Olondunge Via Yehova Vi Limbukiwila Kovina A Lulika

“Unu waye, una ko muiwa muiwa lovaso, ... u molehẽla ciwa vocina a lulika.” —VA ROM. 1:20.

1. Koloneke vilo ukũlĩhĩso woluali wa siata oku kuata unene upi komanu valua?

ONDAKA “olondunge” ka ya siatele oku tiamisiwila konele yi sesamẽla. Omanu vamue va siata oku popia okuti, omunu una o kuete ukũlĩhĩso walua eye o kuete olondunge. Pole, omanu vana va kuete ukũlĩhĩso woluali, ka va siatele oku eca olonumbi via velapo vi kuatisa komuenyo. Vana va ecelela oku songuiwa lavo “va punguaiwa lolofela viosi viokulongisa.”—Va Efe. 4:14.

2, 3. (a) Momo lie Yehova eye lika ‘ukualondunge viosi’? (b) Olondunge via Suku via litepa ndati lolondunge violuali?

² Omanu vana va kuete ukũlĩhĩso wa Yehova Suku, va litepa lomanu vakualuali! Embimbiliya li tu sapuila okuti, Yehova eye lika ‘ukualondunge viosi.’ (Va Rom. 16:27) Eye wa kũlĩha cosi catiamẽla koviluvo viaye kuenda ndomo via lulikiwa oku kongelamo ulandu wavio. Ovihandeleko violuali vina okuti oko omanu va siata okupa akonomuiso avo, viosi via tumbikiwa la Yehova. Omo liaco, eye ka komoha ovina omanu va siata oku panga, kuenda ka kapeleko ukũlĩhĩso wolonoño violuali. Momo “olondunge violuali lulo, ku Suku via soka nduveke.”—1 Va Kor. 3:19.

³ Embimbiliya li tu sapuila okuti, Yehova “eye ukuakueca olondunge” komanu vaye. (Olosap. 2:6) Olondunge via Suku via suapo kuenda via litepa lukũlĩhĩso wolonoño. Ovio vi vetiya oku talavaya luloño u tunda kukũlĩhĩso wa suapo kuenda kelomboloko liwa. (Tanga Tiago 3:17.) Upostolo Paulu wa komõha calua olondunge via Yehova. Eye wa soneha hati: “Wa longa nye! ukuasi lolondunge lukũlĩhiso wa Suku! Okutetulula kuaye ka ku kũlĩhisua, kuenda olonjila viaye ka vi moñoluiwa.” (Va Rom. 11:33) Omo okuti, Yehova eye ukualondunge viosi, tua kolela okuti ovihandeleko viaye vi tu songuila konjila yiwa yomuenyo. Handi vali, Yehova eye lika wa kũlĩha eci tu sukila oku linga oco tu kuate esanju.—Olosap. 3:5, 6.

Yesu ‘Omesele Yovopange’

4. Vonepa yipi tu limbuka olondunge via Yehova?

⁴ Olondunge via Yehova kuenda ovituwa viaye vikuavo, vi limbukiwila kovina a lulika. (Tanga Va Roma 1:20.) Ovituwa via Yehova, vi limbukiwila okupisa kovina vinene toke kovina vitito a lulika. Kolonepa viosi tu pondola oku vanja cikale kilu cikale posi, tu limbuka uvangi wolondunge viosi kuenda ocisola Cululiki. Poku kũlĩhĩsa ovina a lulika, ci tu longisa calua catiamẽla kokuaye.—Osa. 19:1; Isa. 40:26.

5, 6. (a) Helie wa kuatisa Yehova koku lulika oluali? (b) Nye tu kũlĩhĩsa cilo kuenda momo lie?

⁵ Yehova eci a “sovola ilu losi,” ka kale lika liaye. (Efet. 1:1) Embimbiliya li lombolola okuti, osimbu ka lulikile oluali, wa lulika ungelo umue okuti kokuaye oko kua lulikiwa “ovina viosi.” Ungelo waco, eye Omõla wongunga wa Suku “uveli pokati koviluvo viosi” una okuti noke wa kala palo posi ndomunu okuti, Yesu. (Va Kol. 1:15-17) Yesu wa kuatavo olondunge ndevi via Yehova. Kelivulu Liolosapo kocipama 8 wa tukuiwa hati, ndunge. Ocipama caco Cembimbiliya ca tukulavo Yesu hati, ‘omesele yovopange’ a Suku.—Olosap. 8:12, 22-31.

