Vetiyiwa ‘Locali ca Piãla’ ca Suku

1, 2. (a) “Vocali ca piãla” ca Suku mua kongela nye? (b) Apulilo api tu konomuisa vocipama cilo?

YEHOVA wa lekisa ocali caye cocisola eci a tuma Yesu, Omõlaye o soliwe palo posi! (Yoano 3:16; 1 Yoano 4:9, 10) Upostolo Paulu wa tukula ocituwa caco okuti: “Ocali caye ca piãla.” (2 Va Korindo 9:15) Momo lie Paulu a tukuila ondaka yaco?

² Paulu wa kũlĩhile okuti ocilumba ca Yesu ocindekaise cokuti olohuminyo viosi via Suku vi ka tẽlisiwa ocili. (Tanga 2 Va Korindo 1:20.) Eci ci lomboloka okuti ‘vocali caye ca piãla’ mua kongela ocilumba ca Yesu, ovina viosi viwa kuenda ocisola cocili Yehova a siata oku lekisa kokuetu. Ocili okuti, ocali caco ci komohĩsa kuenda ka tu tẽla oku ci lombolola. Nye tu yeva vutima omo liocali caco ci likasi? Ocali caco, ci tu vetiya oku li pongiyila ndati, Kocipito Conjivaluko Colofa via Kristu yi ka lingiwa Votatu keteke 23 Yelombo yunyamo wo 2016?

OMBANJAILE YI LIKASI YA SUKU

3, 4. (a) Nye o yeva vutima eci o tambula ombanjaile yimue? (b) Ombanjaile yimue yi likasi yi pondola oku pongolola ndati omuenyo wove?

³ Eci tu tambula ombanjaile yimue tu kuata esanju. Pole, olombanjaile vimue vi kuete esilivilo liavelapo okuti, vi pondola oku pongolola ekalo liomuenyo wetu. Sokolola ndeci okuti wa kongeliwa vocitangi cimue cungangala. Ekangiso liaco olofa. Pole, vepuluvi liaco ku molẽha omunu umue kua kũlĩhĩle kuenje o lieca oco a kangisiwe eye. Eye o pondiwa omo liungangala waco! Nye o yeva vutima omo liombanjaile yaco yi likasi?

⁴ Ombanjaile yaco yocisola haiyo yi likasi, yi ku vetiya oku linga apongoloko komuenyo wove. Yi pondolavo oku ku vetiya oku kala ukuacali, oku lekisa ocisola komanu vakuavo, kuenda oku ecela omunu wosi oku lingila cimue cĩvi. Vokuenda kuomuenyo wove wosi, o ka lekisa okuti wa sanjukila ombanjaile yaco.

5. Momo lie ocali ca Suku coku eca ocisembi ca velelapo olombanjaile vikuavo?

⁵ Ocali ca Suku coku eca ocisembi oco ca velapo okuti ombanjaile ya tukuiwa ale yi sule. (1 Petulu 3:18) Sokolola ndoco: Vosi yetu tua piñala ekandu ku Adama, kuenda onima yekandu olofa. (Va Roma 5:12) Ocisola ca vetiya Yehova oku tuma Yesu palo posi oco a file omanu vosi okuti “o mahẽla omanu vosi oku fa.” (Va Heveru 2:9) Pole, ocisembi ca Yesu ci ka linga ovina vialua! Momo ci ka malako olofa otembo ka yi pui. (Isaya 25:7, 8; 1 Va Korindo 15:22, 26) Omunu wosi o lekisa ekolelo ku Yesu, o ka kala lombembua otembo ka yi pui, ci kale okuti o kuete elavoko lioku viala la Yesu kilu ale lioku kala palo posi vemehi Liusoma wa Suku. (Va Roma 6:23; Esituluilo 5:9, 10) Asumũlũho api akuavo a kongeliwa kocali ca Yehova?

6. (a) Asumũlũho api atiamẽla kocali ca Yehova o lavoka? (b) Tukula ovina vitatu tu vetiya oku linga omo liocali ca Suku.

⁶ Omo liocali ca Suku, ongongo yi ka pongoluiwa oluali luokaliye, kuenje olombei vi ka sakuiwa kuenda omanu va fa va ka pinduiwa. (Isaya 33:24; 35:5, 6; Yoano 5:28, 29) Tu kuetele ocisola Yehova kumue Lomõlaye omo ‘liocali caye capiãla.’ Ocali caco ci tu vetiya oku linga nye? Oco ci tu vetiya (1) oku setukula ongangu ya Yesu Kristu, (2) oku lekisa ocisola ku vamanjetu, kuenda (3) oku ecela vakuetu lutima wosi.

