Kuata Ovimãho Via Sunguluka Oco Amameko Lesanju
“SIA tẽlisile eci nda yonguile oku linga!” Olonjanja viñami wa popele olondaka evi noke yoku lueya ocina cimue wa yonguile oku linga? Ukristão una okuti onjali pole umalẽhe, olonjanja vimue o kuata ovisimĩlo viaco omo liekavo lioku tata oñaña yaye. Kuenje, o sumua omo okuti ka kuete otembo yalua yoku pitisa kovaso ovina viespiritu. Ukristão ukuavo omo okuti ka tatiwile ciwa vutila waye, pamue o sima okuti ka loñolohele koku linga ovina vimue, kuenda ka kasi oku linga upange u kuete esilivilo vekongelo. Manji umue ukãi okuti wa kuka, pamue o sima okuti ka kasi oku linga calua kupange wa Yehova ndeci a lingaile eci a kuata uhayele. Manji umue o tukuiwa hati Christian okuti ekalo liepata liaye ka liu wecelela oku talavaya kupange wa Yehova ndeci a yongola, wa popia hati: “Eci ndi yeva ohundo yi vetiya vamanji oco va litumbike kupange wakundi votembo yosi, ndi fetika oku lila.”
Nye tu sukila oku linga eci tu liyaka lovitangi viaco? Vamanji vamue va siata oku yula ndati ovitangi viavo? Onima yipi yi tunda koku kuata ovimãho via sunguluka?
Sokiya Ovimãho Via Sunguluka
Upostolo Paulu wa lekisa ndomo tu pondola oku amamako lesanju poku popia hati: “Sanjukili vu Ñala olonjanja viosi. Mopia vali siti, Sanjuki. Esunguluko liene li limbukiwe lomanu vosi”! (Va Fil. 4:4, 5) Oco tu kuate esanju kupange wa Suku, tu sukila oku sokiya ovimãho via sunguluka loku kũlĩhĩsa uloño wetu kuenda ekalo liomuenyo wetu. Nda tua seteka oku tẽlisa ovimãho viaco pole, ka tu kuete epondolo liaco, tu sumua. Tu sukilavo oku lunguka okuti ka tu sokiya lika ovimãho vitito loku li sandela esunga okuti tu kuata owesi kupange woku kunda.
Ndaño tu liyaka lovitangi, Yehova o yongola okuti tu eca kokuaye ovina vietu via velapo okuti, oku u lingila upange lutima wetu wosi. (Va Kol. 3:23, 24) Nda ka tua ecele ku Yehova ovina via velapo, ka tu tẽlisa elitumbiko lietu kokuaye. (Va Rom. 12:1) Noke ka tu kuata esanju kuenda ka tu tambula asumũlũho eyilila kupange tu linga lutima wosi.—Olosap. 10:22.
Vembimbiliya ondaka ya pongoluiwa hati, ‘esunguluko,’ yi lomboloka oku likũlĩhĩsa ove muẽle. Oyo yi lombokavo ‘oku ecelela.’ (Tia. 3:17) Kuenda yi kuetevo elomboloko lioku yuvula oku litateka ove muẽle koku linga cimue. Omo liaco, nda tua lekisa esunguluko, tu sokiya ovimãho via pita pokati kuenda ci tu kuatisa oku kũlĩhĩsa ekalo liomuenyo wetu. Anga hẽ, ka ca lelukile oku ci linga? Ku vamue ka ca lelukile, momo va siata oku kuata ovisimĩlo ka via sungulukile viekalo lia vakuavo. Sokolola ndeci okuti, ekamba liove li molẽha okuti lia kava calua omo lioku linga upange umue. Anga hẽ, ku seteka oku u kuatisa loku u sapuila ndomo a sukila oku linga apongoloko amue komuenyo waye? Cimuamue haico ci pondola oku pita letu. Tu sukila oku kũlĩhĩsa ekalo liomuenyo wetu, oco tu limbuke nda tu pondola oku tẽlisa ovina tu yongola oku linga.—Olosap. 11:17.