⁶ Ovina via lulikiwa vi situlula olondunge via Yehova kuenda via Yesu Omesele Yovopange aye. Ovio vi tu longisa ovina vialua. Tu kũlĩhĩsi ovina vikuãla viatiamẽla kovina via lulikiwa via tukuiwa kelivulu Liolosapo 30:24-28 “vi kuete olondunge via lua.”a

Ongangu Yoku Kuata Ombili Yupange

7, 8. Catiamẽla kolonjinji, nye ci ku komõhisa?

⁷ Eci tu kũlĩhĩsa ekalo kuenda upange woviluvo vimue vi tukuiwa hati, ovina “vitito kilu lieve” tu lilongisako ovina vialua. Tu kũlĩhĩsi eci catiamẽla kolondunge violonjinji.—Tanga Olosapo 30:24, 25.

⁸ Olonoño via siata oku popia hati, voluali muli olohuluwa vialua violombuto violonjinji vi likolisilako oku talavaya kilu lieve kuenda kosi yongongo. Olonjinji via sokiyiwa vovimunga vialua, kuenda ovimunga viaco via tepiwa vovisoko vitatu okuti: olonasoma, alume, kuenda olonalavayi. Ocimunga locimunga ci talavaya kumosi oco va kuate ovina va sukila. Olonjinji vimue vi talavaya ciwa koku finisa pocitumãlo va kasi. Ovio vi teta amela loku a lembika kuenje noke a linga otulumu yi kuatisa ovikũla oco va kuate okulia. Olonoño via limbuka okuti olonjinji viaco vi talavaya loku kũlĩhĩsa okulia va sukila vocisoko cavo.b

9, 10. Tu kuama ndati ongangu yombili yupange wolonjinji?

⁹ Tu pondola oku lilongisa calua catiamẽla kolonjinji. Ovio vi tu longisa okuti, nda tu yongola oku kuata onima yiwa kovopange etu, tu sukila oku kuata ombili yoku talavaya. Embimbiliya li tu sapuila hati: “Kuende kolunjinji acisiãi. Sokolola ovituwa vialuo hu lunguka. Ka lu kuete osoma, pamue ocime, ndaño ombiali, haimo lu vanjiliya ohuta yaluo yokondombo, kuenda lu ungola ovilia vialuo poku lombola.” (Olosap. 6:6-8) Yehova kuenda Yesu Omesele Yovopange aye, va kuete ombili yoku talavaya. Yesu wa popia hati: “Toke cilo Tate o linga upange, lamevo ndinga upange.”—Yoa. 5:17.

¹⁰ Omo okuti tu setukula Suku kuenda Kristu, tu sukilavo oku kuata ombili yoku talavaya. Tu sukila oku kala “vakuambili yupange wa Ñala” kocikele cosi tu kuete vocisoko ca Yehova. (1 Va Kor. 15:58) Omo liaco, tu sukila oku pokola kelungulo Paulu a ecele Kakristão voko Roma hati: “Kombili ko ka lendi. Kuati owuya wespiritu. Vumbi Ñala [Yehova].” (Va Rom. 12:11) Alikolisilo etu oku linga ocipango ca Yehova ko lingi wolivova, momo Embimbiliya li tu sapuila hati: “Suku hokuanyako okuti ivalako upange wene kuenda ocisola wa lekisi loku vumba ... vonduko yaye.”—Va Hev. 6:10.

Oku Teyuila Ukamba Wetu la Suku

11. Lombolola ekalo liolohuita.

¹¹ Ohuita okacinyama kamue katito ka tu longisavo ovina vialua. (Tanga Olosapo 30:26.) Oko ka setahãla ondimba yinene, pole, ka kuete ovatũi atito a kasi ndelola kuenda ovolu atito. Okacinyama kaco, ka sangiwa calua kovitumãlo viovawe ale kolomunda. Oko ka kuete ovaso amue a lunguka calua okuti o kuatisa koku lavulula ciwa ovina vi koka ohele komuenyo waye. Ututa waye una wa longa calua haiwo u kasi pokati kovawe, u u teyuila kovanyali. Olohuita via lulikiwa oku kala ovimunga kumosi la vakuavo oco vi liteyuile kuenda oku likuatisa koku kuata owuya kotembo yombambi.c

12, 13. Nye tu lilongisa kolohuita?

