Teyuila Elongiso Lia Suku

“Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.”−OLOSAPO 3:5,6.

1. Oloneke vilo ndamupi kukasi loku sandekiwa vali calua asapulo atiamẽla kukulihiso womanu okuti kotembo yosimbu cisule?

OTEMBO yilo, voluali luosi muli eci cisoka 9.000 kovikanda viasapulo vikasi loku sandekiwa eteke leteke. Kofeka yo Estados Unidos ño lika, unyamo lunyamo kusandekiwa eci cisoka 200.000 kalivulu okaliye. Ndomo calomboluiwa la vamue va kua ku konomuisa , kosãi Yelombo yunyamo wo 1998, kua kala eci cisoka 275 kolohuluwa viovikanda viasapulo vo Web page vio internt. Ekonomuiso liaco eli lialekisa okuti osãi losãi ku kasi oku vokiyiwa eci cisoka 20 kolohuluwa viovikanda viasapulo. Calitepa leci ca kala kotembo yosimbu, pole, kaliye omanu vakuete olonjila vialua vioku yeva asapulo atiamẽla kovina viñi viñi. Ndaño okuti eci cikuete olonepa vimue viwa, asapulo aco asiatavo oku nena ovitangi vialua.

2. Ovitangi vipi viyilila koku yevelela asapulo alua?

² Kuli omanu vamue va tekela vali calua koku kulihisa asapulo veteke leteke soketi lalimue eteke yikatẽlisiwa, pole kavakapiko ovina vikuete vali esilivilo liocili. Vakuavo va konomuisa asapulo atiamẽla kovina vimue viatatama, kuenje omanu va vililongisa, noke va fetika oku sima okuti va tẽla calua. Omo okuti ka vakuete elomboloko liasuapo, pamue vanõlapo oku kuama onjila ka yasungulukile okuti noke yinena ovitangi kokuavo muẽle kuenda kuvakuavo. Kuenje olonjanja viosi kuli ohele yoku kulihisa asapulo uhembi ale ana okuti ka asungulukile. Olonjanja vialua okuti kakuli onjila layimue yakoleliwa vali okuti yecelela oku kuliha nda asapulo aco asunguluka ale ka asungulukile.

3. Alungulo api asangiwa Vembimbiliya atiamẽla koku konomuisa uloño womanu?

³ Ocili okuti ocituwa caco eci cosiata casiata calua komanu. Ohele yoku pesila otembo yakahandangala koivna vimue ka vi silivilla ale yoku konomuisa asapulo ka asungulukile yakulihiwile ale koloneke via Soma Salomone. Eye wa popia hati: “Lunguka lelilongiso limue liñi. Momo oku sovola alivulu a lua ka ku sulila, kuenje okulilongisa enene ku kavisa etimba.” (Ukundi 12:12) Noke eci papita ovita vimue vianyamo, upostolo Paulu wasonehela Timoteo hati: “Lava eci ca kundikiwa kokuove. Yuvula olondaka vietombo, levi viumamõhe, lolonamalala violondunge viesanda. Vamue poku sakalala lavio va lipumbisa ekolelo.” (1 Timoteo 6:20,21) Omo liaco, oloneke vilo Akristão vasukila oku yuvula asapulo eyuka ovisimilo ka viasungulukile.

4. Ndamupi tulekisa ekolelo lietu ku Yehova kuenda kalongiso aye?

⁴ Omanu va Yehova ciwa okuti va kuama olondaka visangiwa kelivulu Liolosapo 3:5,6, oku tu tanga ndoco: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.” Voku kolela Yehova muakongelako oku likala ovisimilo vina okuti ka vilitava Londaka ya Suku, cikale okuti ovisimilo viaco vietu muẽle ale pamue viaeciwa la vakuetu. Oco tuteyuile ekalo lietu kespiritu, cavelapo okuti tupindisa olondunge vietu oco tutẽle oku limbuka asapulo eyuka ovisimilo vivi okuti tu a yuvula. (Va Heveru 5:14) Tukonomuisi olono vimue viasapulo aeco.

