Alomboluilo Asuapo

NYE ci pondola oku lingisa okuti Ukristão o sapula cimue okuti hacociliko? Eye pamue o pitulula ño oku sapula cimue a yeva, okuti ka kũlĩhĩsa vali nda ocili ale nda ndati. Ale pamue o vokiya alomboluilo amue kondaka yimue, omo poku yi konomuisa ka tẽlele oku kuata elomboloko liwa liondaka yaco. Eci tu kuata utate woku sapula ocili, ndaño muẽle kovina vitito, olonjeveleli vietu vika limbuka okuti ci tava oku kolela kovina via velapo viondaka tu kasi loku sapula.

Kupange Woku Kunda. Vamue eci va limbuka okuti kua va kambela handi calua coku lilongisa, va kuata ohele yoku fetika oku kuata onepa kupange woku kunda. Pole, ka pa piti otembo yalua haico va limbuka okuti va tẽla oku kunda ciwa, ndaño muẽle lukũlĩhĩso wa pita ño pokati. Ndamupi hẽ? Uloño waco, oku lipongiya ciwa.

Osimbu handi kua endele kupange woku kunda, kũlĩhĩsa ciwa ondaka o yongola oku ka vangula. Sokolola apulilo amue pamue olonjeveleli viove vika linga. Sandiliya atambululo awa atiamẽla kapulilo aco Vembimbiliya. Eci cika ku kuatisa oku lipongiyila oku eca atambululo asuapo lutima wa tula. Anga hẽ oka songola elilongiso limue Liembimbiliya? Konomuisa ciwa lutate ocipama cika longisiwa. Kũlĩhĩsa okuti o kuete elomboloko liwa liovisonehua vieca etambululo kapulilo a sangiwa velivulu.

Nda hẽ omunu ove wa sanga, ale yu u talavayela kumosi wa ku linga epulilo limue okuti ove kua konomuisile handi etambululo liaco? Nda kua kolelele ketambululo eca, tamalãla keyonjo lioku tãha ño etambululo. “Ondingesunga yi sokolola eci a tambulula.” (Olosap. 15:28) Ove ci tava okuti o sanga ekuatiso li sukiliwa velivulu Raciocínios à Base das Escrituras ale vovipama vi tukuiwa hati “Tópicos Bíblicos Para Palestrar”, vi sangiwa Vembimbiliya Tradução do Novo Mundo das Escrituras Sagradas. Nda ku kuete lacimue pokati kevi via tukuiwa ndeti, u sika okuti oka konomuisa ciwa ondaka yaco kuenje oka tiuka eteke likuavo. Nda omunu wa linga epulilo liaco ukuacili, kokuaye ka ci kala ocitangi oku kevelela etambululo lia suapo. Ocili okuti eye oka komõha calua omo liumbombe wove.

Oku talavaya vupange woku kunda lakundi va loñoloha cika ku kuatisa oku loñoloha koku kunda ciwa Ondaka ya Suku. Tala ovisonehua ovo va tanga kuenda ndomo ovo va vi lombolola. Tava lumbombe kolonumbi ale kepindiso ovo va ku ĩha. Ndonge ukuambili Apolosi wa tavele kekuatiso a tambuile ku vakuavo. Luka wa tukuile Apolosi hati, “onoño yoku kunda,” kuenda hati, “wa loñoloha lovisonehua,” haeye “ukuambili yovutima,” okuti ulume umue “wa sapula loku longisa lutate ovina via Yesu.” Pole kua kambele cimue kelomboloko liaye. Eci Prisila la Akuila va ci limbuka, vo “pañinya kuenje vo wimba onumbi ya velapo yonjila ya Suku.”​—Ovil. 18:24-28.

“Kolela Lika Ondaka Yocili.” Olohundo vietu vekongelo te vi lekisa esumbilo liocili tu kuetele ekongelo okuti “olio ongunji yi talamisa ocili hailio onjaka yaco.” (1 Tim. 3:15) Oco tu teyuile ocili, ci kuete esilivilo liocili oku kuata elomboloko liovisonehua tua sokiya oku ka tanga volohundo. Kapako eci ci lomboluiwa vulandu waco wosi kuenda esunga via sonehiwila.

Eci ci popiwa vohongele yimue yekongelo ci tava okuti ci setukuiwa. Ocili okuti “etu vosi tuakuaku lueya lueya.” (Tia. 3:2) Pole ove oka kuatisiwa nda wa likolisilako oku kuata ovituwa viupopi uwa. Vamanji valua alume vana va lisonehisa Kosikola Yupange Wakristão, vokuenda kuotembo vaka kala akulu vekongelo. Vosi va ihĩwa ocikele caco eci, kokuavo ku “kisikiwa ca lua.” (Luka 12:48) Nda ukulu wekongelo ka kuatele utate kuenje wa eca onumbi yimue ka ya sungulukile okuti kueyilila ovitangi vinene ku vamanji vekongelo, ukulu waco wekongelo o nyaliwa la Suku. (Mat. 12:36, 37) Omo liaco, manji wosi o yongola oku kala ukulu wekongelo, te wa kũlĩhĩwa okuti o “kolela lika ondaka yocili ndomo yo longisiwa.”​—Tito 1:9.

