Etu Tuakristão Tu Lavi Ekalo lietu
‘Yehova wa popia hati: Vulombangi viange kuenda wakuenje vange.’—ISAYA 43:10.
1. Omanu vapi Yehova a kokela kokuaye?
ECI iñila Vonjango Yusoma kũlĩhĩsa ciwa. Omanu vapi olete? O pondola oku mola amalẽhe va kasi oku yevelela lutate olonumbi via Suku. (Osamo 148:12, 13) Kuenda o pondolavo oku mola olonjali vi likolisilako oku vumba Yehova ndaño lovitangi voluali lulo. Handi vali, o molavo akulu vendamba va litumbika ku Yehova ndaño lekambo liuhayele. (Olosapo 16:31) Vosi yavo va sole calua Yehova. Kuenje, Yehova wa va kokela kokuaye oco va kuate ukamba laye. Yesu wa popia hati: “Lomue o tẽla oku iya kokuange, te Isia wa numa u koka.”—Yoano 6:37, 44, 65.
2, 3. Koloneke vilo, momo lie ka ca lelukilile oku pokola kolonumbi via Yehova?
2 Etu tua sanjuka calua omo lioku kala omanu va Yehova. Kuenda tua siata oku tambula asumũlũho alua kokuaye. Pole, ‘koloneke vilo viohali,’ ka ca lelukile oku pokola kolonumbi via Yehova. (2 Timoteo 3:1) Capiãla enene amalẽhe va citiwa lolonjali vina okuti Akristão. Umalẽhe umue ukuenje wa popia hati: ‘Tunde vutila wange, nda siata oku endaenda kolohongele. Pole, sia kuatele elomboloko liovina viespiritu. Kuenda sia kuatelevo onjongole yoku vumba Yehova.’
3 Kuli amalẽhe vamue okuti, va kuete onjongole yoku vumba Suku. Pole, va siata oku yonjiwa lakamba, kuenda oku vetiyiwa lovituwa violuali, oco va linge ekandu. Olonjanja vimue eci tu yonjiwa lovituwa viaco, tu fetika oku hongua kespiritu. Koloneke vilo, omanu va siata oku sepula olonumbi Viembimbiliya loku popia hati, ka vi kuatisa vali momo viosimbu calua. (1 Petulu 4:4) Vamue va siata oku popia hati, ka tu sukila oku kũlĩha ndomo tu fendela Suku. (Yoano 4:24) Upostolo Paulu vukanda waye a sonehela va Efeso, wa lombolola eci catiamẽla ‘kovituwa’ violuali. (Va Efeso 2:2) Ovituwa viaco, ovio via siata oku vetiya omanu oku kuata ovisimĩlo viaco vĩvi. Momo omanu vaco ka va kũlĩhĩle ocipango ca Yehova.
4. Ndamupi Yesu a lombolola esilivilo lioku lava ekalo lietu?
4 Etu Tuakristão cikale amãlehe cikale akulu, tua kũlĩha okuti tu sukila oku lava ekalo lietu. Oco tu limbuke ekalo liaco, tu sukila oku kũlĩha olonumbi via Yehova kuenda ovina a tu yonguila. Etu tua lulikiwa lesetahãlo lia Suku. (Efetikilo 1:26; Mika 6:8) Embimbiliya li sokisa ovituwa vietu nduwalo woketimba okuti, u muiwa lomanu vosi. Catiamẽla koloneke vilo, Yesu wa lungula hati: “Ota, njiya ndocimunu. U ka pekela puãi o lavulula kuenje o lava olonanga viaye ndokuti ka endi epõlola loku kutisiwa osõi, eye wa sumũlũha.”a (Esituluilo 16:15) Etu ka tu yongola oku siapo ovituwa viwa lolonumbi via Yehova. Kuenda ka tu yongola oku lisetahãisa loluali lulo lua Satana loku siapo ekalo lietu lioku vumba Yehova. Momo nda ka tua lavele ekalo lietu, tu nyõla ukamba wetu la Yehova. Kuenje, tuka liyaka lovitangi vialua.
5, 6. Momo lie Ukristão a sukilila oku pama kespiritu?