Onepa Yimue Yoluali Yikasi Peka Lia Satana

5. Yipi hẽ ono yimue yasapulo eyuka ovisimilo vialua vivi, kuenda helie okasi konyima yaco?

⁵ Oluali lulo oluo ono yasapulo eyuka ovisimilo vialua vivi. (1 Va Korindo 3:19) Yesu Kristu wa likutilila ku Suku kueci catiamẽla kolondonge viaye hati: “Si pingi okuti o vopa voluali, te okuti o va teyuila keviho.” (Yoano 17:15) Yesu wa pinga ku isia yaye oco ateyuile olondonge viaye “keviho,” momo wa kulihile okuti Satana okasi muẽle oku yapula oluali. Ndaño okuti Tuakristão ka ci tu teyuila kovituwa vivi violuali lulo. Yoano wa soneha ndoco: ‘Tu ci okuti tua tiamẽla ku Suku, pole oluali luosi lu kasi povaka Eliapu.’ (1 Yoano 5:19,) Capiãla enene koloneke vilo viasulako ceci okuti, tulete Satana kumue lolondele viaye, vakasi oku yukisa oluali lulo lasapulo eyuka ovisimilo vivi.

6. Citava hẽ ndati okuti ovitalukilo violuali vi tu kokela oku sina okuti ovina vimue ka viasungulukile vi tu lingila soketi via sunguluka?

⁶ Tukevelelavo okuti pokati kasapulo aeco a–a eyuka ndeti ovisimilo vivi, amue alekisiwa soketi mbi ka a koki ohele. (2 Va Korindo 11:14) Pole, kulihisa handi ovitalukilo vikasi mulo voluali, ndeci ovipama via siata oku lekisiwa vo Televisão volosinema, vovisikilo, vovikanda viasapulo, kuenda valivulu. Omanu valua va tava okuti onepa yalua yovitalukilo yivetiya oku kuama ovituwa vivi ndeci, ukahonga, ungangala, kuenda oku sipa elimba. Onjanja ya tete eci omanu va tala ocitalukilo cimue okuti cilekisa ovina vimue kaviasungulukile, pamue civasumuisa pole nda vamamako loku tala ovitalukilo viaco, noke vafetika oku popia hati, viasunguluka kuenda ka vi va kokela vali ohele. Lalimue eteke ka tu ka simi hati ovitalukilo vimue vivetiya ovisimilo vivi, vi taviwa ale ka vikoki ohele.−Osamo119:37.

7. Uloño upi womanu okuti upondola oku tepulula ekolelo lietu Kembimbiliya?

⁷ Konomuisa ono yimue yikuavo yeyukavo asapulo ãvi. Ono yaco yovisimilo viñi viñi viasita oku sandekiwa lolonoño vimue kuenda lalongisi vo kolosikola viavelapo, vana va kua ku likolisilako oku sandeka asapulo a kapa omanu vatatahãi oco ka va ka kolele Kembimbiliya. (Cisokisa la Tiago 3:15.) Asapulo aeco, okuti olonjanja vialua asandekiwila volorevista lo valivulu oluali ana asoliwe vali calua lomanu, apondola oku tu yapula oco ka tu kakolele vali Embimbiliya. Omanu vamue vasole calua oku seteka oku tepulula unene Wondaka ya Suku lalomboluilo amue oku luvikiya ño, okuti ka a tuala konjila layimue yasunguluka. Ocituwa caco eci civi cakalavo koloneke viovapostolo Paulu wa popia hati: “Lunguki sanga umue o nyõla etavo liene lovilongua viesanda liaño. Va sole oku tõlisa ño ovisila viomanu lovihõlo violuali, vina ka via tundile ku Kristu.”−Va Kolosai 2:8.

Vava Va Suvuka Ocili

8, 9. Omanu vatomba ondaka ya Suku valilekisa hẽ ndati oloneke vilo?

