Ove Opondola Okupandikisa Toke Kesulilo

“Tu lupuki lepandi okulitunda tu kasi lakuo”—VA HEVERU 12:1.

1, 2. Okupandikisa cilomboloka nye?

“VU sukila epandi,” oco ca sonehela upostolo paulu Kakristão vokocita ca tete va Heveru. (Va Heveru 10:36) Okusinumũla esilivilo liocituwa eci cimosi haico upostolo petulu avetiya akristão hati: “Kekolelo liene vuvokiyako . . . epandi.” (2 Petulu 1:5, 6) Puãi epandi he nye?

² Yimue odicionariu Lexicon yo Helasi Longelesi yilekisa okuti ondaka ya “epandi” yilomboloka “Okutoñomala handi yokutokaka . . . okukola posi, lokupandikisa.” Catiamela ko Helasi okutukula epandi, elomboluilo limue lilekisa okuti: “Epandi olio likuete epondolo liokuliyaka lovina, pole hakutokokako, puãi lelavoko lialua . . . Eci ocituwa cimue cilingisa omanu oku tamãlala eci aliyaka lakatanga lovolu aye okuimba ocipala caye kovaso yofela. Unu owu wupondola okulundula oseteko yakãla toke vulamba mekonda kovaso yolongembia kumõlehela ocimãho.” Kuenje epandi lipondola okukuatisako umue okutalama muele ndĩ kovaso yovitangi viakãla kuenda katupumbi elavoko. Helie he o sukila capiãla enene ocituwa caco?

3, 4. (a) Helie o sukila okupandikisa? (b) Nye tu sukila okupandikisa toke kesulilo?

³ Akristão vosi vakasi volupesi lumue lusukila epandi. Kulima wo 65 O.K., upostolo Paulu wasonehela kekamba liaye liungende Timoteo haeye ukuekolelo olondaka evi vikolisa: “Nda yaka uyaki uwa. Oku yoloka nda mala. Koku tata ekolelo nda lipua.” (2 Timoteo 4:7) Lolondaka evi okuti “oku yoloka nda mala,” Paulu wakala lokusokisa omuenyo waye Ndukristão okasi volupesi, kuenda okasi okumalusula elila. Kotembo yaco, Paulu wakala lokuyula okupitila kesulilo lielila, laye wakalavo lokululuvalela lika kokutambula onima. “Keteke liaco,” eye wapopia hati, “pa siala ekolowa liesunga lia solekiwila. Ñala onganji yesunga o li eca kokuange.” (2 Timoteo 4:8) Paulu wakuata ekolelo liokunganyala onima mekonda eye wakuata epandi toke kesulilo. Tupopia he nye kokulipolako kuetu?

⁴ Okuvetiya ava vakasi, Paulu wa soneha hati: “Tu lupuki lepandi okulitunda tu kasi lakuo.” (Va Heveru 12:1) Omo okuti Tuakristão, eye tuaiñila volupesi olu luepandi eci tualitumbika etu muele ku Yehova Suku vu Yesu Kristu. Efetikilo liwa vetapalo liokukala ondonge likuete esilivilo lialua, pole eci cavelapo vali enene te tua mãla olupesi liaco. Yesu wa lombolola hati: “U opandakaisa Kuesulilo eye oka popeliwa” (Mateo 24:13) Onima yikevelela ava vamalusula elila letundilo liwa omuenyo kopui! Omo liaco, lokukuata ocimãho cavo vovisimĩlo tusukilavo okupandikisa toke kesulilo. Nye cika tu kuatisako oco tu tele ocimãho caco?

Eci cisukiliwa—Eteku Lisesamela

5, 6. (a) Poku pandikisa velila liokomuenyo, pi tu sukila okululuvala? (b)Eliangiliyo lie liespiritu etu tu sukila okuvelisapo etu muele, kuenda momo lie?