5 Ukristão wosi wa limbuka esilivilo lioku lava ekalo liaye kespiritu, wa kũlĩha ndomo a pondola oku ambata omuenyo waye. Ndamupi? Eci Ukristão a fetika oku yapuka vonjila ya Yehova, ka kũlĩha onjila a kasi oku kuama. Embimbiliya lieca elungulo lioku yuvula eyonjo liaco. Ndonge Tiago wa popia hati: “U o tatãla wa soka ndapuku okalunga a pungua lofela hao a pekuiwa. Omunu waco ka ka kolele okuti, omunu ukuavitima vivali, haeye ukuakutatayala volonjila viaye viosi, o tambula cimue ku Ñala.”—Tiago 1:6-8; Va Efeso 4:14; Va Heveru 13:9.
6 Etu Tuakristão tu pondola ndati oku lava ekalo lietu? Nye ci tu kuatisa oku limbuka esumũlũho lietu lioku kala afendeli va Yehova? Tu kũlĩhĩsi ciwa olonumbi vikuãimo.
Pamisa Ekolelo Liove
7. Momo lie ci kuetele esilivilo oku pinga ku Yehova oco a kũlĩhĩse utima wetu?
7 Amamako oku pamisa ukamba wove la Yehova. Oku kuata ukamba la Yehova, olio esumũlũho lia velapo Kakristão. (Osamo 25:14; Olosapo 3:32) Nda tua fetika oku kuata atatahãi atiamẽla kekalo lietu Tuakristão, tu sukila oku kũlĩhĩsa ciwa ovituwa vietu. Ukualosamo wa likutilila hati: “Ñulĩhĩse, a Yehova, seteke. Kũlĩhĩsa utima wange lovisimilo viange.” (Osamo 26:2) Momo lie ci kuetele esilivilo oku pinga ku Yehova oco a kũlĩhĩse utima wetu? Momo etu muẽle ka tu pondola oku pisa ovisimĩlo vietu lovilinga vietu. Yehova eye lika wa kũlĩha ekalo lietu kuenda ovisimĩlo viutiwa wetu.—Yeremiya 17:9, 10.
8. (a) Tu kuatisiwa ndati poku setekiwa la Yehova? (b) Ekuatiso lie wa siata oku tambula oco wamameko kespiritu?
8 Oku pinga ku Yehova oco a seteke utima wetu, ci lomboloka oku u laleka oco a kũlĩhe ovisimĩlo vietu. Eye o pondola oku ecelela okuti, tu pita lovitangi oco tu situlule ekalo liutima wetu. (Va Heveru 4:12, 13; Tiago 1:22-25) Omo liaco, tu sukila oku tava koseteko ya Yehova momo yi tu ĩha epuluvi lioku lekisa epokolo lietu kokuaye. Kuenda yi tu kuatisavo ‘oku kanguka, loku suapo, kuenje lacimue ci tu kambela.’ (Tiago 1:2-4) Oku setekiwa la Yehova ci tu kuatisa oku amamako kespiritu.—Va Efeso 4:22-24.
9. Momo lie tu sukilila oku kũlĩha elongiso Liembimbiliya? Ci lombolola.
9 Kolela kolonumbi Viembimbiliya. Oco tu pamise ekolelo lietu, tu sukila oku kuata ukũlĩhĩso Wondaka ya Suku. (Va Filipoi 1:9, 10) Akristão vosi, cikale amalẽhe ale akulu, va sukila oku lekisa esanju liavo omo lioku kũlĩha ocili Cembimbiliya. Paulu wa vetiya Akristão hati: ‘Kũlĩhĩsi ovina viosi. Kuenje nolipo evi viwa.’ (1 Va Tesalonike 5:21) Amalẽhe vana okuti olonjali viavo Akristão, va sukila oku kũlĩha okuti, ukamba wavo la Yehova ka u tundi kekolelo liolonjali viavo. Daviti wa sapuilile omõlaye Salomone hati: “Kũlĩha Suku ya soyove, u vumba loku pua evelo kuenda lutima wove wosi.” (1 Asapulo 28:9) Salomone ka sukilile lika oku limbuka ndomo isiaye a pamisile ekolelo liaye ku Yehova. Pole, wa sukilile eye muẽle oku kũlĩha Yehova. Omo liaco, wa likutilila ku Suku hati: “Nyihe olondunge lukũlĩhĩso poku tunda kuange lo pokuiñila kuange kovaso epata eli.”—2 Asapulo 1:10.
