Amalẽhe U Kasi hẽ Oku Amamako Kespiritu?
HIDEO poku sokolola otembo yimue eci eye a kala oku tangela kosikola ya velapo wa lombolola hati: “Ndaño okuti nda siatele oku endaenda kolohongele Viakristão, pole ame sia kuatele onjongole layimue yoku vumba Yehova. Olonjanja vialua nda enda oku sokolola ukamba nda kuatele la vakuetu tu tangela kumosi kosikola kuenda oku sokolola eci catiamẽla koku kũlĩhĩwa calua lomanu loku endela kumosi volokololo lafeko. Sia kuatele ocimãho kuenda onjongole yoku amamako kespiritu.” Ndeci ca pita la Hideo, amalẽhe valua ka va kuete ocimãho lacimue komuenyo wavo kuenda ka va kuete onjongole layimue yoku tẽlisa ocimãho cimue ci kuete esilivilo komuenyo wavo ale oku amamako kespiritu.
Nda ove umalẽhe, pamue o kuata esanju lialua poku imba ombunje ale poku linga cimue o sole votembo yepuyuko. Pole, eci o linga ovopange atiamẽla kovina viespiritu, ci tava okuti ku kuata esanju liaco. Ci tava hẽ oku vetiyiwila kovimãho viatiamẽla kovina viespiritu? Kũlĩhĩsa olondaka viukualosamo wa popia hati: “Uvangi wa Yehova wocili, u muisa olondunge ava va wulua. . . . Ocihandeleko ca Yehova ca pua eko, ci yelisa ovaso.” (Osamo 19:7, 8) Ondaka ya Suku yi “muisa olondunge ava va wulua” loku linga ovina viosi luloño haiyo ‘yi yelisa ovaso.’ Ocili okuti ove o pondola oku kuata esanju lialua li tundilila kovina viespiritu. Oco hẽ, nye ci sukiliwa oco o kuate esanju liaco? Pi o pondola oku fetikila?
Vetiyiwa Oku Vumba Suku
Catete, ove o sukila oku vetiyiwa. Konomuisa eci ca pita lumalẽhe Yosiya Soma yoko Yuda. Eci elivulu Liovihandeleko via Yehova lia sangiwa vonembele, Yosiya wa li tambula kuenda wa li tanga. Kuenje, ovina eye a tanga velivulu liaco vioveta calua kutima. Omo liaco, “Yosiya wopa umbondo wosi vofeka yosi ya va Isareli.” (2 Asapulo 34:14-21, 33) Omo lioku tanga Ondaka ya Suku, Yosiya wa yeva evetiyo lioku tumbulula efendelo liocili.
Ove o pondolavo oku kuata onjongole yoku vumba Yehova nda wa tanga tanga olonjanja viosi Embimbiliya kuenda oku sokolola eci wa tanga. Eci oco ca vetiya Hideo. Eye wa kuata ukamba wocili lukulu umue Ombangi ya Yehova okuti ukundi wotembo yosi. Ukundi waco wotembo yosi wa kala locituwa coku tanga Embimbiliya kuenda oku likolisilako calua oku kapako komuenyo waye ovina viosi a lilongisa. Omo lioku vetiyiwa longangu yiwa yukundi wotembo yosi, Hideo wa fetikavo oku ci linga kuenje weya oku kuata onjongole yocili yoku vumba Suku kuenda oku kuatisa omanu konepa yespiritu. Oku amamako kuaye kespiritu kuo kuatisa oku kala locimãho komuenyo waye.
Oku tanga Embimbiliya eteke leteke ku pondola oku vetiya amalẽhe. Takahiro wa lombolola hati: “Nda okuti nda pekela ale, kuenje nda limbuka okuti handi sia tangele Embimbiliya veteke liaco, haico ndi pasuka oku tanga Embimbiliya. Omo liaco, nda fetika oku limbuka olonumbi via Yehova. Oku tanga Embimbiliya eteke leteke kua ndi kuatisa calua oku amamako kespiritu. Nda litumbika koku kuata onepa yalua kupange wa Yehova omo lioku fetika upange wukundi wotembo yosi noke yoku mãla osikola ya velapo. Kuenje, nda siata oku kuata asumũlũho alua omo lioku linga upange waco.”
Nye o pondola oku linga vali oco ci vetiye ombili yove yoku sanjuisa Yehova okuti oku tanga Embimbiliya ci sule? Tomohiro wa longisiwa ocili Cembimbiliya la Inaye. Eye wa lombolola hati: “Noke yoku lilongisa elivulu liosi losapi hati, A Vida Tem Objectivo, okuti otembo yaco nda kala lanyamo a soka 19, ndeya oku limbuka lutima wange wosi ocisola cocili ca Yehova kuenda ocilumba cocisembi ca Yesu. Oku lekisa olopandu kocisola ca Suku ca ndi vetiya oku linga vali calua kupange wa Yehova.” (2 Va Korindo 5:14, 15) Ndeci Tomohiro a linga, amalẽhe valua va siatavo oku vetiyiwa oco vamameko kespiritu poku likolisilako oku linga elilongiso Liembimbiliya pokolika.
