Alomboluilo a Vetiya Oku Sokolola

TU PANDULA calua apongoloko Ondaka ya Suku ya linga vovimuenyo vietu, kuenje tu yongola okuti vakuetu vopakovo ekuatiso. Handi vali, tu limbuka okuti ndomo omanu va tambuluiya kolondaka viwa ci kokisa epongoloko kelavoko liavo liokovaso. (Mat. 7:13, 14; Yoa. 12:48) Etu tu yongola muẽle okuti ovo va tava kocili. Pole, ekolelo lietu lia pama kuenda ombili yetu, vi sukila oku lekisiwila kumosi lundunguluke oco tu tẽlise uwa wa velapo.

Oku popolola ño koku vangula ocili cina ci lekisa okuti eci omunu a lilongisa ketavo liaye cuhembi, ndaño muẽle ceci okuti ocili caco ci lekisiwa lulala wovisonehua Viembimbiliya vina vi lekisa uvangi weci tua popia, olonjanja vialua caco tua popia ka ci tambuiwa ciwa. Ndeci, nda ovipito vimue viowiñi via pisiwa okuti via fetikiwa la vakualofeka, eci pamue ka cika pongolola ovisimĩlo viomanu ndomo va tenda ovipito viaco. Olonjanja vialua, oka kuata vali onima yiwa nda wa sunguluka londaka yaco. Nye ca kongela voku sunguluka?

Ovisonehua vi tu sapuila okuti “olondunge viokilu . . . viombembua, haivio . . . via sunguluka.” (Tia. 3:17) Ondaka yo Helasi ya pongoluiwa palo hati, “via sunguluka” yi lomboloka “oku unjuka.” Ambimbiliya akuavo a pongolola ondaka eyi hati, “via liuvika,” “vio omboka,” ale “vi pandikisa.” Kũlĩhĩsa okuti oku sunguluka kua tokekisiwa loku kala ukuambembua. Kelivulu lia Tito 3:​2, oku sunguluka kua tiamisiwila koku omboka okuti kua litepa loku kala onjaki. Kelivulu lia Va Filipoi 4:5, tu vetiyiwa oku kũlĩhĩwila “[k]esunguluko” lietu. Omunu wa sunguluka o kapako oku tuwa, ekalo, kuenda ndomo omunu eye a kasi loku vangula laye a liyevite. Eye o tava kocisimĩlo cukuavo, nda ca sunguluka oku ci linga. Oku tata vakuetu ndoco, ci kuatisa oku yikula ovitima viavo oco va tave vali ciwa kondaka Yembimbiliya tu va lomboluila.

Papa tu Fetikila. Luka, usonehi wasapulo, wa soneha hati eci upostolo Paulu a kala ko Tesalonike, wa situlula Ovisonehua, “wa lombolola, kuenda wa lekisa okuti Mesiya, co sokiyilua oku tala ohali loku pinduka ku vakuavilangu.” (Ovil. 17:2, 3) Eci ci komohĩsa ceci okuti, upostolo Paulu wa ci lingila vosunangonga ya va Yudea. Ava eye a kala loku vangula lavo va tavaile Kovisonehua vio Heveru ndusongui wavo. Omo liaco, ca sungulukile oku fetika locina cimue okuti ovo va ci tavaile.

Eci upostolo Paulu a vangula la va Helasi vonjango yi tukuiwa hati Areópago ko Atenai, eye ka fetikile loku tukula Ovisonehua. Eye wa fetika lovina ovo va kũlĩhĩle kuenda vina ovo va tavaile. Noke wa vi tiamisila kelomboluilo limue lieya oku va tuala koku konomuisa eci catiamẽla Kululiki kuenda Kocipango Caye.​—Ovil. 17:22-31.

Koloneke vilo, kuli olohuluwa vialua viomanu vana okuti ka va tava Kembimbiliya ndusongui vomuenyo wavo. Pole onepa yalua yomanu, ya siata oku pita lovitangi viñi viñi via siata voluali lulo. Ovo va yongola eci ciwa. Nda lesunguluko, ove wa lekisa tete esakalalo leci ci kasi loku va sakalaisa, kuenje oco o lekisa noke ndomo Embimbiliya li ci lombolola, ci pondola oku va vetiya oku yevelela kueci Embimbiliya li popia catiamẽla kocipango ca Suku lomanu.