⁵ Ocipepi lolupale luo Korindo, o Grecia, yakala ocitumãlo cimue okuti kosiahũlu kuasiatele okulingiwa Olomapalo vio Istimico. Paulu kakaile letatahãi liokuti vamanji ko Korindo vakũlĩhĩle olomapalo viokulitunda lovina vikuavo viokuliyaka viakalakovo. Okutiamela kukũlĩhĩso wavo, eye wa va ivaluisako olupesi luokomuenyo muna okuti ovo momo vasangiwile hati: “Ka wa kũlĩhĩli okuti, eci kuli oku litunda, vasi va yoloka, umosi lika puãi otambula ekolowa liaco? Oco yoloki okuti wu li tambula.” Paulu wa lekisa esilivilo liokukala velila kuenda oku kuamelela lepandi toke kokusulila. Pole nye ca va kuatisa okucilinga? Eye wavokiyako hati: “Wosi oñila kolomapalo vioku litunda o lipokuisa kovina viosi.” Oco, okulitunda kolomapalo viosimbu casukilile okuti valipindisa longusu yalua, okucilinga lenyango kovina valia levi vanyua, lokulavulula ovopange avo osi oco va yule.—1 Va Korindo 9:24, 25.

⁶ Nye cipopiwa velila Akristão vaiñila ndeti? Ovo te o luluvala kokulia kuove kuespiritu nda okasi okupandikisa velila liokomuenyo,” eci oco capopia ukulu umue wekongelo Liolombangi via Yehova. Lilongisa okulia kuespiritu Yehova, “Suku yepandi” asiata okueca kokuetu (Va Roma 15:5) Ono yetu yavelapo yokulia kuespiritu Ondaka yaye, embimbiliya. Etu he katu sukila eliangiliyo liwa liokutanga Embimbiliya? Pokati ku “Ukuenje wa kolelua haye wa lunguka,” opo Yehova asiata okuecela Utala Wondavululi lo Despertai! Lalivulu akuavo akunamela Vembimbiliya. (Mateo 24:45) Lombili yalua okucililongisa eci cika tu pamisa kespiritu. Oco, etu tusukila okusanda epuluvi—‘liokupopela otembo yasesamela’—yokulinga elilongiso liopokolika.—Va Efeso 5:16.

7. (a) Momo lie katusanjukila lika okukũlĩha efetikilo liondotilina Yakristão? (b) Ndamupi pamue etu tusukila “ovina vi sesamela akulu”?

⁷ Okukala vetapalo lionndonge Wukristão tusukila okukapa kovaso ovina “viefetikilo liovilongua” kenda “kovina vi sesamela okulu.” (Va Heveru 6:1) Etu tusukila okuamamako konjongole yokukũlĩha “upati lusovi lokulepa kilu lokulonga” kuocili kuenda “okulia [kuaco] kua kola kuakulu.” (Va Efeso 3:18, Va Heveru 5:12-14) Upa ongangu ndeci, kasapulo akuãla omuenyo wa Yesu vongongo—Ovovangi a, Mateo, Marko la Yoano. Okulilongisa ciwa Ovovangi a, etu ka tu kũlĩha lika ovilinga Yesu apanga lakalo ndomo akala pole tulilongisavo olondunge okuti ovio vivetiya ovilinga viaye. Kuenje oco tupondola okukuata ‘ovisimilo via Kristu.’—1 Va Korindo 2:16.

8. Olohongele Viakristão vi tu kuatisa ndati9 okupandikisa velila liokomuenyo?

⁸ Paulu walungula vakuetavo okuti: “Tu sokololi ndomo tu tela oku livetiya pokati okukala ocisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo vu lete okuti eteke liaco li kasi ocipepi.” (Va Heveru 12:24, 25) Hanokuoyo yevetiyo olohongele Viakristão vikuete! Kuenda hekavulukokuolio okukala lavamanji alume lakãi vasoliwe vakuete onjongole letu kuenda vayongola oku tu kuatisako okupandikisa toke kesulilo! Etu kacitava okuti tukuata owesi keliangiliyo eli liocisola ca Yehova. Pokati kombili yetu yokulilongisa pokolika kuenda olonjanja viosi okuendaenda kolohongele, ‘kolondunge tu linga ndakulu vendamba.’—1 Va Korindu 14:20.

