OCIPAMA 37
Ceci Embimbiliya li Popia Catiamẽla Kupange Kuenda Kolombongo
Wa sakalalele ale locitangi coku sanda upange ale olombongo? Ocili okuti, ka ca lelukile oku sanda ovina tu sukila okuti, vepuluvi limuamue tu eca ku Yehova efendelo a sesamẽla. Embimbiliya li tu ĩha olonumbi vi tu kuatisa.
1. Nye Embimbiliya li popia catiamẽla kupange?
Suku o yongola okuti, tu sanjukila upange wetu. Embimbiliya li popia okuti, “ka kuli lacimue ca velapo vali komunu nda . . . oku sanga esanju liupange waye walua.” (Ukundi 2:24) Yehova o talavaya calua. Nda tu u setukula poku lekisa ombili kupange, tu u sanjuisa kuenda tu kuata esanju.
Upange u kuete esilivilo. Pole, lalimue eteke ka tu ka eceleli okuti, owo u velapo efendelo lietu ku Yehova. (Yoano 6:27) Yehova wa likuminya okuti, nda tu pitisa kovaso upange waye, o ka tu ĩha cosi tu sukila konepa yetimba.
2. Cipi ocituwa ca sunguluka catiamẽla kolombongo?
Ndaño Embimbiliya li lekisa okuti “olombongo vi teyuila,” olio li lungulavo okuti, olombongo ka vi tu nenela esanju. (Ukundi 7:12) Tu vetiyiwa oku yuvula oku sola olombongo, pole, tu sukila oku ‘sanjukila ovina tu kuete cilo.’ (Tanga Va Heveru 13:5.) Nda tu sanjukila ovina tu kuete, ka tu ka sakalala calua loku sima okuti lalimue eteke tu ka kuata cimue. Tu sukila oku yuvula olofuka nda ka vi sukiliwa. (Olosapo 22:7) Tu puluka kohele yi tunda komapalo yoku nganyala olombongo locimãho coku kuata lonjanga yalua ovokuasi.
3. Tu talavaya ndati lolombongo lonjila ya sunguluka?
Yehova Osuku yimue ukuakueca kuenda tu u setukula poku kala “vakuacali, loku lipongiyila oku li tepela” la vakuetu. (1 Timoteo 6:18) Tu talavaya lolombongo vietu lonjila ya sunguluka poku kuatisa ekongelo, omanu va suka, ca piãla enene vamanjetu. Yehova ka sanjukila lika eci tu eca, pole, wa kapako calua esunga lieci tu ecela ombanjaile yimue. Nda tu eca lutima wosi, tu sanjuka kuenda tu sanjuisavo Yehova.—Tanga Ovilinga 20:35.
LILONGISA ONDONGOSI
Tala asumũlũho a tunda koku kuata ocituwa ca sunguluka catiamẽla kupange woku sanda eteku kuenda koku sanjukila ovina tu kuete.
4. Sivaya Yehova lonjila ndomo o talavaya
Ukamba wetu la Yehova, u sukila oku vetiya ocituwa tu lekisa catiamẽla kupange. Tala OVIDEO, noke konomuisa apulilo a kuãimo.
Ndeci ca lekisiwa vovideo, nye ci ku komõhisa catiamẽla kocituwa Jason a lekisa kuenda kocituwa ci lekisiwa kocitumãlo caye cupange?
Nye eye a linga oco amameko oku kuata ocituwa ca sunguluka catiamẽla kupange woku sanda eteku?
Tanga Va Kolosai 3:23, 24, noke konomuisa epulilo li kuãimo:
Momo lie ocituwa tu lekisa catiamẽla kupange ci kuetele esilivilo?
