Olongavelo Kalume’ Oco Vatate Ocunda ca Yehova

‘Poku londa wa ambata owiñi wolohute, kuenje wa eca olongavelo kalume.’−VA EFESO 4:8.

1. Olondaka vipi umue manji ukãi Ukristão apopia viatiamẽla kakulu vokekongelo liaye?

“NDAPANDULA calua omo liutate wene kokuetu. Esanju liene, ukamba wene, kuenda esakalalo liene, viosi yavio viocili. Olonjanja viosi ukasi okutuyevisa kuenda o ku tulomboluila olondaka Viembimbiliya vina vikavuluisa kespiritu. Ndi li kutilila okuti lalimue eteke ñuata ovisimilo viokuti kaukueti esilivilo.” Oco manji umue ukãi Ukristão asonehela akulu vo kekongelo liaye. Ocili okuti, ocisola kuenda utate walekisiwa langombo Akristão wavetiya utima waye.−1 Petulu 5:2, 3.

2, 3. (a) Ndomo casonehiwa ko Isaya 32:1, 2, akulu vekongelo vakuahenda vasukila okutata ndati olomeme via Yehova? (b) Ukulu wekongelo osokisiwa ndati ndongavelo?

² Akulu vekongelo, vangiliyiwa la Yehova oco vatate olomeme viaye. (Luka 12:32; Yoano 10:16) Olomeme via Yehova visoliwe calua laye−visoliwe calua muẽle, uvangi waco, wowu okuti wa vilanda losonde yikuete esilivilo lialua ya Yesu. Omo liaco, kacikomõhisa, okuti, Yehova osanjuka eci akulu vekongelo vatata ocunda caye locisola. (Ovilinga 20:28, 29) Tala olondaka viasonehiwa kocitumasuku catiamẽla kakulu vaco ava vakakala ‘olombiali’ viti: “Va soka ndocivundilo coku tila ofela pamue ndocipundo coku tila ombela. Va soka ndolondui viovava vekango, pamue ndulembo wewe linene vofeka yekavo.” (Isaya 32:1, 2) Ocili, ovo vateyuila, vakolisa, kuenda valembeleka olomeme viaye. Akulu vekongelo okuti vatata lohenda yalua ocunda vakasi okulikolisilako okulinga eci Suku akevelela kokuavo.

³ Akulu vaco vekongelo Vembimbiliya vatukuiwa okuti ‘olongavelo kalume.’ (Va Efeso 4:8) Eci ove osokolola ongavelo, osokolola okuti ocina cimue ceciwa oco cikukuatise kekambo limue ale oco cisanjuise omunu otambula ongavelo yaco. Ukulu wekongelo citava okuti osokisiwa ndongavelo eci eye atiamisila ovoloño aye kokueca ekuatiso lisukiliwa ale kokukuataisa ocunda oco cikuate esanju. Eye opondola okucilinga ndati? Etambululo, lisangiwa kolondaka via Paulu visangiwa ko Va Efeso 4:7–16, visivaya ocisola Yehova akuetele olomeme viaye.

‘Olongavelo Kalume’−Pi?

4. Lokutẽlisa Osamo 68:18, vonepa yipi Yehova ‘a lamana omunda yisovi,’ kuenda velie vakala ‘olongavelo kalume’?

⁴ Eci Paulu atukula olondaka viti ‘olongavelo kalume,’ eye watukula olondaka via Soma Daviti, viatiamisiwa ku Yehova hati: “Wa lamana omunda yisovi, wa ambata olomandekua. Wa tambula [olongavelo kalume, NW].” (Osamo 68:18) Noke yokukala kuava Isareli Vofeka Yohuminyo anyamo amue ño, Yehova wakala ndu okuti ‘wa lamana’ Komunda Siono kuenda walinga o Yerusalãi ombala yofeka ya va Isareli kuenje Daviti eye wakala soma yaco. Pole velie hẽ vakala ‘olongavelo kalume’? Vakala alume vakuatiwile kumandekua vokuenda kuyaki wasulila vokutambula ofeka. Vimue olomandekua viaco noke viakuatele esilivilo liocili ku va Lewi lo ku vakuatisa kupange wo vo tavernakulu.−Esera 8:20.