Oco hẽ, nye ove o pondola oku linga nda handi o yevite ekambo lionjongole yoku vumba Yehova? Kuli hẽ omunu umue okuti o pondola oku ku kuatisa? Upostolo Paulu wa soneha hati: “Suku o kasi loku linga upange waye vokati kene, kuenje haeye o tu ĩha ongusu kuenda utima woku linga ocipango caye.” (Va Filipoi 2:13) Nda ove o likutilila ku Yehova oco a ku kuatise, locipango caye muẽle eye oka ku ĩha espiritu sandu liaye, okuti ka ku ĩha lika “ongusu” yoku linga upange waye, pole oka kuĩhavo “utima woku linga ocipango caye.” Eci ci lomboloka okuti, espiritu sandu lia Suku lika ku vetiya oku linga cosi o tẽla kupange wa Yehova kuenda lika ku kuatisa oku amamako kespiritu. Omo liaco, amamako oku kolela unene wa Yehova kuenda oku pamisa utima wove!
Kuata Ovimãho Komuenyo Wove Muẽle
Omo okuti wa litumbika koku linga ocipango ca Yehova lutima wove wosi, o sukila oku kuata ovimãho komuenyo oco wamameko kespiritu. Ufeko umue Ukristão o tukuiwa okuti Mana wa lombolola hati: “Oku kuata ovimãho ca ndi kuatisa calua. Oku kuata ovimãho komuenyo wange ca ndi kuatisa oku amamako kespiritu lepandi okuti sia kuatele ovitangi vioku tiukila kovilinga viosimbu. Loku sokolola eci catiamẽla kovimãho viange, nda enda oku likutilila cocili ku Yehova oco a ndi lekise onjila ndi kuama. Omo liaco, ndeya oku kula kespiritu okuti lacimue ca tẽla oku ndi yapuisa.”
O sukila oku kala lovimãho vina via ku sungulukila kuenda evi o pondola oku tẽlisa. Oku tanga ocipama cimosi Cembimbiliya oloneke viosi, ci tava oku kala ocimãho cimue ca sunguluka oku ci tẽlisa. Handi, ove o pondolavo oku fetika oku konomuisa valivulu akuavo. Ndeci, poku linga ocindekaise cimue ci sangiwa velimi lioputu, ove o pondola oku lilongisa eci catiamẽla kovituwa via Yehova vina vi sangiwa vemẽhi liosapi hati: “Nome; Qualidades” okupisila ponumbi yokuti, “Yehova” velivulu Índice das Publicações da Torre de Vigia. Kuli eci cisoka 40 kolonumbi vina ove o pondola oku konomuisa. Kuenje, oku konomuisa kuaco kuka ku kuatisa oku kuata ukamba wocili la Yehova kuenda oku ku vetiya oku u vumba lutima wove wosi. Ocimãho cikuavo okuti ca sunguluka oku ci tẽlisa, oku eca etambululo ndaño limosi lika kolohongele Viakristão vina okuti omanu vosi va sukila oku eca atambululo. Oku kuata ocimãho coku kũlĩha ciwa omunu umosi veteke kohongele lohongele yekongelo kuenda oku likutilila ku Yehova oloneke viosi kumosi loku sandeka komanu eci catiamẽla kokuaye, ocimãho cimue ci kuatisa calua.
Nda kua lisonehisile handi Kosikola Yupange Wakristão, ci tava okuti ci linga ocimãho cove. Anga hẽ wa siata oku enda enda kupange woku kunda? Nda kua fetikile handi oku enda enda kupange woku kunda ci tava oku likolisilako oku kala ukundi umue ka papatisiwile. Kuenje, oku sokolola ciwa eci catiamẽla kukamba wove la Yehova kuenda oku litumbika kuove kokuaye ci pondolavo oku kala ocimãho ci kuãimo. Amalẽhe valua va siata oku likolisilako oku endela velitumbiko liavo ku Suku poku kala akundi votembo yosi.
Ndaño okuti oku kuata ovimãho ocina cimue ciwa komuenyo wove, pole o sukila oku yuvula ocituwa coku sokisa upange wove kuenda upange una u lingiwa la vakuene. Oka kuata vali esanju lialua nda kua sokisile upange o kasi oku linga la una u kasi oku lingiwa lomanu vakuavo.—Va Galatia 5:26; 6:4.