Upange u kuete esilivilo. Pole, lalimue eteke ka tu ka eceleli okuti, owo u velapo efendelo lietu ku Yehova
5. Oku sanjukila ovina tu kuete, ci tu kuatisa
Omanu valua va seteka oku kuata olombongo vialua. Pole, Embimbiliya li tu ĩha alungulo a litepa. Tanga 1 Timoteo 6:6-8, noke konomuisa epulilo li kuãimo:
Embimbiliya li tu vetiya oku linga nye?
Ndaño tu kuete ovina vitito, tu pondola oku sanjuka. Tala OVIDEO, noke konomuisa epulilo li kuãimo.
Apata a lekisiwa vovideo ndaño lolombongo vitito, nye ci va sanjuisa?
Nye ci popiwa nda tu kuete ale calua, pole, handi tu yongola vali? Yesu wa tukula ulandu umue u lekisa ohele yi tunda kocituwa caco. Tanga Luka 12:15-21, noke konomuisa epulilo li kuãimo:
Nye wa lilongisa kulandu Yesu a tukula? —Tala ocinimbu 15.
Tanga loku sokisa Olosapo 10:22 kuenda 1 Timoteo 6:10. Noke konomuisa apulilo a kuãimo:
Kovisimĩlo viove, nye ca velapo vali, oku kuata ukamba la Yehova ale oku kuata olombongo vialua? Momo lie?
Ovitangi vipi vi tunda konjongole yoku kuata olombongo vialua?
6. Yehova o ka tu ĩha ovina tu sukila
Nda ka tu kuete upange woku sanda eteku ale olombongo vialua, ci tu kuatisa oku limbuka nda tua kolela Yehova ale sio. Tala OVIDEO oco o limbuke eci tu sukila oku linga poku liyaka lovitangi viaco, noke konomuisa apulilo a kuãimo.
Ndeci ca lekisiwa vovideo, ovitangi vipi manji a liyaka lavio?
Nye eye a linga oco a tẽle oku liyaka lovitangi viaco?
Tanga Mateo 6:25-34, noke konomuisa epulilo li kuãimo:
Nye Yehova a likuminya ku vana va pitisa kovaso upange waye?
OMANU VAMUE VA POPIA VATI: “Nda siata oku talavaya calua oco ndi kuatise epata liange. Si pondola oku enda kolohongele viekongelo olosemana viosi.”
Ocisonehua cipi ci ku vetiya oku tava okuti, oku pitisa kovaso efendelo lia Yehova otembo yosi oyo onjila ya velapo?
NYE WA LILONGISA?
Upange woku sanda eteku kuenda olombongo, vi sukiliwa, pole, ka tu ka eceleli okuti vi tu tateka oku vumba Yehova.
Oku Pitulula
Nye ci ku kuatisa oku amamako oku kuata ocituwa ca sunguluka catiamẽla kupange?
Oku sanjukila ovina o kuete, ci ku kuatisa ndati?
O lekisa ndati okuti wa kolela kohuminyo ya Yehova yoku kuatisa afendeli vaye?
OCO O KŨLĨHE OVINA VIKUAVO
Konomuisa nda Embimbiliya li tenda olombongo ndocina cimue cĩvi.
“Anga hẽ Olombongo Olumbombo Luovina Viosi Vĩvi?” (Ocipama ci sangiwa lika vo Internet)
Lilongisa ndomo tu talavaya lolombongo vietu oco tu sanjuise Suku.
“Nye Embimbiliya li Popia Catiamẽla Kocituwa Coku Eca?” (Ocipama ci sangiwa lika vo Internet)
Omapalo yoku nganyala olombongo, omapalo yimue yĩvi?
“Ndomo Embimbiliya li Tenda —Omapalo Yoku Nganyala Olombongo” (Omasuli!, Yelombo 2015)
Tala eci ca vetiya ulume umue oku liwekapo oku lingainga omapalo yoku nganyala olombongo kuenda oku nyana.
“Nda Solele Calua Olomapalo Vioku Yoloka Lolokavalu” (Utala Wondavululi 1 wa Kuvala 2011)