Yaka Luloño

1. Ukanda Watete wa Va Korindo 9:26 u tiamisiwila ndati kupange woku kunda?

¹ Upostolo Paulu wa soneha hati: “Ame si yoloka loku tatãla, si yaki ndu o veta ño ofela.” (1 Va Kor. 9:26) Paulu wa kala oku tukula onjongole yaye kuenda oku tiamisila utima kovimãho viespiritu. Pole, olondaka evi vi tiamisiwilavo kupange woku kunda. Tu yongola oku ‘yaka’ ale oku likolisilako luloño oco uyaki waco u tẽlise ocimãho cayo. Ndamupi?

2. Tu setukula ndati upostolo Paulu kuenda akundi vakuavo vo kocita catete poku nola elivala locitumãlo tu kundila?

² Kuende Apa pa Sangiwa Omanu: Upostolo Paulu kuenda akundi vakuavo vo kocita catete, va kundalaile apa va lavokaile oku sanga omanu. (Ovil. 5:42; 16:13; 17:17) Nda onepa yalua yomanu vocikanjo cetu va sangiwa konjo koñolosi, eli olio epuluvi liwa lioku ka kundila konjo lanjo. Anga hẽ, povitumãlo vioku talamela oviendelo ndeci omboyo komẽle pamue koñolosi, pa sangiwa omanu va enda ale va tiuka kupange? Kelivala lipi volovenda viocikanjo cene mu sangiwa omanu valua? Oku eca uvangi vokololo vapuluvi aco ci pondola oku eca onima yiwa.

3. Tu yaka ndati luloño poku talavaya vocikanjo cetu?

³ Talavaya Luloño Vocikanjo: Tu sukilavo oku kuata utate poku yaka luloño eci tu talavaya vocikanjo cetu. Ndeci, nda ocimuga cimue cinene cakundi cenda vocikanjo pole cambata otembo yalua oku ci songuila oco vosi va talavaye, ciwa oku ci tepa vovimunga vitito. Cimuamue haico tu linga nda tu talavaya volosanjala, momo tu tokeka lonjanga ocikanjo kuenda ceca apuluvi alua oku vangula nda ocimunga caco citito. Anga hẽ tu pondola oku kuata ocikanjo cimue ci kasi ocipepi lonjo yetu okuti ka cambata ungende walua woku pitilako?

4. Nye ci tu kuatisa oku kala ‘anyanga awa omanu’?

⁴ Yesu wa sokisa akundi ‘lanyanga vomanu.’ (Mar. 1:17) Ocimãho canyanga olõsi, haku imbako lika owanda vovava, pole oku kuata olõsi. Oku litunda kuwa kuenyanga liolõsi oku loña pocitumãlo vi sangiwa kuenda elivala liwa lioku vi kuata okuti ka va talamẽla. Ovo va suñamisa alikolisilo avo luloño. Omo liaco, tu lekisi ombili yimuamue kupange woku kunda.—Va Hev. 6:11.