Kala lutate oco okuti alomboluilo ove a litava ‘lolondaka viocili’ ndomo vi sangiwa Vembimbiliya. (2 Tim. 1:13) Eci ka ci sukila oku ku yokokisa. Ove pamue handi kua malẽle oku tanga Embimbiliya liosi. Likolisilako oku ci linga. Pole osimbu o ci linga, kũlĩhĩsa ndomo olonumbi vikuãimo vi pondola oku ku kuatisa oku konomuisa ovipama o kasi loku sima oku ka lombolola velongiso liove.

Tete, lipula ove muẽle ndoco: ‘Anga hẽ ocipama eci ci likuata leci nda lilongisa ale Vembimbiliya? Cika vetiyila hẽ olonjeveleli viange oku tiamẽla ku Yehova ale cika kemãlisa ukũlĩhĩso woluali, okuti ci vetiya omanu oku kuama ukũlĩhĩso waco?’ Yesu wa popia hati: “ondaka yove oyo ocili.” (Yoa. 17:17; Esin. 13:1-5; 1 Va Kor. 1:19-21) Upa esilivilo liwa kovikuata vielongiso via siata oku eciwa locimunga cukuenje wa kolelua haeye wa lunguka. Eci ka cika ku kuatisa lika oku kuata elomboloko liwa liovisonehua, pole cika ku kuatisavo oku vi lombolola ndomo mua sunguluka. Nda wa tiamisila ohundo yove ‘volondaka viocili’ kuenda wa kolela kono ya Yehova yoku eca asapulo poku lombolola kuenda poku kapako ovisonehua, alomboluilo ove aka kala ocili.

Ndomo ku Konomuisiwa Alomboluilo Nda Ocili. Oku tukula asapulo oloneke vilo, loku tukula cimue ca popiwa, ale ovolandu amue, ci pondola oku ku kuatisa poku sokisa cimue kuenda poku kapako atosi amue. Ndamupi o pondola oku kuata ekolelo liokuti alomboluilo aco ocili? Yimue onjila, okupa ovina viaco kono ya koleliwa. Ku ka ivaleko oku konomuisa nda alomboluilo aco handi haimo a kasilili votembo yaco, momo alomboluilo atiamẽla katendelo, lakonomuiso olonoño, ka pa piti otembo yalua haico a pitahãliwa. Handi vali, osimbu omanu vamamako oku kuata elomboloko liasapulo kuenda lialimi o kosimbu, ovisimĩlo vimue viatiamẽla kukũlĩhĩso watete vi sukila oku pongoluiwa. Kuata utate walua nda o kasi loku sima oku lombolola asapulo amue a sangiwa vukanda wasapulo, vo televisão, vo radio, ale vo Internet. Kelivulu lio Olosapo 14:15 ku sangiwa elungulo lia linga hati: “U wa kamba olondunge o tava ño viosi, u wa lunguka [puãi] o kulĩhisa oku a enda.” Omo liaco, li pula ove muẽle ndoco: ‘Ono yaco eyi hẽ ya kũlĩhĩwa okuti yi sapula ocili? Anga hẽ olono vikuavo viasapulo vi pondola oku imbila uvangi esapulo liaco?’ Nda o kuete atatahãi atiamẽla kocili cesapulo limue, ku ka li vangule.

Ka ci tẽla lika oku konomuisa ocili colono viasapulo, puãi konomuisavo lutate ndomo oka lombolola asapulo aco. Kala lutate wokuti poku lombolola cimue ca popiwa, ale ceci catiamẽla katendelo, elomboluilo liove li likuata lulandu waco wosi omu viopiwa. Velikolisilo liove lioku eca ongusu katosi amue, kuata utate oco ondaka “omanu vamue” ka yi ka pongoloke “onepa yalua yomanu,” kuenda ondaka “omanu valua” ka yi ka pongoloke “omanu vosi,” kuenda “olonjanja vimue” ka yi ka pongoloke “olonjanja viosi.” Oku luluviya enene poku lombolola ovina vimue, atendelo, unene wocina cimue, ale cimue ci kokisa ohele, ci lingisa okuti olonjeveleli vi kuata atatahãi nda o kasi loku vangula muẽle ocili ale nda ndati.

Nda olonjanja viosi wa siata oku vangula ocili kueci o popia, oka kũlĩhĩwa ndomunu wa sumbila ocili. Eci cika eca uvangi uwa watiamẽla Kolombangi via Yehova omo vi kasilili ocimunga. Ca velapo vali handi ceci okuti cika eca esivayo ku ‘Yehova Suku yocili.’​—Osa. 31:5.