Ci tava okuti ocipiñalo ondonge Yembimbiliya a tambula kolonjali viaye, mua kongela ovina vimue vietavo kuenda ovihilahila vimue. Kaliye ondonge ya lilongisa okuti ovina viaco ka vi soliwe la Suku, kuenje eye o vi likala oco a kapeko eci a longisiwa ci sangiwa Vembimbiliya. Ndamupi ondonge yi pondola oku sapula kolonjali viaye okuti kaliye ka tava vali kovina viaco? Olonjali viaye pamue vi sima okuti omo a likala ocipiñalo cetavo vo wihĩle, eye o kasi loku va likala. Ondonge Yembimbiliya pamue yi sima okuti osimbu handi ka setekele oku lombolola eci Embimbiliya li popia ndesunga lieci a nõlelapo oku siapo ovina viaco, eye o sukila oku va sapuila okuti handi o va kuetele ocisola kuenda esumbilo.

Oku Tava Kocisimĩlo. Yehova ndaño okuti o kuete unene woku tumĩla, eye wa lekisa esunguluko limue li komohĩsa. Poku upa Lote lepata liaye vimbo lio Sodoma, ovangelo va Yehova va popia laye hati: “Tilila komunda, sanga o pia.” Pole, Lote wa livondela hati: “Oco hacoko [a Yehova, NW].” Eye wa pinga oco vo wecelele oku tilila ko Soyara. Yehova wa kapeleko ocisimĩlo ca Lote poku wecelela oku linga eci a pinga. Omo liaco, eci ovaimbo akuavo a nyõliwa, imbo lio Soyara ka lia nyõliwile. Pole, noke Lote wa kuama onumbi Yehova o wimbile tete, kuenje wa ilukila kolomunda. (Efet. 19:17-30) Yehova wa kũlĩhĩle okuti olonumbi viaye via sunguluka, pole lepandi wa kapako ocisimĩlo ca Lote toke eci eye eya oku ci limbuka.

Oco tu kale ciwa la vakuetu, tu sukilavo oku kala vakuesunguluko. Etu pamue tua kolela okuti ocisimĩlo comunu umue hacociliko, kuenda vovisimĩlo vietu, tu kuete alomboluilo a pondola oku eca uvangi waco. Pole olonjanja vimue, hĩse oku liwekapo oku vangula ondaka yaco. Oku sunguluka ka ci lomboloka oku lueya ovihandeleko via Yehova. Olonjanja vimue hĩse oku nõlapo ño oku eca olopandu komunu waco omo a sapula ocisimĩlo caye, ale oku liwekapo oku kapako ondaka yaco hayociliko oco o tiamisile ombangulo kocina cimue cika tẽlisa vali uwa wa velapo. Ndaño muẽle okuti eye o patãla etavo liove, ka ci ka ku lingise onyeño. Ove ci tava okuti o pula esunga lieci eye a patãlela ondaka yaco. Yevelela lutate etambululo liaye. Eci cika ku kuatisa oku kũlĩha ocisimĩlo caye. Eci ci pondolavo oku yikula onjila yoku ka kuata ombangulo yiwa koloneke vi keya kovaso.​—Olosap. 16:23; 19:11.

Yehova wa eca komanu omoko yoku linõlela. Eye ecelela okuti ovo va kuata omoko yoku linõlela, ndaño olonjanja vimue ka va nõla lolondunge. Ndomunga ya Yehova, Yehosua wa pitulula oku tukula ndomo Suku a tata va Isareli. Pole, noke eye wa popia hati: “Nda wa soki hoti, Oku vumba Yehova civi, oco noli etaili u vu yongola oku vumba, nda olosuku via vumbile olosekulu viene kesinya liolui, nda olosuku via va Amori vana wa tungi vofeka yavo. Puãi ame kumue lonjo yange, tu vumba Yehova.” (Yeh. 24:15) Ocikele cetu etaili oku eca “uvangi,” kuenje tu vangula lutõi, pole ka tu sindiliya omanu oco va tave. (Mat. 24:14) Ovo va kuete omoko yoku nõla, kuenje etu tu ecelela okuti va linõlela.