10. Momo lie ca sungulukila oku linga apulilo lovisimĩlo viwa?
10 Ekolelo lietu li pamisiwa lika lukũlĩhĩso wondaka ya Suku. Paulu wa popia hati: “Ekolelo li tunda kueci ci yeviwa.” (Va Roma 10:17) Nye Paulu a yonguile oku popia lolondaka evi? Paulu wa yonguile oku lekisa okuti, oco tu pamise ekolelo lietu kolohuminyo via Suku, tu sukila oku kuata ukũlĩhĩso Wonda ya Suku. Ukũlĩhĩso waco u tukuatisavo oku kolela kocisoko ca Yehova. Oku linga apulilo amue atiamẽla Kembimbiliya, ci tu vetiya oku sanda atambululo aco. Kelivulu lia Va Roma 12:2, upostolo Paulu wa popia hati: ‘Limbuki ndeci ci kasi ocipango ca Suku, okuti ciwa, ca sunguluka, kuenda ca pua eko.’ Ndamupi tu pondola oku limbuka ocipango ca Suku? Ocipango ca Suku tu ci limbuka lika nda tua kuata ‘ukũlĩhĩso wocili Condaka yaye.’ (Tito 1:1) Espiritu lia Suku li tu kuatisavo oku kuata elomboloko liovina vimue via tatama. (1 Va Korindo 2:11, 12) Eci tu liyaka locitangi coku kuata elomboloko liondaka yimue, tu sukila oku pinga ekuatiso ku Suku vohutililo. (Osamo 119:10, 11, 27) Eye o yongola okuti, tu kuata elomboloko liwa Liondaka yaye loku pokola kokuaye. Yehova o tava apulilo osi tu linga lovisimĩlo viwa.
Nõlapo Oku Sanjuisa Suku
11. (a) Nye ci pondola oku tu yapula vonjila ya Yehova? (b) Nye tu sukila oku linga oco ka tuka yapuisiwe lakamba?
11 Nõlapo oku sanjuisa Suku okuti omunu hayeko. Ocili okuti, oku kũlĩhĩwa la vakuetu ka cĩviko. Momo vosi yetu tu yongola oku kuata akamba kuenda oku linga eci ci sanjuisa ovituma viavo. Pole, votembo yovutila, amalẽhe va siata calua oku vetiyiwa lakamba oco va kuame ovilinga viavo. Etu Tuakristão tu sukila oku ivaluka okuti olonjanja vimue, akamba ka va kũlĩhĩle eci ci tu nenela ekalo liwa komuenyo wetu. Momo va yongola lika oku va kuama koku linga ovina vĩvi. (Olosapo 1:11-19) Eci Ukristão a ecelela oku vetiyiwa lovilinga vĩvi viakamba, o fetika oku nyõla ukamba waye la Yehova. (Osamo 26:4) Upostolo Paulu wa lungula hati: “Ko ka lisetahaisi loluali lulo.” (Va Roma 12:2) Yehova o tu ĩha ekuatiso lioku pandikisa kayonjo aco.—Va Heveru 13:6.
12. Onumbi yipi yi pondola oku tu kuatisa oku pamisa ekolelo lietu? Kuenda ongangu yelie tu sukila oku kuama?
12 Olonjanja vimue tu kala kohele yoku nyõla ekalo lietu kespiritu omo lioku lambalaliwa lomanu. Pole, tu sukila oku ivaluka okuti, oku pokola ku Suku ku kuete esilivilo lia velapo. Omo liaco, ka tuka eceleli oku yapuisiwa lovisimĩlo viomanu. Elivulu Lietundilo 23:2, li tu lungula hati: “Ka ci tava oku kuama owiñi oku linga evĩho.” Kotembo ya va Isareli, omanu valua ka va kuatele ekolelo liokuti Yehova oka tẽlisa olohuminyo Viaye. Pole, Kalembe ka tavele oku kuama ovisimĩlo viomanu. Eye wa kũlĩhĩle okuti, olohuminyo via Suku vika tẽlisiwa muẽle. Omo liaco, weya oku tambula asumũlũho alua ku Yehova. (Atendelo 13:30; Yehosua 14:6-11) Ove hẽ, wa nõlapo oku yuvula ovisimĩlo viomanu oco wamameko oku kuata ukamba la Yehova?