Nda tua kulila vepata limue okuti olonjali vietu via enda oku tu kisika oku linga upange walua, ka ci leluka oku kuata ovisimĩlo via sunguluka viatiamẽla kekalo lietu. Omanu vamue eci va kala omãla va enda oku vetiyiwa oku linga lika ovina vialua viwa oco va soliwe lolonjali viavo. Nda tua kuata ocitangi caco osimbu tua kala omãla, tu pondola oku kuata ovisimĩlo ka via sungulukile viatiamẽla ku Yehova ndomo a tu tenda. Yehova o lekisa ocisola kokuetu eci tu u lingila upange lutima wosi. Ondaka Yaye yi tu sapuila okuti Yehova “wa kũlĩha ovatimba etu, ivaluka okuti tuneketela.” (Osa. 103:14) Eye wa kũlĩha ekalo liomuenyo wetu, kuenje nda tua lekisa ombili kupange waye ndaño lovitangi, o lekisa ocisola kokuetu. Tu sukila oku ivaluka okuti, Suku ka tu kisika upange umue ka tu tẽla oku linga, momo wa kũlĩha ekalo liomuenyo wetu.—Mika 6:8.
Omanu vamue va siata oku kuata ocitangi coku lekisa ovisimĩlo via sunguluka. Nda wa siata oku kuata ocitangi caco, momo lie ku pingila ku manji umue wa ku kũlĩha ciwa haeye wa loñoloha kespiritu oco a ku kuatise? (Olosap. 27:9) Anga hẽ, o yongola oku litumbika kupange wakundi vavelapo? Eci oco ocimãho cavelapo o pondola oku nõla! Ove hẽ, o kuete ovitangi vi ku tateka oku tẽlisa ocimãho caco? Citava okuti o sukila ekuatiso oco o leluise omuenyo wove. Manji umue okuti ekamba liove wa kolela, o pondola oku ku kuatisa nda ovikele o kuete vepata vi ecelela oku tẽlisa ocimãho coku linga ukundi wavelapo. Eye citava okuti oku kuatisa oku limbuka nda o pondola oku tẽlisa ocimãho caco, ale nda o sukila oku linga apongoloko amue. Ulume o pondolavo oku kuatisa ukãi waye oco a tẽlise ocimãho coku kala ukundi wavelapo. Citava okuti o sapuila ukãi waye oco a puyukepo osimbu ka fetikile upange wosãi yikuavo. Nda wa ci linga, ci kuatisa ukãi waye oku amamako lesanju kupange woku kunda.
Kũlĩhĩsa Ovina o Pondola Oku Linga
Oku kuka ale ekambo liuhayele, vi pondola oku tepulula upange tu lingila Yehova. Nda unjali, pamue o limbuka okuti kua siatele okupa esilivilo kelilongiso lio pokolika ale kolohongele, omo lioku pesila otembo yalua koku tata omãla. Anga hẽ, poku kũlĩhĩsa ovina evi, kua siatele oku limbuka ovina o pondola oku linga?
Kosimbu ulume umue u Lewi, wa lekisile onjongole yoku linga ocina cimue okuti ka kuatele epondolo liaco. Eye wa kuatele esumũlũho lioku talavaya vonembele olosemana vivali vunyamo. Pole, wa yonguile oku kala otembo yosi ocipepi lutala. (Osa. 84:1-3) Nye co kuatisa oku kuata esanju? Eye wa limbuka okuti, oku talavaya eteke limosi vonembele, ci nena asumũlũho. (Osa. 84:4, 5, 10) Cimuamue haico tu sukila oku linga. Eci tu liyaka lovitangi komuenyo wetu, tu sukila oku limbuka epondolo tu kuete lioku linga ovina tu yongola oku tẽlisa.
Kũlĩhĩsa ulandu wa manji umue ukãi o tukuiwa hati Nerlande kofeka yo Kanada. Omo okuti endela komangu yalola, ka tẽla oku talavaya calua kupange woku kunda. Omo liaco, wa sokiya oku kala ocipepi lovenda yimue okuti, oyo ya linga ocikanjo caye. Eye wa popia hati: “Eci ndi pitila ocipepi lovenda, ndi tumãla ponele yomangu omanu va siata oku puyukila. Omo liaco, nda siata oku kuata esanju lialua poku sapela lomanu va tumãla ponele yange.” Oku kuata onepa kupange waco ca nena esanju ku manji Nerlande.
Linga Apongoloko a Sukiliwa
Ocimbaluku ci kuete onanga, ci lupuka lika nda kuli ofela. Pole, nda kueya ehunguhungu liofela, omunu ocendisa o sukila oku lavulula oco ocimbaluku ka cika vombe. Ndaño ka tẽla oku tateka ofela yaco, pole, o likolisilako oku cendisa lutate oco ka cika vombe. Cimuamue haico catiamẽla kokuetu okuti, olonjanja vimue tu liyaka lovitangi vina ka tu tẽla oku vi yuvula. Pole, tu sukila oku pandikisa lovitangi viaco, ndaño ka tu tẽla oku vi malako. Eci tu liyaka locitangi cimue, tu kuatisiwa lika nda tua sanjukila upange tu lingila Suku.—Olosap. 11:2.