⁸ Omanu vatomba ondaka ya Suku citava okuti va kapa kohele ekalo lietu kespiritu. Kotembo yosimbu, upostolo Paulu wa popele ale hati omanu vatomba Ondaka ya Suku vaka liyombeka pokati Kakristão valitumbika muẽle ocili. (Ovilinga 20:29,30; 2 Va Tesalonike 2:3) Olondaka viaye vieya oku tẽlisiwa, momo, noke yokufa kuovapostolo, omanu vatomba Suku veya oku livokiya kuenda va sovola etavo Liakristão Vesanda. Oloneke vilo, ka kueceliwa vali okuti pokati komanu va Suku, pakala vana vatombavo Ondaka ya Suku. Omo liaco, omanu vamue vasiapo ocili, kuenje cilo va ñualelapo Olombangi via Yehova loku sandula olombonde kuenda asapulo uhembi. Vamue vakasi oku talavaya lovimunga vikuavo oco va lambalale efendelo liocili. Omo lioku kuama onjila eyi, ovo vatiamẽla konepa ya Satana, una wa tomba tete ondaka ya Suku.

⁹ Omanu vamue va tomba ondaka ya Suku, vakasi oku kuama olono viñi viñi viasapulo okukongelamo o Internet, oco va sandule asapulo vuhembi ana okuti ha ociliko kueci catiamẽla Kolombangi via Yehova. Noke, eci omanu vakuotima wa sunguluka vakonomuisa etavo lietu, ovo pamue va yeva asapulo uhembi atunda komanu vatomba ondaka ya Suku. Vimue Olombangi via Yehova omo okuti ka viakulihile kono asapulo aeco atunda, viasiatavo oku tanga asapulo aeco eyuka ovisimilo vivi. Handi vali, omanu vatomba Suku vasiatavo oku lekisa ovipama viavo vo televisão kuenda vo rádio. Onjila yipi hẽ yasunguluka tu sukila oku nõla lolondunge okuti oyo tu kuama kueci catiamẽla koku tala ale koku yevelela ovipama viaco?

10. Onjila yipi yolondunge tusukila oku kuama kueci catiamẽla kalongiso vomanu vatomba ondaka ya Suku?

¹⁰ Upostolo Yoano wa lungula Akristão oco ka va katambule volonjo viavo omanu vatomba ondaka ya Suku. Eye wa soneha ndoco: “Umue nda iya kokuene kuenje ka ambatele ovilongua viaco ko ko tambuli vonjo ndaño oku u lama. Momo u u lama wa tava kovilinga viaye vivi.” (2 Yoano 10,11) Nda tua yuvula omanu vaco ava, cika tu teyuila kovituwa viavo vivi. Oku yevelela alongiso omanu vatomba ondaka ya Suku, pokati kolono viñi viñi viamako calua viasapulo, cikasi muẽle ndoku tambula omanu vaco vonjo yetu. Lalimue eteke ka tu ka kuati osiata yoku seteka oku kuama onjila yaco eyi yinena ovitangi!−Olosapo 22:3.

Vokati Kekongelo

11, 12. (a) Yipi ya kala ono yasapulo eyuka ovisimilo vivi vakongelo kocita catete canyamo? (b) Akristão vamue valueya hẽ ndati oku teyuila elongiso lia Suku?

¹¹ Kulihisa vali handi ono yikuavo yasapulo eyuka ovisimilo vivi. Ndaño okuti Ukristão walitumbika kayongola oku longisa uhembi , citava okuti olekisa ocituwa coku vangula lukãlu okuti tete kasokolola vali. (Olosapo 12:18) Omo okuti etu tumanu katualipuile, olonjanja vimue vosi yetu tulueya lelimi lietu. (Olosapo 10:19; Tiago 3:8) Omo liaco, koloneke viovapostolo, vekongelo mua kala omanu vamue okuti ka va likandangayaile, ovo valueyaile lelimi liavo, kuenda vaenda oku litenga volondaka vikoka olonamãlala. (1 Timoteo 2:8) Muakalavo vamue vasimaile okuti ovisimilo viavo ovio viavelapo vali okuti via vakuavo visule kuenda vaenda loku sunumula upostolo Paulu. (2 Va Korindo 10:10–12) Ocituwa caco eci, ceya oku nena ovitangi vialua.

