Amamako

ECI ove wa fetika oku lilongisa oku kapako olonumbi Viembimbiliya, ekalo liove, ovisimĩlo viove, kuenda upopi wove wa fetika oku pongoloka kamue kamue. Vialua pokati kovina evi, via fetika eci handi kua lisonehisile Kosikola Yupange Wakristão. Cilo, pamue wa amamako ale toke wa pitila petosi lioku tumbika omuenyo wove ku Yehova. Eci hẽ ci lomboloka okuti o liwekapo oku amamako? Hacoko. Oku papatisiwa kuove efetikilo ño handi.

Eci Paulu a sapuila ndonge Timoteo hati “kolisako” oku kapako elungulo kuenda ocikele cupange a tambuile, Timoteo wa kala ale loku talavaya ndukristão ukulu wekongelo. Wa vetiyiwavo oku “lingainga ovina [viaco] . . . oco vosi va mole okuamako” kuaye. (1 Tim. 4:12-15) Omo liaco, cikale okuti ndopo ño wa fetika oku endela vocili, cikale okuti o kuete ale ukũlĩhĩso walua womuenyo Wukristão, lopo o sesamẽla oku kuata onjongole yoku amamako.

Ukũlĩhĩso Kuenda Epongoloko

Kelivulu lia Va Efeso 3:14-19, tu tangako okuti upostolo Paulu wa li kutilililako vamanjaye oco ‘va kuate unene woku kũlĩha . . . upati lusovi lokulepa lokulonga’ kuocili. Oco ci tẽlisiwe, Yesu wa eca alume ndolongavelo oco va longise, va suñamise, kuenda va pamise ekongelo. Oku sokolola lutate Kondaka ya Suku, kumue lekuatiso lialongisi va loñoloha, ku pondola oku tu kuatisa ‘oku kula’ kespiritu.​—Va Efe. 4:11-15.

Voku kula kuaco, mua kongela oku pongoloka “omunu wokaliye [kongusu yi vetiya ovisimĩlo, NW].” Kuenda mua kongelavo oku likolisilako oku pindisa ovisimĩlo oco vi lisetahãle levi via Suku kuenda via Kristu. Eci ci kisika oku konomuisa ovisimĩlo viavo otembo yosi, oco ci tẽliwe oku ‘wala omunu wokaliye.’ (Va Efe. 4:23, 24) Eci o lilongisa Avanjeliu, o va tenda hẽ ndongangu yimue o sukila oku kuama, ale o va tenda ño ndasapulo amue atiamẽla komuenyo wa Kristu? Anga hẽ, o li kolisilako oku limbuka ovituwa via lekisiwa la Yesu kuenje o linga elikolisilo liocili oco o vi lekisevo vomuenyo wove?​—1 Pet. 2:21.

Olondaka viove o kongela vombangulo yimue, vi lekisa ndomo ove wamako ale konepa eyi. Ava va wala ale omunu wokaliye, ka va lieci vali koku vangula esanda, elaviso, akutisasõi ale pamue koku vangula evi ka via sungulukile. Puãi olondaka viavo “vi kuatisa, haivio . . . vi sumũluisa ava va vi yeva.” (Va Efe. 4:25, 26, 29, 31; 5:3, 4; Yuda 16) Cikale koku vangula kuavo pokolika cikale koku tambulula kuavo kolohongele viekongelo, va lekisa okuti ocili ci kasi muẽle loku pongolola omuenyo wavo.

Nda okuti ku kasi vali loku “punguaiwa lolofela viosi viokulongisa,” eci ci lekisavo okuti o kasi loku amamako kespiritu. (Va Efe. 4:14) Ndeci, lipi hẽ ekalo liove eci oluali lu ku vetiyila kovisimĩlo viokaliye, koku linga cimue, ale kolomapalo? Ove wa siata hẽ oku yonjiwa okuti o pesila otembo yalua kovina evi okuti kovikele viespiritu ci sule? Oku ci linga, ku tateka oku amamako kuove kespiritu. Ciwa oku sanda otembo yoku linga ovopange espiritu!​—Va Efe. 5:15, 16.