5. (a) Paulu walekisa ndati okuti Osamo 68:18, yitelisiwa vekongelo Liakristão? (b) Vonepa yipi Yesu ‘a lamana omunda yisovi’?

⁵ Vukanda Paulu asonehela va Éfeso, eye walekisa okuti olondaka viukualosamo vitẽlisiwa enene vekongelo lia Kristão. Pokulombolola Osamo 68:18, Paulu wasoneha hati: ‘Puãi ocali ca eciwa kokuetu omunu omunu ndoseteko yocali ca Kristu. Oco ca popiwila citi, Poku londa wa ambata owiñi wolohute, kuenje wa eca olongavelo kalume.’ (Va Efeso 4:7, 8) Paulu palo otiamisa osamo eyi ku Yesu omo okuti eye onumiwa ya Suku. Yesu wa “yula oluali” lovilinga viaye viekolelo. (Yoano 16:33) Eye wayulavo okufa kuenda Satana omo okuti Suku wopindula kolofa. (Ovilinga 2:24; Va Heveru 2:14) Kunyamo 33 K.K., Yesu wapinduiwa walonda “kilu liovailu osi”−pomangu yavelapo okuti ovilulikilo viosi viokilu cisule. (Va Efeso 4:9, 10; Va Filipoi 2:9–11) Omo okuti eye onjuli, Yesu watambula “owiñi wolohute” povaka vunyali. Calingiwa hẽ ndati?

6. Kopendekoste okupisa kunyamo wo 33 K.K. eci Yesu alonda kilu, wapunda ndati onjo ya Satana, kuenda nye eye alinga “[l]owiñi wolohute”?

⁶ Eci akala palo posi, Yesu walekisa okuti unene waye wavelapo Satana pokuyovola vana vasangiwile vupika wolondele. Eci cakala kutiño Yesu walundula onjo ya Satana, okutateka, kuenda wotambula ovina viaye. (Mateo 12:22–29) Wasima ale cilo, okuti wapinduiwa kuenda watambula “uviali wosi wokilu lowu wokilu lieve,” hokupundakuoko Yesu apondola okulinga! (Mateo 28:18) Okupisa ko Pendekoste 33 K.K. onumiwa ya Suku, Yesu pokulonda kilu, wafetika okutambula ovina viovonjo ya Satana ‘pokuambata owiñi wolohute.’−omanu vana okuti tunde kosiahulu vakala kupika wekandu kuenda wolofa vemehi liusongui wa Satana. “owiñi” owu “wolohute” lonjongole yavo muẽle vatava okukala “akuenje va Kristu, loku linga ocipango ca Suku lutima wosi.” (Va Efeso 6:6) Eci cilomboloka okuti, Yesu, wa va yovola povaka a Satana kuenje wavatiula kohenda ya Yehova, kuenda wa vaeca kekongelo oco valinge ‘olngavelo kalume.’ Sokolola onyeño Satana akuete omo liupolokoso vo usia lawo eci vopunda omanu vakala vemehi liuviali waye wombuanja!

7. (a) Kovikele vipi ‘olongavelo kalume’ vitalavaya vekongelo? (b) Epuluvi lipi Yehova aeca kulume lulume walinga ukulu wekongelo?

⁷ Etaili hẽ tupondola okusanga ‘olongavelo viaco evi kalume’ vekongelo? Oco muẽle tuvisanga! Tuvisanga okuti vikasi okutalavaya kupange wakulu vekongelo, vatalavayo cocili okuti ‘vamue akundi vondaka yiwa, vamue angombo, vamue alongisi’ vakongelo omanu va Suku apitahãla 87.000 valuali luosi. (Va Efeso 4:11) Ocina cavelapo vali Satana ayongola kokuavo oku vamõla okuti vatata lãvi ocunda. Puãi Suku kavaecelele vekongelo pokati ka Kristu locipango caco oco. Pole, Yehova wapongiya alume ava oco ekongelo likuate ekalo liwa, kuenje ovo vakapulisiwa laye ndomo vatata olomeme viaye eye a vakundika. (Va Heveru 13:17) Nda ove ukulu wekongelo, Yehova wa kuiha epuluvi limue liwa liokulekisa uvangi wokuti walinga ongavelo, ale esumuluho, kuvamanjove. Opondola okukala ndoco lokutẽlisa ovikele vikuãla viavelapo.