Vakuakutala Vakuvetiya

9, 10. (a) Lonjila ye vakua kutala vapondola oku kala ono yekoliso loku pandikisa velila? (b) ‘Elende linene liolombangi’ lia tukuiwa ko va Heveru 12:1 nye?

⁹ Catiamela ku olupuka nda kaliangiliyile ciwa, ovina vipongoloka okuti vokuenda kuotembo viukokela okukonyõha. Paulu wa pula hati: “Wa kaili loku enda ciwa, cilo helie wo tateke okuti ko pokoli vali kocili?.” (Va Galatia 5:7) Ocili muele, vamue Akristão va Galatia vakala lakamba velila liavo liokomuenyo. Konepa yikuavo, ekuatiso levetiyo litunda kuvakuetu lipondola okulingisa okuti alila aleluka omo liokukuata epandi. Eli olio elinga likuete okuti vakuakutala olomapalo kuavana vakuata onepa komapalo yaco. Esanju liowiñi likokisa ombili okuvetiya vakuakulitunda tunde kefetikilo toke eci va mulusula. Olondaka viesivayo viava vacilete, olonjanja vialua viendaila kumuamue locisikilo kuenda okusika afiengu oco vipondole okueca evetiyo kuava va panga onepa okuti ovio va sukila toke eci mala. Ocili, evetiyo liwa lia vakuakutala lipondola okukokela owuya valua ava vakasi velila.

¹⁰ Velila liokomuenyo Akristão vaiñila ndeti velie vakuakutala? Noke yokulombolola etendelo liakristão olombangi via Yehova vakuekolelo, ndomo ca lomboluiwa vocipama 11 ca Va Heveru, paulu wa soneha hati: “Oco letuvo, omo tua ñualiwa lelende linene ndeli liolombangi, . . . tu lupuki lepandi okulitunda tu kasi lakuo.” (Va Heveru 12:1) Omo liokutukula elende, Paulu ka kuamele ondaka yo Helasi yilombolola okulepa, kapopelele vasendeleke elende liokutukula unene lupati. Haimo lumue, eye wa tukula yimue okuti yilikuata la W.E. Vine usonehi wodisionariu “cilomboloka yimue yalende, asitika ilu liosi.” Lulelu, Paulu vovisimĩlo viaye wakahandangala wolombangi— vialua okuti va setahãisua londunda yalende.

11, 12. (a) Akristão olombangi vakuekolelo vokotembo yale ndomo ovo vakala vapondola ndati okupamisa epandikiso lietu velila? (b) Ndamupi tu sumũlũisiwa ‘lelende linene liolombangi’?

¹¹ Akristão vakala olombangi viokotembo yale etaili he vapondola okukala vakuakutala? Citilã. Ovo vosi yavo vapekela volofa, lokukevelela epinduko kuenje, ovo vakala ovo muele vakuakulupuka kuenda cavatunda ciwa eci vapitila, kuenda olongangu viavo visangiwa vamela Embimbiliya. Etu pokutunda Ovisonehua, omanu vaco vakuekolelo vapondola okuiya vovisimĩlo vietu kuenda tu pondola okueca olopandu kokuavo ndomo vakala, okulupuka velila toke vamãla—Va Roma 15:4.a

¹² Ndeci, nda ayonjo oluali a tu seteka, kacasungulukile he okusetukula ndomo Mose a likala ovolamba oke Egito okuti cituvetiya okukala velila? Nda okuti tukasi lokusetekiwa locitangi cimõleha okuti cakãla, okusokolola oseteko ya Avirahama cina a pingiwa oco alumbe omõlaye Isake cipondola muele oku tu pamisa pole okutokoka kekolelo sio. Elivokiyo liaco ‘lielende linene’ liolombangi vina nda lituvetiya konepa eyi catiamela ndomo tuvalete lelomboloko lietu kutima.