Oku tata kuove vakuene ku pondola oku lekisavo oku amamako kuove kespiritu. Ove hẽ wa lilongisa ale ‘oku linga ohenda, loku ecela’ vamanjove alume lakãi?​—Va Efe. 4:32.

Oku amamako kuove koku linga ovina ndomo Yehova a yongola, te kua li molehĩsila cikale vekongelo cikale konjo. Oku amamako kuaco, te kua limolehĩsilavo kosikola, kovitumãlo viowiñi, kuenda kocitumãlo cove cupange. (Va Efe. 5:21–6:9) Nda kapuluvi aco osi wa lekisa ovituwa ndevi via Suku, oku amako kuove ku kasi loku li molehĩsa.

Talavaya Longavelo Yove

Yehova wa eca komunu lomunu pokati ketu eloñoloho lioku linga cimue. Eye o lavoka okuti etu tu talavaya leloñoloho liaco oco tu kuatise va kuetu, lonjila yimue okuti vonduko yetu, Yehova o lekisa ocali kokuavo. Catiamẽla kondaka eyi, upostolo Petulu wa soneha hati: “Omunu omunu a talavaye longavelo a tambula, oku vumba vakuavo ndukalei wa sunguluka woviali . . . via Suku.” (1 Pet. 4:10) Ongavelo yove, o kasi loku talavaya layo ndati?

Petulu wamisako hati: “Wosi o popia, a popie ndu o sapula olondaka viovitumasuku.” (1 Pet. 4:11) Ocinimbu eci ci lekisa ocikele coku vangula eci ci likuata Londaka ya Suku, oco Suku a sivayiwe. Ndomo upopi waco u vanguiwa, te wa sivayavo Yehova. Elongiso o tambula Vosikola Yupange Wakristão, li pondola oku ku kuatisa oku talavaya longavelo yove, okuti o sivaya Suku poku kuatisa vakuene. Loku kala locimãho vovisimĩlo viove, ndamupi o kuete oku seteka oku amamako kuove kosikola yaco eyi?

Ku ka luluvalele lika katosi wa tẽlisa ale kemẽla liove lialungulo ale kocikele cohundo wa tambula. Puãi sokolola toke pi elongiso o kasi oku tambula li kasi loku mioñolola ekalo liocilumba cove cesivayo. Osikola eyi, yi tu pongiyila oku loñoloha vali ciwa kupange woku kunda. Omo liaco, lipula ndoco: ‘Nda siata hẽ oku angiliya eci ndi ka popia kupange woku kunda? Nda siata hẽ oku lekisa onjongole komanu vana nda kundila? Nda siata hẽ oku sia ociseveto coku linga apasu poku sia epulilo limue li vetiya okuti lika tambuluiwa kepuluvi likuavo? Nda okuti ñasi loku longisa umue Embimbiliya, nda siata hẽ oku likolisilako oku mioñoloha okuti ndi kala ulongisi umue o vetiya utima?’

Ku ka tende ño oku amamako kuove omo liovikele viupange wa tambula. Oku amamako kuove ka ku muĩwila kovikele viupange wa tambula, puãi ku muĩwila kueci o linga lovikele viaco. Nda okuti va ku ĩha ocikele cimue cupange okuti mua kongela oku longisa, lipula ove muẽle ndoco: ‘Ñasi hẽ oku mioñolola ciwa uloño wange woku longisa? Ocipama caco ndi ci lombolola lonjila yimue okuti ci vetiya ovimuenyo viava va kasi loku ci yevelela?’