Nda Kusukiliwa “Oku Kolisa”

8. Kolonepa vipi vosi yetu tusukila okukolisiwa olonjanja viosi?

⁸ Catete, Paulu wapopia hati: ‘Olongavelo kalume’ viangiliyiwila “oku kolisa olosandu.” (Va Efeso 4:12) Ondaka yo Helasi kuopiwa ondaka “oku kolisa” yilomboloka okukapaka ocina cimue “vokati kesuñamiso liasunguluka.” Omo okuti katualipuile vosi yetu tusukila okukolisilwa olonjanja vimue−oco tutiamisile ovisimilo vietu, ovituwa vietu, kuenda ovilinga vietu “vokati kesuñamiso liasunguluka” lialisoka lovisimilo kuenda lonjongole ya Suku. Yehova locisola calua wangiliya ‘olongavelo kalume’ oco vitukuatisa kovina tusukila okukolisiwa. Ovo vacilinga hẽ ndati?

9. Ukulu wekongelo opondola okukuatisa ndati omeme yimue yalueya?

⁹ Pamue, umue ukulu wekongelo okovengiwa oco akuatise omeme yimue yalueya, okuti ‘eci yalueya kayacikulihile okuti ekandu.’ Ukulu wakongelo opondola okueca ndati ekuatiso? Osukila ‘oku tiula [omeme yaco] lutima womboka,’ oco cilombolola Va Galatia 6:1. Mekonda liaco eci ukulu wekongela alemẽla u walueya, kacitava okuti u kelohãla, lokupopia olondaka vivi. Elungulo te okuti livetiya, ‘hokuyokokisako,’ omunu okasi okulitambula. (2 Va Korindo 10:9; cisokisa la Yovi 33:7.) Omunu waco pamue okuete ale osõi, omo liaco ungombo ukuacisola oyuvula okusumuisa vali omunu waco. Ndaño muẽle ceci okuti okulemẽla kuatiamẽla kokupisa, te okuti kuvetiya kuenda kulingiwa locisola, kuendavo te kulingiwila okuti omunu walueya opandiyiwa vali kolondunge kuenda kovilinga viwa, oco akuate vali esanju.−2 Timoteo 4:2.

10. Okukolisa vakuetu kukongela nye?

¹⁰ Pokueca ‘olongavelo kalume’ oco tukolisiwe, ovisimilo via Yehova vievi okuti, akulu vaco vekongelo vakala vakuakukavuluisa kespiritu kuenda valekisa ovituwa viwa okuti omanu vaye vopako ongangu. (1 Va Korindo 16:17, 18; Va Filipoi 3:17) Okukolisa vamanji hokulemẽlako lika vana valueya, puãi kukongelavo okukuatisa vakuekolelo oco vakuamẽlele vonjila yasunguluka.a Etaili, lovitangi vialua vikokisa esumuo, valua vasukila okuvetiyiwa oco vakolisiwe. Vamue pamue vasukila ekuatiso liokusuñamisa ovisimilo viavo viatiamẽla ku Suku. Ndeci, vamue Akristão valiyaka lesumuo lialua omo valisokisa okuti kavakuete esilivilo lalimue. Omanu vaco “ava valeñela” pamue vasima okuti lalimue eteke Yehova akakuata ocisola lavo kuenje ndaño muẽle elikolisilo liavo liosi liokuvumba Suku lalimue eteke likataviwa laye. (1 Va Tesalonike 5:14) Pole ovisimilo evi kavialisokele lovisimilo viocili Suku akuetele afendeli vaye.

11. Nye akulu vekongelo vapondola okulinga oco vakuatise vana valiyaka lesumuo lialua, omo valisokisa okuti kavakuete esilivilo lalimue?