¹² Olonjanja vimue olonamãlala viaco evi viaenda loku sulila ‘vonjuela pokati kavo,’ kuenje vekongelo ka muakaile vali ombembua. (1 Timoteo 6:5; Va Galatia 5:15) Catiamẽla komanu vanenaile ovitangi viaco, Paulu wasoneha ndoco: “Umue nda o longisa ovilongua vimue viñi, kuenje ka tava kolondaka viocili via Ñala yetu Yesu Kristu lo kovilongua via longisa okutuwa nda Suku, ca lomboloka okuti omunu waco wa lituna ño esanda, ka kulihile cimue; o mamõha lolondaka lolomata vi koka onya lema, loku imbula, lalundi.”−1 Timoteo 6:3,4.

13. Ovituwa vipi vialekisiwa Lakristão valua vakuekolelo kocita catete canyamo?

¹³ Cisanjuisa vali enene ceci okuti, koloneke viovapostolo, onepa yalua Yakristão vakuatele ekolelo liocili, kuenda valitumbikile muẽle ocili kupange woku kunda olondaka viwa Viusoma wa Suku. Ovo valitumbikilevo kupange woku lembeleka ‘olosiwe lovimbumba kolohali viavo,’ kuenda ‘oku lilava ovo muẽle keliño lioluali.’ (Tiago 1:27) Oco va lave ekalo liavo kespiritu, ovo va yuvowailevo oku nõla “akamba vãvi” vana okuti Akristão muẽle vakalavo vekongelo.−1 Va Korindo 15:33; 2 Timoteo 2:20,21.

14. Nda ka tualungukile, citava hẽ ndati okuti ombangulo yovisimilo via sunguluka, yilinga ombangulo yimue yikoka ohele?

¹⁴ Ocili okuti, ovitangi viatukuiwa ndeti kocinimbu 11 ka viasiatele oku pita olonjanja viosi Lolombangi via Yehova koloneke vilo. Pole, cavelapo okuti tu kulihisi ciwa uvi wiyilila kolonamãlala viaco. Ocili okuti kaciviko oku vangula kueci catiamẽla kovolandu asangiwa Vembimbiliya, ale oku konomuisa ovina vimue viatiamẽla kolohuminyo violuali luokaliye okuti ka viasituluiwile handi. Kuenda ka civikovo oku vangula ovina vietu muẽle ndeci, evi viatiamẽla kuwalo, koku linpongiya, ale koku nõla ovitalukilo. Pole, nda tua fetika oku luvikiya ovihandeleko vietu muẽle, kuenje, eci tulimbuka okuti vakuetu ka va tava kueci etu tu yongola, tu fetika oku sumua, ovituwa viaco evi citava okuti, vinyõla elitokeko vekongelo. Kuenje ndaño ondaka yimue yimõleha soketi ka yikuete esilivilo liocili, pamue citava okuti yipongoluiwa vovisimilo vikoka ohele.

Oku Lava Ciwa Eci Cakundikiwa Kokuetu

15. ‘Ovilongua vieliapu’ vipondola ndati oku nyola ekalo lietu konepa yespiritu, kuenda Embimbiliya lieca elungulo lipi?

¹⁵ Upostolo Paulu wa lungula hati: “Cilo Espiritu li popia longusu, halatatahãiko, liti, kotembo yesulilo vamue va[ka] konyoha ketavo ha va yevelela kaspiritu uhembi lo kovilongua vieliapu.” (1 Timoteo 4:1) Ocili okuti kuli muẽle asapulo eyuka ovisimilo vivi akoka ohele, kuenda tu sukila oku lunguka. Omo liaco, Paulu wa lungula ekamba liaye Timoteo hati: “A Timoteo, lava eci ca kundikiwa kokuove. Yuvula olondaka vietombo, levi viumamõhe, lolonamalala violondunge viesanda. Vamue poku sakalala lavio va lipumbisa ekolelo.”−1 Timoteo 6:20,21.