“OCISOLA CA KRISTU CI TU VETIYA”

7, 8. Nye tu yeva vutima omo liocisola ca Kristu, kuenda ci tu vetiya oku linga nye?

⁷ Catete, tu vetiyiwa oku sumbila Yesu komuenyo wetu. Upostolo Paulu wa popia hati: “Ocisola ca Kristu ci tu vetiya.” (Tanga 2 Va Korindo 5:14, 15.) Paulu wa kũlĩhĩle okuti nda tua tava kocisola capiãla ca Yesu, ci ka tu vetiya oku sola kuenda oku sumbila Yesu. Poku kuata elomboloko liasuapo lieci Yehova a siata oku tu lingila, ocisola caye ci ka tu vetiya oku ambata omuenyo umue u sanjuisa Yesu. Tu ci linga ndati?

⁸ Ocisola tu kuetele Yehova ci tu vetiya oku setukula ongangu ya Yesu okuti tu kuama volomãhi viaye. (1 Petulu 2:21; 1 Yoano 2:6) Eci tu pokola ku Suku kuenda ku Kristu, tu lekisa ocisola cetu kokuavo. Yesu wa popia hati: “Wosi o kuete ovihandeleko viange kuenje o vi pokola, eye o ndi sole. Wosi o ndi sole, o soliwa la Isiange kuenda ame ndu sola kuenje ndi limolẽhisa kokuaye.”—Yoano 14:21; 1 Yoano 5:3.

9. Ayonjo api tua siata oku liyaka lao?

⁹ Vokuenda kuotembo Yocipito Conjivaluko, ci kuete esilivilo oku sokolola lutate ndomo ekalo liomuenyo wetu u kasi. Omo liaco, li pula ndoco: ‘Volonepa vipi viomuenyo wange ndi kuama ongangu ya Yesu? Volonepa vipi ndi sukila oku mioñolola?’ Ci kuete esilivilo oku linga apulilo aco momo oluali lu yongola okuti tu setukula ovituwa vialio. (Va Roma 12:2) Nda ka tua lavuluile tu vetiyiwa oku setukula alongisi oluali, omanu vana va kemãla, kuenda vana va yula kolomapalo. (Va Kolosai 2:8; 1 Yoano 2:15-17) Tu tamalãla ndati kayonjo aco?

10. Apulilo api tu sukila oku linga etu muẽle vokuenda kuotembo Yocipito Conjivaluko? Kuenda atambululo aco a tu vetiya oku linga nye? (Tala elitalatu kefetikilo liocipama cilo.)

¹⁰ Vokuenda kuotembo Yocipito Conjivaluko ci kuete esilivilo oku konomuisa uwalo wetu, olofilme tu tala, ovisikilo tu yeva, ale ovina vi sangiwa vokombutador kuenda votelefone yetu. Lipula ndoco: ‘Nda Yesu wa kale kulo kuenda wa muile uwalo wange, anga hẽ nda co sanjuisa?’ (Tanga 1 Timoteo 2:9, 10.) ‘Anga hẽ, uwalo wange u lekisa okuti ndi ndonge ya Kristu? Yesu nda wa sanjukila hẽ olofilme ndi tala? Nda wa sanjukila hẽ ovisikilo nda siata oku yeva? Nda Yesu wa muĩle ovina vi sangiwa votelefone yange ale vokombutador nda wa ci sanjukila? Nda ca leluka hẽ oku lomboluila Yesu esunga lieci ndi solele olomapalo viovideo game?’ Ocisola tu kuetele Yehova ci tu vetiya oku yuvula ovina viosi okuti ka via sungulukile Kakristão vocili, ndaño via landiwa lolombongo vialua. (Ovilinga 19:19, 20) Eci tua tumbika omuenyo wetu ku Yehova, tua likuminya oku ambata omuenyo u sanjuisa Kristu. Ka ci tava okuti tu seleka ovina vimue vi pondola oku tu tateka oku setukula ongangu ya Yesu.—Mateo 5:29, 30; Va Filipoi 4:8.

11. (a) Ocisola tu kuetele Yehova kuenda Yesu ci tu vetiya oku linga nye kupange woku kunda? (b) Ocisola cetu ci tu vetiya oku kuatisa ndati vamanji vekongelo?