Konomuisa ovindekaise vimue. Nda ka tu kuete uhayele, tu sukila oku yuvula oku linga ovopange ana a kavisa etimba vokuenda kueteke okuti koñolosi tu kuata ongusu yoku enda kohongele oco tu pamisiwe la vamanji kespiritu. Ale manji umue ukãi okuti onjali nda ka pondola oku kundila konjo lanjo omo liomõla ovela, citava okuti o laleka manji ukuavo ukãi oku nena ondonge yaye konjo, oco va linge elilongiso osimbu omõla a pekela.
Nye o sukila oku linga nda ekalo liomuenyo wove ka li ecelela oku pongiya olonepa viosi vika lingiwa kohongele? Citava okuti o nõla olonepa o pondola oku pongiya. Nda tua sokiya ovimãho tu pondola oku tẽlisa, tu kuata esanju.
Oco tu sokiye ciwa ovimãho vietu, tu sukila oku likolisilako oku vi tẽlisa. Manji umue o tukuiwa hati, Serge lukãi waye Agnès, kofeka yo Fransa va linga esokiyo kovina va yonguile oku linga. Manji Serge wa popia hati: “Eci tua limbuka okuti Agnès wa mina, ka tua kuatele vali elavoko lioku kala olomisionaliu.” Manji Serge okuti cilo okuete omãla vavali vafeko, wa lombolola ndomo a sokiya ovimãho viokaliye kumue lukãi waye. Eye wa popia hati: “Omo okuti ka tua tẽlele oku enda kupange wumisionaliu kofeka yikuavo, upange waco tu kasi oku u lingila vofeka yetu poku pesila otembo yalua koku kunda olondaka viwa. Tua sanjuka calua omo lioku kala vekongelo va vangula elimi likuavo.” Anga hẽ, va kuata onima yiwa omo lioku tẽlisa ocimãho caco? Manji Serge wa popia hati: “Tua sanjuka calua omo lioku eca ekuatiso vekongelo liaco.”
Manji Odile kofeka yo Fransa o kuete ci pitahãla 70 kanyamo, wa kuata uvei umue polongolo u tukuiwa hati, osteoartrite. Eye ka kuatele epondolo lioku talama olowola vialua. Omo liaco, wa sumuile calua, momo ka tẽlele oku enda kupange woku kundila konjo lanjo. Pole, ka liwekelepo. Eye wa nõlapo oku kundila omanu votelefone. Kuenje wa popia hati: “Upange waco wa leluka, kuenda u nena esanju lialua!” Onjila a nõlapo yo nenela esanju kupange woku kunda.
Oku Sokiya Ovimãho Via Sunguluka ci Nena Asumũlũho
Oku lekisa esunguluko ci tu kuatisa oku yuvula esumuo. Nda tua sokiya ovimãho via sunguluka, tu kuata epondolo lioku vi tẽlisa ndaño ka tu kuete otembo ale uhayele. Omo liaco, tu pondola oku kuata esanju kovina tu linga ndaño ka via luile.—Va Gal. 6:4.
Nda tua lekisa esunguluko kovina tu yongola oku linga, tu kapiwako la vamanji. Tu sanjuka calua omo liupange va siata oku tu lingila ndaño lovitangi viavo. Nda tua lekisa olopandu kekuatiso va siata oku eca, ci tu kuatisavo oku lekisa ocisola kokuavo, kuenda oku li kuata omunga. (1 Pet. 3:8) Ivaluka okuti Isietu Yehova ukuacisola, ka tu kisika oku linga upange umue ka tu tẽla. Omo liaco, nda tua lekisa esunguluko kovimãho tu yongola oku tẽlisa kupange wa Yehova, tu kuata esanju lialua.
[Elitalatu kemẽla 29]
Oco tu kuate esanju kupange wa Suku, tu sukila oku sokiya ovimãho via sunguluka loku kũlĩhĩsa uloño wetu kuenda ekalo liomuenyo wetu
[Elitalatu kemẽla 30]
Manji Nerlande wa kuata esanju poku linga ovina a tẽla kupange woku kunda
[Elitalatu kemẽla 31]
Lilongisila kulandu “wocimbaluku ci kuete onanga”
[Ofoto ya Eciwa]
© Wave Royalty Free/age fotostock
[Elitalatu kemẽla 32]
Manji Serge lukãi waye Agnès va kuatisiwa omo lioku sokiya ovimãho viokaliye