¹² Nye tu lilongisa kolohuita? Catete ceci okuti okacinyama kaco, ka ca lelukile oku ka kuata. Ovaso aye o kuatisa oku lavulula ovanyali. Handi vali oku kala kuaye kututa kuenda pokati kovawe, ci u kuatisa oku liteyuila. Etu tu sukilavo oku lavulula konepa yespiritu oco tu limbuke ohele yoluali lulo lua Satana. Upostolo Petulu wa lungula Akristão hati: “Lunguki. Lavululi. Unyali wene eliapu o ñuala ñuala ndohosi yi koma oku sandiliya u a lia.” (1 Pet. 5:8) Yesu eci a kala palo posi, wa lavulula loku tamãlala layonjo osi a Satana oku nyõla ekolelo Liaye ku Suku. (Mat. 4:1-11) Yesu wa sia ongangu yiwa kolondonge viaye!

¹³ Onjila yimue yi tu kuatisa oku lavulula, oku kuatisiwa lovimalẽho viosi Yehova a siata oku tu ĩha viatiamẽla koku tu teyuila. Tu sukila oku pitisa kovaso Ondaka ya Suku kuenda oku endaenda kolohongele. (Luka 4:4; Va Hev. 10:24, 25) Handi vali, ndeci olohuita vi likuatisa poku kala ovimunga lavakuavo, tu sukilavo oku likuata omunga la vamanji oco tu ‘likolisi pokati.’ (Va Rom. 1:12) Poku linga ovina vi tu kuatisa oku kuata eteyuilo lia Yehova, tu lekisa okuti tua tava kolondaka viukualosamo Daviti wa popia hati: “Yehova ewe liange, haeye ocikolo cange, haeye upopeli wange. Eye Suku yange, haeye ewe liange, kokuaye oko [ndi vunda].”—Osa. 18:2.

Oku Pandikisa Ndaño Lelambalalo

14. Ndaño okuti oluhuma lumosi, ka lu tu komõhisa, nye ci popiwa kocisoko caco?

¹⁴ Olohuma vi tu longisavo ovina vialua. Ocili okuti, oluhuma lumosi lu kuete olosentimetro vitãlo, ka lu tu komõhisa, pole, nda vi enda vialua, vi tu komõhisa. (Tanga Olosapo 30:27.) Ovio via kũlĩhĩwa okuti vilia calua kuenda vi pondola oku lia ovikũla viosi vi sangiwa vepia limue linene. Embimbiliya li sokisa onjuvungo yoku palãla kuolohuma ndonjuvungo yakãlu ovita, kuenda okuõla kulienge wondalu. (Yoe. 2:3, 5) Omanu va siata oku miha ondalu oco va lupuise olohuma, pole, ka va siatele oku ci tẽla. Momo lie? Momo osimbu vi kasi oku pia, vima ondalu omo liulela walua va kuete kuenje vina via supapo viamamako okulia ovikũla. Ndaño okuti olohuma ka vi kuete osoma ale usongui, pole, vi likuete omunga koku yula ovitangi viosi.d—Yoe. 2:25.

15, 16. Akundi Vusoma koloneke vilo va sokisiwa ndati lolohuma?

¹⁵ Uprofeto Yoele wa sokisa upange womanu va Yehova lovilinga violohuma. Tu ganga ndoco: “Va yoloka lutoi ha va yaki. Va londa ovimbaka ndava va pama kovita. Vamako, u vonjila yaye, u vonjila yaye, lomue o pambuka vonjila yaye. Lomue o lipungika lukuavo; omunu omunu amako vohoka yaye. Va papula olohoka viovanyãli, ka va talama.”—Yoe. 2:7, 8.

¹⁶ Ocitumasuku eci ci likuata ciwa lupange wakundi Vusoma wa Suku koloneke vilo! Lacimue ‘ocimbaka’ celambalalo ci imula upange wavo. Pole va kuama ongangu ya Yesu una wa pandikisa koku linga ocipango ca Suku ndaño wa pembuiwa lomanu valua. (Isa. 53:3) Akristão vamue va siata oku ‘papula olohoka’ poku fa omo liekolelo liavo. Pole, upange woku kunda u kasi oku amamako, kuenda etendelo liakundi Vusoma li kasi oku amamako oku livokiya. Elambalalo lia siata oku ecelela okuti olondaka viwa vi kundiwila komanu vana nda ka ca lelukile kokuavo oku yeva esapulo Liusoma. (Ovil. 8:1, 4) Anga hẽ, kupange wove woku kunda wa siata oku lekisa epandi ndolohoka violohuma okuti ku tatekiwa lelambalalo?—Va Hev. 10:39.