¹¹ Akulu vekongelo nye upondoli okulinga oco ukuatisi omanu vaco? Lutate walua valekisi uvangi Wovisonehua wokuti Yehova wakapako omunu lomunu pokati kafendeli vaye kuenda valekisi okuti ovipama evi vio Vembimbiliya viatiamẽla kokuavo omunu lomunu. (Luka 12:6,7, 24) Vakuatisi okulimbuka okuti Yehova eye ‘wavakoka’ oco vofendele, eye ovalete okuti vakuete esilivilo. (Yoano 6:44) Valekisi okuti ovo kavakasi likaliavo−valua afendeli vocili va Yehova vasiata okukuatavo ovisimilo ndevi. Uprofeto Eliya layevo wakalavo lesumuo lialua okuti wayonguile okufa. (1 Olosoma 19:1–4) Vamue Akristão olombuavekua vakala vekalo liokuti ovitima viavo ‘via va veta evelo.’ (1 Yoano 3:20) Citulembeleka okukuliha okuti vakuekolelo kotembo eci Embimbiliya liakala lokusonehiwa vakalavo ‘vakuavituwa ndevi vietu.’ (Tiago 5:17) Ove citava okuti opitululavo ovipama vio vu Utula Wondavululi kuenda vio vo Despertai! viatiamẽla kovitima viateka. Elikolisilo liove liocisola liokukolisa ekolelo komanu vaco kalikaivaliwa la Suku waecelela okuti ove okala ‘ongavelo kalume.’−Va Heveru 6:10

“Okutunga” Ocunda

12. Olondaka “oku tunga etimba lia Kristu,” vilekisa nye, kuenda yipi osapi yokutunga ocunda?

¹² Cavali, ‘olongavelo kalume’ viaeciwila oku “tunga etimba lia Kristu.” (Va Efeso 4:12) Paulu palo wapopia ondaka yimue yokusetãhasa. “Okutunga” kutuivaluisa okutunga onjo, kuenje “etimba lia Kristu” cilomboloka omanu−ovimatamata viekongelo lia Akristão olombuavekua. (1 Va Korindo 12:27; Va Efeso 5:23, 29, 30) Akulu vekongelo vasukila okukuatisa vamanjavo okupamisiwa kespiritu. Upange wavo ‘okutunga hakunyõlako’ ocunda. (2 Korindo 10:8) Osapi yokutunga ocunda ocisola, “ocisola ci tunga, NW”−1 Va Korindo 8:1.

13. Nye cilomboloka okukala ukuahenda, kuenda momo lie cisilivilila okuti akulu vekongelo valekisa ohenda?

¹³ Onepa yimue yocisola okuti yikuatisa akulu vekongelo okutunga ocunda, okukala vakuahenda. Okukala ukuahenda cilomboloka okulikapa pomangu yavakuene−okukala lovisimilo viavo, levalo liavo kumue lokukapako apa papitila epondolo liavo. (1 Petulu 3:8) Momo lie cikuetele esilivilo kakulu vekongelo okukuata ohenda? Esunga liavelapo lieli okuti Yehova−waeca ‘olongavelo kalume’−eye Suku yohenda. Eci afendeli vaye vakasi lohali ale lolongembia, cusakalasa. (Etundilo 3:7; Isaya 63:9) Eye wakapako apa epondolo liavo lipitila. (Osamo 103:14) Akulu vekongelo, vapondola hẽ okulekisa ndati ohenda?

14. Kolonepa vipi akulu vekongelo vasukila okulekisa ohenda kuvakuavo?

¹⁴ Eci umue asukila ekoliso eya kokuavo, ovo voyevelela lokukulihisa lutate eci akuete kutima. Ovo valikolisilako okukuata elomboloko liocitangi caye, kuenda ovina viosi viakongeliwa kekalo liavamanjavo. Noke eci akulu vekongelo vaeca ekuatiso liovisonehua vikola, olomeme vikamõla okuti caleluka okutava momo ekuatiso liaco lieciwa lovangombo vakuete elomboloko liocili lavo kuenda vatatiwa ciwa lavo. (Olosapo 16:23) Okukuata ohenda cikokisavo kakulu vekongelo okukapako apa epondolo liavakuavo lipitila, kuendavo eci vakuete kutima, pamue omo liovilinga viavo. Ndeci, vamue Akristão vakualondunge valikapa ekandu omo kavakuete epondolo liokulinga calua kokuvumba Suku, pamue momo lioku kuka kuavo ale ka vakuete uhayele uwa. Konepa yimue yikuavo, vamue pamue vasukila okuvavetiya oco vamameko kupange wavo wokukunda. (Va Heveru 5:12; 6:1) Ohenda yivetiya akulu vekongelo okusandiliya “olondaka via sunguluka” vina okuti vikolisa vakuavo. (Ukundi 12:10) Eci olomeme via Yehova vikolisiwa kuenda vivetiyiwa, ocisola cavo ku Suku ci ka va vetiya okulinga longusu yavo yosi cosi vapondola poku u vumba!