13. Momo lie ci kuete esilivilo oku lekisa komanu okuti Tuakristão?
13 Lekisa komanu okuti ove Ukristão. Kuli olusapo lumue lu popia hati, oco omunu a liteyuile o sukila oku yaka. Ondaka eyi yi tiamisiwila ciwa komuenyo wetu Tuakristão. Koloneke via Esera eci va Isareli va suvukiwile lovanyali vavo, va popia hati: “Etu tuakuenje va Suku yovailu losi.” (Esera 5:11) Eci tu popiwa lãvi lomanu, olonjanja vimue tua siata oku kuata usumba. Pole, nda tua seteka oku sanjuisa omanu, tuka nyõla ukamba wetu la Yehova. Omo liaco, yuvula oku kuatela usumba omunu. Sapuila vakuene okuti, Umbangi ya Yehova. Lumbombe wocili, lekisa kokuavo ovina wa siata oku lilongisa kuenda oku va sapuila okuti ove Ukristão. Va sapuilavo olonumbi via Yehova viatiamẽla kovituwa viwa kuenda oku va lomboluila okuti, ove wa nõlapo oku pokola kolonumbi viaco. (Osamo 64:10) Oku pandikisa loku pokola kolonumbi via Yehova, ku pondola oku tu teyuila. Kuenda ku vetiya omanu oku linga apulilo atiamẽla ku Yehova locisoko Caye.
14. Anga hẽ tu sukila oku kuatela usumba elambalalo? Ci lombolola.
14 Ocili okuti, omanu vamue poku va sapuila Ondaka ya Suku va pondola oku ku popia lãvi. (Yuda 18) Nda vakuene ka va tava oku yevelela ovina o va sapuila, kuka sumue. (Esekiele 3:7, 8) Ivaluka okuti, lalimue eteke oka tẽla oku tavisa omanu vana vakuavitima via siva. Momo ka va kuete onjongole yoku tava Kondaka ya Suku. Sokolola ulandu wa Fareo. Eye wa mõla afengi alua kuenda ovikomo vialua oku kongelamo olofa vionuñulu yaye. Pole, ovina viaco ka vio vetiyile oku tava okuti Mose wa tumiwile la Yehova. Omo liaco, kuka liwekepo oku kunda omo liusumba. Kolela okuti, Yehova oka ku kuatisa oku yula usumba waco.—Olosapo 3:5, 6; 29:25.
Ovolandu Okosimbu a Pamisa Ekolelo Lietu
15, 16. (a) Ocipiñalo cetu cespiritu ci lomboloka nye? (b) Nda tua sola ocipiñalo cetu cespiritu tu tambula ekuatiso lie?
15 Sola esumũlũho liove lioku kala Ukristão. Ondaka ya Suku yi lekisa okuti, Akristão vaka kuata asumũlũho alua omo lioku sola ocipiñalo cavo cespiritu. Vocipiñalo caco mua kongela ocili Condaka ya Yehova, kuenda elavoko liomuenyo ko pui. Mua kongelavo esumũlũho lioku kala akundi volondaka viwa Viusoma. Sokolola ño handi ocikele cove coku kala Ombangi ya Yehova. Kuenda ocikundi wa tambula coku sapuila omanu olondaka viwa Viusoma. Upange waco uka popela omanu valua. Ivaluka olondaka via Yehova wa popia hati: “Vulombangi viange.”—Isaya 43:10.
16 Ove o sukila oku lipula ndoco: ‘Anga hẽ nda limbuka esilivilo liocipiñalo caco cespiritu? Esilivilo liaco li lekisiwa poku pitisa kovaso ocipango ca Suku. Anga hẽ nda siata oku ci linga? Ndi kasi hẽ oku pamisa ekolelo liange oco ndi tamalãle layonjo?’ Ocipiñalo cetu, ci tu ĩhavo ekolelo lioku limbuka okuti tua kolapo kuenda tu kasi vombembua kespiritu. Momo ekalo liaco li sangiwa lika vocisoko ca Yehova. (Osamo 91:1, 2) Oku sokolola ciwa ulandu wocisoko ca Yehova koloneke vilo, ci tu ĩha ekolelo liokuti, lomue o tẽla oku kundula omanu va Yehova palo posi.—Isaya 54:17; Yeremiya 1:19.
17. Anga hẽ tu sukila lika oku kolela kocipiñalo cetu cespiritu?
17 Etu ka tu sukila lika oku tiamisila utima kocipiñalo cetu cespiritu. Pole, vosi yetu tu sukila oku kuata ukamba wocili la Yehova. Upostolo Paulu noke lioku pamisa ekolelo Liakristão voko Filipoi, wa va sonehela hati: “A vakuacisola cange, ndeci ale wa pokowaili, okuti eci nda kaile lene hacoko lika, haico cilo, ndaño si kasi lene, kolisiko oku linga eci ci koka epopelo liene. Kolisiko muẽle laco lusumba loku luluma.” (Va Filipoi 2:12) Oco tu popeliwe keteke lia Yehova, tu sukila oku lekisa ekolelo lietu kokuaye.