¹¹ Ocisola tu kuetele Yesu ci tu vetiya oku kuata ombili kupange woku kunda kuenda koku longisa omanu. (Mateo 28:19, 20; Luka 4:43) Vokuenda kuotembo Yocipito Conjivaluko, o pondola hẽ oku linga eliangiliyo lioku li tumbika kupange wakundi va sokamo poku pesila 30 ale 50 kolowola kupange woku kunda? Manji umue ulume ocimbumba haiye okuete eci ci soka 84 kanyamo, wa kuatele ovisimĩlo viokuti omo lioku vela kuenda oku kuka ka pondola oku li tumbika kupange wakundi wa sokamo. Pole, akundi votembo yosi vekongelo a kasi vo kuatisa. Kuenje va linga eliangiliyo liocendelo kuenda va nõla ocikanjo kuna a sukilile oku kundila. Omo liaco, manji wa tẽlisa ocimãho caye coku talavaya 30 kolowola kupange woku kunda. Anga hẽ, o pondolavo oku kuatisa manji umue vekongelo o kasi oco a li tumbike kupange wakundi vasokamo kosãi Yelombo ale ya Kupupu? Ocili okuti havosiko va pondola oku li tumbika kupange wakundi vasokamo, pole, tu pondola oku talavaya lotembo yetu kuenda ongusu yetu poku vokiya upange tu lingila Yehova. Nda tua ci linga, tu ka lekisa okuti tu kasi oku vetiyiwa locisola ca Kristu, ndomo Paulu a ci popia. Ocina cipi cikuavo tu vetiyiwa oku linga omo liocisola tu kuetele Suku?

TU VETIYIWA OKU LISOLA POKATI

12. Ocisola Suku a tu kuetele ci tu vetiya oku linga nye?

¹² Cavali, ocisola tu kuetele Suku ci tu vetiya oku sola vamanjetu. Upostolo Yoano wa soneha ndoco: “A vamanji wa soliwi, nda Suku o tu sole ndoco, tu sesamẽlavo oku li sola pokati.” (1 Yoano 4:7-11) Omo liaco, nda tua tava ocisola ca Suku, tu sukila oku sola vamanjetu. (1 Yoano 3:16) Tu lekisa ndati ocisola kokuavo?

13. Ongangu yipi Yesu a tu sila yoku sola omanu?

¹³ Ongangu ya Yesu yi lekisa ndomo tu pondola oku sola omanu. Eci a kala palo posi, wa kuatisa omanu capiãla enene vana va sukilile ekuatiso. Eye wa sakula vana va kala oku vela, ovilema, olomeke, ovisitatũi kuenda ovitende. (Mateo 11:4, 5) Omo okuti Yesu wa li tepele lasongui vatavo, wa sanjukilile oku longisa omanu vana va yonguile oku kũlĩha ovina viatiamẽla ku Suku. (Yoano 7:49) Eye wa solele omanu vaco kuenda wa lekisa ombili poku va kuatisa.—Mateo 20:28.

14. Nye o pondola oku linga oco o lekise ocisola ku vamanji?

¹⁴ Otembo Yocipito Conjivaluko epuluvi limue liwa lioku sokolola ndomo tu pondola oku kuatisa vamanji vekongelo capiãla enene vana va kuka. O pondola hẽ oku nyula vamanji vaco? Anga hẽ o pondola oku va lingila ovina vimue ndeci: Oku va telekelako, oku va kuatisa kovopange amue o konjo, oku va ambata vocendelo cove poku enda kolohongele ale oku va laleka oco o talavaye lavo kupange woku kunda? (Tanga Luka 14: 12-14.) Ecelela okuti ocisola Suku a tu kuetele ci ku vetiya oku sola vamanji!

LEKISA OHENDA KU VAMANJI

15. Nye tu sukila oku limbuka?

¹⁵ Catatu, ocisola Yehova a tu kuetele ci tu vetiya oku ecela vamanji. Omo okuti vosi yetu tua piñala ekandu kuenda olofa ku Adama, lomue pokati ketu o pondola oku popia hati: “Si sukila ocisembi.” Ndaño ufendeli umue wa Suku ukuekolelo liapiãla, o sukilavo ombanjaile yocisembi. Omunu lomunu pokati ketu wa eceliwa omo liofuka yinene! Momo lie ci kuetele esilivilo oku kũlĩha ovina viaco? Etambululo liaco li sangiwa volusapo lumue lua Yesu.