Alume Vavetiya Okulikuata Omunga

15. Olondaka “kongongela yekolelo” vilomboloka nye?

¹⁵ Catatu, ‘olongavelo kalume’ vaeciwila oco okuti “etu vosi tu pitila kongongela yekolelo, leyi yoku kuliha Mõla a Suku.” (Va Efeso 4:13) Olondaka “Kongongela yekolelo” vilomboloka okulikuata omunga, okuti hokutavako ño lika puãi okukalavo ukuetavo. Eli, olio, esunga limue likuavo Suku atuihila ‘olongavelo kalume−oco vavetiye okulikuata omunga pokati komanu vaye. Vapondola okucilinga hẽ ndati?

16. Momo lie cikuetele esilivilo kakulu vekongelo okulikuata omunga pokati kavo?

¹⁶ Lokulinga okuti, ovo muẽle pokati kavo pakala okulikuata omunga. Nda pokati kangombo pali olonepele, olomeme kavitatiwa ciwa. Otembo yina okuti nda yikapiwa kokutata ocunda citava yipesiwila ño kolonjango violombangulo vimue kavikuete esilivilo kuenda viokulikuatela olonamãlala okuti vitumãla otembo yalua. (1 Timoteo 2:8) Akulu vekongelo citava okuti kavatava lonjanga yalua kolondaka viosi vasokiya, momo alume kuenje pamue vakuete ovisimilo vialua vialitepa. Okulikuata omunga kacilomboloka okuti ovisimilo vimue viñi viavo vipitiwa kilu ale eci vavilombolola vonepa yimue yasunguluka vokuenda kuombangulo yimue vikapiwa konele. Akulu vekongelo vamisako okulikuata omunga nda pokuvangula valiyevelela pokati lesumbilo okuti lomue otatekiwa. Kuenje nda okuti lacimue ocihandeleko Cembimbiliya cikasi okulueyiwa, omunu lomunu pokati kavo te walekisa onjongole yokutava kuenda yokukuatisa kondaka yasulako yanõliwapo lakulu vosi vekongelo. Ocituwa cokulitava pokati cilekisa okuti ovo vakasi okusonguiwa ‘lolondunge viokilu’ okuti “viombembua, haivio vionjuka.”−Tiago 3:17, 18.

17. Akulu vekongelo vapondola okukuatisa ndati ekongelo oco okulikuata omunga kukuamẽlele?

¹⁷ Akulu vekongelo vakapakovo okuvetiya okulikuata omunga vekongelo. Eci kumõleha ocituwa colonepele−ndeci olombonde, okulikuatela ovisimilo vivi ale ocituwa cokuliyuelisa okuti vinyõla ombembua, ovo lonjanga yalua vaeca elungulo lisukiliwa. (Va Filipoi 2:2, 3) Ndeci, akulu vekongelo pamue vakuliha omanu vamue okuti vasiata calua okupopia lãvi vakuavo ale vana vatiamẽla kokulikapa volombangulo viavakuavo, omanu vaco noke valinga vakuasiata. (1 Timoteo 5:13; 1 Petulu 4:15) Akulu vekongelo valikolisilako okukuatisa omanu vaco oco valimbuke okuti ovituwa viaco evi kaviasungulukile okuvisokisa levi Suku asiata okutulongisa kuenda okuvalekisa okuti omunu lomunu te ‘wambata ocikele caye muẽle.’ (Va Galatia 6:5, 7; 1 Va Tesalonike 4:9–12) Lokukuama ovisonehua, ovo valombolola okuti Yehova ecelele okuti ovina vialua vinõliwa lolondunge vietu, omo liaco lomue pokati ketu okuete omoko yoku sombisa ukuavo kondaka eyi. (Mateo 7:1, 2; Tiago 4:10–12) Okufendela kumuamue loku likuata omunga, kunena ekalo limue lioku likolela kuenda lioku likuatela esumbilo vekongelo. Omo liokueca elungulo liatiamẽla Vovisonehua nda cisukiliwa, ‘olongavelo kalume’ vitukuatisa oco ombembua yetu kuenda okulikuata kuetu omunga kutuihinye.−Va Roma 14:19.