16, 17. Nye Suku a tu kundika, kuenda tu kuete oku cilava ndati?

¹⁶ Oloneke vilo tu kuatisiwa hẽ ndati lelungulo eli liocisola? Timoteo wa kundikiwile ocina cimue cikuete esilivilo oco a cilave kuenda oku ci teyuila. Ocina caco nye? Paulu olombolola hati: “Pokola kolondaka viocili wa yeva kokuange. Vi pokola vekolelo locisola vi kasi vu Kristu Yesu. Lava ocili cina ca kundikiwa kokuove le Espiritu Sandu o kasi vokati ketu.” (2 Timoteo 1:13,14) Ocili okuti, vovina via kundikiwile Timoteo, mua kongelele ‘olondaka viocili, kuenda ‘ovilongua vi longisa oku tuwa nda Suku.’ (1 Timoteo 6:3) Oku ci tiamisila kolondaka evi, Akristão voloneke vilo va likolisilako oku teyuila ekolelo liavo kuenda ocili ca va kundikiwa.

¹⁷ Oku teyuila ovina viaco evi tuakundikiwa ndeti, muakongela oku lekisa ovituwa ndeci, oku kuata onjongole yoku lilongisa Embimbiliya, kuenda oku kuata epandi koku linga olohutililo, osimbu ‘tulinga eci ciwa komanu vosi, capiala vali enene ku vakuetu vakuetavo.’ (Va Galatia 6:10; Va Roma 12:11–17) Paulu wamisako vali oku lungula hati: “Kuama esunga, loku fendela Suku, kuenda ekolelo, locisola, lepandi, kuenda usima, Yaka uyaki uwa wekolelo. Kuatela omuenyo ko pui una wa kovongiwila eci wa lekisa etavo liove kovaso olombangi via lua.” (1 Timoteo 6:11–12) Paulu wa tukula olondaka hati, “yaka uyaki uwa wekolelo,” kuenda “kuatelela omuenyo ko pui,” vilekisa okuti tu sukila oku yaka longusu yetu yosi, kuenda oku panamãla oco ka tu kayapuiwe lasapulo eyuka ovisimilo vivi.

Cisukila Oku Lunguka

18. Ndamupi etu Tuakristão tupondola oku lekisa ocituwa casunguluka kueci catiamẽla koku yevelela asapulo oluali?

¹⁸ Ocili okuti, oco tu yake uyaki uwa wekolelo, tu sukila oku lunguka. (Olosapo 2:11; Va Filipoi 1:9) Pole, ka casungulukile oku yuvula ovina viosi viatiamẽla kasapulo oluali. (Va Filipoi 4:5; Tiago 3:17) Haviosiko ovisimilo viomanu okuti ka vilitava Londaka ya Suku. Yesu wa popia eci catiamẽla komanu va kala loku vela oco va sandiliye umue ndotolo okuti ukuoloño woluali. (Luka 5:31) Ndaño okuti koloneke via Yesu ka kua kalele ño enene uloño walua watiamẽla koku sakula omanu, Yesu, wa kulihile okuti ku tunda ekuatiso limue lieca uhaeyele ketimba. Akristão oloneke vilo, va lekisa ocituwa casunguluka kueci catiamẽla kasapulo oluali okuti ka va pembula ño asapulo osi, pole va kulihisa lutate asapulo eyuka ovisimilo vivi oco ka aknyõle ekalo liavo kespiritu.

19, 20. Ndamupi akulu vekongelo vasukila oku lunguka eci va vilikiyiwa oco va kuatise vana va kua ku vangula olombonde? (b) Nye hẽ akulu vekongelo vakuete oku linga la vana va tamãlala loku longisa ovilongua viesanda?

¹⁹ Akulu vekongelo va sukilavo oku lunguka eci va vilikiyiwa oco va kuatise vana vakuaku vangula olombonde. (2 Timoteo 2:7) Olonjanja vimue, ovimatamata viekongelo citava okuti vilihoyisa omo liolondaka vimue ño okuti ka pali la umue okonomuisa nda olondaka viaco viocili ale sio. Oco akulu vekongelo va teyuile elitokeko liekongelo, te va yayulako oku tetulula lonjanga ovitangi viaco. Kuenda, ovo te va yuvula oku vetela evelo vamanji, kuenda ka casungulukile okuti va yayulako oku sima okuti vamanji yapa kaliye valinga vakuakutomba ondaka ya Suku.

