OCIPAMA 53
Nõla Olomapalo vi Sanjuisa Yehova
Yehova o “Suku ukuesanju.” (1 Timoteo 1:11) Eye o yongola okuti tu kala ciwa loku sanjukila omuenyo. Eye o sanjuka calua nda tu sanda otembo yoku puyuka. Vocipama cilo, tu kũlĩhĩsa ndomo tu talavaya ciwa lotembo yetu lonjila yi tu sanjuisa okuti, yi sanjuisavo Yehova.
1. Nye tu sukila oku ivaluka poku nõla olomapalo?
Nye o sole oku linga osimbu o puyuka? Vamue osimbu va puyuka va nõlapo oku kala pamue põha, oku tanga elivulu limue, oku yevelela ovisikilo, oku tala ofilme yimue, ale oku iñila vo Internet. Vakuavo va sole oku kala lakamba—oku pindisa etimba, oku liteva, ale oku imba ombunje. Olomapalo viosi tu linga, tu sukila oku kũlĩhĩsa nda “vi sanjuisa Ñala.” (Va Efeso 5:10) Ci kuete esilivilo oku kuata elomboloko liaco, momo olomapalo vimue, vi lekisa ovina Yehova a suvuka ndeci, ungangala, evĩho liukahonga, ale umbanda. (Tanga Olosamo 11:5.) Nye ci tu kuatisa oku nõla olomapalo via sunguluka?
Nda tu nõla akamba va sole Yehova, va pondola oku tu vetiya oku linga eci ciwa loku nõla olomapalo via sunguluka. Ndomo tua lilongisa vocipama ca pita, “omunu endaenda lukualondunge o lingavo ukualondunge.” Volondaka vikuavo, nda tu linga ukamba lomanu ka va sole olonumbi via Suku, tu “ka liyaka lovitangi.”—Olosapo 13:20.
2. Momo lie ci kuetele esilivilo oku lavulula otembo tu pesila kolomapalo?
Ndaño okuti omapalo tu nõla ya sunguluka, tu sukila oku lunguka oco ka tu ka pesile otembo yalua komapalo yaco. Momo nda ka tua lungukile, ka tu ka kuata otembo yoku linga ovopange a kuete esilivilo lia velapo. Embimbiliya li tu vetiya oku “talavaya ciwa lotembo [yetu].”—Tanga Va Efeso 5:15, 16.
LILONGISA ONDONGOSI
Lilongisa ndomo o nõla olonjila via sunguluka viatiamẽla kolomapalo viove.
3. Yuvula olomapalo ka via sungulukile
Momo lie tu sukilila oku nõla lutate olomapalo vietu? Tala OVIDEO, noke konomuisa apulilo a kuãimo.
Olomapalo vio ko Roma yosimbu, via li soka ndati lolomapalo vio koloneke vilo?
Ndomo ca lekisiwa vovideo, Danny wa lilongisa nye catiamẽla kolomapalo?
Tanga Va Roma 12:9, noke konomuisa epulilo li kuãimo:
Ocinimbu eci ci ku kuatisa ndati poku nõla olomapalo?
Vipi ovina vimue Yehova a suvuka? Tanga Olosapo 6:16, 17 kuenda Va Galatia 5:19-21. Noke lioku tanga ovisonehua evi, konomuisa epulilo li kuãimo:
Ovina vipi via tukuiwa vovinimbu evi okuti, via siata calua kolomapalo vio koloneke vilo?
Ndomo o nõla olomapalo viove lolondunge
Lipula ndoco:
Nye? Ca kongela volomapalo Yehova a suvuka?
Otembo yiñami? Yi pesiwa okuti ci tateka ovopange a velapo?
Helie? Ndi linga laye ukamba, anga lomanu vana va suvuka Yehova?
Ca velapo oku kala ocipãla lovina vi koka ohele. Eli olio esunga lieci tu sukilila oku kuata utate lolomapalo viosi tu limbuka okuti ka viwako kokuetu
4. Talavaya lotembo yove lolondunge
Tala OVIDEO, noke konomuisa epulilo li kuãimo.
Manji wa lekisiwa vovideo, ndaño ka kaile oku tala ovina via vĩha, pole, cipi ca kala ocitangi caye?
Tanga Va Filipoi 1:10, noke konomuisa epulilo li kuãimo:
Ocinimbu eci ci tu kuatisa ndati oku nõla otembo tu pesila kolomapalo?
5. Nõla olomapalo via sunguluka
Ndaño kuli olomapalo vimue ka vi sanjuisa Yehova, pole, kuli vialua viwa viu sanjuisa tu pondola oku linga. Tanga Ukundi 8:15 kuenda Va Filipoi 4:8, noke konomuisa epulilo li kuãimo:
Omapalo yipi ya sunguluka o sole?
Ove o pondola oku sanjukila ovitalukilo kuenda olomapalo via sunguluka
OMANU VAMUE VA POPIA VATI: “Hekanduko oku tala omapalo yimue yi lekisa ungangala, evĩho liukahonga, ale umbanda. Ca velapo ceci okuti, si lingi ovina viaco.”
Nda wa popia nye?
NYE WA LILONGISA?
Yehova o yongola okuti, tu nõla loku sanjukila olomapalo via sunguluka.
Oku Pitulula
Olomapalo vipi Akristão va sukila oku yuvula?
Momo lie tu sukilila oku lunguka lotembo tu pesila kolomapalo?
Momo lie o sukilila oku nõla omapalo yi sanjuisa Yehova?
OCO O KŨLĨHE OVINA VIKUAVO
Kũlĩhĩsa u o sukila oku nõla omapalo yove.
Tala ndomo o nõla olonjila via sunguluka viatiamẽla kolomapalo kuenda kovitalukilo.
“Anga hẽ Ovitalukilo Viove Via Sunguluka?” (Utala Wondavululi 15 wa Mbalavipembe 2011)
Vulandu “Nda Yula Ocituwa Cange Colonepele,” tala esunga lieci ulume umue a nõlelapo oku pongolola olomapalo viaye.
“Embimbiliya li Pongolola Omuenyo Womanu” (Utala Wondavululi Evambi Linene-Enyenye Linene 2010)
Tala ndomo ina umue a nõla onjila ya sunguluka yatiamẽla kolomapalo vi lekisa ovolandu ekalo lioluali.