13. Lonjila ye Olombangi via Yehova etaile vipandikisa velila liokomuenyo?

¹³ Etu tuañualiwavo lowinĩ wakahandangala Wolombangi via Yehova kolotembo vilo. Halongangukuovio viekolelo viasiata okulekisiwa Lakristão olombuavekua ndalume lakãi okuti “Owiñi wakahandangala”! (Esituluilo 7:9) Etu tutanga asapulo omuenyo waco otembo lotembo vorevista yilo kuenda valivulu akuavo o Sociedade Torre de Vigia.b Osimbu tu sokolola ekolelo liavo tukasi lokukolisiwa oco to pandikise toke kesulilo. Kuenda eci cikomohisa calua okukuata ekuatiso liakamba vocili vakasi okuvumba Yehova lekolelo! Oco, etu tukuate ovina vialua oco vitukuatise valila lio komuenyo.

Tumbika Olupesi Luove Lolondunge

14, 15. (a) Momo lie cikuetele esilivilo okutumbika ciwa olupesi luetu lolondunge? (b) Momo lie casungulukila okukuata ovimãho?

¹⁴ Nda okulupuka kulingiwa vocinãla cisõvi, ndeci o maratona, ukuakulupoka elianga liaye olinalula lolondunge. O revista yimue yo New York Runner yalombolola hati: “Okufetika okulupuka lolupesi lualua citava okuti ci sulila vehonguo.” “Esulilo liaco vokuenda kuocinãla cosi casupako ekatanga limue linene ale okukupuka.” Umue wa yoloka omaratona waivaluka hati: “Ohundi kelongiso limue ame ndakala veliangiliyo liolupesi ocili walungula hati: ‘kuka seteke okulisokisa lava va lianga lolupesi. Lupuka ndeci elianga liove liecelela. Konepa yikuavo okakuata ekavo lialua kuenda citava okuti oka kupuka.’ Okuyevelela kelungulo liaco ca ñuatisa okumãla alila.”

¹⁵ Okuyolokela velila liokomuenyo, omanu va Suku vasukila okulikolisilako calua ovo muele. (Luka 13:24) Omo liaco, ondonge Tiago ya soneha hati: “Olondunge viokilu . . . va sunguluka.” (Tiago 3:17) oco ongangu ya vakuetu valua citava okuti yitukolisa vali enene, lesunguluko yi ka tukuatisa okukuata ovimãho viwa lokutela kuenda akalo etu aecelela. Ovisonehua vi tu ivaluisa okuti: “Omunu omunu a kũlĩhise upange waye, oco a lipande eye muele, oku lipandiyila ukuavo hacoko. Momo omunu omunu ambata ocitele caye muele.”—Va Galatia 6:4, 5.

16. Ndamupi esuluviko li tu kuatisako okutumbika ciwa olupesi luetu?

¹⁶ Kelivulu lia Mika 6:8, tukasi okupulisiwa ndoco: “Amanu, Suku wa ku lekisa eci ciwa, Yehova oyongola nye kokuove, hateko . . . oku endaenda la Suku yeve lesuluviko?” Vesuluviko muakongela okulimbuka akambo etu. Okuhongua kuhayele vetu ale okuamako kanyamo omuenyo wetu kukokisa akambo tulinga vupange wa Suku? Ka tu ka pongoloki vakualukonyo. Yehova otava alikolisilo etu lovilumba ‘ndeci tu kuete. Suku ka kisika eci katukuete.’—2 Va Korindo 8:12; cisokisa la Luka 21:1-4.

Luluvalisa Ovaso Ove Konima

17, 18. Nye ca kuatisa Yesu okupandikisa kuti wohali?