²⁰ Paulu walombolola ndomo ekuatiso liaco citava okulieca. Eye wapopia hati: “A vamanji, nda umue wa kuatiwa lokulueya kumue, ene wakue Espiritu u tiuli lutima womboka.” (Va Galatia 6:1) Poku lombolola eci catiamẽla Kakristão vana okuti vakala oku liyaka latatahãi, Yuda wasoneha ndoco: “Tavisi vamue vakuatatahãi pokati kavo. Popeli vamue loku vopa vondalu.” (Yuda 22,23) Ocili okuti, nda noke yoku lungula omunu umue olonjanja vialua eye lopo handi wa tamãlala loku longisa ovilongua viesanda, akulu vekongelo vakuete oku linga cimue, oco vateyuile ekongelo.−1 Timoteo 1:20; Tito 3:10,11.

Tuyukisi Ovitima Vietu Lovina Viesivayo

21, 22. Kovina vipi tusukila oku nõla ciwa lutate, kuenda vovitima vietu tukuete oku yukisamo lovina vipi?

²¹ Akristão vekongelo vayuvula olondaka vieyuka ovisimilo vivi okuti “vi takila ndepute liosembuembue.” (2 Timoteo 2:16,17; Tito 3:9) Tusukila oku yuvula olondaka viaco, cikale okuti viatiamẽla ‘kolondunge’ violuali, ale vina vi vetiyiwa lomanu vatomba ondaka ya Suku, ale cikale via vana va vangulaño okuti ka vasokolola vali ciwa va sangiwa vekongelo. Ndaño okuti onjongole yasunguluka yoku lilongisa cimue cokaliye yipondola oku tu kuatisa, tu sukila oku lunguka momo osiata yapiãla citava okuti yi tu tuala koku konomuisa asapulo eyuka ovisimilo vivi. Etu katukasi vonumbi kueci catiamẽla katutu a Satana. (2 Va Korindo 2:11) Tua kuliha okuti eye okasi oku likolisilako oco a tu tateke kuenda oco tusiepo upange wetu watiamẽla ku Suku.

²² Omo okuti etu tulondingupange viwa, tuteyuili elongiso lia Suku. (1 Timoteo 4:6) Tukuete oku lunguka kueci catiamẽla koku pesela otembo yetu. Te tua nõla ciwa lutate asapulo tuyevelela. Nda tua kuama onjila eyi, ka tu kayapuiwa lasapulo uhembi atunda ku Satana. Omo liaco, tu kapiko: “Cosi ca sumbiwa, cosi cesunga, cosi ca pua eviho, cosi ca posoka, cosi ci sivayaiwa, nda kuli esunga, kuenda nda kuli eci ci sesamela oku sivayiwa.” Nda vovitima vietu tua yukisamo lovina viaco evi, ombembua ya Suku yika kala letu.−Va Filipoi 4:8,9.

Nye Tualilongisa?

• Momo lie ovoloño amue aluali a kapela kohele ekalo lietu kespiritu?

• Nye tu pondola oku linga oco tu liteyuile etu muẽle kasapulo eyuka ovisimilo vivi?

• Etu tukasi vekongelo tusukila oku yula ocituwa cipi catiamẽla koku vangula?

• Ndamupi esunguluko Liukristão li lilekisila kueci catiamẽla koku tanga ale koku yevelela asapulo añi añi olonbeke vilo?

[Elitalatu kemela 21]

Vialua olorevista kuenda alivulu okuti ka vilitava lomuenyo wetu Tuakristão

[Elitalatu kemela 22]

Akristão citava okuti va vangula eci catiamẽla kolondaka viñi viñi, pole ka casungulukile okuti va luvikiya ovihandeleko viatiamẽla kolondaka viaco