Ceci Yesu a Longisa Catiamẽla ku Suku

“Lomue wa kũlĩha Isia, te Omõlaco, kuenda u Omõlaco a panga oku u situluila.”—LUKA 10:22.

OMÕLA wa Suku uveli, osimbu ka citiwile handi ndomunu, wa pita otembo yalua la Isiaye kilu. (Va Kolosai 1:15) Omõla weya oku kũlĩha ciwa ovisimĩlo via Isiaye, lovituwa, kuenda olonjila viaye viosi. Eci Omõlaco eya palo posi, loku tukuiwa hati, Yesu, wa kuata onjongole yoku longisa ocili catiamẽla ku Isiaye. Tu pondola oku lilongisa ovina vialua viatiamẽla ku Suku poku yevelela ovina Omõla a popia.

Onduko ya Suku Yesu wa velisilepo onduko ya Suku, Yehova. Eye wa yonguile okuti omanu va tukulavo onduko ya Isiaye. Onduko ya Yesu, yi lomboloka okuti; “Yehova eye Upopeli.” Kuteke waye wa sulako osimbu ka pondiwile, Yesu wa likutilila ku Yehova hati: “Nda va lomboluila onduko yove.” (Yoano 17:26) Ka ci tu komõhisa oku kũlĩha okuti Yesu wa enda oku tukula onduko ya Suku loku yi situluila komanu. Oco hẽ olonjeveleli via Yesu nda via kuata ndati elomboloko liocili catiamẽla ku Yehova, nda ka via kũlĩhĩle onduko Yaye leci yi lomboloka?a

Suku ukuacisola calua Yesu onjanja yimue wa likutilila ku Suku hati: ‘A Tate, . . . wa ndi sola osimbu oluali ka lua sevetiwile.’ (Yoa. 17:24) Omo okuti Yesu eci a kala kilu wa mola ocisola ca Suku, wa lekisavo ocisola caco volonepa vialua.

Yesu wa lekisa okuti Yehova o kuete ocisola calua. Eye wa popia hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.” (Yoano 3:16) Kelimi lio Helasi, ondaka “oluali” ka yi lomboloka “ilu lieve.” Pole, ondaka yaco ndomo ya tukuiwa vocinimbu eci, yi tiamisiwila komanu vosi vo kilu lieve. Omo okuti Suku o kuetele ocisola calua omanu vosi, wa eca Omõlaye wa soliwa, okuti wosi u kolela o yovuiwa kekandu kuenda kolofa oco a kuate elavoko liomuenyo ko pui. Etu ka tu pondola oku kuata elomboloko lia suapo liocisola caco ca lekisiwa kokuetu.—Va Roma 8:38, 39.

Yesu wa tukula ondaka yimue yi lembeleka okuti: Yehova o kuetele ocisola ca piãla afendeli vaye omunu lomunu. Eye wa longisa okuti, Yehova o kasi ndungombo wa kũlĩha okuti olomeme viaye ka vi kuete ekalo limuamue. (Mateo 18:12-14) Yesu wa popia hati, ndaño muẽle olongungu, layimue yi lokila posi okuti Yehova ka yi kapiko. Noke wa amisako hati: “Ndaño esinga liovovitue viene lia tendiwa.” (Mateo 10:29-31) Nda Yehova wa kapako ndoco ongungu yimosi okuti ka yi lokila posi, ka kapiko hẽ ca piãla omunu lomunu pokati kafendeli vaye? Nda esinga liovitue vietu liosi lia tendiwa, kuenda lia kũlĩhĩwa la Yehova, anga hẽ kuli ovina vimue ka kũlĩhĩle viatiamẽla kokuetu, ndeci ovina tu sukila, alikolisilo etu, kuenda ovitangi vietu?

Isietu wo Kilu Ndomo tua ci konomuisa vocipama ca pita, Yesu eye Omõla uveli wa Suku. Eli olio esunga lieci Omõlaco wa soliwa olonjanja vialua a enda oku vanguila la Yehova kuenda oku U tukula hati, “Tate.” Ocili o kuti, vulandu watete wa Yesu wolondaka vina a popia vonembele eci a kuata 12 kanyamo, wa tukula Yehova hati, “Tate.” (Luka 2:49) Vavanjeliu, Ondaka “Tate” yi sangiwamo ci soka 190 kolonjanja. Yesu olonjanja vialua, wa tukula Yehova hati, “Isiene,” “Isietu,” kuenda “Tate.” (Mateo 5:16; 6:9; 7:21) Poku tukula olonduko viaco, wa lekisa okuti omanu ndaño ka va lipuile, va pondola oku kuata ukamba wocili la Yehova.

Ohenda kuenda onjongole yoku ecela Yesu wa kũlĩhĩle okuti omanu ka va lipuile va sukila ohenda ya Yehova. Volusapo luomõla ocisandui, Yesu wa sokisa Yehova la isia umue ukuahenda haeye ukuakuecela, okuti o tambula lesanju omõla o likekembela. (Luka 15:11-32) Olondaka via Yesu vi tu ĩha ekolelo liokuti, Yehova wa kapako apongoloko osi omunu ukuakandu a linga oco a kuatisiwe lohenda Yaye. Yehova ecela ondingakandu yi likekembela. Yesu hati: “Mopia lene siti, Haico kilu va yolela ca lua ukuakandu umuamue o likekembela akandu aye, akui ecea lecea komanu vakuesunga ka va sukila oku likekembela akandu, ci sule.” (Luka 15:7) Eci hẽ ka ci ku vetiya oku amẽla ku Suku ukuahenda?

Ukuakuyeva olohutililo Yesu eci a kala kilu osimbu keyile handi palo posi, wa mola okuti Yehova ‘Ukuakuyeva ohutililo’ kuenda o sanjukila olohutililo viafendeli Vaye. (Osamo 65:2) Eci a kala palo posi, wa longisa olonjeveleli viaye ndomo vi likutilila kuenda ovina va sukila oku pinga volohutililo viavo. Eye wa va lungula hati: “Ko ka pitololi ño-o olondaka vioku patekela.” Noke wa va longisa oku likutilila catiamẽla kocipango ca Suku oco “ci lingiwe posi ndeci ci lingiwa kilu.” Tu sukilavo oku pinga okulia kueteke, ongecelo yakandu etu, kuenda oku tu teyuila kayonjo. (Mateo 6:5-13) Yesu wa longisa okuti Yehova o yevelela olohutililo viafendeli Vaye, kuenda o tambulula apingilo avo a lingiwa lekolelo.—Mateo 7:7-11.

Yesu poku kuatisa omanu oku kolela kovina evi, wa longisa ocili catiamẽla ku Yehova kuenda kocisola Caye. Pole, kuli ovina vikuavo Yesu a longisa vi lekisa ndomo Yehova, a ka pongolola ekalo lioluali oco a tẽlise ocipango Caye longongo kuenda lomanu. Ondaka eyi, oyo ya kala etosi lia velapo vesapulo Yesu a kunda.

[Atosi pombuelo yamẽla]