16, 17. (a) Nye tu lilongisa kolusapo lua Yesu luatiamẽla kosoma kuenda apika? (b) Noke lioku sokolola lutate kolusapo lua Yesu, nye wa nõlapo oku linga?

¹⁶ Yesu wa ta olusapo lumue luatiamẽla kosoma yimue ya ecela upika wo levalele ci soka 60.000.000 violokondu. Pole, noke upika waco ka tavele oku ecela upika ukuavo wo levalele lika ci soka 100 colokondu. Ohenda soma o kuatela nda yo vetiya oku ecela upika ukuavo. Soma wa temẽle calua eci a yeva okuti upika waye ka tavele oku ecela upika una wo kuatelele lika ofuka yitito. Eye wo sapuila hati: “Wukuenje umue ũvi, nda ecela olofuka viove viosi eci wa livondelele kokuange. Ku pondola hẽ oku kuatelavo ohenda upika lukuẽle ndeci nda ku kuatelavo ohenda?” (Mateo 18:23-35) Ndeci Soma a linga, Yehova wa siatavo oku ecela ofuka yetu yinene. Ocisola Yehova a tu kuetele kuenda ohenda yaye, ci tu vetiya oku linga nye?

¹⁷ Osimbu tu lipongiyila Ocipito Conjivaluko, tu sukila oku lipula ndoco: ‘Anga hẽ, manji umue wa ndi sumuisa? Ca leluka hẽ oku u ecela?’ Ci ka kalavo epuluvi liwa lioku setukula Yehova okuti ‘ukuakuecela.’ (Nehemiya 9:17; Osamo 86:5) Nda tua sanjukila ohenda ya Yehova, tu ka lekisa ohenda ku vakuetu kuenda oku va ecela lutima wosi. Nda ka tu lekisa ocisola ku vamanji kuenda oku va ecela, ka tu pondolavo oku lavoka okuti Yehova o tu ecela. (Mateo 6:14, 15) Ndaño okuti eci tu ecela vakuetu ka tu ivala ovina va tu lingila, pole, ci ka tu kuatisa oku kuata esanju kovaso yoloneke.

18. Ocisola Suku a tu kuetele ca kuatisa ndati manji umue ukãi oku yuvula oku kapako akulueya a manji ukuavo?

¹⁸ Omo okuti ka tua lipuile, ka ca lelukile oku liyaka lakulueya a vamanji. (Tanga Va Efeso 4:32; Va Kolosai 3:13, 14.) Manji umue ukãi o tukuiwa hati, Lily, wa liyaka locitangi caco.^[1] (Tala etosi kesulilo liocipama cilo.) Eye wa kuatisa manji umue ocimbumba o tukuiwa hati, Carol. Manji Lily wa enda oku kuatisa manji Carol poku enda enda laye kovitumãlo viosi a sukilile, oku landa ovina a sukilile, kuenda koku linga ovina vikuavo. Ndaño okuti manji Lily wa likolisilako oku u kuatisa, manji Carol wa enda oku u popia lãvi kuenda ka ca lelukile ku manji Lily oku eca ekuatiso kokuaye. Pole, manji Lily wa tiamisila utima waye kovituwa viwa via manji Carol, kuenje wo kuatisa vokuenda kuanyamo amue toke eci manji Carol a vela calua kuenje wa fa. Ndaño okuti ku manji Lily ka ca lelukile oku kuatisa manji Carol, eye wa popia hati: “Ndi lavoka oku mola vali manji Carol eci a ka pinduiwa. Ndi yongola oku u kũlĩha eci eye a ka lipua.” Ocili okuti, ocisola Suku a tu kuetele ci tu vetiya oku yuvula oku kapako akulueya a vamanji, kuenda tu vetiyiwa oku sokolola otembo eci omanu vosi va ka lipua.

19. “Ocali capiãla ca Suku” ci ku vetiya oku linga nye?

¹⁹ Yehova wa siata oku lekisa kokuetu ‘ocali caye ca piãla.’ Omo liaco, tu sanjukili ombanjaile yaco! Otembo Yocipito Conjivaluko, epuluvi limue li tu kuatisa oku sokolola lutate kovina viosi Yehova la Yesu va siata oku tu lingila. Tu eceleli okuti ocisola ovo va tu kuetele, ci tu vetiya oku setukula ongangu ya Yesu kuenda oku lekisa ocisola ku vamanji loku va ecela lutima wosi.