“Kakateli Eci Ciwa”

17. Momo lie olomahi viekokolo citava okuti vi lupuka kovina via sielena?

¹⁷ Ekolelo li molẽha okuti ka li kuete onjile. (Tanga Olosapo 30:28.) Olonoño via komõha calua uloño walio woku kakatela vocimano kuenda oku yoloka kolusoka okuti ka li kupuka. Oco hẽ, lia siata oku cilinga ndati? Olio ka li kuete onamẽlela polomãhi. Pole, polomãhi viaye pali akaka amue a setahãla esinga o kuatisa oku lamẽlela. Akaka aco, a kuete olofiyu vimue vitito vi lamẽlela. Ongusu yolofiyu viaco oyo yi kuatisa ekokolo oku panamala okuti ndaño o lupukila vocimanu ca sielena ale volusoka, ka li kupuka! Olonoño omo lioku komoha uloño wakokolo, via popia hati, ovikuata vina via pangiwa loku setukula ekalo liolomahi viakokolo, vi kuete onamẽlela ya pama.e

18. Ndamupi tu pondola oku amamako oku ‘kakatela kueci ciwa’?

¹⁸ Nye tu pondola oku li longisa kekokolo? Embimbiliya li tu vetiya hati: “Nyehuli eci cĩvi. Kakateli eci ciwa.” (Va Rom. 12:9) Ovina vĩvi violuali lua Satana, vi pondola oku nyõla onjongole yetu yoku kakatela kolonumbi via Suku. Oku kuata ukamba lomanu vana ka va pokola kovihandeleko via Suku, cikale kosikola, kupange, ale kolomapalo vikuavo, ci pondola oku nyõla onjongole yetu yoku linga eci ciwa. Ka tu ka eceleli okuti ovina viaco vi pita letu! Ondaka ya Suku yi tu lungula hati: “Ku ka kolele olondunge viove.” (Olosap. 3:7) Tu sukila oku pokola kelungulo Mose a ecele komanu va Suku kosimbu hati: “Sumbila Yehova, Suku yove, loku u vumba, eye u kakatela, loku lisila londuko yaye.” (Esin. 10:20) Poku kakatela ku Yehova tu kuama ongangu ya Yesu una ovisonehua via popia hati: “Ove wa sola esunga, wa suvuka esino.”—Va Hev. 1:9.

Ceci tu Lilongisa Kovina Via Lulikiwa

19. (a) Ovituwa vipi via Yehova ove wa limbuka kovina via lulikiwa? (b) Olondunge viokilu vi tu kuatisa ndati?

¹⁹ Ndomo tua lilongisa vocipama cilo, ovituwa via Yehova vi limbukiwila kovina a lulika. Handi vali, ovina a lulika vi tu longisavo ovina vialua. Osimbu tu amamako oku lilongisa catiamẽla kovopange a Yehova, tu komoha calua olondunge viaye. Nda tua kapako olondunge viokilu, tu kuata esanju cilo kuenda tu kuata elavoko liwa. (Uku. 7:12) Tuka limbuka ocili colondaka vi sangiwa kelivulu Liolosapo 3:13, 18 vi popia hati: “Wa sumũlũha omunu o sanga ndunge, kuenda omunu o limuisa uloño. Eye uti womuenyo kuava vo kuatelela. Ava vosi vo kuata va sumũlũha.”

[Atosi pombuelo yamẽla]

Ove hẽ Ocivaluka?

Nye tu lilongisa ...

• kolonjinji?

• kolohuita?

• kolohuma?

• kekokolo?

[Elitalatu kemẽla 16]

Ove hẽ wa siata oku likolisilako oku talavaya ndolonjinji?

[Elitalatu kemẽla 17]

Olohuita vi sanga eteyuila poku kala kumosi la vakuavo. Ove hẽ wa siatavo oku cilinga?

[Elitalatu kemẽla 18]

Akristão va siata oku pandikisa kupange woku kunda ndolohuma

[Elitalatu kemẽla 18]

Akristão va kakatela kueci ciwa ndeci ekokolo li kuatelele apa pa sielena

[Ono Yelitalatu]

Stockbyte/Getty Images