¹⁷ Okulombolola kondaka Yakristão va Korindo omo liesukila liokupandikisa velila liokomuenyo, Paulu watukula alinga amue akuavo atiamela Kolomapalo vio Istimico okuti cakala esilivilo liekambo liavo. Catiamela ku vakuakulitunda kolomapalo viaco, paulu wasoneha hati “Ovo va ci linga [okupuluka] oku tambula ekolowa li nyõleha, etu puãi oku tambula eli ka li nyõleha. Oco, ame si yoloka loku tatãla, siyaki ndu oveta ño ofela.” (1 Va Korindo 9:25, 26) Onima yokuyula olofeto kolomapalo viaco viosimbu ekolowa, ale vimue vikuavo via pangiwile loviti viupinyo ale ovikũla vikuavo, pamue uti wakukuta wovusenge— ocili muele “ekolowa li nyõleha.” Nye citalamela Kakristão vana vapandikisa toke kesulilo?

¹⁸ Okutukula Ukuangangu yetu Yesu Kristu, upostolo Paulu wa soneha hati: “Eye mekonda liesanju lio kapiwila kovaso, wa pandikisa oku tala ohali [kuti, NW] wa pembula Suku.” (Va Heveru 12:2) Yesu wa pandikisa toke kesulilo lomuenyo waye ndomunu poku luluvalela kohuminyo yokovaso ndaño lohali kuti wesepu, muakongelavo esanju akuata kumosi liokukemainya onduko ya Yehova, lokuyovola epata liomanu kokufa, kuenda oku viala Ndosoma haeye Ocitunda Cinene loku tambulula omanu va pokola okuvaiha omuenyo voluali liokaliye palo posi.—Mateo 6:6, 10; 20:28; Va Heveru 7:23-26.

19. Nye tu sukila okukapako vali enene osimbu tu kuamelela vetapalo liokukala olondonge Akristão?

¹⁹ Lilongisa esanju liakapiwa kovaso yetu nda tua kuamelela velila liokuyoloka Kuakristão olondunge. Yehova w tu iha upange usanjuisa wokukunda olondaka viwa Viusoma wa Suku kuvakuetu lukũlĩhĩso womuenyo ko pui Wembimbiliya. (Mateo 28:19, 20) Cikuete esanju lialua okusanga umue okuti okuete onjongole yokukũlĩha Suku yocili kuenda okuti okukuatisako okuiñila velila lioko muenyo! Catiamela komanu vana tu kundila, esumũlũho okukuata onepa vupange woku kemainya onduko ya Yehova. Nda tu pandikisa kokukunda ndaño lovitangi vocikanjo cetu, etu tukuete esanju lialua liokusanjuisa utima wa Yehova. (Olosapo 27:11) Kuenje onima a tu likuminya omuenyo kopui. Hesanjukuolio lika kala! Etu tu sukila okutoñomãla kasumũlũho a-a kuenda oku pandikisa velila.

Osimbu Esulilo Liya

20. Ndamupi elila liokomuenyo likuete vali ovitangi osimbu esulilo likasi ocipepi

²⁰ Vokuyolokela velila liokomuenyo, tukasi lokuliyaka lunyali wetu wapiãla Satana Eliapu. Osimbu tukasi ocipepi lesulilo, eye okasi lokulikolisilako lokutuyonja oco tulinge ekandu oku tu kupula ño kamue kamue, (Esituluilo 12:12, 17) Okuamamako lekolelo ka ca lelukile, ndaño okulitumbika kokukunda Usoma omo liovoyaki, onjala ovoveyi, lovitangi vikuavo vilekisa okuti kulo “kotembo yesulilo.” (Daniele 12:4; Mateo 24:3-14; Luka 21:11; 2 Timoteo 3:1-5) Handi vali, esulilo limõleha ndu likasi kupãla osimbu tukasi oku likevelela capiãla vali enene nda tukasi ale velila akũi anyamo alua. Puãi Ondaka ya Suku yi tu kolisa okuti esulilo likasi muele lokuiya. Yehova walinga hati ka li cilua. Esulilo ndopo li tukuluka.—Havakuki 2:3; 2 Petulu 3:9, 10.

21. (a) Nye ci ka tu kuatisako okutuihinya velila liokomuenyo? (b) Lipi okuti te olio likala ekakatelo lietu osimbu esulilo likasi ocipepi?

