati: “A Rambei, tua kũlĩha okuti ove ulongisi umue wa tunda ku Suku, momo lomue o tẽla oku linga ovilimbu evi o kasi oku linga, te Suku o kasi laye.” Kuenje Yesu o tambulula Nikodemo hati: Oco omunu a iñile Vusoma wa Suku o sukila oku “citiwa evali.”—Yoano 3:2, 3.

Omunu o pondola oku citiwa ndati evali? Nikodemo o pula hati: “[Eye] o pondola hẽ oku iñila vimo lia inaye oco a citiwe onjanja yavali?”—Yoano 3:4.

Sio, oku citiwa evali ka ci lomboloka okuti omunu iñila vimo, oco a citiwe onjanja yavali. Yesu o lombolola hati: “Omunu ka tẽla oku iñila Vusoma wa Suku, te o citiwa lovava kuenda espiritu.” (Yoano 3:5) Omo liaco, eci Yesu a papatisiwa kuenje espiritu sandu lia lokila kokuaye, ci lomboloka okuti, eye wa citiwa “lovava kuenda espiritu.” Vepuluvi liaco kilu kua tunda ondaka ya popia hati: “U Omõlange wa soliwa, ndo sanjukila.” (Mateo 3:16, 17) Lolondaka evi Suku wa lekisa okuti, Yesu wa linga omõlaye wespiritu lelavoko lioku iñila Vusoma wo kilu. Noke ko Pendekoste yunyamo 33 K.K., omanu vakuavo va papatisiwa va tambula espiritu sandu kuenje va citiwavo evali ndomãla va Suku vespiritu.—Ovilinga 2:1-4.

Nikodemo ka kuata elomboloko liovina Yesu a kasi oku u longisa viatiamẽla Kusoma. Omo liaco, Yesu o lombolola vali ovina vialua viatiamẽla kocikele caye cilikasi coku kala omõla wa Suku. Eye o popia hati: “Ndeci Mose a tulika onyoha vekalasoko, haico Mõlomunu a tulikiwa, kuenje wosi o kolela kokuaye o kuata omuenyo ko pui.”—Yoano 3:14, 15.

Kosimbu, nda va isareli va lumaniwa lonyõha va sukilile oku vanja konyõha yosipi ya tungiwa oco ka va ka fe. (Atendelo 21:9) Cimuamue haico okuti, oco omanu va yovuiwe kolofa loku kuata omuenyo ko pui, va sukila oku lekisa ekolelo Komõla a Suku. Oco Yesu a tukule ocisola Yehova a lekisa, o sapuila Nikodemo hati: “Omo Suku a sola calua oluali, wa eca Omõlaye wongunga, okuti wosi o kolela kokuaye ka nyõliwa, o kuata omuenyo ko pui.” (Yoano 3:16) Noke yolosãi epandu tunde eci Yesu a fetika oku kunda vo Yerusalãi, eca uvangi wokuti, eye onjila yoku popela omanu.

Yesu o sapuila Nikodemo hati: “Suku ka tumile Omõlaye voluali oco a lu sombise.” Eci ci lomboloka okuti, Yesu ka tumiwile oco a pise loku sombisa omanu okuti va kunduiwa. Pole, ndomo Yesu a ci popia, wa tumiwa “oco oluali lu popeliwe vonduko yaye.”—Yoano 3:17.

Omo liusumba, Nikodemo wa sandiliya Yesu luteke. Omo liaco, Yesu o malusula oku vangula laye hati: “Esombiso liaco lieli okuti: ocinyi [okuti Yesu omo liomuenyo waye kuenda alongiso aye] ceya voluali, pole, omanu va sole calua owelema okuti ocinyi ci sule, momo ovilinga viavo vĩvi. Momo wosi o linga ovina vĩvi, wa suvuka ocinyi kuenda keya kocinyi oco ovilinga viaye ka vi ka pisiwe. Puãi, wosi o linga ovina viwa iya kocinyi, oco ovilinga viaye vi situluiwe okuti vi taviwa la Suku.”—Yoano 3:19-21.

Cilo Nikodemo u Fariseo, haeye ulongisi vo Isareli, o sukila oku sokolola kovina a mala oku yeva viatiamẽla kocikele ca Yesu vocipango ca Suku.