18. Oku litumbika kovopange a Yehova ci tu kuatisa ndati oku molẽhisa ekalo lietu?
18 Likolisilako oku linga ovopange a Yehova. Omanu va siata oku popia hati, ‘ovilinga viomunu ovio vi situlula ekalo liaye.’ Akristão koloneke vilo, va kuete ocikele coku kundila omanu olondaka viwa Viusoma. Upostolo Paulu wa popia hati: “Omo ndupostolo wa vakualofeka ñemainya upange wange.” (Va Roma 11:13) Upange wetu woku kunda owo u tu tepisa loluali. Pole, ekalo lietu li lekisiwa lika poku linga upange waco. Tu sukilavo oku li tumbika kovopange akuavo a Yehova ndeci: oku endaenda kolohongele, kupange woku tunga olonjango Viusoma, kuenda oku kuatisa vakuetu. Momo poku ci linga, ci pamisa ekolelo lietu ku Yehova.—Va Galatia 6:9, 10; Va Heveru 10:23, 24.
Oku Molẽhisa Ekalo Lietu ci Nena Asumũlũho
19, 20. (a) Esumũlũho lie o kuete omo lioku kala Ukristão? (b) Etu Tuakristão nye ci tu vetiya oku molẽhĩsa ekalo lietu?
19 Sokolola ciwa esumũlũho tu kuete omo lioku kala Akristão. Etu tua kũlĩhĩwa ciwa la Yehova. Uprofeto Malakiya wa popia hati: “Ava va sumba Yehova va livangola pokati, Yehova wa va yevelela, kuenje co lomboloka. Oco kuo sonehĩwĩla elivulu lionjivaluko yava va sumba Yehova, haivo va sokolola onduko yaye.” (Malakiya 3:16) Yehova o tu tenda ndakamba vaye. (Tiago 2:23) Ka tu sakalala lovina violuali, momo tua tiamisila utima wetu kupange wa Yehova. Kuenda tu kuete elavoko liomuenyo ko pui.—Osamo 37:9.
20 Ivaluka okuti, Yehova eye lika wa kũlĩha esilivilo liomuenyo wove. Omo liaco, kuka yevelele ovina vĩvi omanu va popia viatiamẽla kokuove. Olonjanja vimue omanu va pondola lika oku tu pisa lolonumbi viavo. Pole, ocisola lohenda Yehova a tu kuetele, ci tu ĩha ekolelo liokuti tua tiamẽla muẽle kokuaye. (Mateo 10:29-31) Kuenje, ocisola cetu kokuaye ci tu kuatisavo oku molẽhĩsa ekalo lietu kuenda oku endisila omuenyo wetu volonumbi Viaye. Upostolo Paulu wa popia hati: ‘Nda umue o sole Suku, eye wa kũlĩhĩwa laye.’—1 Va Korindo 8:3.
[Etosi pombuelo yemẽla]
a Olondaka evi citava okuti, via kala oku tiamisiwila kocikele colomitavaso violondavululi vionembele yoko Yerusalãi kosimbu. Olomitavaso viaco vokuenda kuteke, va enda loku ñuala ñuala oku kũlĩhĩsa nda olondavululi via pekela ale vi kasi oku lavulula. Kotembo yaco va Lewi ovo va kala olondavululi viaco. Nda olomitavaso via sanga ondavululi yimue ya pekela, va enda oku yi tipula kuenda oku yoka uwalo waye oco yi kutisiwe osõi.
Ivaluka Eci Tua Lilongisa?
• Momo lie omanu va Suku va sukilila oku lava ekalo liavo?
• Etu Tuakristão tu pondola ndati oku pamisa ekalo lietu?
• Nye ci tu kuatisa oku nõla onjila ya sunguluka eci tu liyaka leyonjo lioku sanjuisa omanu?
• Etu Tuakristão oku mõlehisa ekalo lietu ci pamisa ndati elavoko lietu?
[Elitalatu kemẽla 21]
Tu molẽhĩsa ekalo lietu poku litumbika kupange wa Yehova