²¹ Oco tukuate etundilo liwa velila liokomuenyo, etu tusukila okupamisiwa lokulia kuespiritu Yehova asiata oku tu ihĩla vocisola caye. Etuvo vosi yetu tu sukila ekoliso litunda kokulikongaila lavakuetu vakuetavo, vakasivo lokulupukila velila liaco. Ndaño okuti kuli okulambalaliwa kualua kuenda ovitangi viya ocitukulukila vitukokela akatanga velila lietu, tupondola okupandikisa toke kesulilo mekonda Yehova okuete “unene wa piãla.” (2 Korindo 4:7) Hesanjukuolio cikokisa okukũlĩha okuti onjongole ya Yehova yevi okuti etu tusulisa ciwa elila lietu leyulo! Lekakatelo liapama, “tu lupoki lepandi okulitunda tu kasi lakuo,” loku kolela okuti “momo kotembo yaco tu lombola nda ka tua leñelele.”—Va Heveru 12:1; Va Galatia 6:9.

[Etosi]

[Elitalatu kemela 28]

Upa evetiyo kolohongele Viekongelo

Otela Okucilombolola

◻ Momo lile tusukilila okupandikisa toke kesulilo?

◻ Aliangiliyo api a Yehova okuti kacitava okuti tu atenda leselula?

◻ Momo lie cikuetele esilivilo okutumbika ciwa eliangiliyo lietu?

◻ Esanju lipi likasi kovaso osimbu tutoñomala velila?

‘OVO VA SUMBILA SUKU YOCILI’

OSIMBU va Isareli vakala ke Egito vupika, akãi va Heveru vakuakuovolola okuti Sifira la Pawa vakapiwa pomangu yimue yupongo. Voseteko yimue yokutetulula elivokiyo liowiñi wa va Yudea, Fareo wa handeleka akãi ava hati: “Nda wendi oku ka kuatisa omisi ukãi u Heveru . . . omõlaco nda ulume wipayi.”—Etundilo 1:15, 16.

Sifira la Puwa “va sumbila Suku,” ovo vakuata epandi kuenda “ka va lingile ndomo mua va handeleka osoma ye Egito.” Pole, ovo kavapondele oloñaña viavo vialume, ndaño oco okuti eci nda ca va kokela ohele. Yehova “wa sumũlũisa vakuakuovolola,” kuenda wava likuminya oku popela omuenyo wavo omo liovilinga viavo.—Etundilo 1:17, 21.

Esapulo eli lilekisa ocisola ca Yehova kuvana vovumba. Eye wa pondola okulimbuka eci calinga Sifira la Puwa, pokulekisa epandi, omo liocikembe cavo. Noke, laumue ukãi wa sunguluka wayonguile okukuata ocisimĩlo cokusasõla oloñaña! Handi,kakuli atatahãi okuti Yehova o ci kutima waye eci akalinga lavana kavakuete usumba lomanu, kuenje vasiata okulinga ovilinga viungangala. Eye wa kũlĩhĩle okuti akãi vaco vakuakuovolola va vetiyiwile ha lunu ko lika komanu pole va lekisavo esumbilo kuenda esunguluko ku Suku.

Halopandukuovio tukuete mekonda liokuvumba Suku umue okuti ekolelo lietu lovilinga vietu wa di kapako muele! Ocili, pamue lumue pokati ketu wa kapiwile koseteko yekolelo ndeyi yalingiwa ku Sifira la Puwa. Kuenje, nda tutãi lepandi kovina via sunguluka—nda kosikola, nda kupange wetu, ale vekalo likuavo—Yehova ka tambula epokolo lietu liocisola ndombanjaile kokuaye. Pole eye “eca onima kuava vo sanda.” (Va Heveru 11:6) Oco, “Suku hokuanyako okuti ivalako upange wene kuenda ocisola wa lekisi loku vumba olosandu vonduko yaye, ndeci vu kasi loku linga toke opo.”—Va Heveru 6:10.