Okuteyuila Ocunda

18, 19. (a) ‘Olongavelo kalume’ vituteyuila ku velie? (b) Kovina vipi vikuavo vikoka ohele okuti olomeme visukila okuviteyuila, kuenda akulu vekongelo valinga nye oco vateyuile olomeme

¹⁸ Kuãla, Yehova waeca ‘olongavelo kalume’ oco vituteyuile okuti katukokiwa ño ‘lolofela viosi vialongiso loku lunguka kuomanu, latutu avo oku wengula esanda.’ (Va Efeso 4:14) Ondaka yo Helasi kuopiwa ondaka “latutu” yilomboloka “okunyana pokati kolomapalo” ale “uluño wokukemba pokati kolomapalo” Eci cilingiwa hẽ okuti katulimbuka ndomo vakuohembi valinga uloño wavo? Lokunõla olondaka vipepa, ovo vapengisa Ovisonehua lokulikolisilako oco vasokise Akristão vocili okukuama ekolelo liavo. Akulu vekongelo te valavulula “olombinji” viaco evi “viatema”!−Ovilinga 20:29, 30.

¹⁹ Olomeme via Yehova visukilavo okuviteyuila kovina vikuavo vikoka ohele. Ungombo wokosiahulu Daviti lutõi walua wateyuila olomeme via isiaye kovimẽla viovinyama viovusenge vitãkila vikuavo. (1 Samuele 17:34–36) Etailivo, pamue ovitangi ndeci vimõle kuenje angombo Akristão vasukilavo okukuata utõi oco vateyuile ocunda povaka avana vatata lãvi ale vatalisa ohali olomeme via Yehova, capiãla enene vina viahonguapo vali. Akulu vekongelo te vatundisa lonjanga yalua vekongelo olondingaivi kaviliweka okulinga akandu kuenda vana valinga atuatu locipango la vakuakukemba, kuenda vana vakuakusandula olombonde oco kulingiwe uvi.−1 Va Korindo 5:9–13; cisokisa lo Samo 101:7.

20. Momo lie tuponduila okukuata ekoliso pokutatiwa ‘lolongavelo kalume’?

²⁰ Olopandukuovio tueca ‘kolongavelo kalume’! Omo liokututata kuavo locisola, etu tuakolapo, pokukolisiwa lavo locikembe, kuenda locisola citukolisa, haico citukuatisa lonjanga okulikuata omunga, kuenje lepandi lialua cituteyuila. Pole ndamupi hẽ ‘olongavelo kalume’ visukila okutala ovikele viavo vekongelo? Kuenda etu tupondola okulekisa ndati okuti tuvasole? Apulilo a–a akalomboluiwa vocipama cikuãimo.

[Atosi Pombuelo Yemẽla]

Ove hẽ Ocivaluka?

◻ ‘Olongavelo kalume’ velie kuenda momo lie Suku a vavela kekongelo pokati ka Kristu?

◻ Akulu vekongelo vatẽlisa hẽ ndati ovikele viavo oco vakolise ocunda?

◻ Nye akulu vekongelo vapondola okulinga oco vakolise vamanjavo vakuetavo?

◻ Akulu vekongelo vapondola okukuatisa ndati ekongelo okuamamako lokulikuata omunga?

[Elitalatu yemẽla 24]

Akulu vekongelo okulikuata omunga pokati kavo civetiya ekongelo okulikuatavo omunuga

[Elitalatu yemẽla 24]

Ohenda yikuatisa akulu vekongelo okuvetiya vana vateka kovitima