Pamue ove o sima okuti ku kuete ukũlĩhĩso walua woku ci linga kuenda ka ca lelukile kokuove oku kuata ocimãho cimue ca sunguluka. Omo liaco, kuama onumbi yi sangiwa Vembimbiliya yokuti: “Vongola etui liove, yevelela olondaka violonoño.” (Olosapo 22:17) Sandiliya ekuatiso liolonjali viove leli Liakristão vakuavo vana va loñoloha kespiritu. Ocili okuti olonjali kuenda akamba vakuavo va pondola oku kala omanu va sunguluka haivo va eca evetiyo liatiamẽla kondaka yaco. Oku kisikiwa kueci catiamẽla koku tẽlisa ocimãho cimue ca tumbikiwa lomanu vamue vañi, ci pondola oku tepulula esanju liamalẽhe kuenda oku nyõla onjongole yosi yatiamẽla koku kuata ovimãho komuenyo. Eci oco ca pita lufeko umue, wa lombolola hati: “Olonjali viange via ndi tumbikila ovimãho vimue, ndeci oku lisonehisa Kosikola Yupange Wakristão, oku panga onepa kupange woku kunda, oku papatisiwa kuenda oku kala ukundi wotembo yosi. Kuenje, nda likolisilako calua oku tẽlisa ovimãho viaco. Eci nda enda oku tẽlisa ocimãho cimue, olonjali viange lalimue eteke via ndi pandiyile. Pole, via enda oku nyĩha ocimãho cimue cikuavo. Omo liaco, olonjanja viosi nda enda oku yeva ekisika lioku tẽlisa ovimãho viaco. Nda kavele calua kuenda nda enda oku sima okuti, ka kuli esilivilo lalimue lioku tẽlisa ovimãho viaco.” Ocitangi ce hẽ eye a kuatele? Ocili okuti ovimãho viaco via kuatele esilivilo, pole ka via kaile viokutima waye muẽle. Oco ove o litunde ciwa komuenyo wove, o sukila oku kuata onjongole yoku litumbikila ove muẽle ovimãho okuti ka kuli lalimue ekisika!
Sokolola eci ca pita la Yesu Kristu. Eci eya palo posi eye wa kũlĩhĩle cosi Isiaye Yehova a kala loku talamela kokuaye. Oku tẽlisa ocipango ca Yehova, ku Yesu ka ca kalele lika ocimãho, pole ca kala ocikele cimue kokuaye okuti wa sukilile oku ci tẽlisa. Ndamupi Yesu a tendele ocikele caco? Eye wa lombolola hati: “Okulia kuange oku linga ocipango cu wa numa kuenda oku suisapo upange waye.” (Yoano 4:34) Yesu wa kuatele esanju poku linga ocipango ca Yehova kuenda omuenyo waye watiamẽlele lika koku tẽlisa cosi Isiaye a yonguile oku linga. Oku linga ocipango ca Yehova ca kala ndokulia kuaye. Omo liaco, Yesu wa kuata esanju lialua kuenda onjongole yocili yoku tẽlisa upange una a tambuile. (Va Heveru 10:5-10) Ove o pondolavo oku kuata esanju nda wa kuata onjongole yoku linga eci olonjali viove viuku vetiya oku linga.
Ku ka Liwekepo Oku Linga Eci Ciwa
Nda ove o kuete cimue ocimãho likolisilako oku ci tẽlisa. Elivulu lia Va Galatia 6:9 lilombolola okuti: “Ka tu ka kavi oku linga eci ciwa, momo kotembo yaco tu lombola nda ka tua leñelele.” Ku ka kolele kongusu kuenda kuloño wove muẽle. Ci tava okuti poku tẽlisa ocimãho caco o pondola oku sanga ovitangi kuenda vonjanja yaco ku kuata vali ongusu yoku amamako oku ci linga. Pole, Embimbiliya li tu vetiya okuti: “Sumbila [Suku] kolongenda viove viosi, kuenje eye o suñamisa olonjila viove.” (Olosapo 3:6) Yehova oka ku kuatisa osimbu o likolisilako oku tẽlisa ovimãho viove viatiamẽla konepa yespiritu.
Ocili okuti, poku amamako lonjongole yoku vumba Yehova kuenda oku tẽlisa ovimãho viove viatiamẽla kespiritu, omanu vosi vaka mola ‘okuamamako kuove.’ (1 Timoteo 4:15) Nda wa kuama onjila eyi, oka kuata esanju liocili liatiamẽla kesilivilo lioku ambata omuenyo umue woku vumba Suku.
[Elitalatu kemela 31]
Oku tanga Embimbiliya kuenda oku sokolola eci wa tanga, cika ku vetiya oku vumba Yehova
[Elitalatu kemela 32]
Yesu wa tẽlisa cosi Isiaye a tuma oku linga