Evetiyo lioku talavaya ciwa longavelo yove li lomboloka oku lieca ove muẽle. Ove hẽ wa siata oku lieca ove muẽle oco o talavaye la vakuene kupange woku kunda? Wa siata hẽ oku sanda evelo lioku kuatisa vakuekongelo liene vana okuti ndopo ño va fetika, ale oku kuatisa amalẽhe kuenda vana okuti olombeyi? Wa siata hẽ oku lieca olumue koku yelisa Onjango Yusoma? Ale koku kuatisa kovopange akuavo kolohongele viofeka, vilikasi ale kolohongele vimbo? Ci tava hẽ okuti olonjanja vimue o li sonehisa koku talavaya ndukundi wasokamo, ale ndukundi wavelapo? Ci tava hẽ okuti o lieca koku kuatisa ekongelo limue li kuete esukila lia piãla liolonalavayi? Nda okuti wulume, o kasi hẽ oku likolisilako oku suisapo ovina vi kisikiwa koku kala oñuatisi yakulu vekongelo ale koku kala ukulu wekongelo? Oku lieca kuove olumue koku kuatisa, kuenda oku tava kuove ovikele, ku lekisa okuti o kasi loku amamako.​—Osa. 110:3.

Esilivilo Lieci Omunu a Lilongisa Vokuenda Kuotembo

Nda o liyevite okuti kua loñolohele enene kovina vimue omo okuti via ku lingila ndu viokaliye vomuenyo Wukristão, ku ka yokoke. Ondaka ya Suku yi pondola oku “muisa olondunge ava va wulua.” (Osa. 19:7; 119:130; Olosap. 1:1-4) Oku kapako olonumbi Viembimbiliya ci tu kuatisa okupa esilivilo kuloño wa sunguluka wa Yehova. Uloño waco u kuete vali esilivilo lia velapo okuti eci omunu a lilongisa vokuenda kuotembo ci sule. Pole, osimbu tu amamako kupange wa Yehova, tuka kuata ukũlĩhĩso walua. Ndamupi hẽ tu pondola oku talavaya lukũlĩhĩso waco lesilivilo lia velapo?

Omunu una okuti wa lipita lovitangi viñi viñi vomuenyo waye, ci tava okuti o yonjiwa loku sima hati: ‘Ame nda liyakele ale locitangi eci kosimbu. Nda kũlĩha eci ndi linga.’ Eyi hẽ onjila yimue yolondunge? Kelivulu Liolosapo 3:7, tu sangako elungulo lia linga hati: “Ku ka kolele [k]olondunge viove [muẽle].” Ocili okuti, ovina tua kũlĩha vi pondola oku vokiya elomboloko lietu kovina vi kuete oku kũlĩhĩsiwa eci tu liyaka lovitangi komuenyo. Pole nda tu kasi loku amamako kespiritu, ovina tua kũlĩha te vi vetiya ovisimĩlo vietu kuenda ovitima vietu, oku limbuka okuti tu sukila esumũlũho lia Yehova oco tu li tunde ciwa. Omo liaco, oku amamako kuetu ka ku limolehĩsila koku likolela etu muẽle poku liyaka lovitangi, puãi ku limolehĩsila konjanga etu tu lupukila layo ku Yehova oco a songuile omuenyo wetu. Eci ci lekisiwila koku kolela kuetu okuti cosi ci pita letu, momo okuti Yehova wa cecelela. Kuenda ci lekisiwilavo koku amamako kuetu poku kuata ukamba uwa la Isietu o kasi kilu.

Amamako Oku Yolokela Kovaso

Upostolo Paulu ndaño okuti wa kala Ukristão umue ombuavekua, eye wa limbuka okuti wa sukilile oku amamako oku “yolokela . . . kovaso” oco a tambule onima yomuenyo. (Va Fil. 3:13-16) Eci hẽ ocovo ocisimĩlo cove?

Anga hẽ oku amamako kuove kespiritu ku kasi toke pi? Seteka oku amamako kuove loku li kũlĩhĩsa nda wa wala ale omunu wokaliye, ndomo wa pokola kuviali wa Yehova, kuenda ndomo o kasi loku talavaya longavelo yove oco o sivaye Yehova. Osimbu upa esilivilo Kosikola Yupange Wakristão, ovituwa via tukuiwa Vondaka ya Suku te via limolẽhisa naito naito koku vangula kuenda koku longisa kuove. Olonepa evi vi kapako koku amamako kuove. Vi sanjukila, kuenje oku amamako kuove kuka limolẽhisa.