Oku Linga Apulilo. Yesu wa eca ongangu yiwa yoku vetiya omanu oku sokolola. Eye wa kapeleko ekalo liavo kuenje wa ta alusapo ana okuti a lomboloka lonjanga kokuavo. Eye wa lingailevo ciwa apulilo. Eci ca eca epuluvi ku vakuavo lioku lombolola ovisimĩlo viavo kuenda lioku lekisa eci ca kala vovitima viavo. Eci ca va vetiyavo oku sokolola eci catiamẽla kondaka ya kala loku lomboluiwa.

Kepuluvi limue, umue ulongisi wovihandeleko wa pula ku Yesu hati: “Olongisi, ndinga nye okuti ñuata omuenyo ko pui?” Yesu co lelukile calua oku eca etambululo kokuaye. Pole Yesu wo vetiya oku sapula ocisimĩlo caye loku u pula hati: “Vovihandeleko hẽ, mua sonehiwa nye? O tangamo ndati?” Ulume wa tambulula ciwa. Eci hẽ ca sulisa ombangulo? Sio, ka ca sulisile. Yesu wa ecelela okuti ulume amisako vali, kuenda wa linga epulilo limue li lekisa okuti eye wa kala loku litenda ndu okuti ukuesungapo vali. Ulume wa pula hati: “U o lisungue lame helie?” Yesu ko wihĩle etambululo lia popoloka, lina ulume nda a patãla omo liolonepele via kala pokati ka va Yudea la vakualofeka kuenda la va Samária. Yesu wo vetiya oku sokolola eci catiamẽla kolusapo lumue. Olusapo luaco lua kala lua umue u Samária ukuahenda wa kuatisa ongende yimue ya nyaniwile haiyo ya lemehĩwile, okuti ocitunda cimue co pitahãla kuenda umue u Lewi wo pitahãlavo. Loku linga epulilo limue lia leluka, Yesu wa kuatisa ulume oku kuata elomboloko. Ocituwa ca Yesu coku vetiya oku sokolola, ca kuatisa ulume oku kuata elomboloko lina okuti eye ka la likuata liatiamẽla kondaka “U o lisungue” laye. (Luka 10:25-37) Hangangukuoyo yiwa oku yi setukula! Oco ku ka vangule ño ove lika, okuti o sokoluilako ondonge yove, lilongisa oku linga apulilo lutate kuenda oku ta alusapo a vetiya ondonge oku sokolola.

Lekisa Esunga Lieci o Vangula. Eci upostolo Paulu a vanguila vosunangonga ko Tesalonike, eye wa linga vali calua okuti hakutangako ño vono yina olonjeveleli viaye via tavaile ndusongui. Luka wa sapula okuti, Paulu wa lombolola, wa lekisa uvangi, kuenda wa situlula eci a tanga. Eci ceyililako ceci okuti, “vamue pokati kavo va tava, kuenje va litokeka la Paulu kuenda Siluano.”​—Ovil. 17:1-4.

Oku linga ndoco, ci nena onima yiwa, ci kale poku eca uvangi ku va ngandietu, poku vangula lava tu talavayela kumosi ale lava tu tangela kumosi, poku vangula lomanu ka tua kũlĩhĩle kupange woku kunda, poku songola elilongiso Liembimbiliya, ale poku linga ohundo vekongelo. Eci o tanga ocisonehua cimue Cembimbiliya, elomboloko liocisonehua caco pamue lia leluka kokuove, pole komunu ukuavo pamue ka ca lelukile. Oku lombolola kuove ale oku lekisa ndomo ocisonehua caco ci kapiwako cika molẽha ndu okuti ca tĩla. Nda hẽ ka ca kaile vali ciwa oku nõla olondaka vimue via velapo vi sangiwa vocisonehua caco kuenda oku vi lombolola? Ku lekisila hẽ nye uvangi u sangiwa vulandu waco wosi ale vocisonehua cimue cikuavo ci vangulavo ondaka yaco. Ci tava hẽ okuti o ta olusapo lumue lu lekisa elomboloko lieci wa vangula? Anga hẽ apulilo a kuatisa olonjeveleli viove oku sokolola eci catiamẽla kondaka ya vanguiwa? Oku vetiya oku sokolola, ci kuatisa omanu oku kala locisimĩlo ciwa kuenda oku sokolola vali eci catiamẽlako.